لوقا 9 - ثريفيث 2020

سِيذِيثْنغ عِيْسَى يسّكّ ارُّسُل أَذ بشَّرن

¹ ئِڒَاغَا-د عِيْسَى خ ثنْعَاش ن اَرُّسُل، يُوْشَا-ٱسن ثِزمَّار ذ سُّلْطَا اَذ حكْمن خ مَارَّا جْنُوْن أُو عَاوذ حمَا اَذ سْݣنْفَان ڒهْڒَاشَاث.

² ئِسّكّ-يثن حمَا اَذ بشَّرن س ڒْمُلْك ن أَربِّـي اَذ سْݣنْفَان يمهْڒَاش.

³ ينَّا-ٱسن: "وَار كِذْوم تِيوِيم وَالُو خ وبْرِيذ. وَار كسِّيم نِي اَعكَّاز، نِي اَقْرَاب، نِي اَغْرُوْم، نِي نُّقَارْث، نِي ثْنَاين ن يتْشَامِّيرن.

⁴ خْمِي غَا ثَاذْفم غَار شَان ثدَّارْث، قِّيمم ذِنِّي اَڒ غَا ثُوْيُوْرم سّنِّي.

⁵ مڒَا وَار كنِّيو قْبِيڒن شَا ذِي شَان ثنْدِينْت، فّْغم سّنِّي مسْحث ثَعجَّاشْت زݣ يضَارن نْوم اَم شَا ن شْهَاذث خَاسن."

⁶ صَافِي رُوْحن اَرُّسُل عْذُوْن ذِي ڒدْشُوْرَاث، تْبشَّارن سْݣنْفَان يوْذَان ذِي مْكُڒ اَمْشَان.

⁷ لْوَالِي هِيرُودُس يَارَّا-د ڒخْبَار خ مَارَّا مِين يتوْقِيعن، ئِذْهش مِينْزِي شَان يِوْذَان قَّارن قَا وَانِيتَا ذ يَحْيَى نِّي، ئِتْوَاسكَّر-د زِي ڒْموْث.

⁸ ئِجّن يقَّار لَّا، قَا ذ إِلْيَاس إِي د يمظْهَارن. ئِجّن يقَّار لَّا، قَا يكَّر-د يجّن زِي لْأَنْبِيَا نِّي يقْذِيمن.

⁹ هِيرُوْدُس ينَّا: "أَقَا نش قسّغ اَزدْجِيف إِ يَحْيَى نِّي، مِين يعْنَا وَانِيتَا إِي خف تسْڒِيغ مَانَايَا؟" ئِخس اَث يࢲر.

سِيذِيثْنغ عِيْسَى يسشّ خمْسَاڒَاف ن يرْيَازن

¹⁰ وَامِي د ذوْڒن اَرُّسُل، عَوْذن-اَس إِ عِيْسَى خ مَارَّا مِين ݣِّين. يُوْوِي-ثن سّنِّي غَار جِّهث ن يِجّن ن وبِيلَاج ؤُمِي قَّارن بَيْت صَيْدَا.

¹¹ وَامِي ڒْغَاشِي سّْنن مَانَايَا ذْفَارن-ث. نتَّا يسْتقْبڒ-يثن يبْذَا يسَّاوَاڒ اَكِذْسن خ ڒْمُلْك ن أَربِّـي يسْݣنْفَا يِنِّي يخْسن اَذ ݣنْفَان.

¹² وَامِي يعْذُو ڒْحَاڒ ؤُسِين-د غَارس ثنْعَاش ن يمحْضَارن نّس نَّان-اَس: "سكّ يوْذَان-أَ سَّا غَار ڒدْشُوْرَاث ذ ثُوْذْرِين يُوْذْسن اَمُّو ذ وَامُّو، أَذ رْزُوْن مِين غَا شّن ذ مَانِي غَا سنْسن مِينْزِي اَمْشَان-أَ ذ ڒخْڒَا وَاهَا."

