لوقا 18 - ثريفيث 2020

ڒْمِثَال ن ثَاجَّاڒْث يرزُّوْن ڒْحَقّ نّس

¹ ئِسِّيوڒ اَكِذْسن عِيْسَى س يِجّن ن ڒْمَعْنَا بَاش اَذ سّْنن بلِّي يتْخصَّا-يَاسن اَذ تْࢲَادْجن ڒبْدَا وَار تِيحْڒن شَا.

² ينَّا-ٱسن: "ئِجّن ن تْوَاڒَا ذݣ يِجّن ن ثنْدِينْت يجّن ن ڒْقَاضِي وَار يتݣّْوذ شَا أَربِّـي، وَار يتْوقِّير شَا يوْذَان.

³ ذِنِّي ذِي ثنْدِينْت نِّي يجّن ن ثَاجَّاڒْث تْرَاح غَارس ثقَّار-اَس: ؤُش-اَيِي ڒْحَقّ ينُو خ ونِّي ذَايِي يضلّْمن

⁴ أَطَّاس زݣ وَامِي يتَاݣِي اَذَاس يُوْش مِين ذَاس تتَّار نتَّاث. وَلَكِن منْبَعْد إِ مَانَايَا ينَّا ذِي نّفْس نّس: وَاخَّا وَار تݣّْوْذغ شَا أَربِّـي، وَار تْوقِّيرغ شَا يوْذَان،

⁵ ثَاجَّاڒْث-أَ صَافِي ثْسِيحڒ-اَيِي. أَذَاس ؤُشغ ڒْحَقّ حمَا وَار د تْعِيقِيب ثْوَاڒَا نّغْنِي اَذَايِي ثْسدّع."

⁶ ينَّا-ٱسن سِيذِيثْنغ: "صنّْطث إِ مِين ينَّا ڒْقَاضِي-يَا يضدْجْمن.

⁷ أَربِّـي، مَا وَار ذَاسن يتِيشّ ڒْحَقّ إِ يِوْذَان نّس إِي ث يتتَّارن دْجِيڒث ذ نْهَار؟ مَا اَخَاسن يعطَّڒ وَار ذَاسن يسْتِيجِيب شَا؟

⁸ أَذَاوم ينِيغ: أَذَاسن يُوْش ڒْحَقّ ذغْيَا. إِنَّمَا، مِّيس ن بْنَاذم نْهَار إِي ذِي د غَا يَاس، مَا ٱذ يَاف لإِيمَان ذِي ثْمُوْرْث؟"

ثْࢲَادْجِيث ن صَّح

⁹ يسِّيوڒ س ڒْمَعْنَا-يَا اَك شَان يِوْذَان تُوْغَا تَارَّان يخف نْسن نِيشَان، تْحݣَّارن ينّغْنِي:

¹⁰ "ئِجّن ن نْهَار رُوْحن يجّن ن ثْنَاين ن يرْيَازن غَار ثمْزِيذَا ثَمقّْرَانْت ن أَيث-إِسْرَائِيل حمَا اَذ ࢲَّادْجن، ئِجّن زِي ڒْحِزب ن يفَرِّيسِيْين، ئِجّن يجمّع ضَّرِيبَا.

¹¹ ئِبدّ وفَرِّيسِي نِّي يتْࢲَدْجَا ذِي نّفْس نّس ينَّا: يَا أَربِّـي تْشكَّرغ-شك، مِينْزِي وَار دْجِيغ شَا اَم يِوْذَان نّغْنِي يدْجَان ذ يخوَّانن نِغ ذ يِنِّي وَار يدْجِين شَا نِيشَان نِغ ذ يِنِّي يزنَّان نِغ اَم وَانِيتَا إِݣ يجمّْعن ضَّرِيبَا!

¹² تْࢲُوْمِّيغ يُوْمَاين ذِي سِّيمَانَا، تْعشَّارغ خ مَارَّا مِين ربْحغ ذ اَݣْڒَا.

¹³ وَلَكِن ونِّي يجمّْعن ضَّرِيبَا يبدّ غَار ڒݣّْوَاج. وَار يزْعِيم حتَّا اَذ ييْسِي ثِيطَّاوِين نّس غَار وجنَّا، ئِشَّاث ذݣ وُوْڒ نّس ينَّا: يَا أَربِّـي، رْحم-اَيِي نش ذ لْعَاصِي!

