يعيبرانيين 11 - ثريفيث 2020لْإِيمَان ذ يِنِّي إِي زَّايس يتْعِيشن 1 فَا لْإِيمَان نتَّا ذ يجّن ن تِّقث يجهْذن ذِي مِين نتْرَاجَا، نشِّين متْأَكدِّين ذِي ثْمسْڒَايِين وَاخَّا وَار ثنْت نتْوِيڒِي شَا. 2 س لْإِيمَان-أَ إِي تْوَاشكَّرن يوْذَان ن زْمَان. 3 س لْإِيمَان إِي نْفهّم قَا دُّنشْت ثتْوَاخْڒق-د س وَاوَاڒ ن أَربِّـي يعْنِي مِين ذَايس نتْوَاڒَا وَار د يكِّي شَا زِي مِين د يتْبَانن. 4 س لْإِيمَان يكَّر نَّبِي هَابِيل يقدّم يجّن ن دْبِيحث إِي زِي خَاس يَارْضَا أَربِّـي حْسن زِي ثنِّي ن وُوْمَاس قَابِيل. عْلَاحْسَاب لْإِيمَان-أَ يتْشكَّر-يث أَربِّـي يقْبڒ-يث نتَّا نِيشَان وَامِي خَاس يسِّيوڒ أَربِّـي مْلِيح خ مِين يقدّم. أُو نَّبِي هَابِيل س لْإِيمَان نّس نتَّا عَاذ يسَّاوَاڒ وَاخَّا يمُّوْث. 5 س لْإِيمَان يكَّر نَّبِي أَخْنُوْخ يتْوَاخْضف غَار وجنَّا حمَا وَار يتْوِيڒِي شَا ڒْموْث. وَار ث ؤُفِين شَا، ئِيْسِي-ث أَربِّـي غَارس. أُو قْبڒ مَا ٱذ يتْوَاخْضف يتْوَاشكَّر اَم يِجّن يَارْضَا خَاس أَربِّـي. 6 إِيوَا ؤُڒَا ذ يجّن وَار يزمَّر اَخَاس يَارطَّا أَربِّـي بْڒَا لْإِيمَان. مِينْزِي ونِّي إِي غَا يقَارّْبن غَار أَربِّـي لَابُد اَذ يَامن بلِّي نتَّا يدْجَا أُو ذ نتَّا إِݣ يتْجَزَان يِنِّي خَاس يرزُّوْن س وُوْڒَاون نْسن. 7 س لْإِيمَان نَّبِي نُوْح وَامِي ذَاس يعْڒم أَربِّـي خ ثْمسْڒَايِين نِّي وَار ثنْت ࢲْرِين يِوْذَان عمَّارْص، ئِكَّر نتَّا س يِجّن ن ثِيݣّْوْذِي ذ يِجّن ن ڒحْيَا يݣَّا اَغَرَّابُو بَاش اَذ يسنْجم أَيثْبَاب ن ثدَّارْث نّس. وَامِي يݣَّا مَانَاينِّي نتَّا يعيّب دُّنشْت، ئِوَارث صُّلْح نِّي إِي د يتَاسن س لْإِيمَان. 8 س لْإِيمَان يكَّر نَّبِي بْرَاهِيم يطَاع-اَس إِ أَربِّـي وَامِي ذَاس د يڒَاغَا اَذ يرَاح غَار يِجّن ن ومْشَان إِي غَا يقْبڒ ذ لْوَارث. ئِفّغ نتَّا تُوْغَا وَار يسِّين شَا مَانِي غَا يرَاح. 9 س لْإِيمَان يرُوْح نتَّا يزْذغ ذِي ثْمُوْرْث نِّي إِي زِي ث يوْعذ أَربِّـي، نتَّا أَقَاث ذِنِّي اَم شَا ن وبَرَّانِي. ئِتْعِيش ذݣ يقِيضَان اَكِذس ممِّيس إِسْحَاق ذ وَايَّاو نّس يَعْقُوْب، تْوَارَاثن اَكِذس عْلَاحْسَاب مِين زِي ثن يوْعذ. 10 ڒَاحقَّاش بْرَاهِيم يتْرَاجَا ثَنْدِينْت