يوحنا 5 - ثريفيث 2020

سِيذِيثْنغ عِيْسَى يسْݣنْفَا يجّن ن ونشْرُوْف

¹ منْبَعْد إِ مَانَايَا يݣَعّذ عِيْسَى غَار ثنْدِينْت ن لْقُدْس ذݣ يِجّن ن ڒْعِيذ ن أَيث-إِسْرَائِيل.

² ذِي لْقُدْس زَّاث إِ ثوَّارْث وحُوْڒِي ذِنِّي طَّارْف نّس يجّن ن صَّرِيج قَّارن-اَس س وَاوَاڒ ن أَيث-إِسْرَائِيل بَيْت حِسْدَا، غَارس خمْسَا ن يسقِّيفن.

³ تْغِيمَان ذِنِّي اَطَّاس ن يمهْڒَاش ذ يضَرْغَاڒن ذ يزحَّافن ذ ينشْرُوْفن، {تْرَاجَان اَمَان ن صَّرِيج اَذ نْهزّن.

⁴ ثْهوَّا-د يجّن ن لْمَالَائِكَا ن أَربِّـي غَار صَّرِيج نِّي ثْسنْهزَّا اَمَان نّس. ونِّي غَا يهْوَان ذ اَمزْوَارُو ذݣ وَامَان نِّي خْمِي تنْهزَّان اَتَاف اَث سْݣنْفَان زِي ڒهْڒَاش نّس مَامّش مَا يݣَّا.}

⁵ ذِنِّي يجّن ن ومهْرُوْش ثْمنْيَا أُو ثْرَاثِين يسݣّْوُوْسَا نتَّا يهْڒش.

⁶ يُوْفِي-ث عِيْسَى يزّڒ ذِنِّي، ئِسّن قَا اَطَّاس ن ڒْوقْث زݣ وَامِي نتَّا يهْڒش. ينَّا-ٱس: "مَا ثخْسذ اَذ تݣنْفِيذ؟"

⁷ ينَّا-ٱس ومهْڒُوْش نِّي: "آ سِيذِي، وَار غَارِي وِي ذَايِي غَا يسرْسن ذِي صَّرِيج خْمِي تنْهزَّان وَامَان. نش مڒْمِي مَا رزُّوْغ اَذ هْوِيغ، تِيزْوَارن-اَيِي ينّغْنِي."

⁸ أُوْشَا ينَّا-ٱس عِيْسَى: "كَّر، إِيْسِي ثَاسُّوْث نّش، ؤُيُوْر."

⁹ ڒخْدّنِّي يݣنْفَا ورْيَاز نِّي، ييْسِي ثَاسُّوْث نّس يُويُوْر. ذِي نْهَار ن سّبْث ن لْعِبَادَا إِݣ يوْقع مَانَايَا.

¹⁰ كَّرن يسْرَائِيلِيْين نَّان-اَس إِ ونِّي يݣنْفَان: "نْهَارَا ذ نْهَار ن سّبْث ن لْعِبَادَا، وَار غَارك بُو ڒْحَقّ اَذ تيْسِيذ ثَاسُّوْث نّش."

¹¹ ينَّا-ٱسن: "ونِّي ذَايِي يسْݣنْفَان ينَّا-ٱيِي إِيْسِي ثَاسُّوْث نّش، ؤُيُوْر."

¹² نَّان-اَس: "وِي ذَاش ينَّان إِيْسِي ثَاسُّوْث نّش، ؤُيُوْر؟"

¹³ أَرْيَاز نِّي وَار يسِّين شَا مِين يعْنَا ونِّي إِي ث يسْݣنْفَان مِينْزِي عِيْسَى يودَّار ذِي ڒْغَاشِي نِّي.

¹⁴ منْبَعْد إِ مَانَاينِّي عِيْسَى يُوْفَا ونِّي يݣنْفَان اَقَاث ذِي ثمْزِيذَا ثَمقّْرَانْت ن أَيث-إِسْرَائِيل ينَّا-ٱس: "أَقَاش ثْݣنْفِيذ، وَار تݣّ بُو ڒْمُعْصِيَاث عَاوذ حمَا وَار ذَاش يتوْقِيع كْتَار زِي مِين تُوْغَا ذَايش."

¹⁵ ئِرُوْح ورْيَاز نِّي ينَّا-ٱسن إِ يسْرَائِيلِيْين قَا ذ عِيْسَى إِي ذَايِي يسْݣنْفَان.

