لوقا 8 - ثريفيث 2020ڒْمَعْنَا ن ونِّي يزرّْعن 1 منْبَعْد إِ مَانَايَا يݣُّوْر عِيْسَى زِي دْشَا غَار دْشَار زݣ وبِيلَّاج غَار وبِيلَاج يتحدَّاث يتْبشَّار س ڒْمُلْك ن أَربِّـي. أَكِذس ثنْعَاش ن يمحْضَارن نّس 2 ذ شَان ثمْغَارِين يسْݣنْفَا-ثنْت زِي جْنُوْن ذ ڒهْڒَاشَاث. نِثنْتِي ذ مَرْيَم ؤُمِي قَّارن ثَمَݣْدَلِيث إِي زِي فّْغن سبْعَا ن جْنُوْن، 3 ذ أَيُوْنَّا ثَمْغَارْث ن خُوْزِي لْوَكِيل ن هِيرُوْدُس، ذ سُوْزَانَا، ذ ثِنّضْنِي اَطَّاس إِي تْعَاوَاننْت س وَاݣْڒَا نْسنْت. 4 وَامِي خَاس د مُوْنن عَاوذ اَطَّاس ن ڒْغَاشِي ذ يِنِّي غَارس د يُوْسِين زِي مكُڒ اَبِيلَاج، ئِبْذَا يسَّاوَاڒ اَكِذْسن س يِجّن ن ڒْمَعْنَا ينَّا: 5 "ئِفّغ وفدْجَاح اَذ يزْرع. وَامِي يزرّع، ثوْضَا-يَاس شَان زَّرِّيعث خ طَّارْف ن وبْرِيذ. عفّْسن خَاس يِوْذَان شِّين-تث يجْضَاض ن وجنَّا. 6 شَان زَّرِّيعث ثوْضَا-يَاس جَار يِزْرَا. ثغْمِي-د، ڒخْدّنِّي ثْنزْڒف ثِيسْرَاو ڒَاحقَّاش وَار ثسْوِي بُو وَامَان. 7 شَان زَّرِّيعث ثوْضَا جَار يسنَّانن. غْمِين-د اَكِذس يسنَّانن نِّي جيّْفن-تث. 8 شَان زَّرِّيعث ثوْضَا خ ثْمُوْرْث ثَصبْحَانْت. ثُوْڒِي-د ثمْغَار ثݣَّا ثِيذرِين كُڒ يشْتن ثُوْرو مِيَا." وَامِي يكمّڒ وَاوَاڒ-أَ ينَّا س جّْهذ: "صنّط مْلِيح آ ونِّي يتْسْڒَان." أَسفْهم ن ڒْمَعْنَا ن ونِّي يزرّْعن 9 سّقْسَان-ث يمحْضَارن نّس نَّان-اَس: "مِين يخس اَذ يِينِي ڒْمَعْنَا-يَا؟" 10 ينَّا-ٱسن: "ئِتْوَاسْمح إِ كنِّيو اَذ تسّْنم مِين ينُوْفَّرن ذِي ڒْمُلْك ن أَربِّـي، وَلَكِن إِ يِوْذَان نّغْنِي لَّا. سَّاوَاڒغ اَكِذْسن س ڒمْعَانِي حمَا اَذ خْزَرن وَلَكِن وَار تْوِيڒِين شَا، حمَا اَذ سْڒن وَلَكِن وَار فهّْمن إِ شَا. 11 ڒْمَعْنَا-يَا يخس اَذ يِينِي: زَّرِّيعث نِّي نتَّاث ذ اَوَاڒ ن أَربِّـي. 12 زَّرِّيعث نِّي إِݣ يوْضَان خ وبْرِيذ نتَّاث اَم يِوْذَان إِي تسْڒَان إِ وَاوَاڒ ن أَربِّـي. ئِتْرَاح إِبْڒِيس يتكّس-اَسن-ث زݣ وُوْڒ حمَا وَار تِيمْنن شَا، وَار نجّْمن شَا. 13 زَّرِّيعث نِّي إِݣ يوْضَان جَار يِزْرَا نتَّاث اَم يِوْذَان إِي تسْڒَان إِ وَاوَاڒ ن أَربِّـي، قبْڒن-ث س ڒفْرَاحث. وَامِي وَار ؤُوْثِين بُو يࢲوْرَان مْلِيح ذغْيَا تْنقْڒَاعن. تَامْنن زَّايس غِير ذݣ يِجّن ن ڒْوقْث وَاهَا، ذِي ڒْوقْث ن ڒمْحَاين ذغْيَا تفّْغن اَبْرِيذ. 14 زَّرِّيعث نِّي إِݣ يوْضَان جَار