يوحنا 13 - ثريفيث 2020

سِيذِيثْنغ عِيْسَى يسِّيرِيذ يضَارن ن يمحْضَارن نّس

¹ قْبڒ إِ ڒْعِيذ اَمقّْرَان، نتَّا عِيْسَى يسّن قَا ڒْوقْث نّس ثُوْوض-د اَذ يمُوْتِّي زِي دُّنشْت-أَ غَار بَابَاس. نتَّا يحِبّ يِنِّي يدْجَان اَكِذس ذِي دُّنشْت، ئِحِبّ-يثن اَڒ ونݣَّارُو.

² قْبڒ اَمنْسِي تُوْغَا إِبْڒِيس يغَرّ يَهُوْذَا مِّيس ن سِمْعَان إِسْخَرْيُوْطِي حمَا اَذ يزّنْز عِيْسَى.

³ تُوْغَا عِيْسَى يسّن قَا بَابَاس يݣَّا-ٱس كُڒْشِي ذݣ يفَاسّن نّس، يُوْسَا-د زِي أَربِّـي اَذ يذْوڒ غَار أَربِّـي.

⁴ ئِكَّر خ ومنْسِي يكّس تْشَامِّير نّس، ييْسِي يجّن ن ومنْدِيڒ يصَّار يخف نّس.

⁵ ئِفَرّغ-د اَمَان ذِي ثْبقِّيث يبْذَا يسِيرِيذ يضَارن ن يمحْضَارن نّس، ئِمْسح-اَسن س ومنْدِيڒ مِيزِي يصَّار يخف نّس.

⁶ وَامِي د يُوْسَا غَار سِمْعَان بُطْرُس ينَّا-ٱس إِ عِيْسَى: "مَا شك آ سِيذِي اَذَايِي ثْسِيرْذذ يضَارن ينُو؟"

⁷ ينَّا-ٱس عِيْسَى: "شك ڒخُّو وَار ثفْهِيمذ شَا مِين خدّْمغ، زِي سَّا اَڒ ثْسَاونْت عَاذ اَذ تْفهْمذ مَانَايَا."

⁸ ينَّا-ٱس بُطْرُس: "ئِضَارن ينُو عمَّارْص اَثن ثْسِيرْذذ." ينَّا-ٱس عِيْسَى: "مڒَا وَار ذَاش سِيرْذغ، وَار ثْزمَّرذ شَا اَذ تِيڒِيذ ذ اَمحْضَار ينُو."

⁹ ينَّا-ٱس سِمْعَان بُطْرُس: "آ سِيذِي، وَار يدْجِي شَا اَذَايِي ثْسِيڒْذذ يضَارن ينُو وَاهَا، أَذَايِي تْسِيڒْذذ ؤُڒَا ذ يفَاسّن ينُو ذ وزدْجِيف ينُو."

¹⁰ ينَّا-ٱس عِيْسَى: "لَّا، ونِّي يسِيرِيذن بْڒَا مَا ٱذ يسِيرذ عَاوذ. أَذ يسِيرذ يضَارن نّس وَاهَا مِينْزِي نتَّا قَاع ذ اَمنْقَاوِي. كنِّيو مَارَّا ذ يمنْقَاوِيْين إِلَّا يجّن."

¹¹ نتَّا يسّن ونِّي إِي ث غَا يزّنْزن. س مَانَاينِّي ينَّا كنِّيو وَار ثدْجِيم شَا مَارَّا ذ يمنْقَاوِيْين.

¹² وَامِي ذَاسن يسِيرذ يضَارن نْسن، ئِݣَّا تْشَامِّير نّس يقِّيم عَاوذ ينَّا-ٱسن: "مَا ثْفهْمم مِين ذَاوم ݣِّيغ؟

¹³ كنِّيو ثقَّارم-اَيِي آ لْمُعَلِّم نِغ آ سِيذِي، كنِّيو غَارْوم ڒْحَقّ مِينْزِي نِيشَان قَا ذ نش.

¹⁴ مڒَا نش إِݣ يدْجَان ذ سِيذِيثْوم أُو ذ لْمُعَلِّم نْوم سِيرْذغ-اَوم يضَارن نْوم، ئِتْخصَّا ؤُڒَا ذ كنِّيو اَذ تْسِيرْذم يضَارن إِ وَايَاوْيَا.

¹⁵ ݣِّيغ-اَوم اَمُّو حمَا اَذ تݣّم مِين ݣِّيغ نش.

¹⁶ أَقَا تسْڒَام ڒْحَقّ: أَخدَّام وَار يدْجِي شَا ذ اَمقّْرَان زݣ ؤُوقَّاف نّس. أَمْسخَّار وَار يدْجِي شَا ذ اَمقّْرَان زݣ ونِّي إِي ثِيذ يسّكّن.

¹⁷ ڒخُّو ثسّْنم مَانَايَا، سَّعْذ نْوم مڒَا ثݣِّيم مِين ذَاوم نِّيغ.

¹⁸ نش وَار سِّيوِيڒغ شَا خَاوم مَارَّا، نش سّْنغ ؤُݣ يخْضَرغ. ڒخُّو لَابُد اَذ يكمّڒ مِين د يُوْسِين ذِي لْكِتَاب: <ونِّي يشِّين زݣ وغْرُوْم ينُو، يُوْوث-اَيِي س ونِيرز نّس.>

¹⁹ سْخبَّارغ-كنِّيو س مَانَايَا قْبڒ مَا ٱذ يوْقع، خْمِي غَا يوْقع اَتَاف اَذ تَامْنم قَا ذ نش إِݣ يدْجَان.

