أَسڒْمذ ن سِيذِيثْنغ عِيْسَى لْكِتَاب ن مَتَّى 21 - ثريفيث 2020

سِيذِيثْنغ عِيْسَى يتَاذَاف خ وسْنُوْس غَار لْقُدْس

¹ وَامِي قَارّْبن غَار ثنْدِينْت ن لْقُدْس ؤُوْضن غَار وبِيلَاج ن بَيْت فَاجِي زَّاث إِ وذْرَار ن زِّيتُوْن، ئِكَّر عِيْسَى يسّكّ ثْنَاين زݣ يمحْضَارن نّس،

² ينَّا-ٱسن: "رُوْحم غَار وبِيلَاج-ين يدْجَان زَّاثْوم، أَذ تَافم ذِنِّي ثَغْيُوْڒْث ثقّن اَكِذس اَسْنُوْس. فْسِيم-اَسن اَوِيم-ثن-د غَارِي.

³ مڒَا يسِّيوڒ غَارْوم شَان يِجّن ينَّا-ٱوم شَا، إِينِيم-اَس قَا يحْذَاج-يثن سِيذِيثْنغ. ڒخْدّنِّي اَكِوم-ثن-د يسّكّ."

⁴ أَمُّو يوْقع حمَا اَذ يكمّڒ وَاوَاڒ إِي ينَّا سِيذِي أَربِّـي إِ نَّبي زَكَرِيَا ذݣ يِجّن ن زْمَان:

⁵ "إِيْنِيم-اَس إِ يدْجِيس ن لْقُدْس: خْزَر، أَزدْجِيذ نّمْ يُوْسَا-د غَارم، وَار ذَايس بُو تَّكبُّر. ئِنْيَا خ يِجّن ن ثغْيُوْڒْث، ذ وسْنُوْس مِّيس ن ثغْيُوْڒْث."

⁶ رُوْحن ثْنَاين نِّي ن يمحْضَارن، ݣِّين مَامش ذَاسن ينَّا عِيْسَى.

⁷ ؤُوِين-د ثَغْيُوْڒْث ذ وسْنُوْس، ݣِّين خَاسن يزدْجُوْبَا نْسن ڒخْدّنِّي ينْيَا عِيْسَى.

⁸ أَطَّاس ن يِوْذَان سُّوْن-اَس اَبْرِيذ س يزدْجُوْبَا نْسن. ئِنّغْنِي قسّن ڒفْرُوْع ن ڒْشجُّوْر سُّوْن زَّايْسن اَبْرِيذ.

⁹ يِنِّي يݣُّوْرن زَّاثس ذ يِنِّي إِي ث يذفَّارن قَّارن: "لْعَظَمَا إِ مِّيس ن أَيث-دَاود! سَّعْذ ن ونِّي إِي د يُوْسِين عْلَاحْسَاب يسم ن سِيذِي أَربِّـي. لْحَمْدُ إِ أَربِّـي يُوْعْڒَان."

¹⁰ وَامِي يُوْذف عِيْسَى غَار ثنْدِينْت ن لْقُدْس، كَّرن-د اَيثْبَاب ن ثنْدِينْت نَّان: "مِين يعْنَا وَا؟"

¹¹ نَّان ڒْغَاشِي قَا وَانِيتَا ذ نَّبي عِيْسَى زݣ وبِيلَاج ن نَاصِرَا ذِي ثْمُوْرْث ن لْجَلِيل."

سِيذِيثْنغ عِيْسَى ذِي ثمْزِيذَا ثَمقّْرَانْت ن أَيث-إِسْرَائِيل

¹² يُوْذف عِيْسَى غَار ثمْزِيذَا ثَمقّْرَانْت يُوْزّڒ خ مَارَّا خ يِنِّي يسَّاغن ذ يِنِّي يزْنُوْزَان. ئِقْڒب-اَسن مِيسَّاث ن يِنِّي يتْصَرَّافن تْمنْيَاث ذ ڒكْرَاسَا ن يِنِّي يزْنُوْزَان يذْبِيرن.

