يوحنا 21 - ثريفيث 2020

¹ منْبَعْد إِ مَانَايَا يمظْهَار-د عِيْسَى عَاوذ إِ يمحْضَارن نّس خ شّطّ ن ڒبْحَر ن طَبَرْيَا. أَمُّو إِي يوْقع.

² مُوْنن ذِنِّي ڒبْعَاض ن يمحْضَارن نّس: سِمْعَان بُطْرُس ذ تُوْمَا ونِّي ؤُمِي قَّارن <أَشْنِيو>، ذ نَاثْنَاهِيل نتَّا زݣ وبِيلَاج ن قَانَا ذِي ثْمُوْرْث ن لْجَالِيل، ذ ثَارْوَا ن زَبَادِي، ذ ثْنَاين نّغْنِي.

³ ئِكَّر سِمْعَان بُطْرُس ينَّا-ٱسن نش اَذ رَاحغ اَذ يْمَارغ. نَّان-اَس اَكِش نْرَاح ؤُڒَا ذ نشِّين. فّْغن، نْيِين ذِي ثْغَارَّابُوت. ذِي دْجِيڒث نِّي وَار يْمَارن وَالُو.

⁴ وَامِي يصْبَح ڒْحَاڒ، ؤُفِين عِيْسَى يبدّ خ شّطّ ن ڒبْحَر وَلَكِن يمحْضَارن وَار ث عْقِيڒن شَا.

⁵ ينَّا-ٱسن: "آي يحنْجِيرن، مَا ثيْمَارم شَان يسڒْمَان؟" نَّان-اَس: "لَّا، وَالُو."

⁶ ينَّا-ٱسن عِيْسَى: "سيّْبث ثْرَاشَّا خ وفُوْسِي ن ثْغَارَّابُوت اَذ تَافم يسڒْمَان." وَامِي ت سيّْبن وَار زمَّرن اَتِيد جبْذن عْلَاحقَّاش ثْعمَّر س يسڒْمَان اَطَّاس.

⁷ أَمحْضَار نِّي يعِيزّن خ عِيْسَى اَطَّاس ينَّا-ٱس إِ بُطْرُس قَا وِين ذ سِيذِيثْنغ. وَامِي يسْڒَا سِمْعَان بُطْرُس قَا وِين ذ عِيْسَى، ئِكَّر يَرض تْشَامِّير نّس ڒَاحقَّاش تُوْغَا يكّس-يث، ڒخْدّنِّي ينْضو ذِي ڒبْحَر بَاش اَذ يرَاح غَار عِيْسَى.

⁸ وَلَكِن يمحْضَارن نِّي نّغْنِي إِي كِذس يدْجَان ذْفَارن-ث-يذ س ثْغَرَّابُوْت، جبّْذن-د ثْرَاشَّا نِّي ثشُّوْر س يسڒْمَان. وَار ݣّْوِيجن شَا خ ڒْبَرّ غِير شَان مِيَّات مِيتْرُو وَاهَا.

⁹ وَامِي د ؤُوْضن غَار ڒْبَرّ، ؤُفِين ثِمسِّي ن ڒفْحَم خَاس يسڒْمَان ذ وغْرُوْم.

¹⁰ ينَّا-ٱسن عِيْسَى: "أَوِيم-د شْوَايْت ن يسڒْمَان إِي د ثيْمَارم ڒخُّو."

¹¹ ئِنْيَا سِمْعَان بُطْرُس يجْبذ-د ثْرَاشَّا نِّي غَار ڒْبَرّ، ذَايس مِيَّا و ثْڒَاثَا و خمْسِين ن يسڒْمَان ذ يمقّْرَانن. قَاع مَانَايَا، وَار ثقَّارس شَا ثْرَاشَّا نِّي.

¹² ينَّا-ٱسن عِيْسَى: "أَرَاحم-د اَذ تشّم." وَار يزْعِيم ؤُڒَا ذ يجّن زݣ يمحْضَارن اَث يسّقْسَا، مِين ثعْنِيذ شك؟ ڒَاحقَّاش سّْنن قَا ذ سِيذِيثْسن.

¹³ يرُوْح عِيْسَى ييْسِي-د اَغْرُوْم نِّي ذ يسڒْمَان نِّي يفرق-يثن خَاسن.

¹⁴ ثَانِيتَا ذ وِيس ثڒْت مَرَّاث إِي ذِي يتْمظْهَار-د عِيْسَى إِ يمحْضَارن نّس زݣ وَامِي إِي د يكَّر زِي ڒْموْث.

