يعيبرانيين 13 - ثريفيث 2020ڒُوْصِيَاث ثِنݣُّوْرَا 1 قِّيمث تْحِبَّاث اَيَاوْيَا اَم وَاوْمَاثن. 2 وَار تتُّوْث شَا اَذ تْرحّْبم زِي مِدّن مِينْزِي ڒبْعَاض إِي ݣِّين مَانَاينِّي تْرحَّابن زِي لْمَلَائِكَاث بْڒَا مَا ثنْت سّْنن. 3 خمّْمث ذݣ يمحْبَاس اَمشْنَاو كنِّيو إِي كِذْسن ثتْوَاحبّْسم ذ يِنِّي إِي خف تْبُوْصَارن اَمشْنَاو كنِّيو ثتْوَاعدَّابم. 4 وقَّارث ڒمْڒَاش مَارَّا. قَامَا ن ڒمْڒَاش اَذ تِيڒِي س نِّيّث بْڒَا ڒْغدْڒَان. أَقَا أَربِّـي اَذ يعَاقب يِنِّي يفسّْذن ذ يِنِّي يزنَّان. 5 أَذ تْعِيشم بْڒَا مَا ٱذ تْحِبّم تْمنْيَاث، أَذ تْقنْعم س مِين غَارْوم. أَربِّـي س يِيخف نّس ينَّا قَا عمَّارْص اَش جّغ، عمَّارْص اَذَايك سمْحغ. 6 س مَانَاينِّي نقَّار س زْعَامث قَا نش سِيذِي أَربِّـي يتْعَاوَان-اَيِي مَاشِي اَذ ݣّْوْذغ. مِين ذَايِي غَا يݣّ بْنَاذم؟ 7 عقْڒث خ يِنِّي إِي خَاوم يتْرَايَّان يعْنِي يِنِّي يسِّيوْڒن اَكِذْوم س وَاوَاڒ ن أَربِّـي. فكَّرث ذِي مِين ؤُرْون نِثْنِي س ثُوْذَارْث نْسن، ݣّث مَامّش إِي ݣِّين نِثْنِي س لْإِيمَان نْسن. 8 عِيْسَى لْمَسِيح نتَّا ذ يجّن، أَمشْنَاو إِضنَّاظ اَمشْنَاو نْهَارَا اَمشْنَاو إِ ڒبْدَا. 9 أَرّم-د ڒْبَاڒ نْوم بَاش وَار تْذفَّارم شَا لْأَنْوَاع ن ؤُسڒْمذ فشْكل. شُوْف، ذ لمْلِيح اَذ يجْهذ وُوْڒ نّغ س اَرْضَا مَاشِي س لْمَكْلَا دِّينِيَا، يِنِّي إِي ت يتتّن وَار زَّايس سْتنْفِيعن شَا. 10 نشِّين غَارْنغ يجّن ن ڒْمذْبَاح، زِي ڒْمذْبَاح-أَ وَار غَارْسن بُو ڒْحَقّ اَزَّايس شّن يِنِّي يخدّْمن ذݣ وقِيضُوْن اَمقّْرَان. 11 لِأَنَّا ڒفْقِي اَمقّْرَان يتَاوِي-د اَكِذس يذَامّن ن لْحَيَوَانَاث غَار وخَّام اَمْقدّس اَطَّاس اَمشْنَاو يجّن ن صّذْقث خ ڒْمُعْصِيّث، وَلَكِن لْحَيَوَانَاث نِّي يمُّوْثن سْحَرَّاقن-ثن غَار ڒݣّْوَاج ن مَانِي قِّيمن يِوْذَان ذݣ يقِيضَان نْسن. 12 أَمُّو عَاوذ عِيْسَى، ثكَّا خَاس تَمَارَا نِّي غَار ڒݣّْوَاج ن ثوَّارْث ن ثنْدِينْت بَاش اَذ يسِّيصْفَا شَّعْب س يذَامّن نّس. 13 خ مَانَايَا أَ نْرَاح غَار عِيْسَى غَار ڒݣّْوَاج ن