يوحنا 20 - ثريفيث 2020

ئِمحْضَارن وَار تِيفن شَا سِيذِيثْنغ عِيْسَى ذݣ ونْضڒ

¹ ذِي نْهَار اَمزْوَارُو ن سِّيمَانَا، ثُوْسَا-د مَرْيَم ثَمَݣْدَالِيث غَار يِيفْرِي ن ونْضڒ ن عِيْسَى زِيش. تُوْغَا عَاذ ثَادْجسْت، ثُوْفَا اَزْرُو يتْوَاكّس خ يِيفْرِي ن ونْضڒ.

² ثُوْزّڒ-د ثُوْسَا-د غَار سِمْعَان بُطْرُس ذ ومحْضَار نّغْنِي ونِّي يعِيزّن خ عِيْسَى اَطَّاس، ثنَّا-ٱسن قَا يْسِين عِيْسَى زݣ يِيفْرِي ن ونْضڒ، وَار نسِّين مَانِي ث ݣّين.

^3-4 ئِفّغ بُطْرُس ذ ومحْضَار نِّي نّغْنِي رُوْحن س ثَازّْڒَا س ثْنَاين إِذْسن غَار يِيفْرِي ن ونْضڒ. أَمحْضَار نِّي يزْوَار-اَس إِ بُطْرُس يُوْوض ذ اَمزْوَارُو غَار يِيفْرِي ن ونْضڒ.

⁵ ئِسِيجّ خ يِيفْرِي يُوْفَا ڒشْفن يمَارْس ذِنِّي وَلَكِن وَار يُوْذِيف شَا.

⁶ ئِذفَّار-يث-يذ سِمْعَان بُطْرُس ئِخْضڒ، يُوْذف ذݣ يِيفْرِي ن ونْضڒ. ئِتْوَاڒَا ڒشْفن نِّي

⁷ يُوْفَا ڒْقَبّ إِي زِي تُوْغَا يغطَّا وزدْجِيف ن عِيْسَى وَار يدْجِي شَا اَݣ ڒشْفن، ئِضْفس وَاحْذس.

⁸ ڒخْدّنِّي يُوْذف ومحْضَار نِّي يزْوَارن غَار يِيفْرِي ن ونْضڒ، يࢲْرَا مَانَاينِّي يُوْمن.

⁹ وَلَكِن نِثْنِي عَاذ وَار فْهِيمن شَا زِي لْكِتَاب بلِّي لَابُد اَذ يكَّر عِيْسَى زِي ڒْموْث.

¹⁰ سّنِّي روّْحن يمحْضَارن.

سِيذِيثْنغ عِيْسَى يتْمظْهَار-د إِ مَرْيَم ثَمَݣْدَالِيث

¹¹ مَرْيَم ثْبدّ غَار ثوَّارْث ن يِيفْرِي ن ونْضڒ ثقِّيم ثتْرُو. وَامِي ثتْرُو ثْسِيجّ خ يِيفْرِي ن ونْضڒ

¹² ثُوْفَا ثْنَاين ن لمَالَائِكَاث س وَارُّوْض ذ اَشمْڒَاڒ يشْتن ثقِّيم غَار وزدْجِيف يشْتن ثقِّيم غَار يضَارن مَانِي تُوْغَا ثدْجَا دَّات ن عِيْسَى.

¹³ نَّانْت-اَس: "آ ثَمْغَارْث مِين شم يُوْغِين ثتْرُوذ؟" ثنَّا-ٱسنْت: "يْسِين سِيذِي، وَار سِّينغ مَانِي ث سرْسن."

¹⁴ ثنَّا مَانَاينِّي ثخْزَر غَار ذفَّار ثُوْفَا ذِنِّي عِيْسَى، وَلَكِن نتَّاث وَار ثسِّين شَا نتَّا ذ عِيْسَى.

¹⁵ ينَّا-ٱس عِيْسَى إِ مَرْيَم: "آ ثَمْغَارْث مِين شم يُوْغِين ثتْرُوْذ، مِيخف ثْرزُّوْذ؟" مَرْيَم تْغِير-اَس ذ بَاب ن جَرْدَا نِّي، ثنَّا-ٱس: "آ سِيذِي مڒَا ذ شك إِي ث ييْسِين، إِن-اَيِي مَانِي ث ثْسرْسذ حمَا اَث يْسِيغ."

¹⁶ ينَّا-ٱس عِيْسَى: "آ مَرْيَم!" ڒخْدّنِّي ثعْقڒ-يث ثنَّا-ٱس س وَاوَاڒ ن يسْرَائِيلِيْين: "آ رَابُنِي!" (زَعْمَا <آ لْمُعَلِّم.>)

¹⁷ ينَّا-ٱس عِيْسَى: "وَار ذَايِي تطّف شَا، قَا نش عَاذ وَار ݣَعّْذغ شَا غَار بَابَا. رُوْح غَار اَيثْمَا ينُو، إِن-اَسن قَا نش اَذ ݣَعّْذغ غَار بَابَا ذ بَابَاثْوم، غَار أَربِّـي ينُو ذ أَربِّـي نْوم."