¹⁴ أَذَاوم ينِيغ: ونِّي يجمّْعن ضَّرِيبَا يذْوڒ غَار ثدَّارْث نّس مْلِيح يمصْڒَاح اَك أَربِّـي، اَفَرِّيسِي نِّي لَّا. مِينْزِي ونِّي يسمْغَارن يخف نّس، أَتَاف اَذ يِيڒِي ذ اَمزْيَان. ونِّي يسمْزَاين يخف نّس، أَتَاف اَذ يِيڒِي ذ اَمقّْرَان."

سِيذِيثْنغ عِيْسَى يتْبَرَك يحنْجِيرن يمزْيَانن

¹⁵ تُوْغَا يِوْذَان تَاوِين-اَس-د ؤُڒَا ذ يسيْمَان إِ عِيْسَى حمَا اَثن يحَاذَا. وَلَكِن يمحْضَارن نّس وَامِي ࢲْرِين مَانَاينِّي تْعَارَّاضن-اَسن.

¹⁶ ئِكَّر عِيْسَى يڒَاغَا-د خ يحنْجِيرن أُوْشَا ينَّا-ٱسن إِ يمحْضَارن نّس: "جّم يحنْجِيرن يمزْيَانن اَغَارِي د اَسن. وَار ذَاسن تْعَارَّاضم شَا ڒَاحقَّاش ڒْمُلْك ن أَربِّـي يتِيڒِي غَار يِنِّي إِي يدْجَان اَم يِيْنَا.

¹⁷ أَقَا تسْڒَام ڒْحَقّ: لَابُد إِ بْنَاذم اَذ يَامن س ڒْمُلْك ن أَربِّـي مَامْش زَّايس يتَامن وحنْجِير اَمزْيَان. مڒَا لَّا، أَتَاف بْنَاذم نِّي عمَّارْص اَذ يَاذف ذِي ڒْمُلْك ن أَربِّـي."

أَرْيَاز يدْجَان ذ تَّاجَر

¹⁸ ئِسّقْسَا-ث يجّن زِي لْحُكَّام نْ أَيث-إِسْرَائِيل ينَّا-ٱس: "آ لْمُعَلِّم اَصبْحَان، مِين غَا ݣّغ حمَا اَغَارِي ثِيڒِي ثُوْذَارْث ن ڒبْدَا؟"

¹⁹ يَارَّا خَاس عِيْسَى ينَّا-ٱس: "مَايمِّي ثقَّارذ قَا نش ذ اَصبْحَان؟ وَار يدْجِي حَدّ ذ اَصبْحَان إِلَّا أَربِّـي وَاحْذس.

²⁰ ثسّْنذ ڒُوْصِيَاث: وَار زنَّا، وَار نقّ، وَار تَاشَار، وَار شهّذ بُو ࢲُّوْر، وقَّار بَابَاش ذ يمَّاش."

²¹ ينَّا-ٱس ورْيَاز نِّي: "زݣ وَامِي إِي دْجِيغ نش ذ اَمزْيَان تْوقَّارغ قَاع مَانَايَا."

²² عِيْسَى وَامِي يسْڒَا إِ وَاوَاڒ نّس ينَّا-ٱس: "قَا ثقِّيم-اَش يجّن ن ڒْحَاجث وَار ت ثݣِّيذ شَا. رُوْح زنْز مَارَّا مِين غَارك ذ اَݣْڒَا صدّق-يث خ ڒْمُسَاكِين. سّنِّي اَغَارك يِيڒِي ڒْكنْز ذݣ وجنَّا، ڒخْدّنِّي اَرَاح-د شك ذْفَار-اَيِي-د."

²³ وَامِي يسْڒَا إِ مَانَاينِّي يخيّق اَطَّاس ڒَاحقَّاش غَارس اَطَّاس ن وَاݣْڒَا.

²⁴ ئِخْزَر ذَايس عِيْسَى ينَّا: "مشْحَاڒ يقْسح خَاسن خ تْوَاجَر اَذ اَذْفن ڒْمُلْك ن أَربِّـي.

²⁵ أَقَا يسْهڒ اَذ يعْذُو وڒْغم زِي ثِيطّ ن ثْسيْنفْث قْبڒ مَا ٱذ يَاذف تَّاجَر ذِي ڒْمُلْك ن أَربِّـي!"

²⁶ نّان يِنِّي يتسْڒَان: "خْيَار، ؤُݣ يزمَّرن اَذ ينْجم!؟"

²⁷ ئِنْدق-د عِيْسَى ينَّا-ٱسن: "مِين وَار ذَاس زمَّرن شَا يِوْذَان، ئِزمَّر-اَس أَربِّـي."

