يوحنا 6 - ثريفيث 2020

سِيذِيثْنغ عِيْسَى يتِيشّ إِ خمْسَاڒَاف ن يرْيَازن اَذ شّن

¹ منْبَعْد إِ مَانَايَا يرُوْح عِيْسَى اَذ يࢲْوَا ڒبْحَر ن لْجَالِيل (قَّارن-اَس إِ ڒبْحَر نِّي طَبَرْيَا).

² ذْفَارن-ث اَطَّاس ن يِوْذَان وَامِي ࢲْرِين لْمُعْجِيزَاث نِّي وَامِي يسْݣنْفَا يمهْڒَاش.

³ ئِݣَعّذ عِيْسَى غَار وذْرَار يقِّيم اَك يمحْضَارن نّس.

⁴ ڒْعِيذ اَمقّْرَان ن أَيث-إِسْرَائِيل وَار ذَاس يقِّيم شَا اَذ د يَاوض.

⁵ ئِيْسِي عِيْسَى ثِيطَّاوِين نّس يُوْفَا ڒْغَاشِي ݣُّوْرن-د غَارس، ينَّا-ٱس إِ فِيلِيپَّـاس: "مَانِيس د غَا نْسغ اَغْرُوْم بَاش اَذَاسن نُوْش إِ يِيْنَا اَذ شّن؟"

⁶ ئِقَّار-اَس اَمُّو حمَا اَث يجَرّب ڒَاحقَّاش نتَّا يسّن مِين غَا يخْذم.

⁷ ينَّا-ٱس فِيلِيپَّـاس: "مڒَا نْسغ-د اَغْرُوْم س مِيَّاتَاين ن ثْپِـيَّاسِين ن نُّقَارْث، وَار يتْقِدِّي ؤُڒَا ذ يجّن ن ورمُّوْز إِ يِجّن."

⁸ ينَّا-ٱس يجّن زݣ يمحْضَارن نّس، نتَّا ذ أَنْدْرُوْس ؤُمَاس ن سِمْعَان بُطْرُس:

⁹ "أَقَا يج وحنْجِير غَارس خمْسَا ن ثْخبَّازِين ن يمنْدِي ذ ثْنَاين ن يسڒْمَان، وَلَكِن مَانَايَا وَار ذَاسن يتْقِيدِّي شَا إِ ڒْغَاشِي-يَا."

¹⁰ ينَّا-ٱسن عِيْسَى: "سْغِيمث يِوذَان-أَ." أَمْشَان نِّي مَانِي قِّيمن ذِنِّي اَطَّاس ن اَرْبِيع أُو ذِنِّي شَان خمْسَاڒَاف ن يرْيَازن.

¹¹ ئِيْسِي-د عِيْسَى اَغْرُوْم نِّي يشكَّر أَربِّـي، يفرق-يث إِ يِنِّي إِي ذِنِّي يقِّيمن. أَمُّو يݣَّا ؤُڒَا إِ يسڒْمَان، ؤُشِين-اَسن عْلَاحْسَاب مِين رزّْوْن.

¹² وَامِي جِّيوْنن، ينَّا-ٱسن إِ يمحْضَارن نّس: "جمْعث يڒقُّوْزن نِّي يشطّن حمَا وَار يتمْضيِّيع وَالُو."

¹³ وَامِي جمْعن، ؤُفِين ثنْعَاش ن ثقْرَابِين شُّوْرنْت زݣ يڒقُّوْزن نِّي يشطّن خ يِنِّي يشِّين زِي خمْسَا ن ثْخبَّازِين ن يمنْدِي نِّي.

¹⁴ وَامِي ࢲْرِين لْمُعْجِيزَا نِّي إِي يݣّا، ئِوْذَان نَّان قَا ذ وَانِيتَا ذ نَّبي ذ صَّح تُوْغَا د غَا يَاسن اَذ يِيڒِي ذِي دُّنشْت-أَ.

