يعيبرانيين 9 - ثريفيث 2020لْعِبَادَا ثَمزْوَارُوْت ذݣ وقِيْضُوْن اَمقّْرَان 1 ڒْعَهذ نِّي اَمزْوَارُو تُوْغَا غَارس شَان ن لْقَوَانِين ن لْعِبَادَا أُو ذ يجّن ن ومْشَان اَمْقدّس ذِي دُّنشْت-أَ. 2 يعْنِي سوْجَاذن يجّن ن وقِيْضُوْن اَمقّْرَان ذَايس ثْنَاين ن يخَّامن. ذݣ وخَّام اَمزْوَارُو ݣِّين ذَايس ڒْقنْدِيڒ ذ طَّبْڒَا مَانِي سْرُوْسَان اَغْرُوْم نِّي يتْقدَّامن ذ صّذْقث إِ أَربِّـي. أَخَّام نِّي قَّارن-اَس <أَخَّام اَمْقدّس.> 3 ثُمَّا ذِنِّي يجّن ن اَرّْوَاق، غَار ذفَّار نّس ذِنِّي يج ن وخَّام وِيس ثْنَاين قَّارن-اَس <أَخَّام اَمْقدّس اَطَّاس.> 4 ذَايس ڒْمجْمَار ن تْبَخُوْر يشلّل س دّْهب، أُو ذ تَابُوْت ن ڒْعَهذ مَارَّا يغزْذِيسن نّس أُو ذ ثِيسِي نّس شلّْلن س دّْهب. ذِي تَابُوْت-أَ ذَايس اَقْنُوْش يتْوَاصنّع س دّْهب، أَقْنُوْش نِّي ذَايس اَغْرُوْم ؤُمِي قَّارن لْمَنَّا. تَابُوْت-أَ عَاوذ ذَايس ثَغْرِيث ن هَارُوْن ثْنوَّار، ذ ثڒْوِيحِين ن عشْرَا ن ڒُوْصِيَاث. 5 ثَقبَّارْث ن تَابُوْت-أَ خَاس ثْنَاين ن لْمخْلُوْقَاث ن لْعَظَمَا ݣِّين اَم مُوْنِيكُوْث غَارْسن اَفْرِيون. ثِيڒِي ن وَافْرِيون نْسن ثْغطَّا ثَقبَّارْث-أَ ثَانِيتَا ن اَرَّاحْمث. وَلَكِن نشِّين ذِي ڒْوقْث-أَ وَار نْزمَّر أَ نْوصّف ثِمسْڒَايِين-أَ ثَا س ثَا. 6 وَامِي سْوجْذن مَارَّا ثِمسْڒَايِين-أَ اَمُّو، تُوْغَا تَاذْفن ڒْفُقَهَا غَار وخَّام اَمزْوَارُو كُڒ نْهَار ذِي لْأَوْقَات نّس، تݣّن شّْغڒ نْسن. 7 وَلَكِن اَخَّام نِّي وِيس ثْنَاين يتْرَاح ذِنِّي غِير ڒفْقِي اَمقّْرَان، ئِجّن ن ثْوَاڒَا ذِي لْعَام أُو صَافِي. وَا لَابُد اَكِذس يَاوِي شَا ن يذَامّن بَاش اَثن يقدّم خ يِيخف نّس أُو خ دّْنُوْب إِي ݣِّين شَّعْب بْڒَا مَا ثنْت سّْنن. 8 مِين ذَانغ د يسْبِيّن أَرُّوْح يقدّْسن ذِي مَانَايَا؟ ئِسْبِيّن-اَنغ-د مڒَا عَاذ يقِّيم وقِيْضُوْن نِّي اَمقّْرَان، أَتَاف وَار ينُّوْرْزم شَا وبْرِيذ غَار مِين يدْجَان ذ اَمْقدّس اَطَّاس. 9 مَارَّا مَانَايَا يتِيشّ يجّن لْمِثَال إِ ڒْوقْث-أَ إِي ذِي ندْجَا ڒخُّو. شّْغڒ نِّي إِي تُوْغَا تݣّن ذِنِّي خْمِي تْقدَّامن صّذْقث ذ دْبِيحَاث وَار يزمَّر شَا اَذ يسِّيصْفَا ضَّمِيڒ ن ونِّي يعبّْذن. 10 مَانَايَا غِير ذَايس شَان ن لْقَوَانِين ن شَّرِيعَا خ لْمَكْلَا ذ ثْسسِّي ذ ڒُوْضُو. لْقَوَانِين-أَ وَار دْجِين شَا خ وُوْڒَاون ن بْنَاذم، خدّْمن حتَّا ڒْوقْث ن ڒْعَهذ ذ جْذِيذ أُو صَافِي. 11 فَا لْمَسِيح وَامِي د يحْضَار ذ ڒفْقِي اَمقّْرَان ن ثْمسْڒَايِين-أَ إِي د يُوْسِين، يعْنِي يُوْذف اَقِيضُوْن نِّي يدْجَان عَظِيم وَار ذَاس ينْقِيس وَالُو وَار ث بْنِين شَا يفَاسّن ن بْنَاذم، وَار يدْجِي شَا زِي مِين د يتْوَاخڒْقن ذِي دُّنشْت-أَ. 12 يُوْذف يجّن ن ثْوَاڒَا أُو صَافِي غَار وخَّام اَمْقدّس اَطَّاس. نتَّا وَار يُوْذِيف شَا س يذَامّن ن يغَايْذن نِغ ذ ئِينْدُوْزن؛ لَّا، يُوْذف س يذَامّن نّس نِّيث يخدْجس خَانغ لْفِدْيَا بَاش أَ ننْجم إِ ڒبْدَا. 13 شُوْف، ئِذَامّن ن يغَايْذن ذ ئِينْدُوْزن ذ يِيغّذ ن ثْفُوْنَاسْت تْرُوْشَّان زَّايْسن يِنِّي يخنْزن يسِّيصْفَا-ثن بَاش اَذ ذوْڒن ذ يمنْقَاوِيْين. 14 مڒَا اَمنِّي، مشْحَاڒ إِي ذَانغ غَا سِّيصْفَان يذَامّن ن لْمَسِيح كْتَار! نتَّا يرُوْح س أَرُّوْح نِّي يتْدُوْمَان إِ ڒبْدَا يقدّم يخف نّس بْڒَا ڒْعِيب إِ أَربِّـي، ئِذَامّن نّس اَذَانغ سِّيصْفَان ضَّمِير نّغ زِي سَّايِأَث بَاش أَ نعْبذ أَربِّـي يدَّرن. 15 فَلِيهَذَا نتَّا لْمَسِيح يتْشَفَاع جَارَانغ ذ أَربِّـي س يِجّن ن ڒْعَهذ ذ جْذِيذ بَاش يِنِّي ؤُمِي د يڒَاغَا أَربِّـي اَتَاف اَذ اَوِين لْوَارث إِي زِي ثن يوْعذ يتْدُوْمَان إِ ڒبْدَا. لِأَنَّا لْمَسِيح يمُّوْث ذ لْفِدْيَا حمَا اَذَاسن يضْڒق اَذ يڒِين حُرّ زِي ڒْمُعْصِيَاث إِي ݣِّين سْوَادَّاي إِ ڒْعَهذ نِّي اَمزْوَارُو. 16 شُوْف، عْلَاحْسَاب لْوَصِيَا لَابُد اَذ د اَوِين شْهَادَا ن لْوَفَات ن ونِّي يݣِّين لْوَصِيَا. 17 لِأَنَّا لْوَصِيَا وَار ثْصدْجح شَا إِلَّا مڒَا يمُّوْث بَاب نّس. مڒَا عَاذ يدَّر بَاب نّس يعْنِي ونِّي إِي ت يُوْرِين اَتَاف وَار ثْصدْجح شَا. 18 خ مَانَايَا تُوْغَا وَاخَّا ذ ڒْعَهذ اَمزْوَارُو وَار يصدْجح شَا حتَّا وَامِي ؤُزّْڒن يذَامّن. 19 أَقَا نَّبِي مُوْسَى وَامِي يغْرَا كُڒ ڒُوْصِيّث