يعيبرانيين 4 - ثريفيث 2020

¹ إِذن فَا عَاذ نْزمَّر أَ نَاذف ذِي اَرَّاحث ن سِيذِي أَربِّـي مِينْزِي ذَانغ يوْعذ. وَا لَابُد أَ نݣّْوذ بَاش وَار يتْغِيمِي ؤُڒَا ذ يجّن زَّايْوم وَار ذِنِّي د يخطّڒ.

² لِأَنَّا ڒخْبَار-أَ ن ڒْخِير إِي ذَانغ د يتْوَابشَّرن إِ نشِّين، ؤُڒَا ذ ڒجْذُوْذ نّغ تْوَابشَّرن زَّايس. وَلَكِن وَار سْتنْفِيْعن شَا زَّايس وَامِي ؤُݣِين اَزَّايس اَمْنن.

³ شُوْف، أَرَّاحث نِّي مِيخف يسَّاوَاڒ أَربِّـي اَتَاف نْتَاذف ذَايس نشِّين إِي يُوْمْنن. ئِسِّيوڒ أَربِّـي خ مَانَايَا وَامِي ينَّا: <قَا نش جُّوْدْجغ س وغْضَاب ينُو نِّيغ عمَّارْص اَذ اَذْفن ذِي اَرَّاحث ينُو.> مَان اَرَّاحث؟ يعْنِي ثنِّي ن سِيذِي أَربِّـي وَامِي يكمّڒ ڒخْذَايم نّس يخْڒق-د دُّنشْت-أَ.

⁴ إِيوَا ذݣ يِجّن ن لْأَيَا اَمنِّي إِݣ ينَّا خ نْهَار وِيس سبْعَا: ينَّا: <ذِي نْهَار وِيس سبْعَا إِݣ يريّح أَربِّـي زِي مَارَّا ڒخْذَايم نّس.>

⁵ أُو عَاوذ ذِي لْأَيَا نِّي نّغْنِي إِي خف نسِّيوڒ قْبڒ ينَّا: <عمَّارْص اَذ اَذْفن ذِي اَرَّاحث ينُو.>

⁶ إِذن عَاذ قِّيمن ڒبْعَاض ن يِوْذَان اَذ اَذْفن ذِي اَرَّاحث-أَ ن سِيذِي أَربِّـي، يِنِّي يتْوَابشَّرن زِي قْبڒ وَار ؤُذِيفن شَا ذِنِّي لِأَنَّا وَار ؤُمِينن شَا.

⁷ س مَانَايَا تُوْغَا يسجّل أَربِّـي يجّن ن ڒْوقْث نّغْنِي بَاش أَ نَاذف ذِي اَرَّاحث نّس، ڒْوقْث نِّي يسمَّا-يَاس أَربِّـي <نْهَارَا.> منْبَعْد إِ وَاطَّاس ن لْقُرُوْن إِݣ يسِّيوڒ أَربِّـي س نَّبِي دَاود وَامِي ينَّا مَامش ننَّا قْبڒ: <نْهَارَا مڒَا ثسْڒِيم إِ صُّوْت ن أَربِّـي، وَار سقْسِيحث شَا ؤُڒَاون نْوم.>

⁸ شُوْف، مَعْلِيك نَّبِي يَشُوْعَا تُوْغَا يسِّيوض ڒجْذُوْذ نّغ غَار يِجّن ن اَرَّاحث، أَتَاف أَربِّـي وَار يسِّيوڒ شَا خ يِجّن ن نْهَار نّغْنِي منْبَعْد إِ وَاطَّاس ن لْقُرُوْن.

⁹ فَلِهَذَا عَاذ يقِّيم يجّن ن سّبْث، يعْنِي ذ يجّن ن ڒْوقْث ن اَرَّاحث إِ شَّعْب ن أَربِّـي.

¹⁰ لِأَنَّا ونِّي يُوْذْفن ذِي اَرَّاحث ن أَربِّـي اَقَا يتْريَّاح زِي ڒْخذْمث نّس مَامّش يريّح أَربِّـي زِي ڒْخذْمث نِّي نّس.

¹¹ إِذن وَا لَابُد أَ نݣّ لْمجْهُوْد نّغ بَاش أَ نَاذف ذِي اَرَّاحث نِّي حمَا ؤُڒَا ذ يجّن وَار يوطِّي ذِي نّفْس ن ڒْمُعْصِيّث.

¹² أَقَا اَوَاڒ ن أَربِّـي يدَّر نتَّا يفْسُوْس، ئِقْضع اَطَّاس كْتَار زِي سِّيف ن ثْنَاين ن جِّهَاث. ئِتَاذف اَڒ ذَاخڒ يفرّق بُوْحْبڒ ذ اَرُّوْح ذ مَانِي تْمُوْنن ڒمْفَاسڒ، ئِتَاذف غَار وَاذُوْف. ئِتْميَّاز جَار لْأَفْكَار ذ لْأَغْرَاض ن وُوْڒ.

¹³ وَار ذِنِّي ؤُڒَا ذ يجّن ن ثْمسْڒَايْث زِي مِين د يتْوَاخڒْقن ثْنُوْفَّار زِي أَربِّـي. قَاع ثِمسْڒَايِين تْوَافضْحنْت-يد تْوَاظْهَارنْت-يد إِ ثِيطَّاوِين ن ونِّي ؤُمِي غَا نُوْش ڒحْسَاب نّغ.

¹⁴ إِذن نشِّين أَ نطّف مْلِيح ذِي لْإِيمَان نّغ إِي خف نْشهّذ مِينْزِي غَارْنغ يجّن ن ڒفْقِي اَمقّْرَان يمْغر يُوْذف ذݣ يجنَّاثن يعْذُو-ثن، نتَّا ذ عِيْسَى مِّيس ن أَربِّـي.

سِيذِيثْنغ عِيْسَى نتَّا ذ ڒفْقِي اَمقّْرَان

¹⁵ شُوْف، وَار غَارْنغ بُو يجّن ن ڒفْقِي اَمقّْرَان نتَّا وَار يزمَّر شَا اَذ يحسّ زِي ضُّوْعف نّغ. وَاه، غَارْنغ يجّن ڒفْقِي كِّينْت خَاس مَارَّا ڒمْحَاين؛ نتَّا اَم نشِّين وَلَكِن وَار يݣِّي بُو ڒْمُعْصِيّث.

¹⁶ فَلِهَذَا أَ نْقَارّب س زْعَامث غَار ڒْعَرْش ن أَربِّـي ذَايس اَرْضَا بَاش أَ نَاف ذِنِّي اَرَّاحْمث ذ يجّن ن اَرْضَا إِي ذَانغ غَا يعَاوْنن ذِي ڒْوقْث ن ؤُحْذَاجِي نّغ.