لوقا 10 - ثريفيث 2020

سِيذِيثْنغ عِيْسَى يسّكّ ثْنَاين أُو سبْعِين اَذ بشَّرن

¹ منْبَعْد إِ مَانَايَا يخْضَر سِيذِيثْنغ يجّن ثْنَاين أُو سبْعِين ن يمحْضَارن، ئِسّكّ-يثن ثْنَاين ثْنَاين يزْوَارن-اَس غَار كُڒ ثنْدِينْت ذ ومْشَان إِݣ يݣَّا نتَّا اَغَارْسن يرَاح.

² ينَّا-ٱسن إِ يمحْضَارن نّس: "ثَفدْجَاحْث اَطَّاس وَلَكِن ذْرُوْس يشوَّارن إِي غَا يخذْمن. تَّارث زِي بَاب ن ثْفدْجَاحْث اَذ يَرْنِي يشوَّارن ذݣ ومَرْجع نّس.

³ رُوْحث، أَقَا سّكّغ-كنِّيو اَمشْنَاو يزْمَارن جَار وُوْشَّانن.

⁴ وَار كِذْوم كسِّيم نِي ثَزعْبُوْڒْث، نِي اَقْرَاب، نِي ثِسِيڒَا. وَار تْسدْجَامم شَا خ ونِّي غَا ثَافم ذݣ وبْرِيذ.

⁵ خْمِي غَا ثَاذْفم غَار شَا ن ثدَّارْث، إِنِيم ذ اَمزْوَارُو: سْڒَام خ ثدَّارْث-أَ.

⁶ مڒَا يقْبڒ-كنِّيو بَاب ن ثدَّارْث نِّي، أَتَاف اَكِذس تِيڒِي لْبَرَكَا نْوم. مڒَا وَار كنِّيو يقْبِيڒ شَا، أَتَاف وَار كِذس تْغِيمِي شَا لْبَرَكَا نْوم.

⁷ قِّيمم ذِي ثدَّارْث نِّي، شّم سْوم زِي مِين غَارْسن مِينْزِي ونِّي يتْبشَّارن غَارس ڒْحَقّ اَذ يتْخَاڒس. وَار تْرَاحم شَا زِي ثدَّارْث غَار ثدَّارْث.

⁸ خْمِي غَا ثَاذْفم شَان ثنْدِينْت، مڒَا قبْڒن-كنِّيو أَيثْبَاب نّس، شّم س مِينْزِي ذَاوم غَا ؤُشن.

⁹ سْݣنْفَام يمهْڒَاش نْسن إِنِيم-اَسن قَا ڒْمُلْك ن أَربِّـي يُوْذس-د غَارْوم.

^10-11 مڒَا ثُوْذْفم غَار شَا ن ثنْدِينْت وَار كنِّيو قْبِيڒن شَا أَيثْبَاب نّس، فّْغم سّنِّي غَار يبْرِيذن نّس إِنِيم-اَسن قَا ؤُڒَا ذ ثَعجَّاشْت ن ثنْدِينْت نْوم ذَايْنغ يڒصْقن ذݣ يضَارن نّغ اَت نمْسح. وَلَكِن يتْخصَّا-كنِّيو اَذ تسّْنم بلِّي ڒْمُلْك ن أَربِّـي يُوْذس-د.

¹² أَذَاوم ينِيغ: ذِي يُوْم لْحِسَاب ذ لْعِقَاب اَذ يِيڒِي لْعِقَاب ن ثنْدِينْت نِّي كْتَار زِي لْعِقَاب ن ثنْدِينْت ثَعفَّانْت ن سَدُوْم.

¹³ يَا ڒفْضِيحث نّش يَا أَبِيلَاج ن كُوْرَزِيم! يَا ڒفْضِيحث نّش يَا أَبِيلَاج ن بَيْت صَيْدَا! مَعْلِيك لْمُعْجِزَاث-أَ إِي ذَايْوم يوقْعن، وقْعنْت ذِي ثْندَّام ثِعفَّانِين ن صُوْر ذ صَيْدَا، أَتَاف أَيْثْبَاب نْسنْت تُوْبن مشْحَاڒ زݣ وَامِي، إِڒِي ݣِّين اَرُّوْض ن لْحُزن قِّيمن خ يِيغّذ حمَا اَذ د تْبَان تُوْبَا نْسن.

¹⁴ أَقَا ثِندَّام ثِعفَّانِين نِّي ن صُوْر ذ صَيْدَا اَذ يڒِينْت حْسن زَّايْوم ذِي يُوْم لْحِسَاب ذ لْعِقَاب.

¹⁵ ئِي شك، آي اَبِيلَاج ن كَفرْنَاحُوْم! مَا تْغِير-اَش اَذ تْݣَعّْذذ غَار وجنَّا؟ لَّا، قَا شك اَذ تهْوِيذ غَار لْجَحِيم."

