لوقا 11 - ثريفيث 2020

سِيذِيثْنغ عِيْسَى يسڒْمَاذ يمحْضَارن نّس مَامْش غَا ࢲَّادْجن

¹ ئِجّن ن وَاسّ عِيْسَى يتْࢲَادْجَا ذݣ يِجّن ن ومْشَان. وَامِي يكمّڒ ثْࢲَادْجِيث نِّي ينَّا-ٱس يجّن زݣ يمحْضَارن نّس: "آ سِيذِي، سڒْمذ-اَنغ أَ نࢲَّادْج مَامّش يسڒْمَاذ يَحْيَى يمحْضَارن نّس."

² ينَّا-ٱسن عِيْسَى: "مڒْمِي غَا ثࢲَّادْجم إِنِيم اَمُّو: آ بَابَاثْنغ، ذ اَمقّْرَان إِݣ يدْجَا يِيسم نّش. أَذ د يَاس ڒْمُلْك نّش.

³ ؤُش-اَنغ كُڒ نْهَار اَغْرُوْم إِي غَا نحْذَاج.

⁴ غْفَر-اَنغ ڒْمُعْصِيَاث نّغ إِ نشِّين، مَامّش نْسمّح إِ يِنِّي إِي كِذْنغ يخطَّان. وَار ذَانغ تݣّ شَا ذِي ڒمْحَاين."

^5-6 ينَّا-ٱسن عِيْسَى: "مَثَالَان يجّن زَّايْوم غَارس اَمدُّوْكڒ. ذِي ڒْوسْط ن دْجِيڒث يرُوْح غَار ومدُّوْكڒ نّس ينَّا-ٱس: آي اَمدُّوْكڒ، ؤُش-اَيِي ثْڒَاثَا ن وغْرُوْم مِينْزِي يجّن ن ومدُّوْكڒ ينُو يسَفَر يكَّا-د خَافِي، نش وَار غَارِي مِين ذَاس غَا ؤُشغ.

⁷ أَخَاس يَارّ ومدُّوْكڒ نِّي نّس زِي ذَاخڒ ن ثدَّارْث اَذَاس يِينِي: وَار ذَايِي تسدَّاع شَا! نش ڒخُّو ثَوَّارْث ثْبلّع ثَارْوَا ينُو طّْسن اَكِذِي، وَار زمَّرغ شَا اَذ كَّرغ اَذَاش ؤُشغ."

⁸ ينَّا-ٱسن عِيْسَى: "أَذَاوم ينِيغ: ذ اَمزْوَارُو يُوْݣِي اَذ يكَّر اَذَاس يُوْش مِين يرزُّو وَاخَّا نتَّا ذ اَمدُّوْكڒ نّس، وَلَكِن اَذ يكَّر اَذَاس يُوْش مَارَّا مِين يحْذَاج ڒَاحقَّاش يُوْسَا-د غَارس ذِي ڒْوسْط ن دْجِيڒث يتْرزَّا-يَاس اَزدْجِيف."

⁹ نش اَذَاوم ينِيغ: "تَّارم، أَتَاف اَذَاوم يمُّوْش. رزُّوْم، أَتَاف اَذ تَافم. سقرْقُوْبم، أَتَاف اَذَاوم رزْمن.

¹⁰ مِينْزِي مَارَّا ونِّي غَا يتَّارن اَذَاس يمُّوْش. ونِّي غَا يرْزُوْن اَذ يَاف. ونِّي غَا يسْقرْقْبن اَذَاس ثْنُوْرْزم ثوَّارْث.

¹¹ مڒَا شَان يِجّن زَّايْوم يتَّار-اَس مِّيس اَسْڒم، مَا اَذَاس يُوْش فِيغر ذݣ ومْشَان ن وسْڒم نِّي؟ لَّا!

¹² مَا اَذَاس يُوْش بَابَاس ثْغِيرْذنْت إِ ممِّيس مڒَا يتَّار-اَس ثَمدْجَاڒْث؟ لَّا!

