لوقا 22 - ثريفيث 2020

يَهُوْذَا يتَافق اَذ يزّنْز سِيذِيثْنغ عِيْسَى

¹ ئِقَارّب-د ڒْعِيذ ن ثفْضِيرْث ؤُمِي قَّارن ڒْعِيذ اَمقّْرَان ن أَيث-إِسْرَائِيل.

² أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا رزُّوْن مَامّش ذَاس غَا ݣّن حمَا اَذ نْغن عِيْسَى وَلَكِن ݣّْوْذن زِي شَّعْب.

³ يُوْذف شِّيطَان ذݣ وُوْڒ ن يَهُوْذَا ونِّي ؤُمِي قَّارن إِسْخَرْيُوطِي، نتَّا زِي ثنْعَاش نِّي ن اَرُّسُل.

⁴ ئِكَّر يرُوْح اَذ يتَافق اَك اَرُّوْيَاس ن ڒْفُقَهَا ذ يمقّْرَانن ن يعسَّاسن ن ثمْزِيذَا ثَمقّْرَانْت ن أَيث-إِسْرَائِيل خ مَامْش غَا يݣّ اَذَاسن يزّنْز عِيْسَى.

⁵ فَرْحن، وعْذن-ث اَذَاس ؤُشن تْمنْيَاث.

⁶ سّنِّي يوَافق نتَّا، يرزُّو لْفُرْصَا مَامّش إِي غَا يݣّ اَذ يزّنْز عِيْسَى بْڒَا مَا ٱكِذس يِيڒِي شَّعْب.

سِيذِيثْنغ عِيْسَى ذ يمحْضَارن نّس تتّن اَمنْسِي ن ڒْعِيذ

⁷ يُوْوض-د نْهَار ن ڒْعِيذ ن ثفْضِيرْث نْهَار نِّي إِي ذِي غَرّْصن إِ ڒْعِيذ.

⁸ ئِرُوْح عِيْسَى يسّكّ بُطْرُس ذ يُوْحَنَّا ينَّا-ٱسن: "رُوْحم سْوجْذم-اَنغ اَمنْسِي ن ڒْعِيذ اَمقّْرَان حمَا اَث نشّ."

⁹ نَّان-اَس: "مَانِي ثخْسذ اَ نْرَاح اَث نْسوْجذ؟"

¹⁰ ينَّا-ٱسن: "خْمِي غَا ثَاذْفم غَار ثنْدِينْت، أَكِذْوم يمڒْقَا يجّن ن ورْيَاز ييْسِي-د اَقْنُوْش ن وَامَان، ذْفَارم-ث غَار ثدَّارْث مَانِي غَا يَاذف.

¹¹ إِنِيم-اَس إِ بَاب ن ثدَّارْث نِّي: قَا ينَّا-ٱش لْمُعَلِّم، مَانِي يدْجَا وخَّام ن ينوْجِيون إِي ذِي غَا عيّْذغ نش ذ يمحْضَارن ينُو؟

¹² أَكنِّيو يَاوِي غَار يِجّن ن ثْغُوْرْفَات ذ ثَمقّْرَانْت ثسُّو، ثعْذڒ. ذِنِّي إِي ذَانغ غَا ثسْوجْذم."

¹³ رُوْحن ؤُفِين نِيشَان مَامْش ذَاسن ينَّا. صَافِي سْوجْذن اَمنْسِي ن ڒْعِيذ.

¹⁴ وَامِي د تُوْوض ڒْوقْث، يُوْسَا-د عِيْسَى يقِّيم غَار مِيسَّا اَذ يشّ اَك اَرُّسُل نّس.

¹⁵ ينَّا-ٱسن: "مشْحَاڒ نش تُوْغَا تْرَاجِيغ اَكِذْوم مُوْنْسْوغ ذِي ڒْعِيذ اَمقّْرَان-أَ قْبڒ إِي غَا تْوَاعدّْبغ.