سِيذِيثْنغ عِيْسَى يسزْعَام سِمْعَان بُطْرُس

¹⁵ وَامِي ريّْقن، ينَّا-ٱس عِيْسَى إِ سِمْعَان بُطْرُس: "آ سِمْعَان آ مِّيس ن يُوْحَنَّا، مَا تْحِبِّيذ-اَيِي كْتَار زِي يِيْنَا؟" ينَّا-ٱس سِمْعَان بُطْرُس: "وَاه آ سِيذِي، شَك ثسّْنذ قَا نش تخْسغ-ش." ينَّا-ٱس عِيْسَى: "سشّ يزْمَارن ينُو."

¹⁶ ينَّا-ٱس عِيْسَى وِيس مَرّْثَاين: "آ سِمْعَان آ مِّيس ن يُوْحَنَّا، مَا تْحِبِّيذ-اَيِي؟" ينَّا-ٱس سِمْعَان: "وَاه آ سِيذِي، شك ثسّْنذ قَا نش تخْسغ-ش." ينَّا-ٱس عِيْسَى: "ٱرْوس يحُوْڒِيْين ينُو."

¹⁷ ينَّا-ٱس عِيْسَى وِيس ثڒْت مَرَّاث: "آ سِمْعَان آ مِّيس ن يُوْحَنَّا، مَا تخْسذ-اَيِي؟" ئِقّس-اَس ڒْحَاڒ إِ بُطْرُس ڒَاحقَّاش ينَّا-ٱس-ث وِيس ثڒْت مَرَّاث، شك مَا تخْسذ-اَيي؟ ينَّا-ٱس: "آ سِيذِي، شك ثسّْنذ كُڒْشي. ثسّْنذ قَا نش تخْسغ-ش." ينَّا-ٱس عِيْسَى: "سشّ يحُوْڒِيْين ينُو.

¹⁸ أَقَا تسْڒِيذ ڒْحَقّ: ذِي ثمْࢲِي نّش تْحزَّامذ يخف نّش تْرَاحذ مَانِي مَا ثخْسذ. وَلَكِن خْمِي غَا ثوْسَارذ، أَذ تْضڒْقذ يفَاسّن نّش اَتَاف حَدّ نّغْنِي اَش يحزّم اَش يَاوِي مَانِي وَار تخْسذ شَا."

¹⁹ ينَّا مَانَاينِّي عِيْسَى حمَا اَذ يسْبيّن مَامش غَا يمّث بُطْرُس حمَا اَذ تْمظْهَار لْعَظَمَا ن أَربِّـي. وَامِي إِي ذَاس ينَّا مَانَاينِّي، ينَّا-ٱس: "ذْفَار-اَيِي-د.‍"

²⁰ ئِنقْڒب بُطْرُس يُوْفَا يذفَّار-يثن-د ومحْضَار نِّي يعِيزّن خ عِيْسَى اَطَّاس، يعْنِي ونِّي تُوْغَا يقِّيمن غَار وغزْذِيس ن عِيْسَى ذݣ ومنْسِي نِّي ينَّا-ٱس: آ سِيذِي، مِين يعْنَا ونِّي ش غَا يزّنْزن؟

²¹ وَامِي ث يࢲْرَا بُطْرُس ينَّا-ٱس إِ عِيْسَى: "آ سِيذِي، ئِي وِين مِين ذَاس غَا يوقْعن؟"

²² ينَّا-ٱس عِيْسَى إِ بُطْرُس: "نش مڒَا خْسغ وِيْن اَذ يدَّر اَڒ غَا د ذوْڒغ، وَار ذَاش يرُوْح بُو ڒْحَاڒ. شك ذْفَار-اَيِي-د!"

²³ سّنِّي يفّغ ڒخْبَار غَار وَاوْمَاثن قَّارن: <أَمحْضَار-أَ وَار يتْمتِّي شَا.> وَلَكِن ذ صَّح عِيْسَى وَار يِينِّي شَا بلِّي اَمحْضَار-أَ وَار يتْمتِّي شَا. مِين ينَّا؟ ينَّا-ت اَمُّو: <نش مڒَا خْسغ وِيْن اَذ يدَّر اَڒ غَا د ذوْڒغ، وَار ذَاش يرُوْح بُو ڒْحَاڒ.>

²⁴ أَمحْضَار-أَ، مِين يعْنَا؟ ذ نتَّا إِݣ يشهّْذن خ ثْمسْڒَايِين-أَ ثُمَّا يُوْرِي-ثنْت. نشِّين نسّن قَا شْهَاذث نّس ن صَّح.

²⁵ أَطَّاس ن ثْمسْڒَايِين نّغْنِي إِي يݣَّا عِيْسَى. مَعْلِيك ثُوْرَا كُڒ يشْتن زَّايْسنْت يشْت-ئِشْت، حسّْبغ بلِّي اَتَاف دُّنشْت-أَ مَارَّا وَار ثْزمَّر اَذ تيْسِي لْكُتُب نِّي إِي غَا يَارِين.