¹³ مڒَا كنِّيو ذ يعفَّانن ثسّْنم اَذ تُوْشم إِ ثَارْوَا نْوم مِين يدْجَان ذ اَصبْحَان، أَتَاف بَابَاثْوم إِݣ يدْجَان ذݣ وجنَّا يتݣّ كْتَار، يعْنِي يتِيشّ أَرُّوْح يقدّْسن إِ يِنِّي ذَاس ث يتتَّارن."

سِيذِيثْنغ عِيْسَى يتْوَاجَاه يِنِّي يدْجَان ضد نّس

¹⁴ ئِسُوْفغ عِيْسَى يجّن ن جّنّ ذ اَزينُوْن زݣ يِجّن ن ورْيَاز. وَامِي يفّغ جّنّ نِّي يسِّيوڒ ورْيَاز، قِّيمن تْعجّْبن ڒْغَاشِي.

¹⁵ وَلَكِن ڒبْعَاض زَّايْسن نَّان: "بْنَاذم-أَ يسُوْفُوْغ جْنُوْن مِينْزِي اَرَّايس ن جْنُوْن ؤُمِي قَّارن بْعَلْزَبُوْل يُوشَا-اَس جّْهذ-أَ."

¹⁶ ئِنّغْنِي تتَّارن زَّايس يجّن ن لْعَلَامَا ذ ثَمقّْرَانْت زݣ وجنَّا بَاش اَث جَرّْبن.

¹⁷ ئِسّن عِيْسَى مِين نْوَان ينَّا-ٱسن: "مْكُڒ لْممْلَكَا إِي ذِي تْمنْغَان اَيثْبَاب نّس يجّن اَك ونّغْنِي اَذ تْنهْذم. مْكُڒ ثَدَّارْث إِي ذِي تْمنْغَان اَيثْبَاب نّس يجّن اَك ونّغْنِي اَذ توْضَا.

¹⁸ مڒَا شِّيطَان يكَّا اَذ يقْضَا خ شِّيطَان، مَامّش غَا ثݣّ اَذ تقِّيم لْممْلَكَا نّس؟ مِينْزِي ثقَّارم سُوْفُوْغغ جْنُوْن س جّْهذ ن بَعْلْزَبُوْل.

¹⁹ نش مڒَا سُوْفُوْغغ جْنُوْن س جّْهذ ن بَعْلْزَبُول نِّي زَعْمَا، إِنِيم-اَيِي كنِّيو، مَامّش تݣّن يِوْذَان نْوم سُوْفُوْغن-ثن ؤُڒَا ذ نِثْنِي؟ نِيثْنِي س يِيخف نْسن تْبيَّانن بلِّي كنِّيو وَار غَارْوم بُو ڒحَقّ ذي مين ثقَّارم.

²⁰ نش مڒَا سُوْفُوْغغ جْنُوْن س جّْهذ ن وفُوْس ن أَربِّـي، أَقَا ڒْمُلْك ن أَربِّـي يُوْسَا-د غَارْوم.

²¹ أَرْيَاز يجهْذن ونِّي غَار يدْجَا ڒسْنَاح يحطَّا ثَدَّارْث نّس، أَتَاف اَݣْڒَا نّس يتِيڒِي ذِي ڒَامَان.

²² وَلَكِن مڒَا يهْجم خَاس ونِّي خَاس يجهْذن، أَتَاف اَث يغْڒب اَذَاس يكّس مَارَّا ڒسْنَاح إِي خف يعوّڒ اَذَاس يَاوِي اَݣْڒَا نّس مَارَّا."

²³ ونِّي وَار كِذِي يدْجِين شَا، أَتَاف اَقَاث ضد ينُو. ونِّي وَار كِذِي يسْمُوْنن شَا، أَتَاف نتَّا يتْزدْجَاع.

