لوقا 5 - ثريفيث 2020

سِيذِيثْنغ عِيْسَى ئِتْڒَاغَا-د إِ يمحْضَارن نّس يمزْوُوْرَا

¹ ئِجّن ن نْهَار يبدّ عِيْسَى غَار ڒبْحَر ن ݣَنِيسَارَت، مْزَاحَامن خَاس ڒْغَاشِي بَاش اَذ سْڒن إِ وَاوَاڒ ن أَربِّـي.

² يُوْفَا ثْنَاين ن ثْغَرُّوْبَا بدّنْت خ طَّارْف ن ڒبْحَر. تُوْغَا هْوَان-د زَّايْسنْت يحدْجَاقن ن يسڒْمَان بَاش اَذ عذْڒن ثِرَاشِّيوِين نْسن.

³ ئِنْيَا عِيْسَى ذݣ يِشْتن زِي ثْغَرُّوْبَا نِّي ثنِّي إِي يدْجَان ن سِمْعَان، ئِطَالب زَّايس اَذ يُوْيُوْر شْوَايْت خ ڒْبَرّ أُو نتَّا يقِّيم ذَايس يبْذَا يسڒْمَاذ ڒْغَاشِي زِي ثْغَرَّابُوْت نِّي.

⁴ وَامِي يكمّڒ اَوَاڒ نِّي ينَّا-ٱس إِ سِمْعَان: "نْده ثَغَرَّابُوْت نّش غَار مَانِي ؤُدْجْغن وَامَان ضْڒق ثِرَاشِّيوِين حمَا اَذ تْحدْجْقذ يسڒْمَان."

⁵ ينَّا-ٱس سِمْعَان: "آ لْمُعَلِّيم، نشِّين دْجِيڒث ثكْمَاڒ نْخدّم وَار د نْسِيڒِي ؤُڒَا ذ يجّن ن وسْڒم، وَلَكِن وَامِي ت ثنِّيذ شك اَذ ضڒْقغ ثِيرَاشِّيوِين."

⁶ وَامِي ݣِّين اَمُّو سِيڒِين-د اَطَّاس ن يسڒْمَان، ثِرَاشِّيوِين نْسن عْڒَاين اَذ قَّرْصنْت.

⁷ شيَّارن يمدُّوْكَاڒ نْسن ذِي ثْغَرَّابُوْت نِّي نّغْنِي حمَا اَذ د اَسن اَثن عَاوْنن. ؤُسِين-د عمَّرن ثْنَاين ن ثْغَرُّوْبَا نْسن اَڒ وَامِي عْڒَاين اَذ غرْقنْت.

⁸ سِمْعَان بُطْرُس وَامِي يࢲْرا مَانَايَا يُوْسَا-د يوْضَا غَار يضَارن ن عِيْسَى ينَّا-ٱس: "آ سِيذِي، بعّذ خَافِي نش ذ لْعَاصِي."

⁹ ئِذْهش نتَّا ذ يِنِّي اَكِذس مَارَّا ڒَاحقَّاش حدْجْقن-د اَطَّاس ن يسڒْمَان.

¹⁰ عَاوذ يذْهش ؤُڒَا ذ يَعْقُوْب ذ يُوْحَنَّا ثَارْوَا ن زَبَادِي نِثْنِي ذ يمدُّوْكَاڒ ن سِمْعَان. ينَّا-ٱس عِيْسَى إِ سِمْعَان: "وَار تݣّْوذ شَا، شك سَّا اَڒ ثْسَاونْت اَتَاف اَذ تْحدْجْقذ يوْذَان."

¹¹ وَامِي د ذوْڒن س ثْغَرُّوْبَا غَار ڒْبَرّ سمْحن ذِي مَارَّا مِين غَارْسن ذْفَارن عِيْسَى.

سِيذِيثْنغ عِيْسَى يسْݣنْفَا يجّن ذَايس جْذَام

¹² وَامِي عِيْسَى اَقَاث ذݣ يِجّن ن ثنْدِينْت، يُوْسَا-د يجّن ن ورْيَاز ذَايس جْذَام اَطَّاس. ئِࢲْرَا عِيْسَى يوْضَا-يَاس غَار يضَارن يتَّار-اَس ينَّا-ٱس: "آ سِيذِي، شك مڒَا ثخْسذ ثزمَّرذ اَذَايِي ثسِّيصْفِيذ."

¹³ ئِقَارّب غَارس عِيْسَى يحَاذَا-ث س وفُوْس نّس ينَّا-ٱس: "وَاه نش خْسغ، شك قَا ثݣنْفِيذ!" صَافِي ذݣ ومْشَان يرُوْح-اَس جْذَام نِّي.

