لوقا 7 - ثريفيث 2020لإِيمَان ن يِجّن ن وعَسْكَارِي ذ اَمقّْرَان ن اَرُّوْمَانُوْس 1 وَامِي يكمّڒ عِيْسَى اَوَاڒ نّس اَك يِوْذَان إِي تُوْغَا ذَاس يتسْڒَان، يُوْذف غَار وبِيلَاج ن كَفرْنَاحُوْم. 2 ذِنِّي يجّن ن وعَسْكَارِي ذ اَمقّْرَان ن اَرُّوْمَانُوْس غَارس يجّن ن وخدَّام يتْعوَّاڒ خَاس اَطَّاس، وَلَكِن اَخدَّام نِّي يهْڒش عْڒَاين اَذ يمّث. 3 وَامِي يسْڒَا خ عِيْسَى يسّكّ غَارس شَا ن ڒشْيُخ ن أَيث-إِسْرَائِيل حمَا اَث حشّْمن اَذ د يَاس اَذ يسْݣنْفَا اَخدَّام نّس. 4 وَامِي د ؤُسِين غَار عِيْسَى حشّْمن-ث نَّان-اَس: بْنَاذم-أَ يسْذَاهدْج اَث تْعَاوْنذ 5 مِينْزِي يتخْس شَّعْب نّغ عَاوذ يبْنَا ثَمْزِيذَا نّغ. 6 ئِكَّر عِيْسَى يرُوْح اَكِذْسن. وَامِي يقَارّب غَار ثدَّارْث نِّي يسّكّ-د غَارس وعَسْكَارِي نِّي شَان يمدُّوْكَاڒ نّس ينَّا-ٱس: "آ سِيذِي تْعدّْبذ يخف نّش وَاهَا، نش وَار سْذِيهِيدْجغ شَا اَذ تَاذْفذ غَار ثدَّارْث ينُو. 7 خ مَانَايَا نش حسْبغ يخف ينُو وَار سْذِيهْدْجغ شَا اَذ د اَسغ غَارك. إِنِي غِير يجّن ن وَاوَاڒ أُو صَافِي اَتَاف اَذ يݣنْفَا وخدَّام ينُو. 8 ؤُڒَا ذ نش س يِيخف ينُو غَارِي يِنِّي خَافِي يحكّْمن. غَارِي ڒْعَسْكَار خ وفُوْس ينُو حكّْمغ خَاسن. أَذ ينِيغ إِ يِجّن: رُوح، أَذ يرَاح. أَذ ينِيغ إِ يِجّن: أَرَاح-د، أَذ د يَاس. أَذ ينِيغ إِ وخدَّام ينُو: اݣّ ثَا، أَت يݣّ." 9 وَامِي يسْڒَا عِيْسَى إِ مَانَاينِّي يتْعجّب ذَايس اَطَّاس، ئِنقْڒب غَار ڒْغَاشِي إِي ث يذْفَارن ينَّا-ٱسن: "أَذَاوم ينِيغ: يِنِّي يدْجَان زِي أَيث-إِسْرَائِيل وَار ذَايْسن ؤُفِيغ بُو لْإِيمَان يمْغَر اَطَّاس اَم وَانِيتَا!" 10 يِنِّي يسّكّ وعَسْكَارِي نِّي ذوْڒن غَار ثدَّارْث ؤُفِين اَخدَّام يݣنْفَا. سِيذِيثْنغ عِيْسَى يسْنكَّر-د يجّن ن ومتِّين 11 ثِيوشَّا نّس يرُوْح عِيْسَى غَار يِجّن ن وبِيلَاج قَّارن-اَس نَعِين، أَكِذس يمحْضَارن نّس ذ ڒْغَاشِي اَطَّاس. 12 وَامِي يقَارّب غَار ثوَّارْث ن وبِيلَاج، يُوْفَا ذِنِّي يْسِين-د يجّن ن ومتِّين اَث