يسنَّانن نتَّاث اَم يِوْذَان إِي تسْڒَان إِ وَاوَاڒ ن أَربِّـي، وَلَكِن ذغْيَا تمْجيَّافن س ومْنُوْس ذ وَاݣْڒَا ذ شّهَاوَاث ن دُّنشْت-أَ وَار نفّْعن شَا. 15 وَلَكِن زَّرِّيعث نِّي إِݣ يوْضَان ذِي ثْمُوْرْث ثَصبْحَانْت نتَّاث اَم يِوْذَان إِي تسْڒَان إِ وَاوَاڒ ن أَربِّـي قبْڒن-ث س وُوْڒ نْسن اَصبْحَان ذ اَشمْڒَاڒ، صبَّارن حمَا اَذ اَرْون. ڒْمَعْنَا ن ڒْقنْدِيڒ 16 ؤُڒَا ذ يجّن وَار يتْشَعِّيڒ ڒْقنْدِيڒ حمَا اَخَاس يقْڒب اَقْنُوْش نِغ اَث يݣّ سْوَادَّاي إِ قَامَا. لَّا، ئِتݣّ-يث خ ڒْمَرْفَاع حمَا اَذَاسن يُوْش ثْفَاوْث إِ يِنِّي إِي د غَا يَاذْفن. 17 مَارَّا مِين ينُوْفَّرن اَذ د يمظْهَار. مَارَّا مِين يتْوَاسْنُوْفَّرن اَذ ينفْضح اَذ يتْوَاسّن. 18 أَرّم-د ڒْبَاڒ نْوم إِ مَامّش تسْڒَام. ونِّي يدْجَان غَارس يتْمَارْنِي-يَاس. وَلَكِن ونِّي وَار غَار يدْجِي شَا، يتْوَاكْسِي-يَاس ؤُڒَا ذ مِين ذَاس يتْغِير غَارس." سِيذِيثْنغ عِيْسَى ذ يمَّاس ذ اَيثْمَاس 19 عِيْسَى ثُوْسَا-د غَارس يمَّاس ذ أَيثْمَاس، وَار زمَّرن شَا اَغَارس اَوْضن، ذِنِّي اَطَّاس ن ڒْغَاشِي. 20 ندْقن-د شَان يِوذان نَّان-اَس: "أَقَا يمَّاش ذ أَيثْمَاش بدّن غَار بَارَّا رزُّوْن اَشك ࢲرن." 21 يَارَّا خَاسن ينَّا-ٱسن: "أَقَا يمَّا ذ اَيثْمَا نِثْنِي ذ يوْذَان نِّي يتْسْڒَان إِ وَاوَاڒ ن أَربِّـي خدّْمن زَّايس." سِيذِيثْنغ عِيْسَى يسْبدَّا اَرِّيح ذِي ڒبْحَر 22 ئِجّن ن نْهَار ينْيَا عِيْسَى ذِي ثْغَرَّابُوْت اَك يمحْضَارن نّس ينَّا-ٱسن: "يَالَّاه أَ نزْوَام غَار وجمَّاض-ين ن ڒبْحَر." رُوْحن، 23 وَامِي ؤُيُوْرن ذِي ڒبْحَر، عِيْسَى يكَّا خَاس يِضص. عْلَاغَفْلَا يكَّر-د يجّن ن اَرِّيح يجْهذ اَطَّاس ذِي ڒبْحَر، ثبْذَا ثْغَرَّابُوْت تْعمَّر س وَامَان ؤُوْضن-د ذݣ يِجّن ن لْخَطَر. 24 قَارّْبن غَارس يمحْضَارن سْفَاقن-ث نَّان-اَس: "آ لْمُعَلِّم آ لْمُعَلِّم، أَقَا نشِّين نتْمتَّا!" ئِكَّر عِيْسَى يسْبدّ اَرِّيح ذ ڒمْوَاج يهدّن ڒْحَاڒ يرْسَا. 25 ينَّا-ٱسن: "مَانِي يدْجَا لْإِيمَان نْوم؟" ݣّْوْذن تْعجّْبن نَّان إِ وَايَاوْيَا: "مِين يعْنَا وَانِيتَان؟ ؤُڒَا ذ اَرِّيح ذ وَامَان ن ڒبْحَر يتْأَمَر-يثن تْطَاعَان-اَس." ئِجّن ذَايس جْنُوْن ذِي ثْمُوْرْث ن يجَرِيثِيْين 26 ؤُوْضن غَار ثْمُوْرْث ن يجَرِيثِيْين زَّاث إِ ثْمُوْرْث ن لْجَلِيل. 27 وَامِي يُوْوض عِيْسَى غَار ڒْبَرّ يڒْقَا-ث-يذ يجّن ن بْنَاذم زِي ثنْدِينْت ذَايس جْنُوْن. نتَّا اَطَّاس زݣ وَامِي وَار يَرّض بُو وَارُّوْض وَار يزدّغ شَا ذِي ثدَّارْث، ئِزدّغ ذݣ يمضْڒَان. 28 وَامِي يُوْفَا عِيْسَى ذِنِّي يبْذَا يسْنكَّر ثْغُوْيّث، ئِوْضَا غَار يضَارن ن عِيْسَى ينْدق-د س يِجّن ن ثْمِيجَّا ثُوْعْڒَا ينَّا-ٱس: "آ عِيْسَى آ مِّيس ن أَربِّـي يُوْعْڒَان، مِين ثخْسذ زَّايِي؟ تتَّارغ زَّايك حمَا وَار ذَايِي تْعدِّيبذ شَا!" 29 ينَّا مَانَايَا مِينْزِي عِيْسَى تُوْغَا يُوْمَر جّنّ نِّي اَعفَّان حمَا اَذ يفّغ زݣ ورْيَاز نِّي. عَاوذ مِينْزِي جّنّ نِّي يتطّف-يث اَطَّاس ن ثْوَاڒَاثِين. وَاخَّا تقّْنن-اَس يفَاسّن ذ يضَارن نّس س سْنَاسڒ حطَّان-ث، يتْرزَّا-ثنْت ينْده-يث جّنّ نِّي غَار ڒخْڒَا. 30 ئِسّقْسَا-ث عِيْسَى ينَّا-ٱس: "مَامّش ذَاش قَّارن؟" ينَّا-ٱس: "نش قَّارن-اَيِي أَبرُّو" مِينْزِي تُوْغَا ؤُذْفن ذَايس اَطَّاس ن جْنُوْن. 31 حشّْمن-ث اَطَّاس جْنُوْن نِّي حمَا وَار ثن يتْسكِّي شَا غَار وَانُو بْڒَا ڒَحدّ. 32 ذِنِّي يجّن ن ثْحِيمرْث ذ ثَمقّْرَانْت ن يِيڒْفَان ثَرْوس خ وذْرَار. تَّارن زَّايس حمَا اَثن يجّ اَذَايس اَذْفن. سّنِّي يجِّي-ثن. 33 فّْغن جْنُوْن زِي بْنَاذم نِّي ؤُذْفن ذݣ يِيڒْفَان. ثهْوَا ثْحِيمرْث نِّي خ وذْرَار غَار ڒبْحَر ثغْرق ذِنِّي. 34 يِنِّي يَروّْسن، ࢲْرِين مِين يوقْعن اَروْڒن سُوْفْغن ڒخْبَار ذِي ثنْدِينْت ذ ڒدْشُوْرَاث. 35 فّْغن-د يِوْذَان حمَا اَذ ࢲرن مِين يوقْعن. ؤُسِين-د غَار عِيْسَى ؤُفِين اَرْيَاز نِّي فّْغن زَّايس جْنُوْن، ئِقِّيم غَار يضَارن ن عِيْسَى يَرض اَرُّوْض نّس يݣنْفَا يذْوڒ س ڒَعْقڒ نّس. أُوْشَا ݣّْوْذن اَطَّاس. 36 خبَّرن-ثن ڒشْهُوْذ مَامّش يݣَّا عِيْسَى يسْݣنْفَا اَرْيَاز نِّي إِي ذِي تُوْغَا دْجَان جْنُوْن. 37 أُوْشَا تَّارن زِي عِيْسَى مَارَّا أَيْثْبَاب ن جِّهث ن يجَرِيثِيْين حمَا اَخَاسن يبعّذ مِينْزِي ݣّْوْذن اَطَّاس. ئِنْيَا ذِي ثغَرَّابُوْت يعْقب سّنِّي. 38 أَرْيَاز نِّي إِي زِي فّْغن جْنُوْن يتَّار زِي عِيْسَى حمَا اَكِذس يرَاح. وَلَكِن عِيْسَى يُوْݣِي يسّكّ-يث ينَّا-ٱس: 39 "عْقب غَار ثدَّارْث نّش، سْخبَّر-يثن س مِين ذَاش يݣَّا أَربِّـي." ئِرُوْح ورْيَاز نِّي يبْذَا يتْخبَّار ذِي ثنْدِينْت ثكْمَاڒ زِي مِين ذَاس يݣَّا عِيْسَى. سِيذِيثْنغ عِيْسَى يسْݣنْفَا يدْجِيس ن يَاݣْرُس 40 وَامِي د يذْوڒ عِيْسَى، رحّْبن زَّايس ڒْغَاشِي مِينْزِي مَارَّا إِذْسن تْرَاجَان-ث. 41 يُوْسَا-د غَارس يجّن ن ورْيَاز قَّارن-اَس يَاݣْرُس. نتَّا ذ اَرَّايس ن ثمْزِيذَا إِي يدْجَان ذِنِّي. يوْضَا غَار يضَارن ن عِيْسَى يبْذَا يتْحشَّام-يث اَطَّاس حمَا اَكِذس يرَاح غَار ثدَّارْث نّس 42 مِينْزِي غَارس غِير يجّن ن ثْحنْجِيرْث وَاهَا عْڒَاين اَذ تݣّ ثنْعَاش يسݣّْوُسَا، تْمتَّا. ئِكَّر عِيْسَى يرُوْح، تمْزَاحَامن خَاس ڒْغَاشِي. 43 ذِنِّي جَار يِوْذَان نِّي يجّن ن ثمْغَارْث ثنْعَاش يسݣّْوُسَا زݣ وَامِي إِي ثهْڒش، تَازّڒ س يذَامّن. مَارَّا مِين غَارس ذ اَݣْڒَا ثْضيّع-يث خ يضْبِيبن، وَار يزمَّر حَدّ اَت يسْݣنْفَا. 44 ثذْفَار عِيْسَى، ثْحَاذَا-يَاس طَّارف ن وسڒْهَام نّس ڒخْدّنِّي ثْݣنْفَا ذݣ ومْشَان. 45 ينَّا عِيْسَى: "وِي ذَايِي يحَاذَان؟" مَارَّا إِذْسن نْكَرن. ينَّا-ٱس بُطْرُس: "آ لْمُعَلِّم، قَا مَارَّا يِوْذَان-أَ تمْزَاحَامن خَاش!" 46 ينَّا عِيْسَى: "لَّا، سْحِيسّغ شَان يِجّن يحَاذَا-اَيِي مِينْزِي سّْنغ جّْهذ يفّغ زَّايِي." 47 وَامِي ثُوْفَا ثمْغَارْث نِّي ثْنفْضح، ثْرُوْح غَار عِيْسَى ترْجِيجِي ثوْضَا-يَاس غَار يضَارن نّس. ثْعَاوذ-اَس زَّاث إِ مَارَّا يوْذَان نِّي مَايمِّي ث ثْحَاذَا ذ مَامّش ثْݣنْفَا ذݣ ومْشَان. 48 ينَّا-ٱس عِيْسَى: "آ يدْجِي، شم لْإِيمَان نّمْ يسْݣنْفَا-شم. رُوْح ذِي ڒهْنَا." 49 وَامِي عَاذ يسَّاوَاڒ، يُوْسَا-د يجّن زِي ثدَّارْث ن اَرَّايس نِّي ن ثمْزِيذَا ينَّا-ٱس: "يدْجِيش شك ثمُّوْث. وَار تْعدَّاب شَا ڒخُّو لْمُعَلِّم." 50 ئِسْڒَا-يَاس عِيْسَى ينَّا-ٱس: "وَار تݣّْوذ شَا! أَمن وَاهَا، أَقَا يدْجِيش اَذ تْݣنْفَا." 51 وَامِي يُوْوض غَار ثدَّارْث ن يَاݣْرُس، وَار يجِّي ؤُڒَا ذ يجّن اَذ يَاذف إِلَّا بُطْرُس ذ يُوْحَنَّا ذ يَعْقُوْب ذ بَابَاس ذ يمَّاس ن ثْحنْجِيرْث نِّي. 52 مَارَّا تْرُوْن خَاس تْعزَّان. ينَّا-ٱسن عِيْسَى: "وَار خَاس تْرُوْم شَا. أَقَا ثْحنْجِيرْث-أَ وَار ثمُّوْث شَا، ثطّص وَاهَا!" 53 بْذَان ضحّْشن خَاس قَا سّْنن بلِّي ثمُّوْث. 54 ئِطّف-اَس ذݣ وفُوْس إِ ثْحنْجِيرْث نِّي ينَّا-ٱس: "آ ثَحنْجِيرْث كَّر." 55 ڒخْدّنِّي بُوْحْبڒ نّس يذْوڒ-اَس-د، ثكَّر ذݣ ومْشَان. ئِوصَّا-ثن اَذَاس ؤُشن مِين غَا ثشّ. 56 بَابَاس ذ يمَّاس قِّيمن تْعجّْبن. نتَّا يوْصَّا-ثن ينَّا-ٱسن وَار تْعَاوَاذم إِ حَدّ مِين يوقْعن. |