يوحنا 12 - ثريفيث 2020

مَرْيَم ثْذهّن سِيذِيثْنغ عِيْسَى س وَامَان ن لْوَرْذ

¹ ستِّييَّام قْبڒ إِ ڒْعِيذ اَمقّْرَان، يُوْسَا-د عِيْسَى غَار بَيْت عَنْيَا مَانِي يزدّغ لِعَازَر ونِّي إِي د يسكَّر عِيْسَى زِي ڒْموْث.

² ݣّين-اَس اَمنْسِي ذِنِّي، ؤُتْشْمَاس مَرْثَا تْسخَّار لِعَازَر يقِّيم اَكِذْسن.

³ ثيْسِي-د مَرْيَم اَزْين ن لِيتْرُو ن وَامَان ن لْوَرْذ صْفَان زݣ يِنِّي يغْڒَان س وَاطَّاس، ثذْهن-اَس إِ عِيْسَى يضَارن نّس، ثمْسح-اَس يضَارن نّس س وشوَّاف نّس. ثَدَّارْث مَارَّا ثشُّوْر س اَرِّيحث ن وَامَان نِّي ن لْوَرْذ.

⁴ يجّن زݣ يمحْضَارن نّس، ونِّي ؤُمِي قَّارن يَهُوْذَا إِسْخَريُوْطِي أُو ذ نتَّا إِي غَا يزّنْزن عِيْسَى، ينَّا-ٱسن:

⁵ "مَايمِّي وَار زّنْزن شَا اَمَان نِّي ن لْوَرْذ س ثڒْتمِيَّا ن ثْپـيَّاسِين ن نُّقَارْث اَذ مُّوْشنْت إِ يمسْعَان؟"

⁶ وَامِي ينَّا اَمُّو مَاشِي زِيدْجْزن-اَس يمسْعَان؛ لَّا، نتَّا ذ اَشفَّار مْكلّف خ وشمُّوْس ن تْمنْيَاث يتَاشَار زِي مِين ذِن سْرُوْسَان.

⁷ ينَّا-ٱس عِيْسَى: "اجّ-يت، نتَّاث ثْخمّڒ اَمَان-أَ إِ نْهَار ن ثنْضڒْث ينُو.

⁸ ئِمسْعَان اَقَاثن اَكِذْوم ڒبْدَا، نش وَار كِذْوم تْغِيمِيغ شَا إِ ڒبْدَا."

⁹ ؤُسِين-د اَطَّاس ن ڒْغَاشِي ن يسْرَائِيلِيْين وَامِي د اَرِّين ڒخْبَار بلِّي نتَّا اَقَاث ذِنِّي. وَار يدْجِي خ عِيْسَى وَاهَا، ؤُسِين-د اَذ ࢲْرن ؤُڒَا ذ لِعَازَر ونِّي إِي د يسكَّر زِي ڒْموْث.

¹⁰ خ مَانَاينِّي تَافْقن اَرُّوْيَاس ن ڒْفُقَهَا اَذ نْغن ؤُڒَا ذ لِعَازَر.

¹¹ مَايمِّي؟ ڒَاحقَّاش نتَّا ذ سَّبَاب مِينْزِي تْبعَّاذن خَاسن اَطَّاس ن يسْرَائِيلِيْين تَامْنن زِي عِيْسَى.

سِيذِيثْنغ عِيْسَى يتَاذَاف خ وسْنُوْس غَار لْقُدْس

¹² ثِيوشَّا نّس قَاع ڒْغَاشِي نِّي إِي د يُوْسِين غَار ڒْعِيذ سْڒِين بلِّي عِيْسَى يݣُّوْر-د غَار لْقُدْس.

¹³ ئِيْسِين اَفْرِيون ن ثْشجُّوْرَا ن تْمَر بَاش اَزَّايس رحْبن فّْغن اَث ڒْقَان س ڒفْرَاحث. تْعيَّاضن قَّارن لْحَمْدُو إِ أَربِّـي! سَّعْذ ن وَانِيتَا إِي د يُوْسِين عْلَاحْسَاب يسم ن سِيذِي أَربِّـي، قَا نتَّا ذ اَزدْجِيذ ن أَيث-إِسْرَائِيل!

¹⁴ يُوْفَا عِيْسَى يجّن ن وسْنُوْس ينْيَا خَاس مَامّش إِي يُوْرَا ذِي لْكِتَاب:

¹⁵ "وَار تݣّْوذ شَا آ يدْجِيس ن لْقُدْس. خْزَر، أَزدْجِيذ نّمْ اَقَا يُوْسَا-د غَارم، ئِنْيَا-د خ وسْنُوْس."

¹⁶ ئِمحْضَارن نّس وَار فْهِيمن شَا إِ ثْمسْڒَايِين-أَ ذݣ ومزْوَارُو. وَلَكِن وَامِي يتْوَارْفع عِيْسَى عَاذ إِي د فكَّرن مَانَايَا يُوْرَا خَاس ذِي لْكِتَاب بلِّي يوْقع-اَس.