¹⁶ أَقَا قَّارغ-اَوم: زِي سَّا اَڒ ثْسَاونْت وَار زَّايس تتّغ شَا اَڒ غَا يوْقع ذِي ڒْمُلْك ن أَريِّي."

¹⁷ ئِيْسِي-د عِيْسَى ڒْكَاس يشكَّر أَربِّـي ينَّا-ٱسن: "إِيْسِيم ڒْكَاس-أَ، فرْقم-ث جَارَاوم.

¹⁸ أَقَا قَّارغ-اَوم: زِي سَّا اَڒ ثْسَاونْت وَار سسّغ شَا زݣ وَامَان-أَ ن وضِيڒ اَڒ د غَا يَاس ڒْمُلْك ن أَربِّـي."

¹⁹ ئِيْسِي اَغْرُوْم يشكَّر أَربِّـي يرْزِي-ث يُوْشَا-ٱسن-ث ينَّا-ٱسن: "ذ وَا إِݣ يدْجَان ذ دَّات ينُو إِي غَا يمُّوْشن عْلَاحْسَاب كنِّيو. تݣّث مَانَايَا حمَا اَذَايِي ثْفكَّرم."

²⁰ أَمُّو عَاوذ منْبَعْد إِ ومنْسِي ييْسِي-د ڒْكَاس ينَّا-ٱسن: "ڒْكَاس-أَ ذ ڒْعَهذ ذ جْذِيذ إِي كِذْوم تݣّغ س يذَامّن ينُو اَذ اَزّْڒن عْلَاحْسَاب كنِّيو."

²¹ ينَّا-ٱسن: "وَلَكِن ونِّي يرزُّوْن اَذَايِي يزّنْز فُوْس نّس اَقَاث اَكِذِي خ مِيسَّا.

²² مِّيس ن بْنَاذم اَذَاس يوْقع عْلَاحْسَاب مَامْش خَاس يقَّار لْكِتَاب، وَلَكِن يَا ڒفْضِيحث ن بْنَاذم نِّي إِي ث غَا يزّنْزن."

²³ بْذَان يمحْضَارن سَّاوَاڒن جَارَاسن قَّارن، مَانْون زَّايْنغ إِي غَا يݣّن مَانَايَا؟

ؤُݣ يدْجَان ذ اَمقّْرَان؟

²⁴ تْمنْغَان عَاوذ اَك وَايَاوْيَا عْلَاحْسَاب ونِّي يحسّْبن زَّايْسن ذ اَمقّْرَان.

²⁵ ينَّا-ٱسن عِيْسَى: "ئِزدْجِيذن ن ڒݣْنُوْس حكّْمن خ شُّعُوْب نْسن. لْحُكَّام نْسن قَّارن-اَسن سَّادَات.

²⁶ وَلَكِن مَانَاينِّي يتْخصَّا وَار يتِيڒِي شَا جَارَاوم؛ لَّا، ونِّي يدْجَان ذ اَمقّْرَان جَارَاوم يتْخصَّا-يَاس اَذ يِيڒِي اَم ومزْيَان نْوم ذ ونِّي يحكّْمن يتْخصَّا-يَاس اَذ يِيڒِي اَم ونِّي يتْسخَّارن.

²⁷ ؤُݣ يدْجَان ذ اَمقّْرَان؟ مَا ذ ونِّي يقِّيمن اَذ يشّ نِغ ذ ونِّي إِي خَاس يتْسخَّارن؟ يَاش ذ ونِّي يقِّيمن اَذ يشّ نِغ لَّا؟ وَلَكِن نش اَقَايِي اَكِذْوم اَم ونِّي إِي خَاوم يتْسخَّارن.

²⁸ ذ كنِّيو إِي كِذِي يصْبَارن ذِي ڒمْحَاين ينُو.

²⁹ مَامش ذَايِي يُوْشَا بَابَا يجّن ن ڒْمُلْك إِ نش، ؤُڒَا ذ نش اَذَاوم ؤُشغ يجّن ن ڒْمُلْك.

