يوحنا 11 - ثريفيث 2020

سِيذِيثْنغ عِيْسَى يسكَّر-د لِعَازَر زِي ڒْموْث

¹ ئِجّن ن بْنَاذم قَّارن-اَس لِعَازَر يهْڒش، نتَّا زݣ وبِيلَاج نِّي ؤُمِي قَّارن بَيْت عَنْيَا. زدّْغنْت ذِنِّي سُوْيْثْمَاس، ئِشْتن قَّارن-اَس مَرْيَم يشْتن قَّارن-اَس مَرْثَا.

² مَرْيَم ذ نتَّاث إِݣ يذهْنن يضَارن ن عِيْسَى س وَامَان ن لْوَرْذ ثمْسح-اَس-ثن س وشوَّاف نّس. ؤُمَاس ن مَرْيَم لِعَازَر يهْڒش.

³ سُوْيْثْمَاس نِّي سّكّنْت-يد غَار عِيْسَى نَّانْت-اَس آ سِيذِي، قَا ونِّي خَاك يعِيزّن قَا يهْڒش.

⁴ وَامِي يِسْڒَا إِ مَانَاينِّي عِيْسَى ينَّا ڒهْرَاش-أَ وَار د يُوْسِي شَا حمَا اَذ يمّث؛ لَّا، يُوْسَا-د ذ سَّبَاب إِ لْعَظَمَا ن أَربِّـي حمَا اَزَّايس يتْوَاسمْغَار مّيس ن أَربِّـي.

⁵ تُوْغَا عِيزّن خَاس خ عِيْسَى مَرْثَا ذ وتْشْمَاس ذ ومَاس لِعَازَر.

⁶ وَامِي يسْڒَا نتَّا قَا يهْڒش، ئِقِّيم ذِنِّي يُوْمَاين مَانِي يدْجَا.

⁷ منْبَعْد إِ مَانَايَا ينَّا-ٱسن إِ يمحْضَارن نّس: "يَالَّه أَ نذْوڒ عَاوذ غَار ثْمُوْرْث ن يَهُوْذِيَا."

⁸ نَّان-اَس يمحْضَارن: "مَامّش آ لْمُعَلِّم؟ ئِسْرَائِيلِيْين نِّي تُوْغَا رزُّوْن اَش رجْمن، شك ثخْسذ اَذ ثْعقْبذ ذِنِّي؟"

⁹ ينَّا-ٱسن عِيْسَى: "ذِنِّي ثنْعَاش ن سْوَايَع ن ثْفَاوْث ذِي نْهَار. ونِّي يݣُّوْرن ذِي نْهَار وَار يتْنقْرِيض شَا مِينْزِي يتْوَاڒَا ثْفَاوْث ن دُّنشْت-أَ.

¹⁰ مڒَا شَان يِجّن يݣُّوْر س دْجِيڒث يتْنقْرَاض مِينْزِي دْجِيڒث وَار ذَايس بُو ثْفَاوْث."

¹¹ وَامِي ينَّا مَانَايَا، يَرْنِي ينَّا-ٱسن: "أَمدُّوْكّڒ نّغ لِعَازَر قَا يطّص، أَذ رَاحغ اَثِيذ سْفَاقغ."

¹² نَّان-اَس يمحْضَارن: "آ سِيذِي، مڒَا نتَّا يطّص اَذ يكَّر نِّيث."

¹³ وَلَكِن عِيْسَى يسِّيوڒ خ ڒْموْث نّس، نِثْنِي تْغِير-اَسن يسَّاوَاڒ خ اَرَّاحث نِّي ن يِنِّي يطّْصن.

¹⁴ أُوْشَا ينَّا-ٱسن نِيشَان: "قَا لِعَازَر يمُّوْث.

¹⁵ نش فَرْحغ وَامِي وَار ذِنِّي دْجِيغ حمَا اَذ تَامْنم. يَالَّه اَغَارس نْرَاح."

¹⁶ تُوْمَا يعْنِي ونِّي ؤُمِي قَّارن أَشْنِيو ينَّا-ٱسن إِ يمحْضَارن إِي يدْجَان ذ يمدُّوْكَاڒ نّس: "أَكِس نُوْيُوْر ؤُڒَا ذ نشِّين اَكِس نمّث."

¹⁷ وَامِي د يُوْسَا عِيْسَى، يُوْفَا ثعْذُو أَرْبعِيَّام زݣ وَامِي يتْوَانْضڒ.

¹⁸ بَيْت عَنْيَا ثݣّْوج ثْڒَاثَا كِيلُوْمِت خ لْقُدْس.

¹⁹ أَطَّاس ن يسْرَائِيلِيْين ؤُسِين-د غَار مَرْثَا ذ مَرْيَم حمَا اَثنْت عزَّان خ ومَاثْسنْت.

²⁰ وَامِي ثسْڒَا مَرْثَا قَا عِيْسَى يݣُّوْر-د، ثْرُوْح اَث تڒْقَا وَلَكِن مَرْيَم ثقِّيم ذِي ثدَّارْث.