¹³ ينَّا-ٱسن: "لْكِتَاب يقَّار: <ثَدَّارْث ينُو اَذ تِيڒِي ذ ثَدَّارْث ن ثْࢲَادْجِيث.> وَلَكِن كنِّيو ثَارِّيم-تث ذ يفْرِي ن يخوَّانن."

¹⁴ ذِي ثمْزِيذَا ثَمقّْرَانْت قَارّْبن-د غَار عِيْسَى يضَرْغَاڒن ذ يزحَّافن أُوشَا يسْݣنْفَا-ثن.

¹⁵ عصّْبن اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا وَامِي ࢲْرِين عِيْسَى لْمُعْجِزَاث إِي يݣَّا، ذ يحنْجِيرن طَّارْف إِ ثمْزِيذَا ثَمقّْرَانْت تْڒَاغَان س جّْهذ قَّارن: "لْعَظَمَا إِ مِّيس ن أَيث-دَاود!"

¹⁶ نَّان-اَس إِ عِيْسَى: "مَا تسْڒِيذ مِين خَاك قَّارن؟" ينَّا-ٱسن عِيْسَى: "وَاه، مَا وَار ثغْرِيم مِين يدْجَان ذِي لْكِتَاب؟ <ثݣِّيذ، آي أَربِّـي، أَش حمْذن يحنْجِيرن ذ يسيْمَان س وقمُّوْم نْسن.>"

¹⁷ سّنِّي يسْمح ذَايْسن، يفّغ زِي ثنْدِينْت نِّي يرُوْح غَار وبِيلَاج ن بَيْت عَنْيَا يسنْس ذِنِّي.

ثَشجَّارْث ن ثَازَارْث يُوْزْغن

¹⁸ غَار صْبَاح زِيش يݣَعّذ عِيْسَى غَار ثنْدِينْت، نتَّا يدْجُوْز.

¹⁹ ئِࢲْرَا يجّن ن ثْشجَّارْث ن ثَازَارْث خ وبْرِيذ يرُوْح غَارس يُوْفِي-ت ذَايس ثِيفْرَاي وَاهَا. ينَّا-ٱس: "شم زِي سَّا اَڒ ثْسَاونْت عمَّارْص اَذ تَارْوذ." ڒخْدّنِّي ثُوْزغ ثْشجَّارْث نِّي ن ثَازَارْث.

²⁰ ئِمحْضَارن نّس وَامِي ࢲْرِين مِين يوقْعن، تْعجّْبن نَّان-اَس إِ عِيْسَى: "مَامّش ثݣَّا ثْشجَّارْث-أَ ثُوْزغ ذݣ ومْشَان؟"

²¹ ئِنْدق-د عِيْسَى ينَّا-ٱسن: "أَقَا تسْڒَام ڒْحَقّ: مْڒِي ذَايْوم لْإِيمَان وَار ثْشكِّيم شَا، أَتَاف اَذ تݣّم كْتَار زِي مِين يتْوَاݣّن إِ ثْشجَّارْث-أَ. مڒَا ثنِّيم إِ وذْرَار-أَ: نقْڒع-د شك سَّانِيتَا ثْمنْضَارذ ذِي ڒبْحَر، أَتَاف اَذ ينقْڒع.

²² ينَّا-ٱسن: مڒَا ثُوْمْنم، أَغَارْوم يِيڒِي مَارَّا مِين غَا ثتَّارم إِ أَربِّـي ذِي ثْࢲَادْجِيث نْوم."

