يعيبرانيين 5 - ثريفيث 2020

¹ شُوْف، كُڒ ڒفْقِي اَمقّْرَان تِيخْضَارن-ث-يد زݣ يرْيَازن، تِيشّن-اَس ڒْوقْث ن ڒْخذْمث نّس بَاش اَذ يخْذم زَّاث إِ أَربِّـي عْلَاحْسَاب يوْذَان اَذ يقدّم صّذْقث ذ دْبِيحَاث خ ڒْمُعْصِيَاث.

² ئِزمَّر نتَّا اَذ يحِيْنّ خ يِنِّي وَار يفهّْمن شَا ذ يِنِّي يفّْغن اَبْرِيذ مِينْزِي نتَّا س يِيخف نّس ذَايس ضُّوْعف.

³ خ مَانَايَا وَا لَابُد اَذ يقدّم دْبِيحَاث خ ڒْمُعْصِيَاث نّس نِّيث مَامّش إِي ثنْت يتْقدَّام خ يِوْذَان.

⁴ عَاوذ وَار ذِنِّي حَدّ إِي غَا يسمْغَارن يخف نّس اَذ يخْذم س شَّان-أَ يعْنِي ذ ڒفْقِي اَمقّْرَان؛ لَّا، ذ أَربِّـي إِي ذَاس يتِيشّن ڒْحَقّ نِّي مَامّش ذَاس ث يُوْشَا إِ ڒفْقِي نِّي ؤُمِي قَّارن هَارُوْن.

⁵ أَمُّو ؤُڒَا ذ عِيْسَى وَار يسمْغَار شَا يخف نّس اَذ يخْذم س لْعَظَمَا-يَا يعْنِي ذ ڒفْقِي اَمقّْرَان؛ لَّا، ينَّا-ٱس أَربِّـي: <أَقَا شك ذ مِّي، نْهَارَا نش ذوْڒغ ذ بَابَاش.>

⁶ عَاوذ يقَّار أَربِّـي ذݣ يِجّن ن ومْشَان نّغْنِي: <شك ذ ڒفْقِي إِ ڒبْدَا اَمشْنَاو لْفِرْقَا نِّي ن ڒفْقِي ؤُمِي قَّارن مَلِكِيصَادِق.>

⁷ ذݣ وُوْسَّان نِّي إِي ذِي تُوْغَا يدَّر عِيْسَى ذِي ثْمُوْرْث-أَ، ئِتْࢲَادْجَا يتْڒَاغَا خ أَربِّـي س جّْهذ أُو س يمطَّاون يتتَّار-اَس إِ ونِّي يزمَّرن اَث يسنْجم زِي ڒْموْث. أَربِّـي يتْصنَّاط-اَس وَامِي عِيْسَى يتݣّْوذ زَّايس.

⁸ وَاخَّا نتَّا ذ مِّيس ن أَربِّـي إِي يدْجَا، يڒْمذ طَّاعَا س وعدّب نِّي إِي خَاس يكِّين.

⁹ وَامِي يعْذُو اَعدّب نِّي بْڒَا ڒْمُعْصِيّث، ئِذْوڒ نتَّا ذ ڒْعُنْصَر ن وسنْجم يعْنِي يزمَّر اَذ يسنْجم مَارَّا يِنِّي إِي ث يتْطَاعَان.

¹⁰ سّنِّي يَارِّي-ث أَربِّـي ذ ڒفْقِي اَمقّْرَان اَمشْنَاو لْفِرْقَا نِّي ن ڒفْقِي مَلِكِيصَادِق.

يَالَّاهث أَ نُوْيُوْرث غَار زَّاث حمَا أَ نمْغَر

¹¹ عَاذ نْزمَّر أَ نِينِي اَطَّاس خ ثْمسْڒَايِين-أَ وَلَكِن يقْسح اَكنِّيو نْسفْهم. مَايمِّي؟ لِأَنَّا كنِّيو ثْذقْڒم اَذ تْفهْمم.

¹² شُوْف، وَا لَابُد كنِّيو ڒخُّو اَذ تِيڒِيم ذ يمْسڒْمَاذن وَلَكِن عَاذ يتْخصَّا-يَاوم يجّن اَكنِّيو يسْغَر س ثْغُوْرِي نِّي ثَمزْوَارُوْت زݣ وَاوَاڒ ن أَربِّـي. كنِّيو تحْذَاجَام اَغِي وَاهَا، مَاشِي لْمَكْلَا ذ صَّح.

¹³ كُڒ يجّن عَاذ ذ اَسيْمِي يتْعِيش س ؤُغِي وَاهَا، يعْنِي وَار يفهّم شَا إِ ؤُسڒْمذ خ مِين يصڒْحن.

¹⁴ وَلَكِن لْمَكْلَا ن صَّح تتّن-تث غِير يِنِّي وَار يدْجِين شَا ذ يسيْمَان. نِثْنِي زمَّرن إِ لْمَكْلَا نِّي ن صَّح مِينْزِي ڒبْدَا خدّْمن إِ ثْغُوْرِي نِّي إِي قَّارن تْميَّازن جَار مِين يدْجَان ذ اَصبْحَان ذ جَار مِين يدْجَان ذ اَعفَّان.