²¹ ثنَّا-ٱس مَرْثَا إِ عِيْسَى: "آ سِيذِي، مَعْلِيك اَقَاش ذَانِيتَا إِڒِي وَار يمُّوْث شَا ؤُمَا.

²² نش سّْنغ بلِّي عَاذ ڒخُّو قَا أَربِّـي اَذَاش يُوْش مِين مَا ثتَّارذ-اَس."

²³ ينَّا-ٱس عِيْسَى: "أَذ د يكَّر عَاوذ وُوْمَام."

²⁴ ثنَّا-ٱس مَرْثَا: "سّْنغ اَذ د يكَّر ذِي ڒْوقْث ن لْقِيَامَا ذِي نْهَار اَنݣَّارُو."

²⁵ ينَّا-ٱس عِيْسَى: "نش ذ لْقِيَامَا نش ذ ثُوْذَارْث، ونِّي يتَامْنن زَّايي اَتَاف اَذ يدَّر وَاخَّا يمُّوْث.

²⁶ مَارَّا ونِّي يدَّرن أُو نتَّا يتَامن زَّايِي اَتَاف وَار يتْمتِّي إِ ڒبْدَا. مَا ثُوْمْنذ زِي مَانَايَا؟"

²⁷ ثنَّا-ٱس: "وَاه آ سِيذِي. نش ؤُمْنغ قَا شك ذ لْمَسِيح، شك ذ مِّيس ن أَربِّـي، شك ذ ونِّي إِي د يتَاسن غَار دُّنشْت."

²⁸ وَامِي ثنَّا مَانَايَا، ثْرُوْح ثْڒَاغَا-د إِ وتْشْمَاس س ڒْحسّ ثنَّا-ٱس: "لْمُعَلِّم يُوْسَا-د يرزُّو خَام."

²⁹ وَامِي ثسْڒَا مَانَايَا، ثكَّر س ثَازْڒَا ثْرَاح غَارس.

³⁰ عِيْسَى عَاذ وَار د يُوْسِي شَا غَار وبِيلَاج، أَقَاث ذݣ ومْشَان مَانِي ث تڒْقَا مَرْثَا.

³¹ ئِسْرَائِيلِيْين نِّي اَقَاثن اَك مَرْيَم ذِي ثدَّارث تْعزَّان-ت. وَامِي ࢲْرِين مَرْيَم ثكَّر س ثَازْڒَا ثفّغ نِثْنِي ذْفَارن-ت تْغِير-اَسن اَذ تْرَاح غَار ونْضڒ اَذ تْرُو ذِنِّي.

³² وَامِي د تُوْسَا مَرْيَم مَانِي يدْجَا عِيْسَى، ثࢲْرِي-ث ثوْضَا-يَاس غَار يضَارن نّس ثنَّا-ٱس: "آ سِيذِي، مَعْلِيك اَقَاش ذَانِيتَا إِڒِي وَار يمُّوْث شَا ؤُمَا."

³³ عِيْسَى وَامِي ت يࢲْرَا ثتْرُو حتَّا ذ يسْرَائِيلِيْين نِّي إِي كِذس د يُوْسِين ؤُڒَا ذ نِثْنِي تْرُوْن، نتَّا ؤُڒ نّس ئِغْڒب-يث يخيّق ذِي نّفْس نّس.

³⁴ ينَّا-ٱسن: "مَانِي ث تْنضْڒم؟" نَّان-اَس: "أَرَاح-د آ سِيذِي اَذ تࢲرذ."

³⁵ عِيْسَى يتْرُو.

³⁶ نَّان يسْرَائِيلِيْين نِّي خْزَرم مشْحَاڒ تُوْغَا خَاس يعِيزّ.

³⁷ نَّان ڒبْعَاض زَّايسن قَا ذ وَانِيتَا إِي يسْݣنْفَان ثِيطَّاوِين ن وضَرْغَاڒ، مَا وَار يزمَّر اَتَاف يݣَّا شَان ڒْحَاجث بَاش وَار يتْمتِّي شَا لِعَازَر؟

³⁸ عِيْسَى يزِيدْجز-اَس عَاوذ ذݣ وُوْڒ نّس، يُوْسَا-د غَار يِيفْرِي ن ونْضڒ يُوْفَا خَاس اَزْرُو.

³⁹ ينَّا عِيْسَى: "سْبعّْذث خَاس اَزْرُو-يَا." ثنَّا-ٱس مَرْثَا وتْشْمَاس ن ونِّي يمُّوْثن: "آ سِيذِي، قَا يُرْصُوْض ڒَاحقَّاش ثعْذُو خَاس اَرْبعِيَّام زݣ وَامِي يمُّوْث."

⁴⁰ ينَّا-ٱس عِيْسَى: "يَاش نِّيغ-اَم، مڒَا ثُوْمْنذ اَذ تࢲرذ لْعَظَمَا ن أَربِّـي؟"

⁴¹ أُوْشَا نِثْنِي سْبعّْذن اَزْرُو نِّي. ئِيْسِي عِيْسَى ثِيطَّاوِين غَار وجنَّا ينَّا: "تْشكَّرغ-شك آ بَابَا ثسْتَاجْبذ-اَيِي.