سُّلْطَا ن سِيذِيثْنغ عِيْسَى

²³ يُوْذف عِيْسَى ذِي ثمْزِيذَا ثَمقّْرَانْت يسڒْمَاذ ذِنِّي. قَارّْبن-د غَارس اَرُّوْيَاس ن ڒْفُقَهَا ذ يمقّْرَانن زِي أَيث-إِسْرَائِيل نَّان-اَس: "شك مَانِيس ذَاش د ثكَّا سُّلْطَا نِّي إِي زِي تݣّذ ثِمسْڒَايِين-أَ؟ وِي ذَاش يُوْشِين سُّلْطَا نِّي؟"

²⁴ ئِنْدق-د عِيْسَى ينَّا-ٱسن: "ؤُڒَا ذ نش اَكنِّيو سّقْسِيغ خ يِجّن ن ثْمسْڒَايْث. مڒَا ثْجَاوْبم-اَيِي-د خَاس، أَتَاف اَذَاوم ينِيغ زِي مَانِيس ذَايِي د ثكَّا سُّلْطَا-يَا إِي زِي تݣّغ ثِمسْڒَايِين-أَ.

²⁵ يَحْيَى، مَان سُّلْطَا إِي زِي يطهَّار س وَامَان، مَا زِي أَربِّـي مَا زݣ يِوْذَان؟" سِّيوْڒن جَارَاسن نَّان: "مڒَا ننَّا-ٱس زِي أَربِّـي، أَتَاف اَذَانغ يِينِي عِيْسَى مَايمِّي وَار زَّايس ثُوْمِينم شَا؟

²⁶ مڒَا ننَّا-ٱس سُّلْطَا نِّي ثكَّا-د زݣ يِوْذَان، أَتَاف نشِّين أَ نݣّْوذ زِي شَّعْب مِينْزِي مَارَّا شَّعْب تْوَاڒَان بلِّي يَحْيَى نتَّا ذ نَّبِي."

²⁷ كَّرن نَّان-اَس إِ عِيْسَى: "وَار نسِّين شَا." ئِنْدق-د عِيْسَى ينَّا-ٱسن: "إِيوَا ؤُڒَا ذ نش وَار ذَاوم قَّارغ شَا مَانِيس ذَايِي د ثكَّا سُّلْطَا-يَا إِي زِي تݣّغ ثِمسْڒَايِين-أَ."

ڒْمَعْنَا ن ثْنَاين ن وَاوْمَاثن

²⁸ "مِين ذَاوم يمظْهَارن؟ ئِجّن ن بْنَاذم غَارس ثْنَاين ن ثَارْوَا نّس. ئِرُوْح غَار ومزْوَارُو ينَّا-ٱس: آ مِّي، رُوْح اَذ تْخذْمذ نْهَارَا ذݣ ومَرْجع ينُو وضِيڒ.

²⁹ ئِنْدق-د مِّيس ينَّا-ٱس: لَّا، وَار تْرَاحغ شَا. وَلَكِن منْبَعْد شْوَايْت ينْدم، ئِرُوْح غَار ومَرْجع.

³⁰ ئِرُوْح غَار مِّيس نّغْنِي ينَّا-ٱس مِين ذَاس ينَّا إِ مِّيس نِّي اَمزْوَارُو. يَارَّا خَاس ينَّا-ٱس: وَاخَّا آ بَابَا ينُو. وَلَكِن وَار يرُوْح شَا.

³¹ ؤُو يݣِّين مِين يخس بَابَاثْسن زِي ثْنَاين-أَ؟" نَّان-اَس: "أَمزْوَارُو." ينَّا-ٱسن عِيْسَى: "أَقَا تسْڒَام ڒْحَقّ: ئِعشَّارن ذ ثمْغَارِين يفّْغن اَبْرِيذ اَذَاوم يزْوَارن غَار ڒْمُلْك ن أَربِّـي.

³² ڒَاحقَّاش يُوْسَا-د غَارْوم يَحْيَى يسظْهَار-اَوم-د اَبْرِيذ ن ڒْحَقّ، وَار زَّايس ثُوْمِينم شَا. وَلَكِن يعشَّارن ذ ثمْغَارِين يفّْغن اَبْرِيذ ؤُمْنن زَّايس. كنِّيو ثࢲْرِيم مَانَاينِّي، وَلَكِن وَار تُوْبم شَا حمَا اَزَّايس ثَامْنم."

