يوحنا 4 - ثريفيث 2020

أَطَّاس ن يِوْذَان زِي سَمَارْيَا تَامْنن زِي سِيذِيثْنغ عِيْسَى

¹ ئِسّن عِيْسَى بلِّي يفَرِّيسِيْين اَرِّين-د ڒخْبَار وَامِي د مَارْنِين غَارس يمحْضَارن يتْطهَّار-يثن س وَامَان كْتَار زِي يَحْيَى.

² وَلَكِن عِيْسَى س يِيخف نّس وَار يتْطهَّار شَا إِ يِوْذَان، ذ يمحْضَارن نّس إِݣ يݣِّين مَانَاينِّي.

³ سّنِّي يفّغ زِي ثْمُوْرْث ن يَهُوْذِيَا، ئِرُوْح غَار ثْمُوْرْث ن لْجَالِيل.

⁴ ئِتْخصَّا-يَاس إِ نتَّا اَذ يكّ خ ثْمُوْرْث ن سَمَارْيَا.

⁵ ئِكَّا خ يِجّن ن ثنْدِينْت زِي سَمَارْيَا قَّارن-اَس سُوْخَار، زَّاث إِ ومَرْجع نِّي إِݣ يُوْشَا يَعْقُوْب إِ مِّيس يُوْسف.

⁶ ذِنِّي اَنُو ن يَعْقُوْب. وَامِي عِيْسَى يُوْحڒ س وبْرِيذ اَݣ ؤُزْين ن نْهَار، ئِقِّيم غَار وَانُو نِّي ن يَعْقُوْب.

^7-8 ثُوْسَا-د يشْت ن ثمْغَارث زِي سَمَارْيَا اَذ تَايم اَمَان. ئِمحْضَارن ن عِيْسَى نِثْنِي تُوْغَا رُوْحن غَار ثنْدِينْت اَذ سْغن مِين غَا شّن. ينَّا-ٱس عِيْسَى إِ ثمْغَارْث نِّي: "ؤُش-اَيِي اَذ سْوغ."

⁹ ثنَّا-ٱس ثمْغَارْث نِّي: "شك ذ اَئِسْرَائِيلِي، نش ذ ثَسَمَارِيث. مَامّش ذَاش ثخْڒق شك ثتَّارذ-اَيِي اَذ تسْوذ؟" (إِيوَا يسْرَائِيلِيْين قَا وَار تمْصُرُوْفن شَا اَك يِوْذَان ن سَمَارْيَا.)

¹⁰ ينَّا-ٱس عِيْسَى: "مَعْلِيك شم ثسّْنذ لْهَدِيَا ن أَربِّـي ثسّْنذ مِين عْنِيغ نش إِي ذَام يقَّارن ؤُش-اَيِي اَذ سْوغ، أَتَاف ثتَّارذ-اَيِي شم اَمَان اَذَام ؤُشغ اَمَان ن ثُوْذَارْث."

¹¹ ثنَّا-ٱس: "آ سِيذِي، وَار غَارك شَا مِينْزِي غَا ثَايْمذ. أَنُو-يَا يُوْدْجغ، مَانِيس د غَا ثَاوِيذ اَمَان نِّي ن ثُوْذَارْث؟

¹² جدِّيثْنغ يَعْقُوْب يُوْشَا-ٱنغ اَنُو-يَا، ئِسْوَا زَّايس نتَّا س يِيخف نّس ذ ثَارْوَا نّس ذ ڒبْهَايم نّس. مَا ثْحسّْبذ يخف نّش كْتَار زَّايس؟"

¹³ ئِنْدق-د عِيْسَى ينَّا-ٱس: "مَارَّا ونِّي غَا يسْون زݣ وَامَان-أَ اَتَاف اَذ يفَّاذ عَاوذ.