²⁴ خْمِي غَا يتْوَاسُوْفغ جّنّ اَعفَّان زِي شَان بْنَاذم، أَتَاف اَذ يݣُّوْر ذݣ يمُوْشَان يُوْزْغن يرزُّو اَمْشَان مَانِي غَا يريّح. مڒَا وَار يُوْفِي شَا، أَتَاف اَذ يِينِي اَقَا نش اَذ رَاحغ اَذ ذوْڒغ غَار ثدَّارْث ينُو مَانِيس إِي فّْغغ.

²⁵ سّنِّي اَغَارس يذْوڒ اَت يَاف ثعْذڒ، ثنْقَا.

²⁶ أُوْشَا اَذ يرَاح اَذ د يَاوِي سبْعَا ن جْنُوْن نّغْنِي ذ يعفَّانن كْتَار زَّايس حمَا اَذ ذوْڒن كُڒْشِي اَذَايس زذْغن. أَتَاف اَذ تِيڒِي لْحَالَا ثَنݣَّرُوْت ن بْنَاذم نِّي ذ ثَعفَّانْت كْتَار زِي لْحَالَا نّس ثَمزْوَارُوْت."

²⁷ وَامِي تُوْغَا يسَّاوَاڒ خ مَانَايَا، ئِجّن ن ثمْغَارْث ثْڒَاغَا ذِي ڒْوسْط ن ڒْغَاشِي ثنَّا: "سَّعْذ ن ثمْغَارْث نِّي إِي شك د يُوْرْون، ثنِّي إِي ش يسُّوْطْضن."

²⁸ وَلَكِن نتَّا ينَّا: "لَّا، سَّعْذ ن يِنِّي يتْسْڒَان إِ وَاوَاڒ ن أَربِّـي، تْطَاعَان-اَس."

يِنِّي يرزُّوْن لْعَلَامَا ثَمقّْرَانْت زِي سِيذِيثْنغ عِيْسَى

²⁹ وَامِي تمْزَاحَامن ڒْغَاشِي، ئِبْذَا عِيْسَى يقَّار: "ئِوْذَان ن ڒْوقْث-أَ ذ يعفَّانن. نِثْنِي تتَّارن لْعَلَامَا ثَمقّْرَانْت وَلَكِن وَار ذَاسن تِيشّ إِلَّا ثنِّي ن نَّبِي يُوْنس.

³⁰ مَامّش تُوْغَا يدْجَا نَّبِي يُوْنس ذ يجّن ن لْعَلَامَا إِ اَيْثْبَاب ن ثنْدِينْت ن نِينْوَا، أَمنِّي عَاوذ اَذ يِيڒِي مِّيس ن بْنَاذم ذ يجّن ن لْعَلَمَا إِ يِوْذَان ن ڒْوقْث-أَ.

³¹ يُوْم لْحِسَاب ذ لْعِقَاب اَذ تكَّر لْمَلِكَا ن لْجَنُوْب اَك يِوْذَان ن ڒْوقْث-أَ اَخَاسن ثْشثْشَا، ڒَاحقَّاش ثُوْسَا-د نتَّاث زِي ثْمُوْرْث يُوْݣْجن حمَا اَذ تْصنّط إِ ڒفْهَامث ن سُلِيمَان. أُو ذَانِيتَا يجّن ذ اَمقّْرَان زِي سُلِيمَان.

³² يُوْم لْحِسَاب ذ لْعِقَاب اَذ د كَّرن يمزْذَاغ ن ثنْدِينْت ن نِينْوَا اَك يِوْذَان ن ڒْوقْث-أَ اَخَاسن شثْشَان، ڒَاحقَّاش اَيْثْبَاب ن ثنْدِينْت ن نِينْوَا تُوْبن وَامِي ثن ينْهَا نَّبِي يُونس. أُو ذَانِيتَا يجّن ذ اَمقّْرَان زِي يُوْنس!

