لوقا 23 - ثريفيث 2020

تَاوِين سِيذِيثْنغ عِيْسَى غَار لْحَاكم بِيلَاطُوْس

¹ كَّرن مَارَّا إِذْسن ؤُوِين عِيْسَى اَث سلّْمن إِ لْحَاكم بِيلَاطُوْس.

² بْذَان تْتَاهْمن-ث نَّان: "نُوْفِي-ث يتݣّ لْبلْبَلَا ذِي شَّعْب. ئِقَّار-اَسن وَار تِيشّث بُو ضَّرِيبَا إِ وزدْجِيذ قَيْصَر. نتَّا يحسّب يخف نّس ذ لْمَسِيح يعْنِي ذ يجّن ن وزدْجِيذ."

³ ئِسّقْسَا-ث بِيلَاطُوْس ينَّا-ٱس: "مَا ذ شك ذ اَزدْجِيذ ن أَيث-إِسْرَائِيل؟" ينَّا-ٱس عِيْسَى: "أَقَا ثنِّيذ-ت شك."

⁴ ينَّا-ٱسن بِيلَاطُوْس إِ اَرُّوْيَاس ن ڒْفُقَهَا ذ ڒْغَاشِي نِّي: "وَار خَاس تِيفغ بُو شَان تُّهْمث خ وثَرَّاس-أَ."

⁵ وَلَكِن نِثْنِي زيَّارن خَاس اَطَّاس نَّان-اَس: "ئِتݣّ ڒْفِتْنَا ذِي مَارَّا ثَمُوْرْث ن يَهُوْذِيَا س وسڒْمذ نّس. ئِبْذَا ذِي ثْمُوْرْث ن لْجَلِيل، ڒخُّو اَقَاث ذَا."

⁶ وَامِي يسْڒَا بِيلَاطُوْس بلِّي نَّان لْجَلِيل ينَّا-ٱسن: "مَا اَرْيَاز-أَ زِي ثْمُوْرْث ن لْجَلِيل؟"

⁷ وَامِي يسّن بلِّي عِيْسَى زِي ثْمُوْرْث نِّي مَانِي يتحْكَام هِيرُوْدُس، ئِكَّر يسّكّ-يث غَار هِيرُوْدُس يدْجَان نتَّا س يِيخف نّس ذِي ثنْدِينْت ن لْقُدْس ذِي ڒْوقْث نِّي.

تَاوِين سِيذِيثْنغ عِيْسَى غَار وزدْجِيذ هِيرُوْدُس

⁸ وَامِي يࢲْرَا هِيرُوْدُس عِيْسَى يفَرح اَطَّاس. تُوْغَا يخس اَث يࢲر اَطَّاس زݣ وَامِي. وَامِي خَاس يسْڒَا يتْمنَّا اَذ يݣّ عِيْسَى شَان لْمُعْجِيزَا زَّاثس.

⁹ ئِسّقْسَا-ث اَطَّاس وَلَكِن عِيْسَى وَار خَاس د يَارِّي شَا قَاع.

¹⁰ أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا بدّن ذِنِّي تَهَامن-ث اَطَّاس.

¹¹ ئِحݣَّار-يث هِيرُوْدُس ذ ڒْعَسْكَار نّس ضحّْشن خَاس. يݣَّا خَاس اَسڒْهَام ذ اَصبْحَان، يَارِّي-ث غَار بِيلَاطُوْس.

¹² قْبڒ، بِيلَاطُوْس ذ هِيرُوْدُس تُوْغَا ذِين لْعَدَاوَا جَارَاسن وَلَكِن ڒخُّو ذوْڒن ذ يمدُّوْكَاڒ ذِي نْهَار نِّي.

لْحَاكم بِيلَاطُوْس يرزُّو اَذَاس د يضْڒق إِ سِيذِيثْنغ عِيْسَى

¹³ ئِڒَاغَا-د بِيلَاطُوْس خ اَرُّوْيَاس ن ڒْفُقَهَا ذ لْحُكَّام ن أَيث-إِسْرَائِيل ذ مَارَّا شَّعْب.