¹⁴ وَلَكِن ونِّي غَا يسْون اَمَان إِي ذَاس غَا ؤُشغ نش اَتَاف وَار يتْفِيذِي شَا عمَّارْص. أَمَان إِي ذَاس غَا ؤُشغ نش اَذ ذوْڒن ذَايس اَمشْنَاو يجّن ن ڒْعُنْصَر اَزَّايس ثسْفِي ثُوْذَارْث ن ڒبْدَا."

¹⁵ ثنَّا-ٱس ثمْغَارْث نِّي: "آ سِيذِي، ؤُش-اَيِي اَمَان نِّي حمَا وَار تْفِيذِيغ شَا، وَار د تِيسغ شَا وَار تَايْمغ شَا اَمَان سَّانِيتَا."

¹⁶ ينَّا-ٱس عِيْسَى: "رُوْح ڒَاغَا-د إِ ورْيَاز نّم، ذْوڒ-د ذَانِيتَا."

¹⁷ ثنَّا-ٱس ثمْغَارْث نِّي: "وَار غَاري بُو اَرْيَاز." ينَّا-ٱس عِيْسَى: "وَاه، شم ثسِّيوْڒذ نِيشَان وَامِي ثنِّيذ وَار غَارِي بُو اَرْيَاز،

¹⁸ مِينْزِي ثُوْوِيذ خمْسَا ن يرْيَازن. أَرْيَاز نِّي مِيكذ تْعِيشذ ڒخُّو وَار يدْجِي بُو ذ اَرْيَاز نّم. إِيوَا غَارم صَّح ذِي مِين ثنِّيذ."

¹⁹ ثنَّا-ٱس ثمْغَارْث نِّي: "آ سِيذِي، تْوَاڒِيغ شك ذ نَّبي.

²⁰ ڒجْذُوْذ نّغ عبّْذن أَربِّـي ذݣ وذْرَار-أَ، كنِّيو يسْرَائِيلِيْين ثقَّارم قَا يتْخصَّا أَ نعْبذ ذݣ ؤُمْشَان ن لْقُدْس."

²¹ ينَّا-ٱس عِيْسَى: "تِيقَّا-ٱيِي آ ثَمْغَارْث، أَذ د تَاس يجّن ن ڒْوقْث اَتَاف كنِّيو وَار ثْعبّْذم شَا بَابَا ؤُڒَا ذݣ وذْرَار-أَ ؤُڒَا ذِي لْقُدْس.

²² كنِّيو ثْعبّْذم ونِّي وَار ثسِّينم شَا، نشِّين نْعبّذ ونِّي إِي نسّن مِينْزِي اَسنْجم يكَّا-د زݣ يسْرَائِيلِيْين.

²³ وَلَكِن اَذ د تَاس ڒْوقْث اَقَا ڒخُّو ثُوْسَا-د، مَعْلِيك يِنِّي يعبّْذن نِيشَان اَتَاف اَذ عبّْذن بَابَا س لْحَقِيقَا ذ اَرُّوْح. ذ يِيْنَا إِي خف يرزُّو بَابَا.

²⁴ أَربِّـي نتَّا ذ اَرُّوْح، يِنِّي إِي ث يعبّْذن، يتْخصَّا-يَاسن اَث عبْذن س لْحَقِيقَا ذ اَرُّوْح."

²⁵ ثنَّا-ٱس ثمْغَارْث نِّي: "نش قَا سّْنغ اَذ د يَاس لْمَسِيَا، قَّارن-اَس لْمَسِيح. خْمِي د غَا يَاس اَذَانغ يِينِي كُڒْشي."

²⁶ ينَّا-ٱس عِيْسَى: "قَا ذ نش إِي كِذم يسَّاوَاڒن."