¹⁵ يسّن عِيْسَى بلِّي رزُّوْن اَث اَرَّان ذ اَزدْجِيذ س بسِّيف. ئِكَّر يُوْيُوْر سّنِّي، ئِذْوڒ غَار يذُوْرَار وَاحْذس.

¹⁶ أَݣ وعشِّي، هْوَان-د يمحْضَارن نّس غَار ڒبْحَر.

¹⁷ نْيِين ذِي ثْغَرَّابُوْت رَاحن اَذ قضْعن ڒبْحَر غَار وبِيلَاج ن كَفرْنَاحُوْم. ثُوْوض-د دْجِيڒث أُو عِيْسَى نتَّا عَاذ وَار غَارْسن د يُوْسِي.

¹⁸ ئِكَّر-د اَكِذْسن ڒبْحَر، يتْصُوْض اَرِّيح اَطَّاس.

¹⁹ وَامِي نِثْنِي تُوْغَا ؤُيُوْرن شَان خمْسَا نِغ ستَّا كِيلُوْمِت، ࢲْرِين عِيْسَى يݣُّوْر خ يضَارن خ وَامَان ن ڒبْحَر يقَارّب-د غَار ثْغَرَّابُوْت، نْخڒْعن س ثِيݣّْوْذِي.

²⁰ ينَّا-ٱسن: "أَقَا ذ نش، وَار تݣّْوْذم شَا."

²¹ أُوْشَا قبْڒن-ث س ڒْخَاضَر نْسن اَذ يَاڒِي ذِي ثْغَرَّابُوْت. ڒخْدّنِّي ثَغَرَّابُوْت ثُوْوض غَار ڒْبَرّ مَانِي تُوْغَا ݣِّين اَذ رَاحن.

سِيذِيثْنغ عِيْسَى نتَّا ذ اَغْرُوْم ن ثُوْذَارْث

²² ثِيوشَّا نّس، ڒْغَاشِي نِّي يقِّيمن اَجمَّاض إِ ڒبْحَر فقْذن بلِّي تُوْغَا ذِنِّي يجّن ن ثْغَرَّابُوْت وَاهَا وَار ت ؤُفِين شَا. نِثْنِي سّْنن عِيْسَى وَار يُوْڒِي شَا ذِي ثْغَرَّابُوْت نِّي، ئِمحْضَارن نّس ؤُيُوْرن وَاحذْسن.

²³ سّنِّي ؤُسِينْت-يد ثْغَرُّوْبَا نّغْنِي زِي ثنْدِينْت ن طَبَرْيَا غَار ومْشَان نِّي مَانِي شِّين اَغْرُوْم نِّي مَانِي يشكَّر عِيْسَى أَربِّـي.

²⁴ وَامِي ڒْغَاشِي نِّي وَار ࢲْرِين شَا عِيْسَى ذِنِّي ؤُڒَا ذ يمحْضَارن نّس، نْيِين ؤُڒَا ذ نِثْنِي ذِي ثْغَرُّوْبَا ؤُيُوْرن سّنِّي رُوْحن غَار كَفرْنَاحُوْم رزُّوْن خ عِيْسَى.

²⁵ وَامِي ث ؤُفِين غَار وجمَّاض-ين إِ ڒبْحَر نَّان-اَس: "آ لْمُعَلِّم، مڒْمِي ذَا د تُوْسِيذ ذَانِيتَا؟"

²⁶ ينْدق-د عِيْسَى ينَّا-ٱسن: "أَقَا تسْڒَام ڒْحَقّ: كنِّيو ثْرزُّوْم خَافِي وَار يدْجِي بُو وَامِي ثࢲْرِيم لْمُعْجِيزَاث، كنِّيو ثْرزُّوْم خَافِي وَامِي ثشِّيم ثْجِّيوْنم اَغْرُوْم.

²⁷ وَار خدّْمث شَا إِ ڒْمَكْلَا يخسَّرن، خذْمث إِ ڒْمَكْلَا يتْغِيمَان إِ ثُوْذَارْث ن ڒبْدَا. ذ ثَا ذ ڒْمَكْلَا ذَاوم غَا يُوْش مِّيس ن بْنَاذم مِينْزِي وَانِيتَا يضْبع-يث أَربِّـي بَابَاس س طَّابَع نّس."

²⁸ نَّان-اَس: "مِين يتْخصَّا أَ نݣّ حمَا أَ نْزمَّر أَ نخْذم ڒخْذَايم ن أَربِّـي؟"

²⁹ ينَّا-ٱسن عِيْسَى: "ذ ثَا ذ ڒْخذْمث ن أَربِّـي: أَذ تَامْنم زِي ونِّي إِي د يسّكّ نتَّا."

³⁰ نَّان-اَس: "مَان لْعَلَامَا ثَمقّْرَانْت إِي غَا ثݣّذ اَت نْࢲر حمَا اَزَّايك نَامن؟ مِين غَا ثݣّذ؟

³¹ ذِي ڒخْڒَا ڒجْذُوْذ نّغ شِّين اَغْرُوْم نِّي ؤُمِي قَّارن لْمَنَّا مَامّش د يُوْسَا ذِي لْكِتَاب: <يُوْشَا-ٱسن-د اَغْرُوْم زݣ وجنَّا حمَا اَث شّن.>"

³² ينَّا-ٱسن عِيْسَى: "أَقَا تسْڒَام ڒْحَقّ: وَار يدْجِي بُو ذ مُوْسَى إِي ذَاوم يُوْشِين اَغْرُوْم زݣ وجنَّا؛ لَّا، ذ بَابَا إِي ذَاوم يتِيشّن اَغْرُوْم ن صَّح زݣ وجنَّا.

³³ مِينْزِي اَغْرُوْم ن أَربِّـي نتَّا ذ ونِّي إِي د يهوَّان زݣ وجنَّا يتِيشّ-اَس ثُوْذَارْث إِ دُّنشْت."

³⁴ نَّان-اَس: "إِيوَا آ سِيذِي، ؤُش-اَنغ اَغْرُوْم-أَ إِ ڒبْدَا."

³⁵ ينَّا-ٱسن عِيْسَى: "نش ذ اَغْرُوْم ن ثُوْذَارْث. ونِّي إِي غَاري د غَا يَاسن وَار يتْڒِيزِي عمَّارْص. ونِّي زَّايِي غَا يَامْنن وَار يتْفِيذِي عمَّارْص.

³⁶ وَلَكِن نِّيغ-اَوم: وَاخَّا ثࢲْرِيم-اَيِي كنِّيو، وَار تِيمْنم شَا.

³⁷ مَارَّا مِين ذَايِي د يتِيشّ بَابَا يتَاس-د غَارِي. ونِّي إِي د يتَاسن غَارِي وَار ث سِݣّوِيجغ شَا.

³⁸ مِينْزِي نش هْوِيغ-د زݣ وجنَّا، وَار يدْجِي شَا اَذ ݣّغ مِين خْسغ؛ لَّا، هْوِيغ-د اَذ ݣّغ مِين يخس ونِّي إِي ذَايِي د يسّكّن.

³⁹ مِين يخس ونِّي إِي ذَايِي د يسّكّن؟ يخس بلِّي زِي مَارَّا مِين ذَايِي يُوْشَا وَار ذَايِي يتْودَّار ؤُڒَا ذ يجّن، أَثن د سكَّرغ ذِي نْهَار اَنݣَّارُو.

⁴⁰ مِين يخس بَابَا؟ يخس بلِّي كُڒ ونِّي يࢲْرِين مِّيس يُوْمن زَّايس، أَغَارس ثِيڒِي ثُوْذَارْث ن ڒبْدَا نش اَثِيذ سكَّرغ ذِي نْهَار اَنݣَّارُو."

⁴¹ بْذَان يسْرَائِيلِيْين نِّي تْشثْشَان زَّايس وَامِي ذَاسن ينَّا قَا نش ذ اَغْرُوْم إِي د يهْوَان زݣ وجنَّا.