¹⁶ ينَّا-ٱسن عِيْسَى إِ يمحْضَارن نّس: "ونِّي يتْسْڒَان إِ وَاوَاڒ نْوم، أَتَاف يتْسْڒَا-يَايِي إِ نش. ونِّي وَار كنِّيو يقْبِيڒن شَا، أَتَاف ؤُڒَا ذ نش وَار ذَايِي يقْبِيڒ شَا. ونِّي وَار ذَايِي يقْبِيڒن شَا نش، أَتَاف وَار يقْبِيڒ شَا ونِّي ذَايِي د يسّكّن."

ثْنَاين أُو سبْعِين ن يمحْضَارن نِّي ذوّْڒن-د س ڒفْرَاحث

¹⁷ ذوْڒن-د ثْنَاين أُو سبْعِين نِّي ن يمحْضَارن فَرّْحن. نَّان-اَس إِ عِيْسَى: "آ سِيذِي، قَا ؤُڒَا ذ جْنُوْن تݣّن-اَنغ اَرَّاي عْلَاحْسَاب يسم نّش."

¹⁸ ينَّا-ٱسن عِيْسَى: "تُوْغَا تْوَاڒِيغ شِيطَان يوْضَا-د زݣ وجنَّا مَامش د يوطَّا ڒْبَرْق.

¹⁹ أَقَا تِيشّغ-اَوم جّْهذ إِي زِي غَا ثْعفّْسم خ يفِيغرَان ذ ثْغِرْذمِيوِين ذ مَارَّا جّْهذ ن ڒَعْذُو، وَار كنِّيو يتْضَرِّي وَالُو.

²⁰ إِنَّمَا، وَار فَرّْحث شَا وَامِي جْنُوْن ذَاوم تݣّن اَرَّاي. لَّا، فَرْحث وَامِي يسمَاون نْوم ؤُرِين زمّن ذݣ وجنَّا."

²¹ ڒخْدّنِّي يفَرح عِيْسَى س أَرُّوْح يقدّْسن ينَّا: "حمْذغ-شك آ بَابَا آ سِيذِي أَربِّـي ن وجنَّا ذ ثْمُوْرْث ڒَاحقَّاش ثسْنُوْفَّرذ مَانَايَا خ يمِيغِيسن ذ لْعُلَامَا، ثْسظْهَارذ-ث-يد إِ يحنْجِيرن يمزْيَانن. وَاه آ بَابَا، ڒَاحقَّاش اَمُّو إِي خَاك يَارْضَا.

²² ئِمُّوْش-اَيِي كُڒْشِي زِي بَابَا. وَار يسِّين حَدّ مِين يعْنَا مِّيس منْغِير بَابَاس. وَار يسِّين حَدّ مِين يعْنَا بَابَاس منْغِير مِّيس. بَابَاس، أَث سّْنن غِير يِنِّي ؤُمِي يخس مِّيس اَذَاسن ثِيذ يسْمظْهَار."

²³ ئِنقْڒب غَار يمحْضَارن نّس وَاحذْسن ينَّا-ٱسن: "سَّعْذ ن ثِيطَّاوِين نِّي يࢲْرِين مِين ثࢲْرِيم!

²⁴ مِينْزِي اَذَاوم ينِيغ: أَطَّاس ن لْأَنْبِيَا ذ يزدْجِيذن رْزُوْن اَذ ࢲرن مِين تْوَاڒَام، وَلَكِن وَار ث ࢲْرِين شَا. رْزُوْن اَذ سْڒن مِين ثسْڒَام، وَلَكِن وَار ث سْڒِين شَا."

ڒْمِثَال ن يِج وثَرَّاس زِي أَيث-سَامَرْيَا يتݣّن ڒْخِير

²⁵ يُوْسَا-د يجّن زݣ يِنِّي يتْشرَّاحن شَّرِيعَا يخس اَذ يجَرّب عِيْسَى ينَّا-ٱس: "آ لْمُعَلِّم، مِين غا ݣّغ حمَا اَغَارِي ثِيڒِي ثُوْذَارْث ن ڒبْدَا؟"

²⁶ ينَّا-ٱس عِيْسَى: "مِين ثقَّار شَّرِيعَا؟ مِين ذَايس ثسّْنذ؟"

²⁷ يَارَّا خَاس ونِّي ينَّا-ٱس: "ئِتْخصَّا-ٱش اَذ تخْسذ سِيذِي أَربِّـي نّش س مَارَّا ؤُڒ نّش ذ مَارَّا اَرُّوْح نّش ذ مَارَّا جّْهذ نّش ذ مَارَّا ڒَعْقڒ نّش. أَذ تخْسذ اَجَّار نّش اَمشْنَاو يخف نّش."