¹⁷ ڒْغَاشِي نِّي كِذس، ࢲْرِين وَامِي د يڒَاغَا خ لِعَازَر زݣ ونْضڒ يسكَّر-يث-يذ زِي ڒْموْث، ڒْغَاشِي-يَا عَاذ قِّيمن شهّْذن خ مَانَاينِّي.

¹⁸ س مَانَايَا ڒْقَان-ث-يذ ڒْغَاشِي نّغْنِي مِينْزِي ڒْغَاشِي-يَا سْڒِين بلِّي تُوْغَا يݣّا لْمُعْجِيزَا نِّي.

¹⁹ نَّان يفَرِّيسيْين جَارَاسن: "أَقَا تْوَاڒَام وَار ثُوْوِّيضم غَار وَالُو! دُّنشْت مَارَّا ثْذفَّار-يث."

سِيذِيثْنغ عِيْسَى يسڒْمَاذ خ مَامّش إِي غَا يتْوَارْفع

²⁰ يِنِّي يݣَعّْذن اَذ عبْذن ذِي ڒْعِيذ اَكِذْسن ڒبْعَاض ن ييُوْنَانيْين.

²¹ ئِيُوْنَانِيْين-أَ ؤُسِين-د غَار فِيلِيپَّـاس، فِيلِيپَّـاس نتَّا زݣ وبِيلَاج ن بَيْت صَيْدَا ذِي لْجَالِيل. تتَّارن-اَس نَّان-اَس، آ سِيذِي نخْس أَ نْࢲر عِيْسَى.

²² ئِرُوْح فِيلِيپَّـاس غَار أَنْدْرُوْس بَاش اَذَاس ث يِينِي، أُوْشَا رُوْحن س ثْنَاين إِذْسن غَار عِيْسَى نَّان-اَس-ث.

²³ ئِنْدق-د عِيْسَى ينَّا-ٱسن: "ثُوْسَا-د ڒْوقْث اَذ يتْوَارْفع مِّيس ن بْنَاذم.

²⁴ أَقَا تسْڒَام ڒْحَقّ: ثَحبُّوْشْت ن يِرْذَان مڒَا وَار تْوَاࢲُّو شَا ذِي ثْمُوْرْث يعْنِي مڒَا وَار تْوَانْضڒ شَا، اَتَاف اَذ ثقِّيم ذ ثَحبُّوْشْت وَاهَا. مڒَا تْوَانْضڒ اَذ تُوْش اَطَّاس ن ڒْحَبّ.

²⁵ ونِّي يتخْسن ثُوْذَارْث نّس، أَتَاف اَت يخْسَر. ونِّي يتْعِيفَّان ثُوْذَارْث نّس ذِي دُّنشْت-أَ، أَتَاف اَت يَاف ذِي ثُوْذَارْث ن ڒبْدَا.

²⁶ ونِّي يخْسن اَذَايِي يخْذم، ئِتْخصَّا اَذَايِي يذْفَار. مَانِي غَا يڒِيغ نش، أَذ يِيڒِي عَاوذ ذ اَخدَّام ينُو. ونِّي ذَايِي غَا يخذْمن، أَث يكَرّم بَابَا.

²⁷ ڒخُّو ڒَعْمَر ينُو يخيّق. مَا ٱذ ينِيغ: آ بَابَا سنْجم-اَيِي زِي ڒْوقْث-أَ؟ لَّا، خ سَّبَاب ن ڒْوقْث-أَ مِينْخف إِي د ؤُسِيغ.

²⁸ آ بَابَا، سمْغَار يسم نّش." أُوْشَا يُوْسَا-د يجّن ن صُّوْت زݣ وجنَّا ينَّا، سمْغَارغ-ث، أَث سمْغَارغ عَاوذ.

²⁹ ڒْغَاشِي نِّي تُوْغَا يبدّن تسْڒَان، نَّان اَقَا وَا ذ اَجَّاج. ينّغْنِي نَّان، اَقَا ثسِّيوڒ غَارس يجّن ن لْمَلَائِكَا.

³⁰ ينَّا-ٱسن عِيْسَى: "صُّوْت-أَ وَار يدْجِي بُو إِ يِيخف ينُو لَّا، إِ كنِّيو.

³¹ ڒخُّو اَذ تْوَاعَاقب دُّنشْت-أَ. ڒخُّو لْمُفْسِيد نِّي اَمقّْرَان ن دُّنشْت-أَ اَخَاس اَزّْڒن.

³² خْمِي غَا تْوَاسْبدّغ ذݣ وجنَّا إِ ثْمُوْرْث، أَذ سذْفَارغ غَارِي مَارَّا يوْذَان."

³³ س وَاوَاڒ-أَ يرزُّو اَسن د يسْبيّن ڒْموْث نِّي إِي غَا يمّث.

