يوحنا 16 - ثريفيث 2020

¹ "نِّيغ-اَوم مَانَايَا حمَا وَار ثْسمْحم شَا ذِي لْإِيمَان نْوم.

² أَكنِّيو طرْدن زِي ثمْزِيذَاوِين. عَاذ اَذ د تَاس ڒْوقْث اَذَاس يتْغِير إِ ونِّي إِي كنِّيو غَا ينْغن بلِّي يتݣّ لْأَجَار إِ أَربِّـي.

³ نِثْنِي تݣّن مَانَايَا مِينْزِي وَار سِّينن شَا بَابَا، وَار ذَايِي سِّينن ؤُڒَا ذ نش.

⁴ قَا نِّيغ-اَوم ثِمسْڒَايِين-أَ ڒخُّو بَاش مڒْمِي د غَا ثَاس ڒْوقْث، أَذ تْعَقْڒم بلِّي نِّيغ-اَوم-ثنْت نش. ذݣ ومزْوَارُو وَار ذَاوم نِّيغ شَا ثِمسْڒَايِين-أَ مِينْزِي نش اَقَايِي اَكِذْوم.

سِيذِيثْنغ عِيْسَى يسڒْمَاذ خ ڒْخذْمث ن أَرُّوْح يقدّْسن

⁵ ڒخُّو نش اَذ رَاحغ غَار ونِّي إِي ذَايِي د يسّكّن، وَلَكِن كنِّيو ؤُڒَا ذ يجّن زَّايْوم وَار ذَايِي يسّقْسِي مَانِي غَا رَاحغ.

⁶ وَامِي ذَاوم نِّيغ مَانَايَا، ؤُڒَاون نْوم ذَايْسن ڒحْڒِيق اَطَّاس.

⁷ أَقَا تسْڒَام ڒْحَقّ: حْسن إِ كنِّيو اَذ رَاحغ. مڒَا وَار رُوْحغ شَا، أَتَاف وَار غَارْوم د يتِيس شَا لْمُعَاوِن نِّي. وَلَكِن مڒَا رُوْحغ، أَتَاف اَذَاوم ثِيذ سّكّغ.

⁸ خْمِي د غَا يَاس، أَذ د يسْبيّن إِ يِوْذَان ن دُّنشْت غَلْطن خ ڒْمُعْصِيّث ذ مِين يصڒْحَان ذ لْحِسَاب.

⁹ غَلْطن خ ڒْمُعْصِيّث نْسن مِينْزِي نِثْنِي وَار زَّايِي تِيمْنن شَا.

¹⁰ غَلْطن خ مِين يصڒْحَان مِينْزِي ݣُّوْرغ غَار بَابَا، وَار ذَايِي ثْࢲرّم شَا زِي سَّا ٱڒ ثْسَاونْت.

¹¹ أُو غَلْطن خ لْحِسَاب مِينْزِي لْمُفْسِيد نِّي اَمقّْرَان ن دُّنشْت-أَ يتْوَاحْكم.

¹² غَارِي اَطَّاس ن ثْمسْڒَايِين اَذَاوم ثنْت ينِيغ، وَلَكِن ڒخُّو قسْحنْت خَاوم.

¹³ خْمِي د غَا يَاس أَرُّوْح ن لْحَقِيقَا، أَتَاف اَذَاوم د يسْبيّن لْحَقِيقَا ثكْمَاڒ. أَقَا نتَّا وَار يسِّيوِيڒ شَا زݣ يِيخف نّس، يسَّاوَاڒ إِلَّا زِي مِين ذَاس غَا يِينِي أَربِّـي. أَذَاوم يخبَّر ذِي ثْمسْڒَايِين إِي د غَا يَاسن.

¹⁴ نتَّا إِي ذَايِي غَا يسمْغَارن مِينْزِي يكسِّي زِي مِين غَارِي، أَذَاوم يخبَّر زَّايس.

¹⁵ مَارَّا مِين غَارس غَار بَابَا، غَارِي ؤُڒَا ذ نش. س مَانَايَا نِّيغ-اَوم بلِّي نتَّا يكسِّي زِي مِين غَارِي، أَذَاوم يخبَّر زَّايس."

سِيذِيثْنغ عِيْسَى يسوْجَاذ يمحْضَارن خ وُوْفُوْغ نّس

¹⁶ ينَّا-ٱسن عِيْسَى: "شْوِيت ن ڒْوقْث وَار ذَايِي ثْࢲرّم شَا، شْوِيت ن ڒْوقْث عَاذ اَذَايِي ثࢲرم."

¹⁷ نَّان ڒبْعَاض ن يمحْضَارن نّس جَارَاسن: "مِين يخس اَذ يِينِي س وَاوَاڒ-أَ؟ ئِقَّار-اَنغ شْوِيت ن ڒْوقْث وَار ذَايي ثْࢲرّم شَا، شْوِيت ن ڒْوقْث عَاذ اَذَايِي ثࢲرم. عَاوذ يقَّار، ڒَاحقَّاش نش اَذ رَاحغ غَار بَابَا."