نضْڒن. نتَّا إِي غَارس غار يمَّاس وَاحْذس، نتَّاث ذ ثَاجَّاڒْث. أَكِذس ذِنِّي اَطَّاس ن ڒْغَاشِي زݣ وبِيلَاج نِّي. 13 وَامِي ت يࢲْرَا سِيذِيثْنغ ثقّس-اَس ينَّا-ٱس: "وَار تْرُو شَا!" 14 ئِقَارّب غَار ڒْمحْمڒ يحَاذَا-ث، بدّن يِنِّي ث ييْسِين. ينَّا: "كَّر آي اَحنْجِير." 15 ئِكَّر-د ومتِّين نِّي يبْذَا يسَّاوَاڒ، يَارِّي-ث عِيْسَى إِ يمَّاس. 16 مَارَّا ݣّْوْذن سمْغَارن أَربِّـي نَّان: "ئِمظْهَار-د جَارَانغ يجّن ن نَّبِي ذ اَمقّْرَان. أَربِّـي يفْقذ شَّعْب نّس!" 17 ئِفّغ ڒخْبَار-أَ خ عِيْسَى ذِي مَارَّا ثَمُوْرْث ن يَهُوْذِيَا ذ مَارَّا جْوَايه إِي ذَاس د ينّْضن. سِيذِيثْنغ عِيْسَى ذ سِيذْنَا يَحْيَى 18 يَحْيَى يَارَّا-د ڒخْبَار خ مَارَّا مَانَايَا زݣ يمحْضَارن نّس. ئِڒَاغَا-د خ ثْنَاين زَّايْسن 19 يسّكّ-يثن غَار سِيذِيثْنغ حمَا اَذَاس ينِين مَا ذ شك إِي خف نتْسْڒَا اَذ د تَاسذ نِغ أَ نْرَاجَا شَان يِجّن نّغْنِي؟ 20 وَامِي د ؤُسِين ثْنَاين نِّي ن يرْيَازن غَار عِيْسَى، نَّان-اَس قَا يسْقَاذ-اَنغ-د غَارك يَحْيَى اَش نسّقْسَا: مَا ذ شك إِي نتْرَاجَا اَذ د تَاسذ نِغ ذ شَان يِجّن نّغْنِي؟" 21 ذِي ڒْوقْث نِّي يسْݣنْفَا عِيْسَى اَطَّاس ن يمهْڒَاش ذ يِنِّي ذِي يدْجَا ڒحْڒِيق ذ يِنِّي ذِي دْجَان جْنُوْن ذ يعفَّانن. عَاوذ يَارَّا اَطَّاس ن يضَرْغَاڒن تْوَاڒَان. 22 ينَّا-ٱسن عِيْسَى: "عقْبث غَار يَحْيَى عَاوْذم-اَس مِين تْوَاڒَام ذ مِين تسْڒَام: ئِضَرْغَاڒن تْوَاڒَان، ئِزحَّافن ݣُوْرن، يِنِّي إِي ذِي يدْجَا جْذَام ݣنْفَان، ئِذهْشُوْرن تسْڒَان، يِنِّي يمُّوْثن تْنكَّرن-د، ڒْمُسَاكِين تْوَابشَّارن. 23 سَّعْذ ن يِنِّي وَار ذَايِي يتْشكِّين شَا." 24 صَافِي روّْحن يِنِّي يسّكّ يَحْيَى، عِيْسَى يبْذَا يسَّاوَاڒ خ يَحْيَى يقَّار-اَسن إِ ڒْغَاشِي نِّي: "مِينْخف ثفّْغم اَذ تࢲرم ذِي ڒخْڒَا؟ مَا غَار يِج وغَانِيم يتْهزَّا-ث اَرِّيح؟ لَّا! 25 مڒَا لَّا، مِينْخف ثفّْغم اَذ تࢲرم؟ مَا ذ يجّن ن ورْيَاز يَرض اَرُّوْض ذ اَصبْحَان؟ لَّا، يِنِّي إِي غَار يدْجَا وَارُّوْض ذ اَصبْحَان تْعِيشن مْلِيح تِيڒِين ذِي ڒْقُصُوْر ن يزدْجِيذن! 26 مڒَا لَّا، مِينْخف ثفّْغم اَذ تࢲرم؟ مَا ذ يجّن ن نَّبِي؟ قَّارغ-اَوم: وَاه، نتَّا كْتَار زݣ يِجّن ن نَّبِي. 27 ذ يَحْيَى إِي خف يسَّاوَاڒ لْكِتَاب: <أَقَا تْسكِّيغ-د يجّن ن اَرَّسُوْل ينُو زَّاثش، حمَا اَذَاش يسوْجذ اَبْرِيذ نّش.> 28 أَقَا تسْڒَام: زِي مِين د جِّينْت ثمْغَارِين وَار يدْجِي حَدّ ذ اَمقّْرَان زِي يَحْيَى، وَلَكِن ونِّي إِي يدْجَان ذ اَمزْيَان قَاع ذِي ڒْمُلْك ن أَربِّـي نتَّا ذ اَمقّْرَان زِي يَحْيَى." 29 مَارَّا يوْذَان تسْڒَان خَاس، ؤُڒَا ذ يعشَّارن نِثْنِي س يِيخف نْسن عْتَرْفن بلِّي مَانَايَا يدْجَا نِيشَان مِينْزِي نِثْنِي تْوَاطهَّارن س وَامَان عْلَاحْسَاب يَحْيَى. 30 وَلَكِن ڒْحِزب ن يفَرِّسِيْين ذ يِنِّي يتْشرَّاحن شَّرِيعَا وَار خِيسن شَا مِين يخس أَربِّـي، ؤُݣِين اَثن يطهَّار يَحْيَى س وَامَان. 31 "خ مَانَايَا وِي ذِي غَا شَابّْهغ يوْذَان ن ڒْوقْث-أَ؟ مِينْذِي تْشَابَّاهن؟ 32 نِثْنِي اَم شَا ن يحنْجِيرن إِي يقِّيمن ذِي سَّاحَا تْڒَاغَان إِ وَايَاوْيَا قَّارن: نتْصُوْض ذِي ثمْجَا، وَار ثشْضِيحم شَا. نتْعزَّا-كنِّيو، وَار ثتْرُوْم شَا. 33 مِينْزِي يَحْيَى يُوْسَا-د يتْࢲُوْمَّا وَار يسسّ اَمَان ن وضِيڒ كنِّيو ثنِّيم اَقَا ذَايس جْنُوْن! 34 يُوْسَا-د مِّيس ن بْنَاذم يتتّ يسسّ وَار يتْࢲُوْمِّي شَا. كنِّيو ثنِّيم اَقَا بْنَاذم-أَ يتتّ يسسّ اَطَّاس، عَاوذ نتَّا ذ اَمدُّوْكڒ ن يعشَّارن ذ يِنِّي يعصَّان. 35 إِنَّمَا، ڒفْهَامث ن أَربِّـي قبّْڒن-تث مَارَّا يِنِّي يتفْهَامن." ئِجّن ن ثمْغَارْث تْوَاغْفَرنْت-اَس ڒْمُعْصِيَاث نّس 36 ئِج وفَرِّسِي يعَرض عِيْسَى حمَا اَذ يشّ اَكِذس. يُوْذف غَار ثدَّارْث ن وفَرِّسِي نِّي يقِّيم غَار مِيسَّا. 37 ذِنِّي ذݣ وبِيلَاج نِّي يجّن ن ثمْغَارْث ثْعصَّا. ثَارَّا-د ڒخْبَار عِيْسَى يقِّيم اَذ يشّ ذِي ثدَّارْث ن وفَرِّسِي نِّي، ثُوْسَا-د نتَّاث غَارس يجّن ن ثْزيَّات ذَايس اَمَان ن لْوَرْذ. 38 ثقِّيم غَار ذفَّار ن