³⁴ نَّان-اَس ڒْغَاشِي نِّي: "نشِّين نسْڒَا زِي مِين يقَّار لْكِتَاب قَا لْمَسِيح اَذ يقِّيم إِ ڒبْدَا. إِيوَا، مَامّش ثقَّارذ شك قَا مِّيس ن بْنَاذم يتْخصَّا اَذ يتْوَاسْبدّ ذݣ وجنَّا؟ مِين يعْنَا مِّيس-أَ ن بْنَاذم قَاع؟"

³⁵ ينَّا-ٱسن عِيْسَى: "ذْرُوْسْت ن ڒْوقْث إِي كِذْوم يتِيڒِي نُّوْر. ؤُيُوْرم مَدَامَا عَاذ غَارْوم نُّوْر-أَ حمَا وَار خَاوم د ثْحَرّث ثَادْجسْت. ونِّي يݣُّوْرن ذِي ثَادْجسْت وَار يسِّين مَانِي يݣُّوْر.

³⁶ خْمِي عَاذ غَارْوم نُّوْر، أَمْنث زِي نُّوْر-أَ حمَا كنِّيو اَذ تْذوْڒم ذ ثَارْوَا ن نُّوْر." وَامِي ينَّا مَانَايَا عِيْسَى يُوْيُوْر ينُّوْفَّر زَّايسن.

أَيْث-إِسْرَائِيل تَاݣِين اَذ اَمْنن

³⁷ عِيْسَى وَاخَّا يݣّا اَطَّاس ن لْمُعْجِيزَاث زَّاثْسن، وَار زَّايس ؤُمِينن شَا.

³⁸ مَانَايَا حمَا اَذ يكمّڒ إِ مِين ينَّا نَّبِي ؤُمِي قَّارن إِشَعْيَا: <آي أَربِّـي، وِي يُوْمْنن س وَاوَاڒ نّغ؟ إِ وُوْمِي د يسْبيّن جّْهذ ن وفُوْس ن أَربِّـي؟>

³⁹ س مَانَايَا وَار زمَّرن شَا اَذ اَمْنن مِينْزِي إِشَعْيَا ينَّا عَاوذ:

⁴⁰ <ئِسْضرْغڒ-يثن زِي ثِيطَّاوِين نْسن، ئِسّقْسح-اَسن ؤُڒَاون نْسن، حمَا وَار تْوِيڒِين س ثِيطَّاوِين نْسن، حمَا وَار فهّْمن س وُوْڒَاون نْسن، بَاش وَار غَارِي د ذوِّيڒن نش اَثن سْݣنْفِيغ.>

⁴¹ نَّبِي إِشَعْيَا ينَّا مَانَايَا خ عِيْسَى وَامِي يࢲْرَا لْعَظَمَا نّس يسِّيوڒ خَاس نتَّا.

⁴² إِنَّمَا، يوْذَان اَطَّاس وَاخَّا زِي اَرُّوْيَاس نِّي ؤُمْنن زَّايس. وَلَكِن خ سَّبَاب ن يفَرِّيسِيْين ؤُݣِين يِوْذَان-أَ اَت ينِين حمَا وَار ثن طرْدن شَا زِي ثمْزِيذَا.

⁴³ أَقَا رزُّوْن اَرْضَا ن يِوْذَان كْتَار زِي اَرْضَا ن أَربِّـي.

أَوَاڒن ن سِيذِيثْنغ عِيْسَى ذ يِنِّي إِي غَا يحَاسْبن يوْذَان

⁴⁴ عِيْسَى يتْخَاطَاب س جّْهذ ينَّا: "ونِّي يتَامْنن زَّايي، مَاشِي يتَامن زَّايِي يتَامن زِي ونِّي إِي ذَايِي د يسّكّن.

⁴⁵ ونِّي إِي ذَايِي يࢲْرِين، يࢲْرَا ونِّي إِي ذَايِي د يسّكّن.

⁴⁶ ؤُسِيغ-د غَار دُّنشْت-أَ ذ نُّوْر حمَا ونِّي إِي زَّايِي يُوْمْنن وَار يتْغِيمِي شَا ذِي ثَادْجسْت.

⁴⁷ ونِّي غَا يسْڒن إِ وَاوَاڒ ينُو وَار ذَاس يتْطِيعِي شَا اَتَاف نش وَار ث تْحِسِيبغ شَا. أَقَا نش وَار د ؤُسِيغ شَا اَذ حَاسْبغ دُّنشْت؛ لَّا، ؤُسِيغ-د حمَا اَذ سنْجْمغ دُّنشْت.

⁴⁸ ونِّي إِي ذَايِي يتْعيَّابن نتَّا وَار يقبّڒ شَا اَوَاڒ ينُو، أَتَاف غَارس وِي ث غَا يحَاسْبن. أَوَاڒَ-أَ إِي نِّيغ ذ ونِّي إِي ث غَا يحَاسْبن ذِي نْهَار اَنݣَّارُو.

⁴⁹ أَقَا وَار سِّيوْڒغ شَا زِي غَاري؛ لَّا، نش سَّاوَاڒغ نش قَّارغ زِي ڒُوْصِيّث إِي ذَايِي يُوْشَا بَابَا يعْنِي ونِّي إِي ذَايِي د يسّكّن.

⁵⁰ سّْنغ ڒُوْصِيّث نّس نتَّاث ذ ثُوْذَارْث ن ڒبْدَا. مِين سَّاوَاڒغ نش، سَّاوَاڒغ-ث عْلَاحْسَاب مَامّش إِي ذَايِي ينَّا بَابَا."