ثْفَاوْث ن دَّات نتَّاث ذ ثِيطَّاوِين

³³ ؤُڒَا ذ يجّن وَار يتْشَعِّيڒ ڒْقنْدِيڒ حمَا اَث يسرْس ذݣ يِج ومْشَان ينُوْفَّر نِغ اَخَاس يقْڒب اَقْنُوْش. لَّا، ئِتݣّ-يث خ ڒْمَرْفَاع حمَا اَذَاسن يُوْش ثْفَاوْث إِ يِنِّي إِي د غَا يَاذْفن.

³⁴ ثِيطّ نّش نتَّاث ذ ثْفَاوْث إِ ثُوْذَارْث نّش. مڒَا غَارك ثِيطَّاوِين صحَّانْت، أَتَاف اَغَارك ثِيڒِي ثْفَاوْث مَارَّا ذِي ثُوْذَارْث نّش. مڒَا ثِيطَّاوِين نّش وَار دْجِينْت شَا مْلِيح، أَتَاف اَذ تِيڒِي مَارَّا ثُوْذَارْث نّش ذ ثَادْجسْت.

³⁵ حْضَا يخف نّش مْلِيح حمَا نُّوْر إِي ذَايك وَار يتْذوِّيڒ شَا ذ ثَادْجسْث.

³⁶ مڒَا مَارَّا دَّات نّش ذَايس ثْفَاوْث وَار ذَايس بُو ثَادْجسْث، أَتَاف اَذ تْشعْشع اَطَّاس اَذ تݣّ ثْفَاوْث اَمشْنَاو مَامّش ذَاوم يتِيشّ ڒْقنْدِيڒ ثْفَاوْث."

ڒفْضِيحَاث ن ڒْحِزب ن يفَرِّيسِيْين ذ يمْسڒْمَاذن ن شَّرِيعَا

³⁷ وَامِي يسِّيوڒ عِيْسَى، يُوْسَا-د يجّن زِي ڒْحِزب ن يفَرِّيسِيْين يعَرض-يث حمَا اَكِذس يشّ. يُوْذف عِيْسَى يقِّيم غَار مِيسَّا،

³⁸ أَفَرِّيسِي نِّي يتْعجّب وَامِي يُوْفَا عِيْسَى وَار يسِيرذ شَا يفَاسّن نّس قْبڒ مَا ٱذ يشّ.

³⁹ ينَّا-ٱس سِيذِيثْنغ: "كنِّيو يفَرِّيسِيْين ثْسِيرِيذم ڒْكَاس نْوم ذ طّبْسِي نْوم غَار بَارَّا مْلِيح، وَلَكِن غَار ذَاخڒ نْوم ثشُّوْرم س طّْمَع ذ شَّرّْ.

⁴⁰ آ يِنِّي وَار يفهّْمن! أَربِّـي ذ نتَّا إِݣ يݣِّين دَّات، ذ نتَّا عَاوذ إِݣ يݣِّين مِين ذَايس غَار ذَاخڒ.

⁴¹ صدّْقم مِين ذَايْوم غَار ذَاخڒ، أَتَاف مَارَّا اَذ يذْوڒ يسِيرذ إِ كنِّيو.

⁴² يَا ڒفْضِيحث نْوم آ ڒْحِزب ن يفَرِّيسِيْين! تِيشّم ڒَعْشُوْر ؤُڒَا خ نَعْنَاع ذ ؤُوْرَام ذ مَارَّا ڒَاعْشُوْب، وَلَكِن وَار تهْتِيمِيم شَا زِي ڒْحَقّ ذ ڒمْحِبّث ن أَربِّـي. لَّا، ئِخصَّا-ٱوم اَذ تهْتَامم س مَانَايَا بْڒَا مَا تتُّوْم ڒَعْشُوْر.