²⁷ وَامِي د عقْبن يمحْضَارن نّس، تْعجّْبن وَامِي ث ؤُفِين يسَّاوَاڒ اَك يِجّن ن ثمْغَارْث. وَلَكِن وَار ذَاس ينِّي ؤُڒَا ذ يجّن مِين غَارس ثْرزُّوذ غَار ثَا؟ نِغ، مَايمِّي إِي كِذس ثسَّاوَاڒذ؟

²⁸ ثجَّا ثمْغَارْث نِّي اَقْذِيح نّس ثْرُوْح غَار ثنْدِينْت، ثنَّا-ٱسن إِ يوْذَان:

²⁹ "أَرَاحم-د اَذ تࢲرم يجّن ن ورْيَاز ينَّا-ٱيِي مَارَّا مِين ݣِّيغ. يمْكن ذ لمَسِيح نِغ؟"

³⁰ فّْغن يِوْذَان نِّي زِي ثنْدِينْت رُوْحن غَارس.

³¹ ذِي ڒْوقْث نّي قَّارن-اَس يمحْضَارن آ لْمُعَلِّم، ٱشّ!

³² وَلَكِن نتَّا ينَّا-ٱسن: "غَارِي مِين تتّغ، كنِّيو وَار ث ثسِّينم شَا."

³³ ئِمحْضَارن نّس سّقْسَان اَيَاوْيَا مَا يُوْوِي-اَس-د حَدّ مِين غَا يشّ؟

³⁴ ينَّا-ٱسن عِيْسَى: "ڒْمَكْلَا ينُو اَذ خذْمغ مِين يخس ونِّي ذَايِي د يسّكّن اَذ كمّْڒغ ڒْخذْمث نّس.

³⁵ غَارْوم يجّن ن لْمِثَال يقَّار: منْبَعْد إِ اَرْبعَا ن شْهُوْرَاث اَذ د تَاس ڒْوقْث ن ومْجَار. نش اَذَاوم ينِيغ: رزْمث ثِيطَّاوِين نْوم خْزَارث يمَرْجعِيون، ثُوْوض-د ڒْوقْث ن ومْجَار.

³⁶ ونِّي يمجَّارن اَذ ييْسِي تخْڒِيسث نّس يجمّع ثَفدْجَاحْث إِ ثُوذَارْث ن ڒبْدَا، حمَا اَذ مُوْنن ذِي ڒفْرَاحث نْسن يِنِّي يزَرّْعن ذ يِنِّي يمجَّارن.

³⁷ يعْنِي ذ صَّح مِين يقَّار لْمِثَال: ئِجّن يزرّع، ئِجّن يمجَّار.

³⁸ نش سّكّغ-د كنِّيو اَذ تمْجَارم مَانِي وَار ثْزرْعم شَا. ئِنّغْنِي زرْعن، كنِّيو ثسْتنْفَعم زِي ڒْخذْمث نْسن."

³⁹ أَطَّاس ن يِوْذَان زِي جِّهث ن سَمَارْيَا ؤُمْنن زِي عِيْسَى وَامِي ثشْهذ ثمْغَارْث نِّي ثنَّا-ٱسن قَا ينَّا-ٱيِي مَارَّا مِين ݣِّيغ.

⁴⁰ وَامِي إِي غَارس د ؤُسِين يِوْذَان زِي سَمَارْيَا عَرْضن-ث اَكِذْسن يقِّيم. سّنِّي يقِّيم اَكِذْسن يُوْمَاين ذِنِّي.

⁴¹ وَامِي سْڒِين اَوَاڒ ن عِيْسَى مَارْنِين يِوْذَان إِي زَّايس يُوْمْنن.

⁴² نَّان-اَس إِ ثمْغَارْث نِّي نشِّين وَار نْتِيمن شَا ڒخُّو غِير عْلَاحْسَاب مِين ذَانغ ثنِّيذ شم، مِينْزِي يسِّيوڒ اَكِذْنغ س يِيخف نّغ أُو نشِّين نسّن بلِّي ذ صَّح ذ وَا إِݣ يسنْجَامن دُّنشْت.

