يوحنا 7 - ثريفيث 2020سِيذِيثْنغ عِيْسَى يتْݣَعَّاذ س ثْنُوْفْرَا غَار ثنْدِينْت ن لْقُدْس 1 منْبَعْد إِ مَانَايَا عِيْسَى يݣُّوْر زݣ ومْشَان غَار ومْشَان ذِي ثْمُوْرْث ن لْجَالِيل. ئِتْبعَّاذ زِي ثْمُوْرْث ن يَهُوْذِيَا مِينْزِي يسْرَائِيلِيْين نِّي رزُّوْن خَاس اَث نْغن. 2 ئِقَارّب-د يجّن ن ڒْعِيذ ن أَيث-إِسْرَائِيل ؤُمِي قَّارن <ثِنْوَاڒِين.> 3 نَّان-اَس أَيثْمَاس زݣ يمَّاس: "ؤُيُوْر سَّانِيتَا، رُوْح غَار ثْمُوْرْث ن يَهُوْذِيَا حمَا ؤُڒَا ذ يمحْضَارن نّش اَذ ࢲْرن مَان ڒخْذَايم إِي ثْخدّْمذ. 4 وَار يدْجِي حَدّ يخدّم شَان ثْمسْڒَايْث س ثْنُوْفْرَا مڒَا يرزُّو اَث سّْنن. مڒَا تݣّذ ثِمسْڒَايِين-أَ، سْمظْهَار-د يخف نّش إِ دُّنشْت." 5 أَيثْمَاس س يِيخف نْسن وَار ؤُمِينن شَا زِي عِيْسَى. 6 ينَّا-ٱسن عِيْسَى: "ڒْوقْث ينُو عَاذ وَار د تُوْوِيض شَا حمَا اَذ رَاحغ، وَلَكِن كنِّيو اَذ تْرَاحم ذِي اَيِّي ڒْوقْث. 7 دُّنشْت وَار ثْزمَّر شَا اَكنِّيو ثْعِيفّ، نش تْعِيفَّا-ٱيِي دُّنشْت مِينْزِي شهّْذغ قَا ڒخْذَايم ن دُّنشْت-أَ ذ ثِعفَّانِين. 8 ݣَعّْذث كنِّيو غَار ڒْعِيذ، نش وَار تْݣَعِّيذغ شَا غَار ڒْعِيذ-أَ مِينْزِي ڒْوقْث ينُو عَاذ وَار د تُوْوِيض." 9 وَامِي ذَاسن ينَّا اَوَاڒ-أَ يقِّيم ذِي ثْمُوْرْث ن لْجَالِيل. 10 وَلَكِن وَامِي ݣَعّْذن اَيثْمَاس غَار ڒْعِيذ، منْبَعْد يݣَعّذ ؤُڒَا ذ نتَّا. يݣَّا اَخمِي ينُّوْفَّر، وَار د يسْمظْهَار شَا يخف نّس. 11 رزُّوْن خَاس يسْرَائِيلِيْين ذِي ڒْعِيذ نَّان مَانِيس يكَّا ورْيَاز نِّي؟ 12 أَطَّاس إِݣ يتْوشْوِيشن زِي ڒْغَاشِي خَاس قَّارن نتَّا ذ اَرْيَاز ن ڒْخِير. وَلَكِن ينّغْنِي زَّايْسن قَّارن لَّا، ئِسْخَرِّيق خَانغ وَاهَا. 13 وَلَكِن ؤُڒَا ذ يجّن وَار خَاس يسِّيوڒ س جّْهذ س ثِيݣّْوْذِي زݣ يمقّْرَانن نِّي ن أَيث-إِسْرَائِيل. 14 وَامِي يعْذُو وزْين زِي ڒْعِيذ، ئِݣَعّذ عِيْسَى غَار ثمْزِيذَا ثَمقّْرَانْت ن أَيث-إِسْرَائِيل يسڒْمَاذ ذِنِّي. 15 ئِسْرَائِيلِيْين ذهّْشن نَّان: "مَامّش يݣَّا نتَّا يسّن مِين ذَايْسن ذِي لْكُتُب أُو نتَّا وَار يغْرِي شَا؟" 16 ينَّا-ٱسن عِيْسَى: "مِين سڒْمَاذغ وَار يدْجِي بُو ينُو، أَسڒْمذ-أَ ن ونِّي إِي ذَايِي د يسّكّن. 17 ونِّي يخْسن اَذ يݣّ زِي مِين يخس أَربِّـي اَتَاف اَذ يسّن اَسڒْمذ-أَ ينُو مَا زَّايِي نِغ زِي أَربِّـي. 18 ونِّي يسَّاوَاڒن زِي غَارس يرزُّو لْعَظَمَا إِ يِيخف نّس. ونِّي يرزُّون لْعَظَمَا ن ونِّي إِي ثِيذ يسّكّن، قَا نتَّا ذَايس لْحَقِيقَا وَار ذَايس بُو ڒْغشّ. 