لوقا 24 - ثريفيث 2020سِيذِيثْنغ عِيْسَى يكَّر-د زِي ڒْموْث 1 نْهَار اَمزْوَارُو ن سِّيمَانَا يعْنِي ذ ڒْحَد، ثِمْغَارِين نِّي رُوْحنْت غَار صْبَاح زِيش غَار يِيفْرِي ن ونْضڒ نِّي، ؤُوِينْت لْعِطَر إِي تُوْغَا سْوجْذنْت. 2 ؤُفِينْت اَزْرُو يتْوَاكّس خ ونْضڒ. 3 وَامِي ؤُذْفنْت ذَايس وَار ؤُفِينْت شَا ذِنِّي دَّات ن سِيذِيثْنغ عِيْسَى. 4 نِثنْتِي وَامِي قِّيمنْت ذهّْشنْت ذِي مَانَاينِّي، بدّن-د غَارْسنْت ثْنَاين ن يثَرَّاسن ݣِّين اَرُّوْض يتْشعْشِع. 5 ݣّْوْذنْت ثمْغَارِين نِّي اَطَّاس سجّْذنْت غَار ثْمُوْرْث، نَّان-اَسنْت ثْنَاين ن يثَرَّاسن نِّي: "مَايمِّي ثْرزُّوْنْت خ ونِّي يدَّرن جَار يِنِّي يمُّوْثن؟ 6 نتَّا وَار ذَا يدْجِي شَا، ئِكَّر-د زِي ڒْموْث. مَا وَار ثعْقِيڒنْت شَا وَامِي كِذْوم يسِّيوڒ أُو نتَّا تُوْغَاث عَاذ ذِي ثْمُوْرْث ن لْجَلِيل؟ 7 ينَّا-ٱوم قَا يتْخصَّا مِّيس ن بْنَاذم اَذ يتْوَاسلّم إِ يِنِّي يعصَّان، نِثْنِي اَث صلّْبن نتَّا اَذ د يتْوَاسكَّر ذِي نْهَار ن وِيس ثڒْتِيَّام." 8 سّنِّي نِثنْتِي عقْڒنْت خ وَاوَاڒ نِّي ن عِيْسَى. 9 ذوْڒنْت-يد زݣ ونْضڒ سِّيوْضنْت مَارَّا ڒخْبَار-أَ غَار حِيطَاش ن اَرُّسُل ذ مَارَّا ينّغْنِي. 10 ثِنِّي يسِّيوْضن ڒخْبَار-أَ غَار اَرُّسُل نِثنْتِي ذ مَرْيَم ثَمَݣْدَالِيث، ذ أَيُوْنَّا، ذ مَرْيَم يمَّاس ن يَعْقُوْب، ذ ثِنّغْنِي. 11 أَرُّسُل-أَ وَار ؤُمِينن شَا ثِمْغَارِين نِّي مِينْزِي فكَّرن نِثنْتِي سَّاوَاڒنْت وَاهَا. 12 وَلَكِن بُطْرُس يكَّر يُوْزّڒ غَار يِيفْرِي ن ونْضڒ نِّي، وَامِي يسِّيج ذِنِّي يُوْفَا ڒشْفن يمَارْس وَاحْذس. ئِرُوْح نتَّا يذْوڒ غَار ثدَّارث يتْعجّب ذِي نّفْس نّس عْلَاحْسَاب مِين يوقْعن. سِيذِيثْنغ عِيْسَى يمْظهَّار-د خ وبْرِيذ ن دْشَار ن عِينْوَاس 13 نْهَار نِّي، ثْنَاين ن يمحْضَارن نّس تْرَاحن غَار يِجّن ن دْشَار قَّارن-اَس عِينْوَاس. ئِݣّْوج خ ثنْذِينْت ن لْقُدْس يجّن ن حِيطَاش ن كِيلُوْمِت. 14 سَّاوَاڒن جَارَاسن خ ثْمسْڒَايِين يوقْعن. 15 وَامِي سَّاوَاڒن تمْنَاقَاشن يمڒْقَا اَكِذْسن عِيْسَى نتَّا س يِيخف نّس يبْذَا يݣُّوْر اَكِذْسن. 16 وَلَكِن نِثْنِي وَار يتْوَاسْمِيح شَا اَث عقْڒن. 17 ينَّا-ٱسن عِيْسَى: "مِين يعْنَا مَانَايَا إِي خف ثسَّاوَاڒم اَمُّو وَامِي ثُوْݣُّوْرم ذݣ وبْرِيذ؟" بدّن، ئِبَان لْحُزن خ وُوْذم نْسن. 18 ئِنْدق-د يجّن زَّايْسن قَّارن-اَس كْلُوْپَـاس ينَّا-ٱس: "مَا ذ شك وَاحْذش ذَانِيتَا إِي د يزُوْرن غَار لْقُدْس ذݣ وُوْسَّان-أَ قَا وَار ثسِّينذ شَا مِين يوقْعن؟!" 19 ينَّا-ٱسن عِيْسَى: "مِين يوقْعن ذِنِّي؟" نَّان-اَس: "قَا عِيْسَى نَاصِرِي تُوْغَا يدْجَا ذ يجّن ن نَّبِي غَارس جّْهذ ذِي مِين يتݣّ ذ مِين يقَّار زَّاث إِ أَربِّـي ذ مَارَّا يوْذَان. 20 طّْفن-ث اَرُّوْيَاس ن ڒْفُقَهَا ذ لْحُكَّام نّغ سلّْمن-ث اَث نْغن، صلّْبن-ث. 21 نشِّين تُوْغَا نتْمنَّا بلِّي ذ نتَّا إِي غَا يسْنجْمن أَيْث-إِسْرَائِيل! نْهَارَا ذ وِيس ثڒْتِيَّام زݣ وَامِي يوْقع مَانَايَا. 22 عَاوذ ذِنِّي شَان ثمْغَارِين زَّايْنغ جِّينْت-اَنغ نسْتْعجّب مِينْزِي رُوْحنْت غَار ونْضڒ زِيش 23 وَار ذِنِّي ؤُفِينْت شَا دَّات نّس. ذوْڒنْت-يد، نَّانْت-اَنغ بلِّي مظْهَارنْت-يذ لْمَلَائِكَاث خبَّرنْت-ثنْت بلِّي اَقَاث يدَّر. 24 ڒخْدّنِّي رُوْحن شَان يوْذَان زَّايْنغ غَار ونْضڒ نّس، ؤُفِين نِيشَان مَامْش ذَانغ نَّانْت ثمْغَارِين نِّي، وَلَكِن نتَّا وَار ث ؤُفِين شَا ذِنِّي." 25 ينَّا-ٱسن عِيْسَى: "آ يِنِّي وَار يفْهِيمن شَا! آ يِنِّي وَار يتِيمْنن شَا ذغْيَا ذِي مَارَّا مِين نَّان لْأَنْبِيَا! 26 تُوْغَا يتْخصَّا إِ لْمَسِيح اَذ يعدّب، سّنِّي اَذ يَاذف غَار لْعَظَمَا نّس." 27 ذِنِّي يبْذَا-يَاسن عِيْسَى زِي شَّرِيعَا ن مُوْسَى ذ لْكُتُب ن مَارَّا لْأَنْبِيَا يسفْهم-يثن مِين خَاس يُوْرِين ذِي مَارَّا لْكُتُب نِّي. 28 قَارّْبن غَار دْشَار اِي غَار تْرَاحن، عِيْسَى يݣَّا يخف نّس اَخْمِي يخس اَذ يكمّڒ خ وبْرِيذ نّس. 29 وَلَكِن بْذَان نِثْنِي تحْشَامن-ث نَّان-اَس: "قِّيم اَكِذْنغ مِينْزِي عْڒَاين ذ ثَمدِّيث قَا يرُوْح ڒْحَاڒ." سّنِّي يُوْذف غَارْسن حمَا اَكِذْسن يسنْس. 30 وَامِي اَكِذْسن يقِّيم اَذ يشّ، ئِكَّر ييْسِي اَغْرُوْم يشكَّر أَربِّـي يرْزِي-ث يبْذَا يفَرّق-اَسن-ث. 31 ذِنِّي إِي نُوْرْزْمنْت ثِيطَّاوِين نْسن عقْڒن-ث، وَلَكِن نتَّا ينرْفع وَار يقِّيم شَا اَث ࢲرّن. 32 نَّان إِ وَايَاوْيَا: "نشِّين نسْحِسَّا شَان ڒْحَاجث ثشَّاث ذݣ وُوْڒَاون نّغ وَامِي تُوْغَاث يسَّاوَاڒ اَكِذْنغ ذݣ وبْرِيذ يسفْهم-اَنغ لْكُتُب." 33 ڒخْدّنِّي كَّرن ذوْڒن غَار لْقُدْس. ؤُفِين