⁴³ يَا ڒفْضِيحث نْوم آ ڒْحِزب ن يفَرِّيسِيْين! مِينْزِي تخْسم يمُوْشَان يمزْوُوْرَا ذِي ثمْزِيذَاوِين، ئِتعْجِيب-اَوم اَخَاوم سدْجْمن يِوْذَان ذِي ڒسْوَاق.

⁴⁴ يَا ڒفْضِيحث نْوم، كنِّيو اَمشْنَاو يمضْڒَان يودَّارن ݣُّوْرن خَاسن يِوْذَان وَار د اَرِّين شَا ڒخْبَار."

⁴⁵ ئِنْدق-د يجّن زݣ يِنِّي يتْشرَّاحن شَّرِيعَا ينَّا-ٱس: "آ لْمُعَلِّم، وَامِي ثقَّارذ مَانَايَا اَقَا ؤُڒَا ذ نشِّين تْحݣَّارذ-اَنغ!"

⁴⁶ يَارَّا خَاس عِيْسَى ينَّا: "يَا ڒفْضِيحث نْوم ؤُڒَا ذ كنِّيو آ يِنِّي يتْشرَّاحن شَّرِيعَا مِينْزِي تْشدَّام ڒحْمڒ يذقْڒن يقسْحن خ يِوْذَان حمَا اَث اَرْبُوْن، وَلَكِن كنِّيو وَار تْحِيذِيم بُو ڒحْمڒ نِّي ؤُڒَا س يِجّن ن وضَاض نْوم.

⁴⁷ يَا ڒفْضِيحث نْوم مِينْزِي كنِّيو ثْبنَّام يمضْڒَان ن لْأَنْبِيَا تَارِّيم-ثن ذ يمْرَابْذن أُو كنِّيو ڒجْذُوْذ نْوم ذ نِثْنِي إِي ثن ينْغِين.

⁴⁸ تَافَاقم اَك ڒجْذُوْذ نْوم، كنِّيو ذ ڒشْهُوْذ خ مِين خذْمن مِينْزِي ذ نِثْنِي إِݣ ينْغِين لْأَنْبِيَا أُو كنِّيو ثْبنَّام يمْرَابذن نْسن.

⁴⁹ خ مَانَايَا عَاوذ ثقَّار لْحِكْمَا ن أَربِّـي اَذَاسن سّكّغ لْأَنْبِيَا ذ اَرُّسُل، ئِجّن اَث نْغن يجّن اَخَاس اَزّْڒن.

⁵⁰ حمَا يوْذَان ن ڒْوقْث-أَ اَذ تْوَاعَاقْبن خ مَارَّا يذَامّن إِي يُوْزّْڒن زِي لْأَنْبِيَا زݣ وَامِي ثدْجَا دُّنشْت-أَ.

⁵¹ زݣ يذَامّن ن هَابِيل اَڒ يذَامّن ن زَكَرِيَا ونِّي ينْغِين جَار ڒْمذْبَح ذ ثمْزِيذَا ثَمقّْرَانْت. وَاه، أَذَاوم ينِيغ: مَارَّا لْعِقَاب خ مَانَاينِّي ذ يوْذَان ن ڒْوقْث-أَ إِي خَاس غَا يتْوَاحَاسْبن!

⁵² يَا ڒفْضِيحث نْوم آ يِنِّي يتْشرَّاحن شَّرِيعَا! ثطّْفم ڒْمفْتَاح ن ڒفْهَامث، كنِّيو وَار تِذْفم شَا ذَايس وَار تجِّيم وِي غَا يَاذْفن."

⁵³ وَامِي سّنِّي يفّغ، بْذَان يمْسڒْمَاذن ن شَّرِيعَا ذ ڒْحِزب ن يفَرِّيسِيْين تْاعَرَّاضن-ث كْتَار، تْسدَّاعن-ث خ وَاطَّاس ن ثْمسْڒَايِين.

⁵⁴ حطَّان-ث حمَا اَذ يِينِي شَان وَاوَاڒ اَث طّْفن زَّايس.