ڒْمَعْنَا ن يخمَّاسن إِي ذِي يدْجَا شَّرّْ

³³ "صنّْطث إِ يِجّن ن ڒْمَعْنَا نّغْنِي. ئِجّن ن بَاب ن ثدَّارْث يࢲُّو اَضِيڒ ذݣ يِجّن ن ومَرْجع نّس. ئِنّض-اَس-د ڒْحِيض، ئِݣَّا ذَايس ثَسِيرْث وضِيڒ. ئِبْنَا ذَايس يجّن ن ثْسُوْمْعث إِ ڒْعَسّث. ئِݣَّا ذَايس يخمَّاسن يرُوْح يسَفَر.

³⁴ وَامِي د يُوْوض ڒْوقْث ن وڒْقض ن وضِيڒ، ئِكَّر يسّكّ يخدَّامن نّس غَار يخمَّاسن نِّي بَاش اَذَاس د ؤُشن ڒْحَقّ نّس ن وضِيڒ.

³⁵ وَلَكِن مِين ݣِّين يخمَّاسن نِّي؟ طّْفن يخدَّامن نّس، ئِجّن ؤُوْثِين-ث، ئِجّن نْغِين-ث، ئِجّن رجْمن-ث.

³⁶ ئِكَّر يسّكّ يخدَّامن نّغْنِي كْتَار زݣ ومزْوَارُو. ݣِّين-اَسن يخمَّاسن نِّي مِين ݣِّين إِ يمزْوُوْرَا.

³⁷ غَار ونݣَّارُو يكَّر يسّكّ غَارْسن مِّيس. ينَّا اَقَا اَذ ݣّْوْذن ممِّي.

³⁸ وَامِي ؤُفِين يخمَّاسن نِّي مِّيس يُوْسَا-د، نَّان إِ وَايَاوْيَا: أَث نْنغ بَاش اَذَاس نَاوِي اَمَرْجع ن وضِيڒ!

³⁹ طّْفن-ث، نْغِين-ث، نْضَرن-ث-يذ غَار بَرَّا إِ ومَرْجع وضِيڒ.

⁴⁰ إِيوَا خْمِي إِي د غَا يذْوڒ بَاب ن ومَرْجع، مِين ذَاسن غَا يݣّ إِ يخمَّاسن نِّي؟"

⁴¹ نَّان-اَس: "ئِوْذَان نِّي يعفَّانن اَثن ينغ، أُوشَا اَذ يجّ اَمَرْجع وضِيڒ إِ يخمَّاسن نّغْنِي إِي ذَاس غَا ؤُشن ڒْحَقّ نّس وضِيڒ ذِي ڒْوقْث."

⁴² ينَّا-ٱسن عِيْسَى: "مَا عمَّارْص وَار ثغْرِيم مِين يُوْرِين ذِي لْكِتَاب؟ <أَزْرُو إِي عِيفّن يبنَّاين، يوْقع ذݣ ومْشَان اَصبْحَان ذِي ثْغمَّارْث ن دْسَاس. ذ سِيذِي أَربِّـي إِݣ يݣِّين مَانَايَا، ذ يجّن ن ڒْحَاجث ذ ثَمقّْرَانْت!>

⁴³ س مَانَايَا قَّارغ-اَوم: ڒْمُلْك ن أَربِّـي اَذَاوم يتْوَاكّس اَذ يمُّوْش إِ يِجّن ن شَّعْب إݣ يتݣّن ڒْخِير.

⁴⁴ ونِّي غَا يوْضَان خ وزْرُو-يَا اَذ يرز. ونِّي خف غَا يوْضَا وزْرُو-يَا اَذ ينڒْبࢲ."

⁴⁵ وَامِي سْڒِين اَرُّوْيَاس ن ڒْفُقَهَا ذ ڒْحِزب ن يفَرِّيسِيْين إِ ڒمْعَانِي ن عِيْسَى فهْمن بلِّي يسَّاوَاڒ خَاسن.

⁴⁶ رزُّوْن اَث طّْفن، وَلَكِن ݣّْوْذن زِي شَّعْب مِينْزِي تْوَاڒَان عِيْسَى ذ نَّبِي.