³⁰ يعْنِي ذِي ڒْمُلْك ينُو اَذ تقِّيمم اَكِذِي غَار مِيسَّا اَذ تشّم اَذ تسْوم. أَذ تقِّيمم خ ڒْعَرْشَاث حمَا اَذ تْحكْمم خ ثنْعَاش ن ثْقبَّاڒ ن أَيْث-إِسْرَائِل."

سِيذِيثْنغ عِيْسَى يسَّاوَاڒ خ ونْكَر ن بُطْرُس

³¹ ينَّا-ٱس عِيْسَى: "خْزَر آ سِمْعَان: شِّيطَان يرْزُّو اَكنِّيو يغَرْبڒ اَم مَامّش تْغَارْبَڒن يرْذَان.

³² تتَّارغ اَكِذش غَار سِيذِي أَربِّـي حمَا لإِيمَان نّش وَار ينقّص شَا. خْمِي غَارِي د غَا ثْذوْڒذ، شجّع اَيْثْمَاش."

³³ ينَّا-ٱس بُطْرُس: "آ سِيذِي، أَقَايِي اَكِذش وجْذغ مڒَا ثُوْذْفذ ڒحْبس اَكِذش اَذْفغ، مڒَا ثمُّوْثذ اَكِذش مّْثغ."

³⁴ يَارَّا خَاس عِيْسَى ينَّا-ٱس: "أَذَاش ينِيغ آ بُطْرُس: قْبڒ مَا ٱذ يدّن ويَازِيض نْهَارَا اَتَاف اَذَايِي ثنْكَرذ ثْڒَاثَا ن ثْوَاڒَاثِين وَار ذَايِي ثسِّينذ شَا."

³⁵ ڒخْدّنِّي ينَّا-ٱسن عِيْسَى إِ يمحْضَارن نّس: "وَامِي كنِّيو سّكّغ بْڒَا ثَزعْبُوْڒْث، بْڒَا اَقْرَاب، بْڒَا ثِسِيڒَا، مَا يخصِّي-كنِّيو شَا؟" نَّان-اَس: "لَّا."

³⁶ ينَّا-ٱسن: "ڒخُّو ونِّي غَار ثدْجَا شَان ثْزعْبُوْڒْث نِغ شَان وقْرَاب اَث ييْسِي. ونِّي وَار غَار يدْجِي شَا سِّيف، أَذ يزّنز اَرُّوْض نّس اَث يسغ.

³⁷ أَذَاوم ينِيغ: أُو لَابُد اَذَايِي يوْقع مِين يُوْرِين ذِي لْكِتَاب عْلَاحْسَاب مَامش يقَّار: <حسْبن-ث اَك لْمُجْرِمِين.> إِيوَا مِين خَافِي يُوْرِين صَافِي اَذ يوْقع."

³⁸ نَّان-اَس: "أَقَا غَارْنغ ثْنَاين ن ڒسْيُوْف آ سِيذِي." ينَّا-ٱسن: "وَاه، صَافِي."

سِيذِيثْنغ عِيْسَى يتْࢲَادْجَا ذݣ وذْرَار ن زِّيتُوْن

³⁹ ئِفّغ عِيْسَى اَم ڒبْدَا يرُوْح غَار وذْرَار ن زِّيتُوْن، ذْفَارن-ث عَاوذ يمحْضَارن نّس.

⁴⁰ وَامِي يُوْوض غَار ومْشَان نِّي ينَّا-ٱسن: "ࢲَّادْجم حمَا وَار تِيذْفم شَا ذِي ڒمْحَاين."

⁴¹ ئِبعّذ خَاسن شْوَايْت، ئِسجّذ غَار ثْمُوْرْث يبْذَا يتتَّار إِ أَربِّـي.

⁴² ينَّا: "آ بَابَا، مڒَا ثخْسذ سْبعّذ-يث خَافِي ڒْكَاس-أَ ن ڒَعْذَاب. مَاشِي مَامْش خْسغ نش؛ لَّا، مَامْش يخس ڒْخَاضَر نّش شك."