¹³ ينَّا-ٱسن عِيْسَى: "ؤُشم-اَسن كنِّيو مِين غَا شّن." نَّان-اَس: "نشِّين غَارْنغ ذَا غِير خمْسَا ن ثْخبَّازِين ذ ثْنَاين ن يسڒْمَان. مَا أَ نْرَاح نشِّين أَ نْسغ مَشَّا إِ مَارَّا يوْذَان-أَ؟"

¹⁴ (مِينْزِي ذِنِّي شَان خمْسَاڒَاف ن يرْيَازن). ينَّا-ٱسن عِيْسَى إِ يمحْضَارن نّس: "سْغِيمم-ثن ذ لْفِرْقَاث، خمْسِين خمْسِين."

¹⁵ ݣِّين مَانَاينِّي، سْغِيمن-ثن مَارَّا.

¹⁶ ئِكَّر يطّف خمْسَا نِّي ن ثْخبَّازِين ذ ثْنَاين نِّي ن يسڒْمَان، ئِيْسِي ثِيطَّاوِين نّس غَار وجنَّا أُوْشَا يشكَّر أَربِّـي. يرْزَا اَغْرُوْم نِّي يُوْشَا-اَسن-ث إِ يمحْضَارن نّس حمَا اَث فرْقن خ يِوْذَان نِّي مَارَّا.

¹⁷ شِّين مَارَّا جِّيوْنن. سّنِّي يْسِين ثنْعَاش ن ثقْرَابِين عمَّارنْت س يڒقُّوْزن نِّي يشطّن.

بُطْرُس يتْشهَّاذ خ لْمَسِيح

¹⁸ ئِجّن ن نْهَار عِيْسَى يتْࢲَادْجَا وَاحْذس طَّارْف نّس يمحْضَارن نّس. ئِكَّر يسّقْسَا-ثن ينَّا-ٱسن: "مِين خَافِي قَّارن يِوْذَان؟"

¹⁹ أَرِّين خَاس نَّان-اَس: "ئِجّن يقَّار شك ذ يَحْيَى. ئِجّن يقَّار شك ذ إِلْيَاس. ئِجّن يقَّار شك زِي لْأَنْبِيَا يقْذِيمن إِي د يكَّرن زِي ڒْموْث."

²⁰ ينَّا-ٱسن عِيْسَى: "ئِي كنِّيو، مِين ذَايِي د تَارَّام نش؟" ئِنْدق-د بُطْرُس ينَّا-ٱس: "شك ذ لْمَسِيح ن أَربِّـي."

²¹ عِيْسَى يأَكّد خَاسن يُوْمَر-يثن بَاش وَار تْخبَّارن حَدّ خ مَانَاينِّي.

²² ينَّا-ٱسن إِ يمحْضَارن نّس: "مِّيس ن بْنَاذم لَابُد اَذ يتْوَاعدّب خ وَاطَّاس ن ثْمسْڒَايِين، اَث عِيفّن يمقّْرَانن ن أَيث-إِسْرَائِيل ذ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا. أَث نْغن، وِيس ثڒْتِيَّام اَذ د يتْوَاسكَّر زِي ڒْموْث."

²³ ثُمَّا ينَّا-ٱسن إِ مَارَّا يوْذَان نِّي: "ونِّي يخْسن اَذَايِي يذْفَار نش، لَابُد اَذ يسْمح ذݣ يِيخف نّس، لَابُد كُڒ نْهَار اَذ يكسِّي صَّلِيب نّس مِينْخف غَا يعدّب اَذَايِي يذْفَار.

²⁴ ڒَاحقَّاش ونِّي يرزُّوْن اَذ يسنْجم ثُوْذَارْث نّس اَتَاف اَث يخْسَر. ونِّي غَا يخْسَرن ثُوْذَارْث نّس خ سَّبَاب ينُو اَتَاف اَث يسنْجم.

²⁵ مِينْزِي غَا ينْفع بْنَاذم مڒَا يرْبح دُّنشْت-أَ قَاع وَا يخْسَر يخف نّس نِغ يضيّع يخف نّس؟

²⁶ ونِّي خَافِي غَا يعفَّرن نش نِغ اَذ يعفَّر خ وَاوَاڒ ينُو، أَتَاف اَخَاس يعفَّر مِّيس ن بْنَاذم خْمِي د غَا يَاس س لْعَظَمَا نّس ذ لْعَظَمَا ن بَابَاس اَك لْمَلَائِكَاث يقدّْسن.

²⁷ أَقَا تسْڒَام ڒْحَقّ: ڒبْعَاض زݣ يِنِّي يدْجَان ذَا اَكِذِي وَار تْمتِّين شَا اَڒ غَا ࢲرن ڒْمُلْك ن أَربِّـي."

سِيذْنَا مُوْسَى ذ سِيذْنَا إِلْيَاس تْمظْهَارن-د اَك سِيذِيثْنغ عِيْسَى

²⁸ منْبَعْد إِ وَاوَاڒ نِّي شَان ثْمنْيَام يݣَعّذ عِيْسَى غَار وذْرَار حمَا اَذ يࢲَّادْج، يُوْوِي اَكِذس بُطْرُس ذ يُوْحَنَّا ذ يَعْقُوْب.

²⁹ وَامِي يࢲُّوْدْج، ئِبدّڒ وغمْبُوْب نّس يذْوڒ ذَايس نُّوْر، يذْوڒ وَارُّوْض نّس ذ اَشمْڒَاڒ يتْشعْشِيع.

³⁰ مظْهَارن-د ثْنَاين ن يرْيَازن سَّاوَاڒن اَكِذس يجّن ذ نَّبِي مُوْسَى يجّن ذ نَّبِي إِلْيَاس.

³¹ مظْهَارن-د اَك عِيْسَى س يِجّن ن لْعَظَمَا ذ ثَمقّْرَانْت، بْذَان سَّاوَاڒن اَكِذس خ وُوْفُوْغ نّس إِي زِي غَا يفّغ ذغْيَا زِي لْقُدْس.

³² وَلَكِن بُطْرُس ذ يِنِّي اَكِذس تطّْصن تْنُوْدُّوْمن س يِيضص، وَامِي فَاقن مْلِيح ثُمَّا ؤُفِين لْعَظَمَا ن عِيْسَى، أَكِذس ثْنَاين ن يرْيَازن بدّن.

³³ وَامِي عَاذ ݣُّوْرن زَّايس يرْيَازن نِّي، ئِنْدق-د بُطْرُس ينَّا-ٱس إِ عِيْسَى: "آ سِيذِي، ذ اَصبْحَان اَكِذش نقِّيم ذَانِيتَا. نشِّين أَ نݣّ ثْڒَاثَا ن يقِيضَان، ئِجّن إِ شك، ئِجّن إِ مُوْسَى، ئِجّن إِ إِلْيَاس." بُطْرُس تُوْغَا يفَجَا، وَار يُوْفِي شَا مِين غَا يِينِي.

³⁴ وَامِي نتَّا تُوْغَاث عَاذ يسَّاوَاڒ يهْوَا-د خَاسن يج وسيْنُو يغطَّا-ثن ݣّْوْذن.

³⁵ ثنْدق-د زَّايس يجّن ن ثْمِيجَّا زݣ وسيْنُو نِّي ثنَّا-ٱسن: "قَا ذ وَانِيتَا ذ مِّي إِي يخْضَرغ، صنّْطث غَارس."

³⁶ وَامِي صَافِي ثْمِيجَّا نِّي ثسِّيوڒ ؤُفِين عِيْسَى وَاحْذس. ئِمحْضَارن نِّي سْنُوْفَّرن مَانَاينِّي ذݣ وُوْڒ نْسن وَار خبَّرن حَدّ ذِي لْأَيَامَاث نِّي خ مِين ࢲْرِين.

سِيذِيثْنغ عِيْسَى يسْݣنْفَا يجّن ن وحنْجِير ذَايس جّنّ

³⁷ ثِيوشَّا نّس هْوَان-د زݣ وذْرَار، رحّْبن زَّايْسن ڒْغَاشِي اَطَّاس.