²⁸ ينَّا-ٱس عِيْسَى: "غَارك ڒْحَقّ ذِي مِين ثنِّيذ. اݣّ زَّايس حمَا اَغَارش ثِيڒِي ثُوْذَارْث."

²⁹ وَلَكِن ونِّي يتْشرَّاحن شَّرِيعَا يرزُّو اَذ يُوْش ڒْحَقّ خ يِيخف نّس، ينَّا-ٱس إِ عِيْسَى: "مِين يعْنَا وَاجَّار ينُو؟"

³⁰ يَارَّا خَاس عِيْسَى ينَّا-ٱس: "ئِجّن ن بْنَاذم يهوَّا زِي ثنْدِينْت ن لْقُدْس يݣُّوْر غَار ثنْدِينْت ن أَرِيحَا. فّْغن-د اَكِذس يخوَّانن ذݣ وبْرِيذ كّْسن-اَس اَرُّوْض نّس، ؤُوْثِين-ث جِّين-ث جَار ثُوْذَارْث ذ ڒْموْث.

³¹ يعْذُو سّنِّي يجّن ن ڒفْقِي ذݣ وبْرِيذ نِّي، ئِࢲْرِي-ث يَرْوڒ زَّايس.

³² ڒخْدّنِّي يعْذُو-د سّنِّي يجّن زِي شُّرْفَا ن أَيْث-لَاوِي، عَاوذ يخْزَر ذَايس يَرْوڒ.

³³ وَلَكِن يج وثَرَّاس زِي ثْمُوْرْت ن أَيث-سَامَارْيَا يتْسَفَر يعْذُو-د سّنِّي، ئِࢲْرِي-ث يقّس-اَس.

³⁴ ئِقَارّب غَارس ييْسِي زّشْت ذ وَامَان ن وضِيڒ يذْهن-اَس س يجَارِيحن نّس يشّد-اَس-ثن. ڒخْدّنِّي يسْني-ث خ وغْيُوْڒ نّس، يُوْوِي-ث غَار يِجّن ن ثدَّارْث ن يمْسَافَرن يتْهلَّا ذَايس يݣَّا ذَايس ڒْخِير.

³⁵ ثِيوشَّا نّس ييْسِي-د ثْنَاين ن دِينَار يُوْشَا-اَس-ثن إِ بَاب ن ثدَّارْث ن يمْسَافَرن ينَّا-ٱس: تْهِلَا ذَايس، شْحَاڒ مَا خَاس ثْغَسْطَارذ نّغْنِي، أَتَاف نش خْمِي د غَا اَسغ اَذَاش ثن اَرّغ."

³⁶ ينَّا-ٱس عِيْسَى إِ ونِّي: "مِين تْوَاڒِيذ شك؟ مِين يعْنَا ونِّي زِي ثْڒَاثَا نِّي إِي غَا يِيڒِين ذ اَجَّار ن بْنَاذم نِّي إِي طّْفن يخوَّانن؟"

³⁷ ينَّا-ٱس ونِّي يتْشرَّاحن شَّرِيعَا قَا ذ اَثَرَّاس نِّي إِي ذَايس يݣِّين ڒْخِير." ينَّا-ٱس عِيْسَى: "رُوْح، اݣّ مَانَاينِّي ؤُڒَا ذ شك."

مَرْثَا ذ مَرْيَم

³⁸ عِيْسَى ذ يمحْضَارن نّس ݣُّوْرن خ وبْرِيذ. يُوْذف غَار يِجّن ن دْشَار، ثْرحّب زَّايس يجّن ن ثمْغَارْث قَّارن-اَس مَرْثَا غَار ثدَّارْث نّس.

³⁹ أَكِذس يجّن ن وتْشْمَاس نتَّاث قَّارن-اَس مَرْيَم ثْرُوْح ثقِّيم غَار يضَارن ن سِيذِيثْنغ ثبْذَا تْصنَّاط إِ وَاوَاڒ نّس.

⁴⁰ مَرْثَا ثنُّوْغ اَطَّاس ذِي شّْغڒ ن ثدَّارْث. ثُوْسَا-د ثنَّا-ٱس إِ عِيْسَى: "آ سِيذِي، مَا وَار ذَاش ثشْقِي شَا وتْشْمَا ثقِّيم وَاهَا ثجَّا-ٱيِي وَاحْذِي خدّْمغ شّْغڒ؟ إِنِي-يَاس اَذَايِي ثْعَاون بَعْذَا!"

^41-42 ينَّا-ٱس سِيذِيثْنغ: "آ مَرْثَا آ مَرْثَا، بْنَاذم يتحْذَاجَا غِير يجّن ن ڒْحَاجث. شم ذَايم اَمْنُوْس تْخيَّاقذ خ وَاطَّاس ن ثْمسْڒَايِين، مَرْيَم ثِيخْضَر مِين يصبْحَان وَار ذَاس يتْوَاكّس شَا."