²⁸ ينَّا-ٱس بُطْرُس: "أَقَا نشِّين نسْمح ذِي كُڒْشِي نذْفَار-يش!"

²⁹ ينَّا-ٱسن عِيْسَى: "أَقَا تسْڒَام ڒْحَقّ: مَارَّا ونِّي يسمْحن ذِي ثدَّارْث نّس نِغ ذِي ثمْغَارْث نّس نِغ ذِي اَيْثْمَاس نِغ ذِي بَابَاس نِغ ذِي يمَّاس نِغ ذِي ثَارْوَا نّس عْلَاحْسَاب ڒْمُلْك ن أَربِّـي،

³⁰ أَتَاف اَغَارس ثِيڒِي ذِي دُّنشْت-أَ كْتَار س وَاطَّاس. أُو ذِي زْمَان إِي د غَا يَاسن اَتَاف اَغَارس ثِيڒِي ثُوْذَارْث ن ڒبْدَا."

سِيذِيثْنغ عِيْسَى عَاوذ يسَّاوَاڒ خ ڒْموْث نّس

³¹ ئِرُوْح عِيْسَى يُوْوِي ثنْعَاش نِّي ن يمحْضَارن نّس وَاحذْسن ينَّا-ٱسن: "أَقَا نتْݣَعَّاذ غَار لْقُدْس مَانِي إِي غَا يكمّڒ مَارَّا مِين ؤُرِين لْأَنْبِيَا خ مِّيس ن بْنَاذم.

³² أَث سلّْمن إِ يِنِّي وَار يدْجِين شَا زِي أَيث-إِسْرَائِيل، أَخَاس ضحْشن، أَث سحْقَارن، أَخَاس سُّوْسْفن.

³³ أَث ؤُوْثن س وسْغُوْن، أَث نْغن. نْهَار وِيس ثڒْتِيَّام اَذ د يكَّر زِي ڒْموْث."

³⁴ ئِمحْضَارن نِّي وَار فْهِيمن وَالُو زݣ وَاوَاڒن-أَ. ڒْمَعْنَا ن وَاوَاڒن-أَ ينُوْفَّر خَاسن، وَار سِّينن شَا مِينْخف يسَّاوَاڒ.

سِيذِيثْنغ عِيْسَى يسْݣنْفَا يج وضَرْغَاڒ ذِي ثنْدِينْت ن أَرِيحَا

³⁵ وَامِي يقَارّب عِيْسَى غَار ثنْدِينْت ن أَرِيحَا، ؤُفِين ذِنِّي يجّن ن وضَرْغَاڒ يقِّيم طَّارْف ن وبْرِيذ يتتَّار.

³⁶ وَامِي يسْڒَا إِ ڒْغَاشِي عدُّوْن ينَّا-ٱسن مِين يوقْعن؟

³⁷ نَّان-اَس قَا عِيْسَى نَاصِرِي نتَّا إِي سَّا يعدُّوْن.

³⁸ ئِبْذَا يسْنكَّر ثْغُوْيّث يقَّار-اَس: "آ عِيْسَى آ مِّيس ن أَيث-دَاود، رْحم-اَيِي!"

³⁹ يِنِّي يزْوَارن إِ عِيْسَى نْهَان-ث نَّان-اَس سْقَار. نتَّا يُوْݣِي، ئِقِّيم يسْنكَّر ثْغُوْيّث عَاذ س جّْهذ يقَّار: "آ مِّيس ن أَيث-دَاود، رْحم-اَيِي!"

⁴⁰ ئِبدّ عِيْسَى يُوْمَر-يثن حمَا اَذَاس ثِيذ اَوِين. وَامِي غَارس د يقَارّب يسّقْسَا-ث ينَّا-ٱس:

⁴¹ "مِين ثخْسذ اَذَاش ݣّغ؟" ينَّا-ٱس وضَرْغَاڒ نِّي: "آ سِيذِي، قَا نش خْسغ اَذ تْوَاڒِيغ."

⁴² ئِنْدق-د عِيْسَى ينَّا-ٱس: "تْوَاڒَا، قَا لإِيمَان نّش يسْݣنْفَا-شك!"

⁴³ ڒخْدّنِّي يبْذَا يتْوَاڒَا، ئِذْفَار عِيْسَى يسمْغَار أَربِّـي. وَامِي ࢲْرِين يِوْذَان نِّي مِين يوقْعن، مَارَّا بْذَان حمّْذن أَربِّـي.