لوقا 20 - ثريفيث 2020

سُّلْطَا ن سِيذِيثْنغ عِيْسَى

¹ ئِجّن ن نْهَار ذݣ وُوْسَّان نِّي، عِيْسَى اَقَاث ذِي ثمْزِيذَا ثَمقّْرَانْت يسڒْمَاذ يوْذَان يتْبشَّار-يثن، ؤُسِين-د غَارس اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا ذ يمقّْرَانن ن أَيث-إِسْرَائِيل.

² كَّرن نَّان-اَس: "إِنِي-يَانغ شك، مَانِيس ذَاش د ثكَّا سُّلْطَا نِّي إِي زِي تݣّذ ثِمسْڒَايِين-أَ؟ وِي ذَاش يُوْشِين سُّلْطَا نِّي؟"

^3-4 ينَّا-ٱسن عِيْسَى: "ؤُڒَا ذ نش اَكنِّيو سّقْسِيغ خ يِجّن ن ثْمسْڒَايْث. إِنِيم-اَيِي: يَحْيَى، مَان سُّلْطَا إِي زِي يطهَّار س وَامَان، مَا زِي أَربِّـي مَا زݣ يِوْذَان؟"

⁵ مْشَوَارن جَارَاسن نَّان: "سُّلْطَا نِّي، مڒَا ننَّا-اَس قَا ثكَّا-د زِي أَربِّـي، أَتَاف اَذَانغ يِينِي عِيْسَى مَايمِّي وَار زَّايس ثُوْمِينم شَا؟

⁶ وَلَكِن مڒَا ننَّا-اَس سُّلْطَا نِّي قَا ثكَّا-د زݣ يِوْذَان، أَتَاف مَارَّا يوْذَان اَذَانغ رجْمن مِينْزِي ؤُمْنن بلِّي يَحْيَى ذ نَّبِي."

⁷ أُوشَا نَّان-اَس إِ عِيْسَى: "نشِّين وَار نسِّين شَا مَانِيس د ثكَّا سُّلْطَا نِّي نّس."

⁸ ئِنْدق-د عِيْسَى ينَّا-ٱسن: "إِيوَا ؤُڒَا ذ نش وَار ذَاوم قَّارغ شَا مَانِيس ذَايِي د ثكَّا سُّلْطَا-يَا إِي زِي تݣّغ ثِمسْڒَايِين-أَ."

ڒْمَعْنَا ن يخمَّاسن إِي ذِي يدْجَا شَّرّْ

⁹ ئِبْذَا عِيْسَى يسَّاوَاڒ اَك شَّعْب س ڒْمَعْنَا-يَا ثَانِيتَا ينَّا-ٱسن: "ئِجّن ن سِّيّد يࢲُّو اَضِيڒ ذݣ يِجّن ن ومَرْجع نّس، يجَّا ذَايس يخمَّاسن صَافِي يرُوْح يسَفَر اَطَّاس ن ڒْوقْث.

¹⁰ وَامِي د يُوْوض ڒْوقْث ن وڒْقض ن وضِيڒ، ئِكَّر يسّكّ يجّن ن وخدَّام نّس غَار يخمَّاسن نِّي بَاش اَذَاس د وْشن ڒْحَقّ نّس ن ومَرْجع ن وضِيڒ. وَلَكِن مِين ݣِّين يخمَّاسن نِّي؟ ؤُوْثِين-ث، سّكّن-ث-يد يخْوَا.

¹¹ ئِرُوْح يسّكّ-اَسن يجّن ن وخدَّام نّغْنِي، وَلَكِن ؤُڒَا ذ ونِّي ؤُوْثِين-ث عدّن خَاس سّكّن-ث-يد يخْوَا.

¹² ئِسّكّ-اَسن حتَّا ذ يج وخدَّام وِيس ثْڒَاثَا، ؤُڒَا ذ ونِّي جَرْحن-ث ؤُزّْڒن خَاس.

¹³ سّنِّي بَاب ن ومَرْجع ن وضِيڒ ينَّا، مِين غَا ݣّغ؟ صَافِي، نش اَذَاسن سّكّغ ممِّي يعِيزّن يمْكن اَث ݣّْوْذن.

¹⁴ ئِخمَّاسن نِّي مِين ݣِّين؟ وَامِي ؤُفِين مِّيس يُوْسَا-د، كَّرن نَّان إِ وَايَاوْيَا: أَقَا ونِّي إِي غَا يوَارْثن! أَث نْنغ بَاش اَذَاس نَاوِي اَمَرْجع-أَ ن وضِيڒ!