³⁸ ئِڒَاغَا يجّن ن ورْيَاز زِي ڒْغَاشِي نِّي ينَّا: "آ لْمُعَلِّم، تتَّارغ زَّايش اَذ تخْزَرذ مِّي اَقَا ذ وَا وَاهَا إِي غَارِي.

³⁹ ممِّي يخطّف-يث يجّن ن جّنّ، ذغْيَا يسْنكَّر ثْغُوْيّث. جّنّ نِّي يسرْجِيجِي-ث اَڒ د غَا يسُوْفغ نتَّا كُوْفُّو زݣ وقمُّوْم نّس، وَار ذَاس يرخُّو حتَّا ٱڒ ث غَا يسَالَا.

⁴⁰ تَّارغ زݣ يمحْضَارن نّش اَزَّايس سُوْفْغن جّنّ-أَ وَلَكِن نِثْنِي وَار ذَاس زمَّرن شَا."

⁴¹ يَارَّا خَاسن عِيْسَى ينَّا-ٱسن: "آ يوْذَان ن ڒْوقْث-أَ إِي ذِي وَار يدْجِي بُو لْإِيمَان، آ يِنِّي يفّْغن اَبْرِيذ! مشْحَاڒ إِي كِذْوم غَا قِّيمغ أُو مشْحَاڒ ذَاوم غَا صْبَرغ؟ أَوِي-يَايِي-د مِّيش ذَانِيتَا."

⁴² وَامِي د يقَارّب وحنْجِير نِّي غَار عِيْسَى، ئِسرْجِيجِي-ث جّنّ نِّي يغْضڒ-يث غَار ثْمُورْث. ئِسْبدّ عِيْسَى جّنّ نِّي اَعفَّان، ئِسْݣنْفَا اَحنْجِير نِّي يَارِّي-ث إِ بَابَاس.

⁴³ قِّيمن يِوْذَان نِّي مَارَّا تْعجّْبن ذِي جّْهذ ن أَربِّـي. وَامِي تْعجّْبن مَارَّا ذِي قَاع مِين يݣَّا عِيْسَى، ئِكَّر نتَّا ينَّا-ٱسن إِ يمحْضَارن نّس:

⁴⁴ "صنّْطث مْلِيح إِ وَاوَاڒ-أَ إِي ذَاوم غَا ينِيغ: مِّيس ن بْنَاذم عْڒَاين اَذ يتْوَاسلّم غَار يفَاسّن ن يِوْذَان."

⁴⁵ وَلَكِن نِثْنِي وَار فهِيمن شَا إِ وَاوَاڒ نِّي، ئِقْسح خَاسن حمَا اَذ فهْمن، ݣّْوْذن اَث سّقْسَان خ مِين ذَاسن ينَّا.

مَانْون إِݣ يدْجَان ذ اَمقّْرَان قَاع؟

⁴⁶ تْمنْغَان يمحْضَارن اَك وَايَاوْيَا ؤُݣ يدْجَان ذ اَمقّْرَان زَّايْسن.

⁴⁷ عِيْسَى يسّن مِين غَارْسن ذݣ وُوْڒَاون نْسن. ئِسْقَارّب-د غَارس يج وحنْجِير ذ اَمزْيَان، ئِسْبدّ-يث زَّاثس.

⁴⁸ ينَّا-ٱسن: "ونِّي غَا يقبْڒن شَان وحنْجِير اَم وَانِيتَا عْلَاحْسَاب يسم ينُو، أَخْمِي ذ نش إِݣ يقْبڒ. ونِّي ذَايِي يقبّْڒن، أَتَاف يقْبڒ ونِّي ذَايِي د يسّكّن. مِينْزِي ونِّي يدْجَان زَّايْوم ذ اَمزْيَان قَاع، ذ نتَّا إِݣ يدْجَان ذ اَمقّْرَان."

⁴⁹ ينَّا-ٱس يُوْحَنَّا: "آ لْمُعَلِّم، قَا نࢲْرَا يجّن يسُوْفُوْغ جْنُوْن عْلَاحْسَاب يسم نّش. نشِّين نرْزُو اَث نسْبدّ وَامِي وَار يدْجِي شَا ذ اَمحْضَار اَكِذْنغ."