⁴² نَّان: "وَانِيتَا، مَا وَار يدْجِي شَا ذ عِيْسَى ذ مِّيس ن يُوسف نِغ؟ نشِّين نسّن بَابَاس ذ يمَّاس، مَامّش غَا يِينِي قَا نش هْوِيغ-د زݣ وجنَّا؟"

⁴³ ينَّا-ٱسن عِيْسَى: "وَار تْشثْشَام شَا جَارَاوم.

⁴⁴ وَار يزمَّر ؤُڒَا ذ يجّن اَذ د يَاس غَارِي إِلَّا مڒَا س لْإِذن ن بَابَا إِي ذَايِي د يسّكّن، نش اَثِيذ سكَّرغ ذِي نْهَار اَنݣَّارُو.

⁴⁵ أَمُّو إِي يُوْرَا يجّن زِي لْأَنْبِيَا: <مَارَّا اَذ ڒمْذن زِي أَربِّـي.> مَارَّا ؤُو إِي س يسْڒِين إِ بَابَا اَذ يڒْمذ زَّايس اَتَاف اَغَارِي د يَاس.

⁴⁶ وَار يدْجِي ؤُڒَا ذ يجّن يࢲْرَا بَابَا إِلَّا ونِّي إِي د يُوْسِين زِي أَربِّـي، ذ نتَّا إِݣ يࢲْرِين بَابَا.

⁴⁷ أَقَا تسْڒَام ڒْحَقّ: ونِّي إِي غَا يَامْنن اَغَارس ثِيڒِي ثُوْذَارْث ن ڒبْدَا.

⁴⁸ نش ذ اَغْرُوْم ن ثُوْذَارْث.

⁴⁹ ڒجْذُوْذ نْوم شِّين اَغْرُوْم ن وجنَّا ذِي ڒخْڒَا، وَاخَّا اَمنِّي مُّوْثن.

⁵⁰ مِين يعْنَا وغْرُوْم إِي د يهْوَان زݣ وجنَّا بَاش ونِّي إِي ث غَا يشّن وَار يتْمتِّي شَا؟

⁵¹ أَقَا ذ نش ذ اَغْرُوْم يدَّرن إِي د يهْوَان زݣ وجنَّا. مَارَّا ونِّي غَا يشّن زݣ وغْرُوْم-أَ اَذ يدَّر إِ ڒبْدَا. أَغْرُوْم-أَ إِي تِيشّغ نش ذ دَّات ينُو حمَا اَذ تدَّر دُّنشْت-أَ."

⁵² ئِسْرَائِيلِيْين نِّي منْغن جَارَاسن نَّان: "مَامّش غَا يݣّ وَانِيتَا اَذَانغ يُوْش دَّات نّس اَت نشّ؟"

⁵³ ينَّا-ٱسن عِيْسَى: "أَقَا تسْڒَام ڒْحَقّ: مڒَا وَار ثشِّيم شَا دَّات ن مِّيس ن بْنَاذم وَار ثْسسّم شَا يذَامّن نّس، أَذ تِيڒِي وَار غَارْوم بُو ثُوْذَارْث ذݣ يِيخف نْوم."

⁵⁴ ينَّا-ٱسن: "ونِّي غَا يشّن دَّات ينُو اَذ يسو يذَامّن ينُو، أَغَارس ثِيڒِي ثُوْذَارْث إِ ڒبْدَا نش اَثِيذ سكَّرغ ذِي نْهَار اَنݣَّارُو.

⁵⁵ مِينْزِي دَّات ينُو ذ ڒْمَكْلَا ن صَّح، ئِذَامّن ينُو ذ ثِيسسِّي ن صَّح.

⁵⁶ مَارَّا ونِّي غَا يشّن دَّات ينُو اَذ يسو يذَامّن ينُو، أَتَاف اَذ يقِّيم ذَايِي، نش ذَايس.

⁵⁷ مَامّش إِي ذَايِي د يسّكّ بَابَا يدَّرن أُو نش دَّرغ زِي بَابَا، أَمنِّي ونِّي ذَايِي غَا يشّن اَزَّايِي إِي يدَّر.