عِيْسَى غَار يضَارن نّس ثبْذَا ثتْرُو وْضَان-اَس يمطَّاون نّس خ يضَارن ن عِيْسَى. ثْرُوْح ثمْسح-يثن س وشوَّاف نّس، ثْسدْجم-يثن ثذْهن-يثن س وَامَان ن لْوَرْذ. 39 أَفَرِّسِي نِّي إِي ث يعَرْضن وَامِي يࢲْرَا مَانَايَا ينَّا ذِي نّفْس نّس: وَانِيتَا مَعْلِيك ذ نَّبِي اَتَاف اَذ يسّن مِين ثعْنَا ثمْغَارْث-أَ إِي ث يتْحَاذَان، نتَّاث ثعْصَا أَربِّـي. 40 ئِنْدق-د عِيْسَى ينَّا-ٱس: "آ سِمْعَان، غَارِي يج ن ڒْحَاجث اَذَاش ت ينِيغ." ينَّا-ٱس سِمْعَان: "سِّيوڒ آ لْمُعَلِّم." 41 "ذِنِّي يجّن ن سِّيّد يرْضڒ تْمنْيَاث إِ ثْنَاين ن يِوْذَان. ئِجّن يرْضڒ-اَس خمْسْمِيَّا دِينَار، ئِجّن يرْضڒ-اَس خمْسِين دِينَار. 42 وَلَكِن وَار غَارْسن مِينْزِي غَا اَرّن، صَافِي سِّيّد نِّي يسْمح-اَسن مَارَّا. إِن-اَيِي شك: مَانْون إِي ث غَا يحِبّن اَطَّاس؟" 43 ينَّا-ٱس سِمْعَان: "يمْكن ونِّي ؤُمي يسْمح ذݣ وَاطَّاس ن ومَرْوَاس." ينَّا-ٱس عِيْسَى: "غَارك ڒْحَقّ." 44 ئِنقْڒب غَار ثمْغَارْث نِّي ينَّا-ٱس إِ سِمْعَان: "أَقَا تْوَاڒِيذ ثَمْغَارْث-أَ؟ ؤُسِيغ-د غَار ثدَّارْث نّش وَار ذَايِي د ثُوْوِيذ شك ؤُڒَا ذ اَمَان إِي زِي غَا سِيرْذغ يضَارن ينُو. نتَّاث ثْسِيرذ-اَيِي يضَارن ينُو س يمطَّاون نّس ثمْسح-يثن س وشوَّاف نّس. 45 شك وَار خَافِي ثْسدْجْمذ شَا. زݣ وَامِي د ؤُسِيغ نتَّاث ثْسدْجَام-اَيِي يضَارن ينُو. 46 شك وَار ذَايِي ثذْهِينذ اَزدْجِيف ؤُڒَا س زّشْت. نتَّاث ثذْهن-اَيِي يضَارن ينُو س وَامَان ن لْوَرْذ. 47 خ مَانَايَا اَذَاش ينِيغ، ڒْمُعْصِيَاث نِّي إِي ثݣَّا اَطَّاس تْوَاغْفَرنْت-اَس مِينْزِي نتَّاث ذَايس ڒمْحِبّث اَطَّاس. ونِّي ؤُمِي تْوَاغْفَرنْت ڒْمُعْصِيَاث ذْرُوْس، نتَّا ذَايس ڒمْحِبّث ذْرُوْس." 48 ينَّا-ٱس إِ ثمْغَارْث نِّي: "ڒْمُعْصِيَاث نّمْ تْوَاغْفَرنْت-اَم." 49 بْذَان يِنِّي إِي كِس يقِّيمن قَّارن إِ وَايَاوْيَا: "مِين يعْنَا وَانِيتَا إِݣ يغْفَرن ڒْمُعْصِيَاث-أَ؟" 50 ينَّا-ٱس عِيْسَى إِ ثمْغَارْث نِّي: "شم يسنْجم-يشم لْإِيمَان نّم، رُوْح ذِي ڒهْنَا." |