²⁰ أَقَا تسْڒَام ڒْحَقّ: ونِّي يقبّْڒن ونِّي إِي د غَا سّكّغ، أَقَا يقْبڒ-اَيِي. ونِّي ذَايِي يقبّْڒن، أَقَا يقبّڒ ؤُڒَا ذ ونِّي إِي ذَايِي د يسّكّن."

²¹ وَامِي ينَّا عِيْسَى مَانَايَا، ئِخيّق ذِي نّفْس نّس ينَّا-ٱسن-ت نِيشَان: "أَقَا تسْڒَام ڒْحَقّ: ئِجّن زَّايوم اَذَايِي يزّنْز."

²² ئِمحْضَارن نّس خْزَرن ذݣ وَايَاوْيَا وَار سِّينن ونِّي مِيخف يسَّاوَاڒ.

²³ ذِنِّي يجّن ن ومحْضَار نّس يعِيزّ خَاس خ عِيْسَى اَطَّاس، نتَّا يقِّيم اَك وغزْذِيس نّس.

²⁴ ئِشيَّار-اَس سِمْعَان بُطْرُس ينَّا-ٱس: "سّقْسَا-ث مِين يعْنَا ونِّي مِيخف يسَّاوَاڒ."

²⁵ ئِميّڒ غَار عِيْسَى ينَّا-ٱس: "آ سِيذِي، مِين يعْنَا؟"

²⁶ ينَّا-ٱس عِيْسَى: "أَذ سِّيسْنغ اَرقُّوْز-أَ ن وغْرُوْم، ونِّي ؤُمِي غَا ث ؤُشغ ذ نتَّا." ئِسِّيسن اَرقُّوْز نِّي ن وغْرُوْم، يُوْشَا-ٱس-ث إِ يَهُوْذَا مِّيس ن سِمْعَان إِسْخَرْيُوْطِي.

²⁷ وَامِي يطّف اَرقُّوْز نِّي ن وغْرُوْم يَهُوْذَا ڒخْدّنِّي يُوْذف-يث شِّيطَان. ينَّا-ٱس عِيْسَى: "ذغْيَا، ٱݣّ مين غَا ثݣّذ."

²⁸ وَار يفْهِيم ؤُڒَا ذ يجّن زݣ يِنِّي إِي ذِين يحْضَارن خ مِين ذَاس ينَّا.

²⁹ تْغِيڒ-اَسن إِ ڒبْعَاض قَا ينَّا-ٱس اَذ يسغ مِين حْذَاجن ذِي ڒْعِيذ نِغ اَذ يصدّق خ يمسْعَان مِينْزِي يَهُوْذَا مْكلّف خ وشمُّوْس ن تْمنْيَاث.

³⁰ وَامِي يطّف اَرقُّوْز نِّي ن وغْرُوْم صَافِي ئِفّغ. ڒخْدّنِّي ثُوْوض-د ثْمدِّيث.

سِيذِيثْنغ عِيْسَى يسڒْمَاذ يجّن ن ڒُوْصِيّث ذ جْذِيذ

³¹ وَامِي يفّغ يَاهُوْذَا ينَّا عِيْسَى: "ڒخُّو يتْوَاسمْغَار مِّيس ن بْنَاذم، يتْوَاسمْغَار س مِّيس ؤُڒَا ذ أَربِّـي.

³² مڒَا أَربِّـي يتْوَاسمْغَار س مِّيس، أَتَاف اَث يسمْغَار عَاوذ أَربِّـي ذݣ يِيخف نّس، أُو ذغْيَا اَث يسمْغَار.

³³ آ ثَارْوَا ينُو، ثقِّيم ذْرُوْسْت ن ڒْوقْث بَاش اَذ يڒِيغ اَكِذْوم. أَخَافِي ثْرزُّوْم. مِين نِّيغ نش إِ يسْرَائِيلِيْين اَذَاوم ت ينِيغ ڒخُّو إِ كنِّيو: مَانِي غَا رَاحغ نش، وَار ثْزمَّرم شَا اَذ د تَاسم ذِنِّي.

³⁴ ڒخُّو تِيشّغ-اَوم يجّن ن ڒُوْصِيّث ذ جْذِيذ: حِبّث اَيَاوْيَا. أُو حِبّث اَيَاوْيَا مَامّش كنِّيو حِبّغ نش.

³⁵ مڒَا كنِّيو تْحِبِّيم اَيَاوْيَا، أَتَاف اَذ سّْنن مَارَّا قَا كنِّيو ذ يمحْضَارن ينُو."

³⁶ ينَّا-ٱس سِمْعَان بُطْرُس: "مَانِي غَا ثْرَاحذ آ سِيذِي؟" ينَّا-ٱس عِيْسَى: "مَانِي غَا رَاحغ نش، ڒخُّو وَار ثْزمَّرذ شَا اَذَايِي ثذْفَارذ ذِنِّي. وَلَكِن عَاذ اَذَايِي د ثذْفَارذ."

³⁷ ينَّا-ٱس بُطْرُس: "آ سِيذِي، مَايمّي وَار زمَّرغ شَا اَش ذْفَارغ ڒخُّو؟ نش اَخَاك صدّْقغ ثُوْذَارْث ينُو!"

³⁸ ينْدق-د عِيْسَى ينَّا-ٱس: "مَا ذ صَّح اَخَافِي ثْصدّْقذ ثُوْذَارْث نّش؟ أَقَا تسْڒِيذ ڒْحَقّ: أَذَايِي ثنْكَرذ ثْڒَاثَا ن ثْوَاڒَاثِين قْبڒ مَا ٱذ يدّن ويَازِيض."