¹⁴ ئِوصَّا-ث ينَّا-ٱس: "وَار تْخبَّر حَدّ." ينَّا-ٱس: "رُوْح غَار ڒفْقِي سظْهَار-اَس يخف نّش. اݣّ صّذْقث نِّي إِي زِي يوصَّا مُوْسَى حمَا اَغَارْسن ثِيڒِي شْهَاذث خ مين يوقْعن."

¹⁵ وَلَكِن سّنِّي يبْذَا يتنْتَاشَر خَاس ڒخْبَار كْتَار عَاذ. ؤُسِين-د غَارس اَطَّاس ن ڒْغَاشِي حمَا اَذَاس سْڒن حمَا اَذ ݣنْفَان زِي ڒهْڒَاشَاث نْسن.

¹⁶ نتَّا تُوْغَا يتْرَاح غَار يمُوْشَان إِݣ يخْڒَان حمَا اَذ يࢲَّادْج ذِنِّي.

سِيذِيثْنغ عِيْسَى يسْݣنْفَا يجّن ن ونشْرُوْف

¹⁷ ئِجّن ن نْهَار تُوْغَا عِيْسَى يسڒْمَاذ يوْذَان. قِّيمن ذِنِّي جَارَاسن ڒبْعَاض زِي ڒْحِزب ن يفَرِّسِيْين ذ يمْسڒْمَاذن ن شَّرِيعَا، ؤُسِين-د زِي مَارَّا ڒدْشُوْرَاث ن لْجَلِيل ذ يَهُوْذِيَا ذ لْقُدْس. جّْهذ ن سِيذِي أَربِّـي اَقَاث اَك عِيْسَى بَاش اَذ يسْݣنْفَا يمهْڒَاش.

¹⁸ ؤُسِين-د شَان يِوْذَان يْسِين يجّن ن ورْيَاز يزّڒ ذِي ثَاسُّوْث نّس مُّوْثن-اَس يضَارن. رزُّوْن مَامّش غَا ݣّن اَث سِيذْفن اَث سرْسن زَّاثس.

¹⁹ وَامِي ؤُفِين وَار زمَّرن اَث سِيذْفن مِينْزِي ذِنِّي اَطَّاس ن ڒْغَاشِي، ݣَعّْذن زَّايْس غَار ثْزقَّا قڒْعن يجّن ن ومْشَان ذِي سّْقف سهْوَان-ث-يد خ ثَاسُّوْث نّس غَار ڒْوسْط زَّاث إِ يضَارن ن عِيْسَى.

²⁰ نتَّا وَامِي يࢲْرَا لْإِيمَان نْسن ينَّا-ٱس إِ ونشْرُوف نِّي: "آي اَرْيَاز، تْوَاغْفَرنْت-اَش ڒْمُعْصِيَاث نّش."

²¹ بْذَان يمْسڒْمَاذن ن شَّرِيعَا ذ ڒْحِزب ن يفَرِّسِيْين تْفكَّرن نَّان ذݣ وُوْڒَاون نْسن: "مِين يعْنَا وَانِيتَا يتَارَّا يخف نّس ذ أَربِّـي؟ ڒْمُعْصِيَاث وَار ثنْت يغْفَر شَا إِلَّا أَربِّـي وَاحْذس!"

²² عِيْسَى يسّن مِين نْوَان ينَّا-ٱسن: "مَايْمِي تْفكَّرم اَمُّو كنِّيو ذِي ڒَعْقُوْڒَاث نْوم؟

²³ مِين يسهْڒن اَطَّاس اَذَاس ينِيغ إِ ونشْرُوْف-أَ، مَا ٱذَاس ينِيغ: تْوَاغْفَرنْت-اَش ڒْمُعْصِيَاث نّش؟ نِغ مَا ٱذَاس يينِيغ: كَّر شك ؤُيُوْر؟

²⁴ نش خْسغ اَذ تسّْنم مِّيس ن بْنَاذم غَارس سُّلْطَا خ ثْمُوْرْث حمَا اَذ يغْفَر ڒْمُعْصِيَاث." أُوْشَا ينَّا-ٱس عِيْسَى إِ ونشْرُوْف نِّي: "أَذَاش ينِيغ، بدّ خ يضَارن نّش يْسِي ثَاسُّوْث نّش رُوْح اَذ تْروّْحذ غَار ثدَّارْث نّش!"

²⁵ ڒخْدّنِّي يكَّر ونشْرُوْف نِّي زَّاثْسن ييْسِي مِين تُوْغَا خف يزّڒ، يروّح يحمّذ أَربِّـي.