⁵⁰ ينَّا-ٱس عِيْسَى: "وَار ث سْبدَّام شَا. مِينْزِي يِنِّي وَار يدْجِين شَا ضد نْوم، أَقَاثن اَكِذْوم."

ئِجّن ن دْشَار ذِي سَامَارْيَا وَار يقبّڒ شَا سِيذِيثْنغ عِيْسَى

⁵¹ عِيْسَى وَامِي د تُوْوض ڒْوقْث نّس إِي ذِي غَا يتْوَارْفع غَار وجنَّا، ئِكَّر يوجّه اَغمْبُوْب نّس بَاش اَذ يرَاح غَار ثنْدِينْت ن لْقُدْس.

⁵² ئِسّكّ اَرُّسُل قْبڒ مَا ٱذ يرَاح نتَّا، رُوْحن نِثْنِي ؤُذْفن غَار يِجّن ن دْشَار ذِي ثْمُوْرْث ن أَيث-سَامَارْيَا حمَا اَذَاس سْوجْذن اَمْشَان.

⁵³ وَلَكِن يوْذَان ن دْشَار نِّي وَار ث قْبِيڒن شَا مِينْزِي سّْنن يتْرَاح إِلَّا غَار لْقُدْس.

⁵⁴ ئِمحْضَارن نّس يَعْقُوْب ذ يُوْحَنَّا وَامِي ؤُفِين مَانَاينِّي نَّان-اَس إِ عِيْسَى: "آ سِيذِي، مَا ثخْسذ أَ نْڒَاغَا إِ ثْمسِّي اَذ تهْوَا زݣ وجنَّا حمَا اَثن ثشّ؟"

⁵⁵ ئِنْدق-د عِيْسَى ينْهَا-ثن ينَّا-ٱسن لَّا.

⁵⁶ صَافِي كَّرن رُوْحن غَار يِجّن ن دْشَار نّغْنِي.

يِنِّي يخْسن اَذ ذْفَارن سِيذِيثْنغ عِيْسَى

⁵⁷ وَامِي ݣُّوْرن خ وبْرِيذ، يُوْسَا-د يجّن ينَّا-ٱس إِ عِيْسَى: "نش اَش ذْفَارغ مَانِي مَا ثْرُوْحذ."

⁵⁸ ينَّا-ٱس عِيْسَى: "ؤُشَّانن غَارْسن يفْرَان نْسن، ئِجْضَاض غَارْسن ڒَعْوَاش نْسن، وَلَكِن مِّيس ن بْنَاذم وَار غَارس ؤُڒَا ذ مَانِي غَا يسُوْمّث اَزدْجِيف نّس."

⁵⁹ ينَّا-ٱس عِيْسَى إِ يِجّن نّغْنِي: "ذْفَار-اَيِي-د!" ينَّا-ٱس ونِّي: "آ سِيذِي، سَامح-اَيِي ذ اَمزْوَارُو اَذ رَاحغ اَذ نضْڒغ بَابَا."

⁶⁰ ينَّا-ٱس عِيْسَى: "يِنِّي يمُّوْثن اجّ-يثن اَذ نضْڒن يمتِّينن نْسن. شك اَرْوَاح اَذ تْبشَّرذ س ڒْمُلْك ن أَربِّـي."

⁶¹ يُوْسَا-د يجّن نّغْنِي ينَّا-ٱس إِ عِيْسَى: "أَشك ذْفَارغ آ سِيذِي، وَلَكِن ذ اَمزْوَارُو اجّ-اَيِي اَذ مْسَافَاضغ خ فَامِلْيَا ينُو."

⁶² ينَّا-ٱس عِيْسَى: "ونِّي يسرْسن فُوْس نّس خ وسْغَار عَاذ يخزَّار غَار ذفَّار اَتَاف وَار يصدْجح شَا اَذ يخْذم ذِي ڒْمُلْك ن أَربِّـي."