يقِيضَان أَ نَارْبُو اَحݣَّار نِّي إِي خف يصْبَر نتَّا. 14 مِينْزِي ذَانِيتَا وَار غَارْنغ بُو ثنْدِينْت يتْدُوْمَان؛ لَّا، نْرزُّو خ ثنْدِينْت نِّي إِي د غَا يَاسن. 15 إِذن لَابُد س عِيسَى إِي زِي غَا نحْمذ أَربِّـي ذِي مْكُڒ ڒْوقْث. ذ ثَانِيتَا ذ دْبِيحث إِي غَا نْقدّم إِ أَربِّـي، يعْنِي مڒَا نعْتَرف س يِيسم نّس. 16 أُو وَار تتُّوْث شَا اَذ تݣّم ڒْخِير اَذ تْشَرْشم اَك ينّغْنِي مِينْزِي س دْبِيحَاث-أَ اَم ثِيْنَا إِي ذَاس يتعْجِيبن إِ أَربِّـي. 17 طَاعث إِ يِنِّي خَاوم يتْرَايَّان، ݣّم-اَسن اَرَّاي مِينْزِي ذ يِنِّي إِݣ يحطَّان ڒَعْمَار نْوم. أَذ ؤُشن نِثْنِي ڒحْسَاب خ مَانَايَا إِ أَربِّـي. طَاعث إِ يِيْنَا بَاش ڒْخذْمث نْسن اَزَّايس فَرْحن وَار خَاسن تْبسِّيڒ شَا. مڒَا ثݣِّيم ثَغنَّانْت اَتَاف وَار كنِّيو ينفّع وَالُو. 18 تَّارث إِ أَربِّـي خَانغ. أَقَا نشِّين متْأَكدِّين ضَّمِير نّغ مرْتَاح، نْرزُّو أَ نخْذم س ڒحْيَا مَارَّا ثِمسْڒَايِين. 19 تتَّارغ-اَوم س وُوْڒ ينُو خَصَّاتَان اَذ تࢲَّادْجم بَاش ذغْيَا اَغَارْوم د ذوْڒغ. لْخِتَام ن ثبْرَات-أَ 20 أَربِّـي ذَايس ڒهْنَا، ذ نتَّا إِي د يَارِّين سِيذِيثْنغ عِيْسَى زݣ يمتِّينن س يذَامّن ن ڒْعَهذ إِݣ يتْدُوْمَان إِ ڒبْدَا، عِيْسَى-يَا ذ اَمكْسَا اَمقّْرَان ن يحُوْڒِيْين. 21 أَذَاوم يذبَّر أَربِّـي مَارَّا ثِمسْڒَايِين ثِصبْحَانِين بَاش اَذ تݣّم ڒْخَاضَر نّس. أَذَايْنغ يخْذم مِين ذَاس يتعْجِيبن زَّاثس، س سِيذِيثْنغ عِيْسَى لْمَسِيح إِي غَار غَا ثِيڒِي لْعَظَمَا إِ ڒبْدَا ن ڒبْدَاث. آمِين. 22 فَا آي أَيثْمَا تتَّارغ-اَوم اَذ تصْبَرم إِ وَاوَاڒ ينُو إِي زِي كنِّيو تْوصِّيغ مِينْزِي ؤُرِيغ-اَوم-د غِير يجّن ن ثبْرَات ذ ثَمزْيَانْت. 23 ئِتْخصَّا اَذ تسّْنم بلِّي ضڒْقن-اَس-د إِ وُوْمَاثْنغ تِيْمُوْتَاوُس. أَكنِّيو ࢲرغ اَكِذس يعْنِي مڒَا يُوْسَا-د ذغْيَا. 24 سِيوْضم-اَسن سْڒَام إِ مَارَّا يِنِّي إِي خَاوم يتْرَايَّان ذ مَارَّا صَّالِحِين. يِيْنَا زِي إِطَالْيَا سَاوَّاضن-اَوم-د سْڒَام. 25 أَكِذْوم يِيڒِي اَرْضَا مَارَّا إِذْوم. |