²⁶ مَارَّا ذهْشن ذِي مَانَايَا حمّْذن أَربِّـي، ݣّْوْذن اَطَّاس نَّان: "نْهَارَا نࢲْرَا ثِمسْڒَايِين سذْهَاشنْت اَطَّاس!"

سِيذِيثْنغ عِيْسَى يتْڒَاغَا-د إِ لَاوِي

²⁷ منْبَعد يرُوْح عِيْسَى يُوْفَا يجّن يجمّع ضَّرِيبَا قَّارن-اَس لَاوِي، ئِقِّيم ذݣ ومْشَان مَانِي جمّْعن ضَّرِيبَا. ينَّا-ٱس عِيْسَى: "ذْفَار-اَيِي-د."

²⁸ أُوْشَا يكَّر لَاوِي يسْمح ذِي مَارَّا يذْفَار-يث.

²⁹ يݣَّا-ٱس لَاوِي يجّن ن زَرّْدث ذ ثَمقّْرَانْت ذِي ثدَّارْث نّس. حْضَارن اَكِذْسن اَطَّاس ن يعشَّارن ذ ينّغْنِي إِي قِّيمن اَكِذْسن اَذ شّن.

³⁰ شثْشَان زَّايس ڒْحِزب ن يفَرِّسِيْين ذ يمْسڒْمَاذن ن شَّرِيعَا نَّان-اَسن إِ يمحْضَارن نّس: "مَايمِّي تتّم ثْسسّم اَك يعشَّارن ذ يِنِّي يعصَّان؟"

³¹ يَارَّا خَاسن عِيْسَى ينَّا-ٱسن: "ئِوْذَان يصحَّان وَار تحْذِيجِين بُو وضْبِيب، أَضْبِيب تحْذَاجَان-ث يمهْڒَاش."

³² ينَّا-ٱسن: "نش وَار د ؤُسِيغ شَا اَذ ڒَاغِيغ إِ يِنِّي يدْجَان نِيشَان حمَا اَذ تُوْبن، ؤُسِيغ-د غَار يِنِّي يعصَّان."

³³ نَّان-اَس: "مَايمِّي يمحْضَارن ن يَحْيَى ذ يمحْضَارن ن ڒْحِزب ن يفَرِّسِيْين تْࢲُوْمَّان تْࢲَادْجَان اَطَّاس، ئِمحْضَارن نّش تتّن سسّن وَاهَا؟"

³⁴ ينَّا-ٱسن عِيْسَى: "كنِّيو مَا تجّم ئِمدُّوْكَاڒ ن مُوْڒَاي اَذ ࢲُوْمّن ذِي ڒْفَارْح نّس؟"

³⁵ ينَّا-ٱسن: "لَّا، وَلَكِن عَاذ اَذ د اَسن وُوْسَان اَذ يميْسِي مُوْڒَاي زِي ڒْوسْط نْسن، ڒخْدّنِّي اَذ ࢲُوْمّن ذݣ وُوْسَان نِّي."

³⁶ ئِسِّيوڒ عَاوذ اَكِذْسن س ڒْمَعْنَا-يَا: "وَار يدْجِي حَدّ يتقْسَّاس-د ثَرقِّيعْث زݣ وَارُّوْض ن جْذِيذ حمَا س ثْرقِّيعْث نِّي اَزَّايس يرقّع اَرُّوْض ذ ڒْبَاڒِي. مَايمِّي؟ أَرُّوْض ذ جْذِيذ اَذ يقِّيم يتْشرَّاݣ وَاهَا، ونِّي ن ڒْبَاڒِي وَار خَاس د تِيس ثْرقِّيعْث نِّي ن جْذِيذ.

³⁷ ؤُڒَا ذ اَمَان ن وضِيڒ ذ جْذِيذ وَار خدْجْقن شَا ذݣ يِيڒْمَاون يقْذِيمن، حمَا وَار دُّوْقُّوْزن وَار تْزدْجِيعن شَا وَامَان ن وضِيڒ اَذ ضيّْعن يِيڒْمَاون نِّي.

³⁸ وَلَكِن اَمَان ن وضِيڒ ذ جْذِيذ خدْجْقن ذݣ يِيڒْمَاون ذ جْذِيذ.

³⁹ مڒَا يسْوَا شَان يجّن اَمَان وضِيڒ يقْذِيمن، أَتَاف وَار يتخْس شَا يِنِّي ذ جْذِيذ مِينْزِي يقَّار قَا يِنِّي يقْذِيمن ذ يصبْحَانن."