⁴³ ڒخْدّنِّي ثْبدّ-د غَارس يجّن ن لْمَلَائِكَا زݣ وجنَّا حمَا اَذَاس ثُوْش جّْهذ.

⁴⁴ ئِخيّق وُوْڒ نّس يَرْنِي يتْࢲَادْجَا كْتَر عَاذ، ثِيذِي نّس ثهْوَا-د زَّايس غَار ثْمُوْرْث ثݣَّا اَم ثْنقِّيضِين ن يذَامّن نِيشَان.

⁴⁵ وَامِي يكمّڒ ثْࢲَادْجِيث نّس، ئِذْوڒ غَار يمحْضَارن نّس يُوْفِي-ثن طّْصن س لْحُزن.

⁴⁶ ينَّا-ٱسن: "مَايمِّي تطّْصم؟ كَّرم، ࢲَّادْجم حمَا وَار تِيذْفم شَا ذِي ڒمْحَاين."

أَيث-إِسْرَائِيل ذ يرُوْمَانِيْين تطّْفن سِيذِيثْنغ عِيْسَى

⁴⁷ يَالَّاه عِيْسَى يسَّاوَاڒ يُوْوض-د يَهُوْذَا، ئِجّن زِي ثنْعَاش ن اَرُّسُل نّس. يُوْوِي-د اَكِذس ڒْغَاشِي اَطَّاس، ئِقَارّب غَارس حمَا اَخَاس يسدْجم خ وغمْبُوْب نّس.

⁴⁸ ينَّا-ٱس عِيْسَى: "مَا س سْڒَام-أَ إِي زِي غَا ثْزّنْزذ مِّيس ن بْنَاذم آ يَهُوذَا؟"

⁴⁹ وَامِي ࢲْرِين يمحْضَارن مَانَايَا نَّان-اَس: "آ سِيذِي، مَا أَ نُوْوث س سِّيف؟"

⁵⁰ ئِجّن زݣ يِنِّي ذِنِّي يدْجَان يُوْوْثَا يسْمغ ن اَرَّايس ن ڒْفُقَهَا يقسّ-اَس اَمزُّوْغ اَفُوْسِي.

⁵¹ ينَّا-ٱسن عِيْسَى: "صَافِي، بدّث!" ئِحَاذَا اَمزُّوْغ ن ورْيَاز نِّي يسْݣنْفَا-ث.

⁵² ينَّا-ٱسن عِيْسَى إِ اَرُّوْيَاس ن ڒْفُقَهَا ذ يمقّْرَانن ن يعسَّاسن ن ثمْزِيذَا ثَمقّْرَانْت ذ يمقّْرَانن ن أَيث-إِسْرَائِيل إِي غَارس د يُوْسِين: "مَا تْغِير-اَوم قَا نش ذ لْمُجْرِم وَامِي د ثيْسِيم ڒسْيُوْف ذ يدبُّوْزن حمَا اَذَايِي ثطّْفم نِغ؟

⁵³ تُوْغَا تْغِيمِيغ اَكِذْوم مْكُڒ نْهَار ذِي ثمْزِيذَا ثَمقّْرَانْت، وَار ذَايِي ثطِّيفم شَا. وَلَكِن ڒخُّو ذ ثْسَعَّات نْوم ذ جّْهذ ن ثَادْجسْث."

بُطْرُس ينكَّر سِيذِيثْنغ عِيْسَى

⁵⁴ طّْفن عِيْسَى، ؤُوِين-ث غَار ثدَّارْث ن اَرَّايس ن ڒْفُقَهَا سِيذْفن-ث. ئِذْفَار-يث بُطْرُس زي ڒݣّْوَاج.

⁵⁵ شعّْڒن ثِمسِّي ذِي ڒْوسْط ن ڒمْرَاح ن ثدَّارْث. قِّيمن ذِنِّي، ئِقِّيم اَكِذْسن بُطْرُس.

⁵⁶ ثࢲْرِي-ث يجّن ن ثْخدَّانْت يقِّيم زَّاث إِ ثْمسِّي، ثخْزَر ذَايس مْلِيح، ثنَّا-ٱسن: "بْنَاذم-أَ وَانِيتَا تُوْغَا يدْجَا اَكِذس."