¹⁸ قَّارن: "مِين يخس اَذ يِينِي ڒْمَعْنَا ن <شْوِيت ن ڒْوقْث>؟ وَار نفْهِيم شَا مِين يقَّار."

¹⁹ ئِسّن عِيْسَى قَا رزُّوْن اَث سّقْسَان، أُوْشَا ينَّا-ٱسن: "مَايمِّي تْسقْسَام اَيَاوْيَا خ وَاوَاڒ إِي ذَاوم نِّيغ: <شْوِيت ن ڒْوقث وَار ذَايِي ثْࢲرّم شَا، شْوِيت ن ڒْوقْث عَاذ اَذَايِي ثࢲرم>؟

²⁰ أَقَا تسْڒَام ڒْحَقّ: كنِّيو اَذ تْرُوْم اَذ تْحزْنم، وَلَكِن دُّنشْت-أَ اَذ تْفَرح. كنِّيو اَذَايْوم يِيڒِي ڒحْڒِيق، وَلَكِن ڒحْڒِيق نْوم اَذ يذْوڒ ذ ڒفْرَاحث.

²¹ ثَمْغَارْث خْمِي تَارو، يتِيڒِي ذَايس ڒحْڒِيق ڒَاحقَّاش ڒْوقْث نّس ثُوْوض-د. وَلَكِن خْمِي غَا ثَارو اَسيْمِي، وَار تْفكِّير شَا عَاذ ذِي ڒحْڒِيق نِّي س ڒفْرَاحث نّس مِينْزِي ثُوْرو-د يجّن ن وسيْمِي غَار دُّنشْت-أَ.

²² ؤُڒَا ذ كنِّيو ذَايْوم ڒحْڒِيق ڒخُّو، وَلَكِن اَكنِّيو ࢲرغ عَاوذ. ڒخْدّنِّي اَذ تْفَرْحم س وُوْڒَاون نْوم، وَار ذَاوم يتكّس ڒفْرَاحث نْوم حَدّ.

²³ نْهَار نِّي إِي د غَا يَاسن كنِّيو وَار ذَايِي تْسقْسِيم خ وَالُو. أَقَا تسْڒَام ڒْحَقّ: بَابَا اَذَاوم يُوْش مَارَّا مِين ذَاس غَا ثتَّارم عْلَاحْسَاب يسم ينُو.

²⁴ حتَّا ٱڒ ڒخُّو وَار ثتَّارم وَالُو عْلَاحْسَاب يسم ينُو. تَّارث اَذ تَافم، أَتَاف ڒفْرَاحث نْوم اَذ تِيڒِي ثكْمَاڒ.

²⁵ سِّيوْڒغ-اَوم مَانَايَا س ڒمْعَانِي. أَذ د تَاس يجّن ن ڒْوقْث وَار كِذْوم سِّيوِيڒغ شَا س ڒمْعَانِي. أَذَاوم خبَّرغ خ بَابَا س وَاوَاڒن نِيشَان بْڒَا ڒمْعَانِي.

²⁶ نْهَار نِّي كنِّيو اَذ تتَّارم إِ بَابَا عْلَاحْسَاب يسم ينُو. قَّارغ-اَوم بلِّي مَاشِي ذ نش إِي غَا يتَّارن ذݣ ومْشَان نْوم.

²⁷ مِينْزِي بَابَا س يِيخف نّس يتحِبَّا-كنِّيو وَامِي ذَايِي ثْحِبّم ثُوْمْنم بلِّي نش فّْغغ-د زِي أَربِّـي.

²⁸ فّْغغ-د زِي بَابَا وْضغ-د غَار دُّنشْت-أَ. أَذ ؤُيُوْرغ زِي دُّنشْت-أَ اَذ عقْبغ عَاوذ غَار بَابَا."

²⁹ نَّان-اَس يمحْضَارن نّس: "ڒخُّو شك ثسَّاوَاڒذ نِيشَان، وَار يدْجِي شَا س ڒمْعَانِي.

³⁰ ڒخُّو نشِّين نتْوَاڒَا بلِّي ثسّْنذ كُڒْشِي وَار ثحْذِيجذ وِي ش غَا يسّقْسَان. س مَانَايَا نُوْمن بلِّي ثُوْسِيذ-د زِي أَربِّـي."

³¹ ئِنْدق-د عِيْسَى ينَّا-ٱسن: "ڒخُّو إِي ثُوْمْنم نِغ؟

³² أَذ د تَاس يجّن ن ڒْوقْث اَقَا ڒخُّو ثُوْسَا-د، أَذ تمْزدْجَاعم كنِّيو كُڒ يجّن زَّايْوم اَذ يروَّاح. أَذَايِي ثْسمْحم اَذ يڒِيغ وَاحْذِي، وَلَكِن وَار تِيڒِيغ شَا وَاحْذِي مِينْزِي بَابَا أَقَاث اَكِذِي.

³³ قَّارغ-اَوم مَانَايَا حمَا اَذ تيْسِيم زَّايِي ڒهْنَا. ذِي دُّنشْت-أَ ثَانِيتَا اَخَاوم ثكّ ذَايس تَمَارَا، وَلَكِن شجّْعث يخف نْوم اَقَا نش ربْحغ دُّنشْت-أَ."