حِيطَاش ن اَرُّسُل ذ يِنِّي إِي كِذْسن يمُوْنن ذِنِّي. 34 نَّان-اَسن: "مَانَايَا ذ صَّح! ئِكَّر-د سِيذِيثْنغ زِي ڒْموْث، تُوْغَا يبَان-د إِ سِمْعَان!" 35 تْخبَّرن-ثن س مِين يوقْعن ذݣ وبْرِيذ ذ مَامّش سّْنن سِيذِيثْسن وَامِي يرْزَا اَغْرُوْم. سِيذِيثْنغ عِيْسَى يمْضهَّار-د إِ يمحْضَارن نّس 36 وَامِي سَّاوَاڒن خ مَانَايَا يُوْسَا-د عِيْسَى يبدّ ذِي ڒْوسْط نْسن ينَّا-ٱسن: "سْڒَام خَاوم." 37 ݣّْوْذن اَطَّاس تْغِير-اَسن اَقَا تْوَاڒَان شَان ڒخْيَاڒ. 38 ينَّا-ٱسن: "مِين كنِّيو يُوْغِين ثنْخڒْعم؟ مَايمِّي ؤُڒَاون نْوم ذَايْسن شّكّ؟ 39 خْزَرم يفَاسّن ينُو ذ يضَارن ينُو، أَقَا ذ نّش. حَذَام-اَيِي، خْزَرم. أَقَا ڒخْيَاڒ وَار ذَايس بُو ويْسُوْم ؤُڒَا ذ يِخْسَان اَمُّو إِي ذَايِي تْوَاڒَام نش." 40 ينَّا-ٱسن مَانَايَا، ئِسْبيّن-اَسن-د يفَاسّن نّس ذ يضَارن نّس. 41 نِثْنِي قِّيمن عَاذ وَار ؤُمِينن شَا مِين يوقْعن مِينْزِي فَرّْحن ذهّْشن. أُوْشَا ينَّا-ٱسن: "مَا ذَا شَان لْمَكْلَا اَت شّغ؟" 42 ؤُشِين-اَس شْوَايْت ن يسڒْمَان شنْفن. 43 ئِيْسِي-ت، ئِشِّي-ت زَّاثْسن. 44 ينَّا-ٱسن: "ذ وَا ذ اَوَاڒ إِي زِي كِذْوم سِّيوْڒغ وَامِي عَاذ تُوْغَا دْجِيغ اَكِذْوم، يعْنِي لَابُد اَذ يكمّڒ مَارَّا مِين خَافِي يُوْرِين ذِي شَّرِيعَا ن مُوْسَى ذ لْكُتُب ن لْأَنْبِيَا ذ زَّبُوْر." 45 ڒخْدّنِّي يرْزم عِيْسَى ڒَعْقُوْڒَاث نْسن حمَا اَذ فهْمن لْكُتُب. 46 ينَّا-ٱسن: "أَمُّو إِي يُوْرَا ذِي لْكِتَاب قَا يتْخصَّا إِ لْمَسِيح اَذ يتْوَاعدّب اَذ د يكَّر زِي ڒْموْث وِيس ثڒْتِيَّام. 47 أَذ بشَّرن مَارَّا ڒݣْنُوْس حمَا اَذ تُوْبن اَذ تْوَاغْفَرنْت ڒْمُعْصِيَاث نْسن س يِيسم ن لْمَسِيح. أَذ يبْذَا مَانَايَا ذِي لْقُدْس. 48 كنِّيو اَقَا ثشهّْذم خ مَانَايَا. 49 أَتَاف مِينْذِي كنِّيو يوْعذ بَابَا اَذَاوم ثِيذ سّكّغ نش. قِّيمم ذِي ثنْدِينْت-أَ اَڒ خَاوم د غَا يهْوَا جّْهذ زݣ وجنَّا." سِيذِيثْنغ عِيْسَى يتْوَارْفع غَار وجنَّا 50 ئِسُوْفغ-يثن زِي ثنْدِينْت يُوْوِي-ثن غَار بَيْت عَنْيَا. ئِسْݣَعّذ يفَاسّن نّس يبَرك-يثن. 51 وَامِي ثن يتْبَرَاك، ئِتْݣَعَّاذ خَاسن يتْوَارْفع غَار وجنَّا. 52 سجّْذن-اَس، ذوْڒن-د غَار لْقُدْس نِثْنِي فَرّْحن اَطَّاس. 53 سّنِّي قِّيمن ذِي ثمْزِيذَا ثَمقّْرَانْت حمّْذن أَريِّي. |