إِ مَارَّا شَّعْب، ثُمَّا ييْسِي يذَامّن ن ئِينْدُوْزن ذ يغَايْذن يخلّط-يثن اَك وَامَان، ثُمَّا يرُوْشّ زَّايْسن لْكِتَاب س يِيخف نّس ذ مَارَّا شَّعْب س ثَاضُوْفْث ثَزݣّْوَاغْث ذ وزُوْي. 20 ينَّا-ٱسن قَا يِيْنَا ذ يذَامّن ن ڒْعَهذ إِي ذَاوم يُوْمَر أَربِّـي اَذ تݣّم. 21 أَمنِّي عَاوذ يرُوْشّ اَقِيضُوْن اَمقّْرَان س يذَامّن-أَ ذ مَارَّا ڒقْشُوْع إِي ذَايس سْتَعْمَاڒن ذِي لْعِبَادَا. 22 أُو ذ صَّح عْلَاحْسَاب شَّرِيعَا ن مُوْسَى عْڒَاين مَارَّا ثِمسْڒَايِين اَذ تْوَاسِّيصْفَانْت س يذَامّن. أُو بْڒَا مَا ٱذ اَزّْڒن يذَامّن اَتَاف ڒْمُعْصِيَاث وَار تْوَاغْفِيرنْت شَا. 23 إِذن، ثِمسْڒَايِين-أَ يتْشَابَّاهن ذِي ثْمسْڒَايِين نِّي ن وجنَّا تُوْغَا تْوَاسِّيصْفَانْت س دْبِيحَاث. وَلَكِن ثِمسْڒَايِين نِّي س يِيخف نْسنْت ن وجنَّا لَّا؛ تْوَاسِّيصْفَانْت نِثنْتِي س يِجّن ن نُّوْع ن دْبِيحَاث حْسن زِي ثِنِّي نّغْنِي. 24 شُوْف، لْمَسِيح وَار يُوْذِيف شَا اَخَّام نِّي اَمْقدّس اَطَّاس إِي يبْنَان س يفَاسّن ن بْنَاذم يتْشَابَّاهن وَاهَا ذݣ ونِّي ن صَّح؛ لَّا، نتَّا يُوْذف ذݣ وجنَّا نِّيث اَذ يحْضَار زَّاث إِ أَربِّـي عْلَاحْسَاب نشِّين. 25 وَار يُوْذِيف شَا ذݣ وجنَّا بَاش اَذ يتْقدَّام يخف نّس اَطَّاس ن ثْوَاڒَاثِين اَمشْنَاو مَامش يتݣّ ڒفْقِي نِّي اَمقّْرَان خْمِي يتَاذف كُڒ لْعَام غَار وخَّام اَمْقدّس اَطَّاس س يذَامّن مَاشِي نّس. 26 مَعْلِيك اَمنِّي تُوْغَا اَتَاف لَابُد لْمَسِيح يتْوَاعدَّاب اَطَّاس ن ثْوَاڒَاثِين زݣ وَامِي تْوَاخْڒق دُّنشْت-أَ. وَلَكِن لَّا، ئِهْوَا-د نتَّا يجّن ن ثْوَاڒَا اَڒ ونݣَّارُو ن زْمَانَاث بَاش اَذ يسْبطّڒ ڒْمُعْصِيَاث وَامِي يقدّم يخف نّس ذ دْبِيحث. 27 ڒْموْث يتْمتَّا-ت بْنَاذم يجّن ن ثْوَاڒَا، ثُمَّا يذفَّار-يت لْحِسَاب ذ لْعِقَاب. 28 أَمُّو لْمَسِيح، يتْوَاقدّم ذ دْبِيحث يجّن ن ثْوَاڒَا بَاش اَذ يَارْبُو ڒْمُعْصِيَاث ن وَاطَّاس ن يِوْذَان. ثُمَّا اَذ د يهْوَا وِيس مَرّْثَاين. مَايمِّي؟ مَاشِي عْلَاحْسَاب ڒْمُعْصِيّث ن يِوْذَان عَاوذ؛ لَّا، أَذ د يهْوَا بَاش اَذ يسنْجم يِنِّي إِي ث يتْرَاجَان. |