¹⁶ س مَانَاينِّي رزُّوْن يسْرَائِيلِيْين اَذ عدّْبن عِيْسَى مِينْزِي يتݣّ مَانَايَا ذِي نْهَار ن سّبْث ن لْعِبَادَا.

سِيذِيثْنغ عِيْسَى يسنْجَام يوْذَان يتِيشّ-اَسن ثُوْذَارْث

¹⁷ ينَّا-ٱسن عِيْسَى: "بَابَا يخدّم ڒبْدَا، ؤُڒَا ذ نش خدّْمغ اَم نتَّا."

¹⁸ س مَانَايَا يسْرَائِيلِيْين رزُّون كْتَار اَث نْغن. وَار يدْجِي بُو خ سَّبَاب ن نْهَار ن لْعِبَادَا أُو صَافِي، وَلَكِن عَاوذ خْمِي ذَاسن يقَّار بلِّي أَربِّـي ذ بَابَاس يتمْسَاوَا يخف نّس اَك أَربِّـي.

¹⁹ ينَّا-ٱسن عِيْسَى: "أَقَا تسْڒَام ڒْحَقّ: مِّيس وَار يزمَّر اَذ يݣّ شَان ثْمسْڒَايْث س يِيخف نّس، غِير مِين يࢲرّ زِي بَابَاس اَقَا يتݣّ-يث. مِين مَا يتݣّ بَابَاس اَقَا يتݣّ-يث ؤُڒَا ذ مِّيس.

²⁰ بَابَاس يتخْس مِّيس، يسْبيَّان-اَس مَارَّا مِين يتݣّ. أَذَاس يسْبيّن ڒخْذَايم ثِمقّْرَانِين خ ثْمسْڒَايِين-أَ حمَا اَذ تْعجّْبم!

²¹ مَامّش د يسْنكَّر بَابَاس يِنِّي يمُّوْثن يتِيشّ-اَسن ثُوْذَارْث، ؤُڒَا ذ مِّيس يتِيشّ-اَسن ثُوْذَارْث إِ يِنِّي يخس.

²² بَابَاس وَار يتْحِسِّيب حَدّ، يُوْشَا-ٱس لْحِسَاب مَارَّا إِ مِّيس

²³ حمَا مَارَّا اَذ كَرْمن مِّيس اَمش تْكَرَّامن بَابَاس. ونِّي وَار يتْكَرِّيمن شَا مِّيس وَار يتْكَرِّيم شَا ؤُڒَا ذ بَابَاس إِي ثِيذ يسّكّن.

²⁴ أَقَا تسْڒَام ڒْحَقّ: ونِّي يتْسْڒَان إِ وَاوَاڒ ينُو يتَامن زݣ ونِّي ذَايِي د يسّكّن، أَغَارس ثِيڒِي ثُوْذَارْث ن ڒبْدَا وَار يتِيذف شَا ذِي لْعِقَاب، نتَّا اَذ يمُوْتِّي زِي ڒْمُوْث غَار ثُوْذَارْث.

²⁵ أَقَا تسْڒَام ڒْحَقّ: أَذ د تَاس ڒْوقْث اَقَا ڒخُّو ثُوْسَا-د، أَذ سْڒن يمتِّينن إِ صُّوْت ن مِّيس ن أَربِّـي أُو يِنِّي ذَاس غَا يسْڒن اَذ دَّرن.

²⁶ أَم بَابَاس غَارس ثُوْذَارْث ذݣ يِيخف نّس، أَمُّو إِي ذَاس يُوْشَا إِ مِّيس اَغَارس ثِيڒِي ثُوْذَارْث ذݣ يِيخف نّس.

²⁷ يُوْشَا-ٱس عَاوذ جّْهذ حمَا اَذ يحَاسب مِينْزِي نتَّا ذ مِّيس ن بْنَاذم.

^28-29 وَار تْعجِّيبم شَا خ مَانَايَا، قَا اَذ د تَاس ڒْوقْث ذَايس غَا سْڒن صُّوْت نّس مَارَّا يِنِّي يدْجَان ذݣ يمضْڒَان نِثْنِي اَذ د كَّرن. يِنِّي يݣِّين ثِمسْڒَايِين ثِصبْحَانِين اَذ رَاحن غَار ثُوْذَارْث. يِنِّي يݣِّين ثِمسْڒَايين ثِعفَّانِين اَذ د كَّرن اَذ رَاحن غَار لْعِقَاب.