⁵⁷ ئِنْكَر بُطْرُس ينَّا-ٱس: "آ ثَمْغَارْث، وَار ث سِّينغ شَا."

⁵⁸ منْبَعْد شْوَايْت يࢲْرِي-ث يجّن نّغْنِي ينَّا-ٱس: "شك ذ يجّن زَّايْسن؟" ينَّا-ٱس بُطْرُس: "آ بْنَاذم، نش لَّا!"

⁵⁹ وَامِي ثعْذُو شَان ثْسَعَّات ينَّا-ٱس يجّن نّغْنِي أُو نتَّا مْأَكّد: "ذ صَّح، أَثَرَّاس-أَ وَانِيتَا تُوْغَا يدْجَا اَكِذس مِينْزِي ؤُڒَا ذ نتَّا زِي لْجَلِيل."

⁶⁰ ينَّا-ٱس بُطْرُس: "آ بْنَاذم، نش وَار سِّينغ شَا مِينْخف ثسَّاوَاڒذ شك!" نتَّا وَامِي تُوْغَاث عَاذ يسَّاوَاڒ، ڒخْدّنِّي يدّن ويَازِيض.

⁶¹ ئِنقْڒب-د سِيذِيثْنغ يخْزَر غَار بُطْرُس، بُطْرُس يفكَّر-د اَوَاڒ نِّي إِي ذَاس ينَّا سِيذِيثْنغ: قْبڒ مَا ٱذ يدّن ويَازِيض اَتَاف اَذَايِي ثنْكَرذ ثْڒَاثَا ن ثْوَاڒَاثِين.

⁶² ئِفّغ غَار بَارَّا يرُو يمطَّاون ذ يمدْجَاحن اَطَّاس.

⁶³ بْذَان يِنِّي يحطَّان عِيْسَى ضحّْشن خَاس شَّاثن-ث.

⁶⁴ ڒحّْفن-اَس خ وغمْبُوْب نّس قَّارن-اَس: "إِوَا آ نَّبِي سِيوڒ، سّن ؤُو ش يُوْوْثِين زَّايْنغ!"

⁶⁵ اَرْنِين خ وَاوَاڒن نِّي، قَّارن-اَس ثِمسْڒَايِين نّغْنِي وَار يحْڒِين شَا.

سِيذِيثْنغ عِيْسَى زَّاث إ جْمَاعث ن لْحُكَّام ن أَيث-إِسْرَائِيل

⁶⁶ وَامِي يصْبح ڒْحَاڒ مُوْنن يمقّْرَانن ن أَيث-إِسْرَائِيل ذ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا، ؤُوِين عِيْسَى غَار جْمَاعث ن لْحُكَّام نْسن.

⁶⁷ نَّان-اَس: "مڒَا شك ذ لْمَسِيح إِنِي-يَانغ-ت!" ينَّا-ٱسن: "مڒَا نِيغ-اَوم-ت، كنِّيو اَتَاف وَار ذَايِي تِيمْنم شَا.

⁶⁸ مڒَا سّقْسِيغ-كنِّيو، أَتَاف وَار ذَايِي تْجِيوِيبم شَا.

⁶⁹ وَلَكِن زِي سَّا اَڒ ثْسَاونْت اَذ يقِّيم مِّيس ن بْنَاذم خ وفُوْسِي ن لْقَوِي."

⁷⁰ نَّان-اَس مَارَّا إِذْسن: "إِيوَا شك ذ مِّيس ن أَربِّـي بَعْدَا؟" ينَّا-ٱسن: "أَقَا ثنَّام-ث كنِّيو ذ نش."

⁷¹ ڒخْدّنِّي نَّان: "مَا عَاذ أَ نحْذَاج شَا ن ڒشْهُوْذ؟ نشِّين مَارَّا إِذْنغ نسْڒَا-يَاس مِين ينَّا نتَّا س وقمُّوْم نّس."