¹⁴ ينَّا-ٱسن: "كنِّيو ثُوْوِيم-اَيِي-د بْنَاذم-أَ ثنِّيم-اَيِي قَا يتݣّ ڒْفِتْنَا جَار يِوْذَان. نش خمّْمغ ذِي ثْمسْڒَايْث-أَ زَّاثْوم. وَار ذَايس ؤُفِيغ ذݣ وثَرَّاس-أَ بُو شَان تُّهْمث عْلَاحْسَاب مِين ثقَّارم كنِّيو.

¹⁵ ؤُڒَا ذ هِيرُوْدُس وَار ذَايس يُوْفِي وَالُو مِينْزِي يَارَّا-اَنغ-ث-يد. خْزَرث، عِيْسَا-يَا وَار يݣِّي مِين خف يسْذَاهدْج ڒْموْث.

^16-17 أَذَاس ؤُشغ اَعْمُوْذ اَذَاس د ضڒْقغ."

¹⁸ ئِسْنكَّر ثْغُوْيّث مَارَّا شَّعْب نَّان-اَس: "إِيْسِي خَانغ وَانِيتَا، ضْڒق-اَنغ-د إِ بَارَابَاس."

¹⁹ بَارَابَاس-أَ تُوْغَا ݣِّين-ث ذِي ڒحْبس عْلَاحْسَاب يِجّن ن ڒْفَوْضَا ثوْقع ذِي ثنْدِينْت، عَاوذ عْلَاحْسَاب يجّن ن لْجَرِيمَا ن ڒْموْث.

²⁰ بِيلَاطُوْس يخس اَذ د يضْڒق إِ عِيْسَى، ئِسِّيوڒ اَك شَّعْب ثْوَاڒَا نّغْنِي.

²¹ نِثْنِي سْنكَّرن ثْغُوْيّث نَّان-اَس: "صلّب-يث! صلّب-يث!"

²² ئِسِّيوڒ اَكِذْسن وِيس ثڒْت-مَرَّاث ينَّا-ٱسن: "مَايمِّي؟ مَان لْجَرِيمَا إِݣ يݣَّا وَانِيتَا؟ نش وَار ذَايس ؤُفِيغ بُو شَان تُّهْمث إِي خف غَا يسْذَاهدْج ڒْموْث. نش اَذَاس ؤُشغ اَعْمُوْذ اَذَاس د ضڒْقغ."

²³ نِثْنِي سْنكَّرن ثْغُوْيّث س جّْهذ حمَا اَث يصلّب، صَافِي ثْغُوْيّث نْسن ثقْڒب-اَس اَرَّاي.

²⁴ ئِكَّر بِيلَاطُوْس يحْكم س مِين خْسن نِثْنِي.

²⁵ ئِضْڒق-د إِ ونِّي يدْجَان ذِي ڒحْبس خ سَّبَاب ن ڒْفَوْضَا ذ لْجَرِيمَا ن ڒْموْث، ئِسلّم-اَسن عِيْسَى حمَا اَذَاس ݣّن مِين خْسن.

تَاوِين سِيذِيثْنغ عِيْسَى اَث صلّْبن

²⁶ وَامِي ؤُوِين عِيْسَى اَث صلّْبن، طّْفن يجّن ن ورْيَاز زِي ثنْدِينْت ن لْقُرِينَا قَّارن-اَس سِمْعَان، أَرْيَاز-أَ يكَّا-د زِي ڒْكَامْپُـو يعْذُو-د سّنِّي. سَرْبُوْن-اَس ڒْعَسْكَار صَّلِيب حمَا اَث يَرْبُو اَذ يذْفَار عِيْسَى.

²⁷ ذْفَارن-ث اَطَّاس ن ڒْغَاشِي، ثِمْغَارِين حزْننْت تْرُوْنْت خَاس.

²⁸ ئِنقْڒب-د غَارْسنْت عِيْسَى ينَّا-ٱسنْت: "آي يسِّيس ن لْقُدْس وَار خَافِي تْرُونْت شَا، رُوْنْت خ يِيخف نْكنْت ذ ثَارْوَا نْكنْت.