¹⁵ نْضَرن-ث-يذ غَار بَارَّا إِ ومَرْجع وضِيڒ نْغِين-ث. إِوَا، مِين ذَاسن غَا يݣّ بَاب ن ومَرْجع نِّي وضِيڒ إِ يخمَّاسن نِّي؟

¹⁶ أَذ د يَاس نتَّا س يِيخف نّس اَذ ينغ يخمَّاسن نِّي مَارَّا، أَذ يجّ اَمَرْجع نِّي وضِيڒ إِ ينّغْنِي." وَامِي سْڒِين إِ مَانَايَا نَّان: "أَربِّـي يسْتَر!"

¹⁷ ئِخْزَر غَارْسن ينَّا: "مِين يخس اَذ يِينِي وَاوَاڒ-أَ إِي يُوْرِين ذِي لْكِتَاب؟ <أَزْرُو إِي عِيفّن يبنَّاين، يوْقع ذݣ ومْشَان اَصبْحَان ذِي ثْغمَّارْث ن دْسَاس.>

¹⁸ ونِّي غَا يوْضَان خ وزْرُو-يَا اَذ يرز. ونِّي خف غَا يوْضَا وزْرُو-يَا اَذ ينڒْبࢲ."

¹⁹ ڒخْدّنِّي يمْسڒْمَاذن ن شَّرِيعَا ذ اَرُّوْيَاس ن ڒْفُقَهَا رزُّوْن اَذ طّْفن عِيْسَى، فهْمن بلِّي يسَّاوَاڒ خَاسن س ڒْمَعْنَا-يَا وَلَكِن ݣّْوْذن زِي شَّعْب.

ضَّرِيبَا ن لْمَلِك قَيْصَر

²⁰ بْذَان يمْسڒْمَاذن نِّي ن شَّرِيعَا ذ اَرُّوْيَاس ن ڒْفُقَهَا حطَّان عِيْسَى، رزُّوْن اَث طّْفن خ شَان وَاوَاڒن نّس حمَا اَث سلّْمن إِ لْحَاكم ذ سُّلْطَا نّس. رُوْحن سّكّن-اَس إِ عِيْسَى شَان يِوْذَان سْنعْمِيڒن اَقَاثن نِيشَان وَلَكِن نِثْنِي ذ يبرْݣَاݣن.

²¹ سّقْسَان-ث نَّان-اَس: "آ لْمُعَلِّم، نسّن بلِّي شك ثقَّارذ ڒْحَقّ ثْسڒْمَاذذ س ڒْحَقّ. وَار تݣّذ بُو ؤُذمَاون، ثْسڒْمَاذذ س ڒْحَقّ مَامّش يخس أَربِّـي أَ نْعِيش.

²² إِنِي-يَانغ، مَا ثْسمّح شَّرِيعَا نّغ أَ نْخدْجس ضَّرِيبَا إِ وزدْجِيذ قَيْصَر نِغ لَّا؟"

²³ ئِسّن عِيْسَى يخَرْوِيضن نِّي إِي ذَايْسن، ينَّا-ٱسن:

²⁴ "أَوِيم-د دِينَار نِّي ن ضَّرِيبَا حمَا اَث ࢲرغ." ينَّا-ٱسن: "وِي يِيڒَان تصْوِيرْث-أَ ذ يِيسم-أَ إِي ذَايس؟" نَّان-اَس: "ن قَيْصَر."

²⁵ ئِنْدق-د عِيْسَى ينَّا-ٱسن: "مِين يدْجَان ن قَيْصَر ؤُشم-اَس-ث إِ قَيْصَر، مِين يدْجَان ن أَربِّـي ؤُشم-اَس-ث إِ أَربِّـي."

²⁶ نِثْنِي وَار زمَّرن شَا اَذ شمْثن عِيْسَى زِي شَان وَاوَاڒ نّس زَّاث إِ شَّعْب. قِّيمن تْعجّْبن ذݣ وجَاوَاب نّس، وَار ؤُفِين شَا مِين غَا ينِين.

سِيذِيثْنغ عِيْسَى يتْبشَّار خ ثُوْذَارْث ن ڒبْدَا

²⁷ كَّرن شَان يِوْذَان زِي ڒْحِزب ن يصَدُّوْقِيْين قَارّْبن-د غَار عِيْسَى. (قَّارن نِثْنِي بلِّي يوْذَان وَار د تكَّرن شَا زِي ڒْموْث.) سقْسَان عِيْسَى نَّان-اَس:

²⁸ "آ لْمُعَلِّم، قَا يُوْرَا-ٱنغ مُوْسَى اَرْيَاز مڒَا يمُّوْث يجَّا ثَمْغَارْث نّس وَار كِذس د يجِّي بُو ثَارْوَا، ثَاجَّاڒْث نِّي لَابُد اَت يَاوِي ؤُڒْوس نّس بَاش اَكِذس د يجّ ثَارْوَا إِ وُوْمَاس نِّي يمُّوْثن.