³⁰ نش وَار زمَّرغ اَذ ݣّغ وَالُو زݣ يِيخف ينُو. مَامّش تسْڒِيغ، أَمُّو تْحَاسَابغ. لْحِسَاب ينُو ن ڒْحَقّ مِينْزِي نش وَار رزُّوْغ شَا مِين خْسغ؛ لَّا، رزُّوْغ مِين يخس ونِّي إِي ذَايِي-د يسّكّن."

ئِشهّذ أَربِّـي خ سِيذِيثْنغ عِيْسَى

³¹ "مَعْلِيك شهْذغ خ يِيخف ينُو، إِڒِي شْهَاذث ينُو وَار ثدْجِي بُو نِيشَان.

³² ئِجّن نّغْنِي يشهّذ خَافِي. نش سّْنغ شْهَاذث إِي خَافِي يشهّذ نتَّاث نِيشَان إِي ثدْجَا.

³³ كنِّيو تُوْغَا ثْسّكّم-د غَار يَحْيَى، نتَّا يشْهذ خ لْحَقِيقَا.

³⁴ وَلَكِن نش وَار حْذِيجغ شَا شْهَاذث ن بْنَاذم. قَّارغ-اَوم مَانَايَا حمَا اَذ تْنجْمم.

³⁵ يَحْيَى يُوْسَا-د ذ ڒفْنَار يرقَّان يتشْرِيقن، كنِّيو ثخْسم اَذ تْفَرْحم شَان ڒِيَّام س نُّوْر نّس.

³⁶ وَلَكِن نش غَارِي يجّن ن شْهَاذث ذ ثَمقّْرَانْت خ ثنِّي ن يَحْيَى. مِين ذَايِي د يُوْشَا بَابَا اَثِيد سْبَانغ، ثِمسْڒَايِين-أَ س يِيخف نْسنْت شهّْذنْت خَافِي بلِّي يسّكّ-اَيِي-د بَابَا.

³⁷ بَابَا ذَايِي د يسّكّن ذ نتَّا إِي خَافِي يشهْذن. كنِّيو عمَّارْص وَار ثسْڒِيم شَا صُّوْت نّس، عمَّارْص وَار ثࢲْرِيم شَا ؤُذم نّس.

³⁸ أَوَاڒ نّس وَار ذَايوم يتْغِيمِي شَا مِينْزِي ونِّي إِي ثِيد يسّكّن وَار زَّايس تِيمْنم شَا.

³⁹ ثْرزُّوم ذِي لْكُتُب كنِّيو تْغِير-اَوم ذَايْسن ثُوْذَارْث ن ڒبْدَا. إِيوَا ؤُڒَا ذ يِيْنَا شهّْذن خَافِي.

⁴⁰ وَاخَّا اَمنِّي كنِّيو وَار ثْخِيسم شَا اَغَارِي د تَاسم حمَا اَغَارْوم ثِيڒِي ثُوْذَارْث.

⁴¹ وَار حْذِيجغ شَا اَذَايِي سمْغَارن يِوْذَان.

⁴² سّْنغ-كنِّيو بلِّي وَار ذَايْوم بُو ڒمْحِبّث ن أَربِّـي.

⁴³ نش ؤُسِيغ-د ذݣ يِيسم ن بَابَا، كنِّيو وَار ذَايِي ثقْبِيڒم شَا. وَلَكِن، مڒَا يُوْسَا-د شَان يِجّن نّغْنِي غَارْوم ذݣ يِيسم نّس نِّيث وَاهَا اَث ثْقبْڒم.

⁴⁴ مَامّش غَا ثݣّم اَذ تَامْنم؟ إِيوَا كنِّيو تخْسم لْعَظَمَا ن وَايَاوْيَا، وَار ثْرزُّوْم شَا خ لْعَظَمَا ن أَربِّـي اَوحْذَانِي.

⁴⁵ وَار تْفكَّرم شَا أَزَّايوم شثْشِيغ غَار بَابَا؛ لَّا، ونِّي إِي زَّايْوم غَا يشثْشَان نتَّا ذ مُوْسَى ونِّي ذِي ثݣِّيم لْأَمَال نْوم.

⁴⁶ مَعْلِيك كنِّيو ثُوْمْنم ذِي مُوْسَى، إِڒِي ثُوْمْنم ذَايِي ؤُڒَا ذ نش مِينْزِي نتَّا يُوْرَا خَافِي.

⁴⁷ مڒَا كنِّيو وَار ثُوْمِينم شَا زِي مِين يُوْرَا، مَامّش غَا ثݣّم اَذ تَامْنم ذݣ وَاوَاڒ ينُو؟"