19 ذ مُوْسَى إِي ذَاوم يُوْشِين شَّرِيعَا، نِغ؟ وَلَكِن ؤُڒَا ذ يجّن زَّايْوم مَا يتݣّ زِي شَّرِيعَا نِّي. إِيوَا، مَايمِّي ثخْسم اَذَايِي ثنْغم؟" 20 نَّان-اَس ڒْغَاشِي: "مَا ذَايك جْنُوْن شك نِغ؟ ؤُو يرزُّوْن اَش ينغ؟" 21 ينَّا-ٱسن عِيْسَى: "ݣِّيغ لْمُعْجِزَا، ثْذهْشم كنِّيو مَارَّا. 22 شُوْف، يجَّا-ٱوم-د مُوْسَى طَّهَارث أُو طَّهَارث-أَ وَار ثدْجِي بُو زِي مُوْسَى لَّا، زِي سَّلَاف صَّالِحِين. خ مَانَايَا كنِّيو وَاخَّا ذِي نْهَار ن سّبْث ن لعِبَادَا تْطهَّارم إِ يحَرْمُوْشن. 23 مڒَا ثْسمّْحم يحَرْمُوْشن اَذ طهَّارن ذِي نْهَار ن لْعِبَادَا حمَا وَار تخِيلِيفم شَا شَّرِيعَا ن مُوْسَى، مَا تْعَصَّابم خَافِي وَامِي سْݣنْفِيغ يجّن ن بْنَاذم قَاع ذِي نْهَار ن لْعِبَادَا؟ 24 إِيوَا، وَار تْحَاسَابث شَا خَافِي اَمُّو وَاهَا، حَاسْبث س ڒْحَقّ." سِيذِيثْنغ عِيْسَى يتْشرَّاح مَانِيس نتَّا ذ مَانِي غَا يرَاح 25 ڒبْعَاض زِي ثنْدِينْت ن لْقُدْس نَّان، ذ وَانِيتَا يمْكن إِي يرزُّوْن اَث نْغن نِغ لَّا؟ 26 إِيوَا خْزَرث، ئِسَّاوَاڒ بْڒَا مَا ٱذ يسْنُوْفَّر يخف نّس، وَار ذَاس قَّارن وَالُو. يمْكن سّْنن اَرُّوْيَاس بلِّي ذ وَانِيتَا يدْجَان ذ لْمَسِيح؟ 27 وَلَكِن خْمِي د غَا يَاس لْمَسِيح ؤُڒَا ذ يجّن وَار يتسّن مَانِيس نتَّا. وَانِيتَا لَّا، نشِّين نسّن مَانِيس نتَّا. 28 ئِكَّر عِيْسَى يتْخَاطَاب س جّْهذ ذِي ثمْزِيذَا ثَمقّْرَانْت ن أَيث-إِسْرَائِيل يسڒْمَاذ-يثن يقَّار-اَسن: "مَا ذ صَّح ثسّْنم-اَيِي مَانِيس نش، نِغ مِين عْنِيغ؟ وَار د ؤُسِيغ شَا س يِيخف ينُو لَّا. ونِّي ذَايِي د يسّكّن غَارس لْحَقِيقَا! كنِّيو وَار ث ثسِّينم شَا. 29 نش سّْنغ-ث مِينْزِي نش زَّايس أُو ذ نتَّا إِي ذَايِي د يسّكّن." 30 ڒخْدّنِّي رزُّوْن اَث طّْفن، وَلَكِن وَار خَاس يسرْس فُوْس حَدّ زَّايْسن مِينْزِي ڒْوقْث نّس عَاذ وَار د تُوْوِيض. 31 إِنَّمَا، اَطَّاس زِي ڒْغَاشِي نِّي ؤُمْنن زَّايس. نَّان: "مَا ٱذ د يَاس عَاذ شَا ن لْمَسِيح اَذ يݣّ لْمُعْجِيزَاث كْتَار زِي ثِيْنَا يتݣّ وَانِيتَا؟" 32 أَرِّين-د ڒخْبَار يفَرِّيسيْين بلِّي ڒْغَاشِي تْوشْوِيشن خَاس خ ثْمسْڒَايِين نِّي. أُوْشَا كَّرن اَرُّوْيَاس ن ڒْفُقَاهَا ذ يفَرِّيسيْين سّكّن يعسَّاسن بَاش اَث طّْفن. 33 ينَّا عِيْسَى: "نش اَكِذْوم قِّيمغ ذْرُوْسْت ن ڒْوقْث، سّنِّي اَذ عقْبغ غَار ونِّي ذَايِي د يسّكّن. 34 أَخَافِي ثرْزُوْم وَار ذَايِي تِيفم شَا. وَار ثْزمَّرم اَذ د تَاسم مَانِي غَا يڒِيغ نش." 35 مْسقْسَان يسْرَائِيلِيْين جَارَاسن نَّان: "مَانِي غَا يرَاح وَانِيتَا وَار ث نْتِيف شَا؟ مَا ٱذ يرَاح غَار يسْرَائِيْلِيْين إِي يتمْزدْجَاعن ذِي ثْمُوْرَا ن ييُوْنَانِيْين بَاش اَذ يسڒْمذ ييُوْنَانِيْين؟ 36 مِين يخس اَذ يِينِّي وَاوَاڒَ-أَ إِݣ ينَّا؟ يعْنِي <أَخَافِي ثرْزُوْم وَار ذَايِي تِيفم شَا. وَار ثْزمَّرم اَذ د تَاسم مَانِي غَا يڒِيغ نش.>" سِيذِيثْنغ عِيْسَى نتَّا ذ لْمَسِيح 37 ذِي نْهَار اَنݣَّارُو اَمقّْرَان زِي ڒْعِيذ نِّي، ئِكَّر يبدّ عِيْسَى يتْخَاطَاب س جّْهذ ينَّا: "مڒَا يفُّوْذ حَدّ، ئِتْخصَّا نتَّا اَذ د يَاس غَارِي اَذ يسو. 38 مَامّش ينَّا لْكِتَاب خ ونِّي زَّايِي غَا يَامْنن: أَزَّايس اَزّْڒن يغزْرَان ن وَامَان يسدَّرن." 39 مَانَايَا ينَّا-ث خ أَرُّوْح يقدّْسن إِي غَا يقبْڒن يِنِّي زَّايس يُوْمْنن. أَرُّوْح يقدّْسن عَاذ وَار ثِيذ يُوْشِي شَا مِينْزِي عِيْسَى عَاذ وَار يتْوَارْفع شَا. 40 سْڒِين ڒبْعَاض ن ڒْغَاشِي إِ وَاوَاڒن ن عِيْسَى نَّان: "ذ وَانِيتَا ذ صَّح ذ نَّبِي إِي قَّارن اَذ د يَاس." 41 ينّغْنِي نَّان: "نتَّا ذ لمَسِيح." وَلَكِن ڒبْعَاض زَّايسن نَّان: "مَا ٱذ د يَاس لمَسِيح زِي ثْمُوْرْث ن لْجَالِيل؟ 42 ينَّا لْكِتَاب اَقَا لْمَسِيح اَذ د يَاس زِي دُّوْرِّيث ن دَاود، يعْنِي زِي بَيْت لَحْم زِي دْشَار مَانِيس د يُوْسَا دَاود." 43 خ مَانَايَا يوْقع لْخِلَاف جَار ڒْغَاشِي نِّي ذِي سَّبَاب نّس. 44 ڒبْعَاض رزُّوْن اَث طّْفن، وَلَكِن وَار خَاس يسرْس فُوْس حَدّ زَّايْسن. 45 عقْبن-د يعسَّاسن غَار يفَرِّيسِيْين ذ اَرُّوْيَاس ن ڒْفُقَهَا. سِّيوْڒن اَك يعسَّاسن نِّي نَّان-اَسن: "مَايمِّي وَار ثِيذ تُوْوِيم؟" 46 نَّان-اَسن يعسَّاسن: "عمَّارْص وَار يسِّيوڒ شَان ن بْنَاذم اَمّش يسَّاوَاڒ ورْيَاز-أَ!" 47 نَّان-اَسن يفَرِّيسيْين إِ يعسَّاسن: "مَا تْوَاخذْعم ؤُڒَا ذ كنِّيو زَّايس؟ 48 مَا ثُوْفِيم شَان يِجّن زِي اَرُّوْيَاس نِغ ذ يفَرِّيسيْين يُوْمن زَّايس؟ 49 يَاك ڒْغَاشِي نِّي وَار سِّينن شَا شَّرِيعَا ن مُوْسَى، يِنِّي اَقَاثن منْعُوْڒِين إِي دْجَان." 50 ئِكَّر يجّن زِي اَرُّوْيَاس-أَ، نتَّا تُوْغَاث قْبڒ يرُوْح غَار عِيْسَى قَّارن-اَس نِيكُوْدِيم، ينَّا-ٱسن: 51 "مَا شَّرِيعَا نّغ ثْحكّم خ يِج ن بْنَاذم قْبڒ مَا ث نْࢲر نِغ أَ نسّن مِين يتݣّ؟" 52 نَّان-اَس: "مَا شك عَاوذ زِي صْحَاب ن لْجَالِيل؟ ارْزُو ذِي لْكُتُب خْزَر، ؤُڒَا ذ يجّن ن نَّبِي وَار د يُوْسِي شَا زِي ثْمُوْرْث ن لْجَالِيل." {سِيذِيثْنغ عِيْسَى يسْمح إِ يِجّن ن ثمْغَارْث ثفّغ اَبْرِيذ} 53 سّنِّي يرُوْح كُڒ يجّن غَار ثدَّارث نّس. |