²⁹ نشِّين تُوْغَا اَكِذْنغ سبْعَا ن وَاوْمَاثن، ئِمْڒش ومزْوَارُو يمُّوْث وَار ذ يجِّي بُو ثَارْوَا.

^30-31 ثَمْغَارْث نِّي يُوْوِي-ت وِيس ثْنَاين يمُّوْث وَار د يجِّي بُو ثَارْوَا. أَمنِّي عَاوذ وِيس ثْڒَاثَا اَڒ وِيس سبْعَا.

³² أَڒ ونݣَّارُو ؤُڒَا ذ ثَمْغَارْث نِّي ثمُّوْث.

³³ يُوْم لْقِيَامَا، ؤُمِي غَا ثِيڒِي ثمْغَارْث نِّي؟ أَقَا ؤُوِين-ت س سبْعَا إِذْسن."

³⁴ يَارَّا خَاسن عِيْسَى ينَّا-ٱسن: "وَاه، ثَارْوَا ن دُّنشْت-أَ مدْجْشن تْوَاسْمدْجَاشن.

³⁵ وَلَكِن ينّغْنِي يحسّب-يثن أَربِّـي اَغَارْسن ثِيڒِي ثُوْذَارْث ن ڒبْدَا، خْمِي د غَا كَّرن زِي ڒْموْث اَتَاف نِثْنِي وَار مدْجْشن شَا وَار تْوَاسْمدْجِيشن شَا.

³⁶ وَار زمَّرن شَا اَذ مّْثن، أَذ يڒِين اَمشْنَاو لْمَلَائِكَاث. نِثْنِي ذ ثَارْوَا ن أَربِّـي، خڒْقن-د ذِي يُوْم لْقِيَامَا.

³⁷ وَلَكِن شُوْف، يِنِّي يمُّوْثن اَذ د كَّرن زِي ڒْموْث. ؤُڒَا ذ مُوْسَى يسْبيَّان-د مَانَايَا ذِي ڒْقِصَّا ن ؤُخْشَاب وَامِي ينَّا قَا سِيذِي أَربِّـي ذ أَربِّـي ن بْرَاهِيم ذ أَربِّـي ن إِسْحَاق ذ أَربِّـي ن يَعْقُوْب.

³⁸ نتَّا ذ أَربِّـي ن يِنِّي يدَّرن مَاشِي ن يِنِّي يمُّوثن، ڒَاحقَّاش نتَّا مَارَّا يوْذَان اَغَارس يڒِين دَّرن."

³⁹ نَّان-اَس شَان يمْسڒْمَاذن ن شَّرِيعَا: "آ سِيذِي، ثنِّيذ مْلِيح!"

⁴⁰ أُو سّنِّي وَار يزْعِيم حَدّ اَث يسّقْسَا عَاذ كْتَار.

لْمَسِيح نتَّا ذ سِيذس ن دَاود

⁴¹ ئِنْدق-د عِيْسَى ينَّا-ٱسن: "مَايمِّي قَّارن قَا لْمَسِيح ذ مِّيس ن دَاود؟

⁴² قَا دَاود ينَّا نتَّا س يِيخف نّس ذِي لْكِتَاب ن زَّابُوْر: <سِيذِي أَربِّـي ينَّا-ٱس إِ سِيذِي: قِّيم-د خ وفُوْسِي ينُو،

⁴³ أَڒ د غَا ݣّغ ڒْعَذْيَان نّش سْوَادَّاي إِ يضَارن نّش.>

⁴⁴ مَامّش غَا يِيڒِي لْمَسِيح ذ مِّيس ن دَاود؟ نتَّا دَاود يقَّار-اَس إِ لْمَسِيح آ سِيذِي."

لْمُنَافِقِين

⁴⁵ ينَّا-ٱسن عِيْسَى إِ يمحْضَارن نّس أُو مَارَّا شَّعْب يتسْڒَا-يَاس:

⁴⁶ "حْضَام يخف نْوم زݣ يمْسڒْمَاذن ن شَّرِيعَا. نِثْنِي تخْسن اَذ ؤُيُوْرن س يسڒْهَامن نِّي نْسن، تخْسن اَخَاسن سدْجْمن ذِي ڒسْوَاق، تخْسن اَذ قِّيمن ذݣ يمُوْشَان يمزْوُوْرَا ذِي ثمْزِيذَاوِين ذ ڒفْرُوْح.

⁴⁷ تتّن ثَاجَّاڒِين، سْمظْهَارن-د يخف نْسن تْࢲَادْجَان اَطَّاس حمَا اَذ بيّْنن إِ يِوْذَان بلِّي نِثْنِي صبْحن اَطَّاس زَعْمَا. يِيْنَا، لْحِسَاب نْسن اَذ يِيڒِي يقْصح اَطَّاس!"