⁵⁸ صَافِي، ذ وَانِيتَا ذ اَغْرُوْم إِي د يهْوَان زݣ وجنَّا. وَار يدْجِي شَا اَم ڒجْذُوْذ نْوم إِي شِّين اَغْرُوْم نِّي ؤُمِي قَّارن لْمَنَّا منْبَعْد مُّوْثن؛ لَّا، ونِّي غَا يشّن زݣ وغْرُوْم-أَ اَذ يدَّر إِ ڒبْدَا."

⁵⁹ مَانَايَا ينَّا-ث عِيْسَى ذِي ثمْزِيذَا وَامِي تُوْغَا يسڒْمَاذ ذݣ وبِيلَاج ن كَفرْنَاحُوْم.

أَوَاڒن ن ثُوْذَارْث ن ڒبْدَا اَقَاثن غَار سِيذِيثْنغ عِيْسَى

⁶⁰ أَطَّاس زݣ يمحْضَارن نّس وَامِي سْڒِين مَانَاينِّي نَّان قَا اَوَار-أَ يقْسح وَار يدْجِي وِي ث غَا يقبْڒن.

⁶¹ يعْڒم عِيْسَى س وُوْڒ نّس قَا يمحْضَارن نّس تْشثْشَان ينَّا-ٱسن: "مَا س مَانَايَا إِي زِي ذَاوم يتقّس ڒْحَاڒ؟

⁶² ئِي مڒَا ثࢲْرِيم مِّيس ن بْنَاذم يتْوَارْفع غَار مَانِي يقِّيم ذ اَمزْوَارُو؟

⁶³ أَرُّوْح ن أَربِّـي ذ نتَّا يسّدَّرن. مِين يدْجَان ذ بنَاذم وَار ينفّع إِ وَالُو. أَوَاڒن إِي ذَاوم نِّيغ، ذَايسن أَرُّوْح ذ ثُوْذَارْث.

⁶⁴ وَلَكِن ذَايْوم يِنِّي وَار يتِيمْنن شَا." مِينْزِي عِيْسَى يسّن زݣ ومزْوَارُو يِنِّي ذَايْسن وَار يتِيمْنن شَا ذ ونِّي إِي ث غَا يزّنْزن.

⁶⁵ ينَّا-ٱسن: "س مَانَايَا نِّيغ-اَوم: وَار يزمَّر ؤُڒَا ذ يجّن اَذ د يَاس غَارِي إِلَّا مڒَا س لْإِذن ن بَابَا."

⁶⁶ زِي ڒْوقْث نِّي سمْحن ذَايس اَطَّاس ن يمحْضَارن نّس، وَار كِس قِّيمن شَا ݣُّوْرن اَكِذس.

⁶⁷ ئِنْدق-د عِيْسَى ينَّا-ٱسن إِ ثنْعَاش ن اَرُّسُل إِي كِس يدْجَان: "ؤُڒَا ذ كنِّيو، مَا ثخْسم اَذَايِي تْسمْحم؟"

⁶⁸ ينَّا-ٱس سِمْعَان بُطْرُس: "آ سِيذِي، مِين يعْنَا ونِّي مَانِي غَا نْرَاح؟ شك غَارك اَوَاڒن ن ثُوْذَارْث ن ڒبْدَا.

⁶⁹ قَا نشِّين نُوْمن، نسّن قَا شك ذ لْعَظِيم ن أَربِّـي."

⁷⁰ ينَّا-ٱسن عِيْسَى: "نش إِي كنِّيو يخْضَرن س ثنْعَاش إِذْوم، وَلَكِن يجّن زَّايْوم ذ إِبْڒِيس."

⁷¹ مَانَايَا يقَّار-يث خ يَهُوْذَا مِّيس ن سِمْعَان إِسْخَرْيُوْطِي لِأَنَّا ذ وَانِيتَا إِي ث غَا يزّنْزن أُو نتَّا ذ يجّن زِي ثنْعَاش ن اَرُّسُل.