²⁹ أَذ د تَاس يجّن ن ڒْوقْث اَذَايس ينِين: سَّعْذ نْسنْت ن ثِنِّي وَار يزمَّرن شَا اَذ اَرْونْت ذ ثِنِّي عمَّارْص وَار ؤُرِيونْت شَا ذ ثِنِّي عَمَّارْص وَار سُّوْطْضنْت شَا.

³⁰ أَذ بْذَان اَذ ينِين إِ يذُوْرَار وْضَام-د خَانغ، أَذ ينِين إِ ثعْرُوْرِين قْبَارنْت-يد خَانغ.

³¹ مڒَا يوْذَان-أَ يِيْنَا ݣِّين مَانَايَا إِ ثْشجَّارْث ذ ثَزيْزَاوْث، مِين ذَاس غَا يوقْعن خْمِي غَا ثَازغ؟"

³² عَاوذ ؤُوِين-د ثْنَاين نّغْنِي ذ لْمُجْرِمِين حمَا اَكِذس تْوَانْغن.

ئِرُوْمَانِيْين تْصلَّابن سِيذِيثْنغ عِيْسَى خ صَّلِيب

³³ وَامِي ؤُوْضن غَار ومْشَان نِّي ؤُمِي قَّارن جُمْجُمَا، صلّْبن-ث ذِنِّي اَك ثْنَاين نِّي ن لْمُجْرِمِين، ئِجّن خ وفُوْسِي يجّن خ وࢲڒْمَاذ.

³⁴ ينَّا عِيْسَى: "آ بَابَا، غْفَر يوْذَان-أَ قَا وَار سِّينن شَا مِين تݣّن." ڒْعَسْكَار نِّي ݣِّين لْقُرْعَا خ وَارُّوْض نّس حمَا كُڒ يجّن مِين غَا ييْسِي.

³⁵ ئِوْذَان بدّن ذِنِّي خزَّارن ذَايس، أَرُّوْيَاس تْبُوْصَارن خَاس قَّارن: "مڒَا ذ صَّح نتَّا ذ لْمَسِيح إِي يخْضَر أَربِّـي اَتَاف اَذ يسنْجم يخف نّس مِينْزِي يسنْجم ينّغْنِي."

³⁶ عَاوذ ؤُڒَا ذ ڒْعَسْكَار ضحّْشن خَاس، قَارّْبن غَارس ؤُشِين-اَس اَمَان وضِيڒ ذ يسمَّامن.

³⁷ نَّان-اَس: "مڒَا شك ذ اَزدْجِيذ ن أَيث-إِسْرَائِيل سنْجم يخف نّش."

³⁸ غَار وزدْجِيف نّس ݣِّين-اَس يجّن ن ثڒْوِيحت ثُوْرَا ذَايس: وَانِيتَا ذ اَزدْجِيذ ن أَيث-إِسْرَائِيل.

³⁹ ئِجّن زِي لْمُجْرِمِين نِّي إِي كِذس صلّْبن يبْذَا يتْزَوَر-يث يقَّار-اَس: "شك مَا ذ لْمَسِيح مَا لَّا؟ يَالَّاه، نجَّا يخف نّش نجَّا-يَانغ."

⁴⁰ ئِنْهَا-ث ونِّي نّغْنِي ينَّا-ٱس: "شك مَا وَار تݣّْوِيذذ شَا أَربِّـي؟ قَا حكّْمن خَاك اَمشْنَاو نتَّا.

⁴¹ نشِّين حكّْمن خَانغ نِيشَان، نسْذَاهدْج لْحُكم-أَ عْلَاحْسَاب مِين نݣَّا. وَلَكِن اَرْيَاز-أَ وَار يݣِّي شَا مِينْخف."

⁴² ڒخْدّنِّي ينَّا-ٱس: "عْقڒ خَافِي آ عِيْسَى خْمِي د غَا ثَاسذ غَار ڒْمُلْك نّش."

⁴³ ئِنْدق-د عِيْسَى ينَّا-ٱس: "أَقَا تسْڒِيذ ڒْحَقّ: نْهَارَا اَذ تِيڒِيذ اَكِذِي ذِي جّنّث."