سِيذِيثْنغ عِيْسَى يسْݣنْفَا مِّيس ن يِج ومْخَازْنِي

⁴³ منْبَعْد إِ يُوْمَاين يفّغ سّنِّي عِيْسَى، ئِرُوْح غَار ثْمُوْرْث ن لْجَالِيل.

⁴⁴ أُو نتَّا س يِيخف نّس يقَّار ؤُڒَا ذ يجّن ن نَّبِي مَا محْتَارم ذِي ثْمُوْرْث نّس.

⁴⁵ وَامِي يُوْوض غَار لْجَالِيل رحّْبن زَّايس يِوْذَان مِينْزِي نِثْنِي ࢲْرِين مَارَّا ثِمسْڒَايِين إِݣ يݣَّا ذِي ڒْعِيذ ذِي لْقُدْس. ؤُڒَا ذ نِثْنِي تُوْغَا حْضَارن ذِنِّي ذِي ڒْعِيذ.

⁴⁶ يُوْسَا-د عَاوذ غَار وبِيلَاج ن قَانَا ذِي ثْمُوْرْث ن لْجَالِيل مَانِي تُوْغَا يَارَّا اَمَان عَادِي ذ اَمَان ن وضِيڒ. أُو ذݣ وبِيلَاج ن كَفرْنَاحُوْم ذِنِّي يِجّن زݣ يمْخَازْنِيْين ن وزدْجِيذ يهْڒش مِّيس.

⁴⁷ أَمْخَازْنِي نِّي وَامِي د يَارَّا ڒخْبَار عِيْسَى يُوْسَا-د زِي ثْمُوْرْث ن يَهُوْذِيَا غَار ثْمُوْرْث ن لْجَالِيل، ئِرُوْح غَارس ينَّا-ٱس مَا كِذِي ثهْوِيذ حمَا اَذ تسْݣنْفِيذ ممِّي؟ قَا عْڒَاين اَذ يمّث.

⁴⁸ ينَّا-ٱس عِيْسَى: "كنِّيو، مَا وَار تِيمْنم شَا حتَّا ٱذ ثࢲرم لْمُعْجِيزَاث ذ لْبُرْهَانَاث؟"

⁴⁹ ينَّا-ٱس ومْخَازْنِي: "آ سِيذِي، يَالَّاه اَكِذِي ثهْوِيذ قْبڒ مَا ٱذ يمّث وحنْجِير ينُو."

⁵⁰ ينَّا-ٱس عِيْسَى: "رُوْح، أَقَا مِّيش يدَّر." أَرْيَاز نِّي يُوْمن زݣ وَاوَاڒ نِّي إِي ذَاس ينَّا عِيْسَى أُوْشَا يرُوْح.

⁵¹ ئِهوَّا-د نتَّا، مْسڒْقَان اَكِذس يخدَّامن نّس نَّان-اَس قَا اَحَرْمُوْش نّش يدَّر.

⁵² ئِسّقْسَا-ثن ينَّا-ٱسن: "مَان ثْسَعَّات نِّي إِݣ يݣنْفَا؟" نَّان-اَس: "غَار لْوَاحْذَا ن يِضنَّاظ اَݣ وعشِّي ثْرُوْح خَاس ثْمسِّي إِي ذَايس."

⁵³ ڒخْدّنِّي يُوْفَا بَابَاس قَا ذِي ڒْوقْث نِّي إِي ذَاس ينَّا عِيْسَى مِّيش اَذ يدَّر. يُوْمن نتَّا ذ مَارَّا اَيثْبَاب ن ثدَّارْث نّس.

⁵⁴ ذ ثَانِيتَا ذ لْمُعْجِيزَا وِيس ثْنَاين إِݣ يݣّا عِيْسَى زݣ وَامِي إِي د يفّغ زِي ثْمُوْرْث ن يَهُوْذِيَا غَار ثْمُوْرْث ن لْجَالِيل.