¹⁸ ثْرُوْح مَرْيَم ثَمَݣْدَالِيث ثسِّيوض-ٱسن ڒخْبَار إِ يمحْضَارن ثنَّا-ٱسن قَا ࢲْرِيغ سِيذِيثْنغ يسِّيوڒ-د اَكِذِي اَقَا مِين ذَايِي ينَّا...

سِيذِيثْنغ عِيْسَى يتْمظْهَار-د ثْڒَاثَا ن ثْوَاڒَاثِين إِ يمحْضَارن نّس

¹⁹ نْهَار ن ڒْحَد مُوْنن يمحْضَارن غَار ثْمدِّيث، ثِوُّوْرَا قّْننْت ݣّْوْذن زݣ يسْرَائِيلِيْين. يُوْسَا-د عِيْسَى يبدّ ذِي ڒْوسْط ينَّا-ٱسن: "سْڒَام خَاوم."

²⁰ ينَّا-ٱسن مَانَايَا، يسْبيّن-اَسن-د يفَاسّن نّس ذ وغزْذِيس نّس. فَرْحن يمحْضَارن وَامِي ࢲْرِين سِيذِيثْسن.

²¹ ينَّا-ٱسن عَاوذ عِيْسَى: "سْڒَام خَاوم. مَامّش ذَايِي د يسّكّ بَابَا، أَمُّو نش اَكنِّيو سّكّغ."

²² وَامِي ينَّا مَانَايَا يصُوْض خَاسن ينَّا-ٱسن: "قبْڒث اَرُّوْح يقدّْسن.

²³ ونِّي ؤُمِي ثْسَمْحم إِ دّْنُوْب نّس، أَذَاس تْوَاسَمْحنْت. ونِّي ؤُمِي وَار ثسْمِيحم شَا، وَار ذَاس تْوَاسْمِيحنْت شَا."

²⁴ وَلَكِن يجّن زِي ثنْعَاش ن يمحْضَارن نّس ؤُمي قَّارن تُوْمَا تْڒَاغَان-اَس أَشْنِيو، وَار كِسن يدْجِي شَا وَامِي د يُوْسَا عِيْسَى.

²⁵ نَّان-اَس يمحْضَارن نِّي نّغْنِي قَا نࢲْرَا سِيذِيثْنغ! ئِكَّر تُوْمَا ينَّا-ٱسن: "مڒَا وَار ࢲْرِيغ شَا لْأَثَر ن يمسْمِيڒن ذݣ يفَاسّن نّس اَذ ݣّغ ضَاض ينُو ذݣ ومْشَان ن يمسْمِيڒن نِّي، أَذ سرْسغ فُوْس ينُو خ وغزْذِيس نّس، وَار تِيمْنغ شَا."

²⁶ منْبَعْد إِ ثْمنيَّام، مُوْنن يمحْضَارن عَاوذ غَار ذَاخڒ، ثِوُّوْرَا قّْننْت اَكِذْسن تُوْمَا. يُوْسَا-د عِيْسَى يبدّ ذِي ڒْوسْط نْسن ينَّا-ٱسن: "سْڒَام خَاوم!"

²⁷ ينَّا-ٱس إِ تُوْمَا: "ٱݣّ ضَاض نّش ذَانِيتَا، خْزَر يفَاسّن ينُو. سرْس فُوْس نّش خ وغزْذِيس ينُو. وَار تْشكَّا شَا؛ لَّا، أَمن."

²⁸ ينْدق-د تُوْمَا ينَّا-ٱس: "آ سِيذِي ينُو، آي أَربِّـي ينُو!"

²⁹ ينَّا-ٱس عِيْسَى: "أَڒ وَامِي ذَايِي ثࢲْرِيذ، عَاذ إِي ثُوْمْنذ؟ سَّعْذ ن يِنِّي وَار ذَايِي ࢲْرِين شَا، ؤُمْنن."

³⁰ يݣّا عِيْسَى اَطَّاس ن لْمُعْجِيزَاث نّغْنِي زَّاث إِ يمحْضَارن نّس، نِثنْتِي وَار ؤُرِينْت شَا ذِي لْكِتَاب-أَ.

³¹ ثِمسْڒَايِين-أَ ؤُرِينْت حمَا اَذ تَامْنم بلِّي عِيْسَى نتَّا ذ لْمَسِيح مِّيس ن أَربِّـي بَاش مڒَا ثُوْمْنم اَغَارْوم ثِيڒِي ثُوْذَارْث ذݣ يِيسم نّس.