⁴² نش سّْنغ قَا شك ڒبْدَا تسْتَاجَابذ-اَيِي، وَلَكِن نش قَّارغ مَانَايَا عْلَاحْسَاب خ ڒْغَاشِي-يَا إِي ذَايِي د ينّْضن، حمَا اَذ اَمْنن بلِّي قَا ذ شك إِي ذَايِي د يسّكّن."

⁴³ وَامِي ينَّا مَانَايَا، ئِڒَاغَا س جّْهذ ينَّا: "آ لِعَازَر، ٱفّْغ-د سّنِّي!"

⁴⁴ ئِفّغ-د ونِّي يمُّوْثن، ئِنّض-اَس ڒشْفن خ يفَاسّن ذ يضَارن خ وغمْبُوْب نّس خَاس ڒْقَبّ. ينَّا-ٱسن عِيْسَى: "كّْسم خَاس ڒشْفن نِّي، اجّم-ث اَذ يُوْيُوْر."

ئِسْرَائِيلِيْين تَافْقن اَذ نْغن سِيذِيثْنغ عِيْسَى

⁴⁵ أَطَّاس ن يسْرَائِيلِيْين إِي د يُوْسِين غَار مَرْيَم ࢲْرِين مِين يݣّا عِيْسَى ؤُمْنن زَّايس.

⁴⁶ وَلَكِن ينّغْنِي رُوْحن غَار يفَرِّيسيْين نَّان-اَسن مِين يݣّا.

⁴⁷ مُوْنن اَرُّوْيَاس ن ڒْفُقَهَا ذ يفَرِّيسيْين اَك جْمَاعث ن لْحُكَّام ن أَيث-إِسْرَائِيل نَّان: "مِين غَا نݣّ؟ قَا اَرْيَاز-أَ يتݣّ اَطَّاس ن لْمُعْجِيزَاث.

⁴⁸ مڒَا نجّي-ث اَمُّو، مَارَّا اَزَّايس اَمْنن. أَذ د اَسن يرُوْمَانِيْين، أَذَانغ خَرْبن ثَمْزِيذَا ثَمقّْرَانْت نّغ ذ لْأُمَّا نّغ."

⁴⁹ يجّن زَّايْسن قَّارن-اَس قِيَافَا، نتَّا ذ اَرَّايس ن ڒْفُقَهَا ذݣ وسݣّْوَاس نِّي. ئِكَّر نتَّا ينَّا-ٱسن: "كنِّيو وَار ثسِّينم وَالُو،

⁵⁰ وَار ثفْهِيمم شَا. حْسن إِ كنِّيو اَذ يمّث يجّن ن ورْيَاز خ شَّعْب حمَا وَار ثْفنِّي شَا لْأُمَّا نّغ مَارَّا."

⁵¹ نتَّا ذݣ وسݣّْوَاس نِّي تُوْغَاث ذ اَرَّايس ن ڒْفُقَهَا. وَار ينِّي شَا مَانَاينِّي زݣ يِيخف نّس؛ لَّا، يُوْسَا-ٱس-د مَانَاينِّي زِي أَربِّـي بلِّي عِيْسَى اَذ يمّث خ لْأُمَّا ن أَيث-إِسْرَائِيل.

⁵² وَار يدْجِي بُو خ لْأُمَّا ن أَيث-إِسْرَائِيل وَاهَا، ؤُڒَا ذ ثَارْوَا ن أَربِّـي يتمْزدْجَاعن ذِي ثْمُوْرَا، أَثن يسْمُوْن أَربِّـي ذ يجّن.

⁵³ زِي نْهَار نّي تَافْقن حمَا اَث نْغن.

⁵⁴ خ مَانَايَا وَار يقِّيم شَا عِيْسَى يتْرَاح يتَاس-د جَار يسْرَائِيلِيْين. ئِرُوْح غَار شَان ثْمُوْرْث ثُوْذس ڒخْڒَا، غَار يِج وبِيلَاج قَّارن-اَس أَفْرَايِم يقِّيم ذِنِّي اَك يمحْضَارن نّس.

⁵⁵ ئِقَارّب-د ڒْعِيذ اَمقّْرَان ن أَيث-إِسْرَائِيل. ؤُسِين-د اَطَّاس ن يِوْذَان زِي ڒدْشُوْر غَار لْقُدْس حمَا اَذ طهَّارن يخف نْسن قْبڒ إِ ڒْعِيذ.

⁵⁶ تُوْغَا رزُّوْن خ عِيْسَى، سَّاوَاڒن وَامِي بدّن ذِي ثمْزِيذَا ثَمقّْرَانْت ن أَيث-إِسْرَائِيل قَّارن جَارَاسن، مِين تْوَاڒَام؟ مَا وَار د يتِيس شَا غَار ڒْعِيذ؟

⁵⁷ أَرُّوْيَاس ن ڒْفُقَهَا ذ يفَرِّيسيْين وصَّان ونِّي إِي غَا يࢲرن مَانِي يدْجَا عِيْسَى، أَسن ت يِينِي بَاش اَذ رَاحن اَث طّْفن.