سِيذِيثْنغ عِيْسَى يمُّوْث خ صَّلِيب

⁴⁴ غَار ثنْعَاش ن وزِيڒ، ثهْوَا-د ثَادْجسْت خ ثْمُوْرْث اَمن-ثكْمَاڒ اَڒ وَامِي ذ ثْڒَاثَا وعشِّي.

⁴⁵ ثْفُوْشْت ثْرُوْح-اَس ثْفَاوْث نّس، ئِقَّارص اَرّْوَاق ن ثمْزِيذَا ثَمقّْرَانْت خ ثْنَاين.

⁴⁶ ئِڒَاغَا عِيْسَى س يِجّن ن ثْمِيجَّا ثجْهذ ينَّا: "آ بَابَا، نش بُوْحْبڒ ينُو سلّْمغ-اَش-ث ذݣ يفَاسّن نّش." وَامِي ينَّا مَانَايَا يَارَّا نّفْس صَافِي يمُّوْث.

⁴⁷ أَعَسْكَارِي نِّي اَمقّْرَان ن اَرُّوْمَانُوْس إِي يدْجَان ذِنِّي وَامِي يࢲْرَا مِين يوقْعن يبْذَا يسمْغَار أَربِّـي ينَّا: "أَثَرَّاس-أَ ذ صَّح بَرِيء إِي يدْجَا."

⁴⁸ مَارَّا يوْذَان إِي ذِنِّي يمُوْنن وَامِي ࢲْرِين مِين يوقْعن، تْروَّاحن-د شَّاثن ذݣ وُوْڒَاون نْسن.

⁴⁹ مَارَّا يمْعَشَارن نّس ذ ثمْغَارِين إِي ث يذْفَارن زِي لْجَلِيل بدّن غَار ڒݣّْوَاج ࢲْرِين مَانَاينِّي.

نطّْڒن سِيذِيثْنغ عِيْسَى

⁵⁰ ذِنِّي يجّن ن ورْيَاز قَّارن-اَس يُوْسف زِي جْمَاعث ن لْحُكَّام ن أَيث-إِسْرَائِيل، نتَّا ذ يجّن ن ورْيَاز يصْبَاح يدْجَان نِيشَان.

⁵¹ وَار يقبِيڒ شَا مِينْخف ثْتَافق جْمَاعث نِّي ذ مِين ثْخدّم. نتَّا زݣ وبِيلَاج ن أَرِيمَاتْيَا إِي يدْجَان ذِي ثْمُوْرْث ن يَهُوْذِيَا. ئِتْرحَّاب عَاوذ زِي ڒْمُلْك ن أَربِّـي.

⁵² ئِرُوْح غَار بِيلَاطُوْس يتَّار-اَس دَّات ن عِيْسَى.

⁵³ ئِرُوْح يُوْسف يسهْوَا-ت-يد. ئِكفّن-يت س ڒشْفن. ئِسرْس-يت ذݣ يِجّن ن ونْضڒ يغْزِين ذݣ وزْرُو يݣَّا اَم يِيفْرِي، عمَّارْص وَار ذَايس ينْضِيڒ حَدّ.

⁵⁴ نْهَار نِّي تُوْغَا ذ جّمْعَا، ئِسْرَائِيلِيْين سوْجَاذن إِ نْهَار ن سّبْث ن لْعِبَادَا إِي تُوْغَا عْڒَاين اَذ يبْذَا.

⁵⁵ ثِمْغَارِين نِّي إِي د يُوْسِين اَك عِيْسَى زِي لْجَلِيل ذْفَارنْت يُوْسف غَار ونْضڒ ࢲْرِينْت-ث ذ مَامْش ذَايس ينْضڒ دَّات نّس.

⁵⁶ ذوْڒنْت غَار ثدَّارْث سوْجَاذنْت لْعِيطَر ذ وَامَان ن لْوَرْذ. ذِي نْهَار ن لْعِبَادَا قِّيمنْت ريّْحنْت عْلَاحْسَاب ڒُوْصِيّث نِّي ن مُوْسَى.