نِّي غَار دْجَان دْسَاسَاث يتْدُوْمَان، ئِخَطّ-يت أَربِّـي يبْنَا-ت. 11 س لْإِيمَان سَارَا س يِيخف نّس يمُّوْش-اَس جّْهذ اَذ تيْسِي اَعدِّيس وَاخَّا نتَّاث ثْنُوْمْغَار، مِينْزِي ثكَّر نتَّاث ثْحسّب ونِّي إِي ت يوعْذن ذَايس تِّقث. 12 ثُمَّا زِي بْرَاهِيم ذ يجّن ن ورْيَاز يوْسَار يكمّڒ، يجَّا-د يجّن ن دُّوْرِّيث اَم يِيْثْرَان يدْجَان ذݣ وجنَّا اَم يِجْذِي يدْجَان خ شّطّ ن ڒبْحَر وَار يزمَّر حَدّ اَت يحسّب. 13 يِيْنَا مَارَّا مُّوْثن ذِي لْإِيمَان نِّي نْسن قْبڒ مَا ذَاسن د اَوْضنْت ثْمسْڒَايِين نِّي إِي زِي ثن يوْعذ. وَلَكِن ࢲْرِين-ثنْت رحّْبن زَّايْسنْت زِي ڒݣّْوَاج، عْتَرْفن بلِّي نِثْنِي ذ يبَرَّانِيْين ذ يعزَّابن ذِي ثْمُوْرْث-أَ. 14 ئِوْذَان إِي سَّاوَاڒن اَمُّو يتظْهَار-د بلِّي رزُّوْن خ يِجّن ن ثْمُوْرْث اَذ تِيڒِي ذ ثَمُوْرْث نْسن. 15 مَعْلِيك تُوْغَا تْخمَّامن ذِي ثْمُوْرْث نِّي مَانِيس د فّْغن، إِڒِي غَارْسن لْفُرْصَا اَذ د عقْبن. 16 وَلَكِن لَّا، رزُّوْن خ يِجّن ن ثْمُوْرْث حْسن زِي ثنِّي، يعْنِي يشْتن ذݣ وجنَّا. خ مَانَاينِّي أَربِّـي وَار يسذْحِي شَا اَذَاس ينِين قَا شك ذ أَربِّـي نّغ مِينْزِي نتَّا يسوْجذ-اَسن يجّن ن ثنْدِينْت. 17 س لْإِيمَان يكَّر نَّبِي بْرَاهِيم اَذ يقدّم ذ دْبِيحث س ممِّيس إِسْحَاق وَامِي ث يجَرّب أَربِّـي. يعْنِي تُوْغَا يتْقدَّام ذ دْبِيحث س ممِّيس وَاحْذس إِي زِي يوْعذ أَربِّـي بْرَاهِيم، 18 تُوْغَا ينَّا-ٱس قَا س إِسْحَاق إِي زِي غَا تْوَاحسّب دُّوْرِّيث نّش. 19 ئِحسّب بْرَاهِيم بلِّي يزمَّر أَربِّـي اَذ د يسكَّر مِّيس زݣ يمتِّينن. مَانَاينِّي ذَايس ڒمْعَانِي مِينْزِي وَاه، ممِّيس يذْوڒ-د إِ بْرَاهِيم اَم يِجّن زِي ڒْموْث. 20 س لْإِيمَان يكَّر نَّبِي إِسْحَاق يبَرك ثَارْوَا نّس يَعْقُوْب ذ عَسُو عْلَاحْسَاب لْمُسْتَقْبل نْسن. 21 س لْإِيمَان يكَّر نَّبِي يَعْقُوْب وَامِي تُوْغَا يتْمتَّا يبَرك ثَارْوَا ن مِّيس يُوْسف ئِج-ئِج، يعبّذ نتَّا خْمِي يتْسنَّاذ خ ثغْڒِيث نّس. 22 س لْإِيمَان يكَّر نَّبِي يُوْسف غَار ونݣَّارُو ن ثُوْذَارْث نّس، ئِسِّيوڒ خ وُوْفُوْغ ن أَيثْ-إِسْرَائِيل زِي مِصْرَا يوصَّا-ٱثن اَذ يْسِين اَكِذْسن يخْسَان نّس. 23 س لْإِيمَان كَّرن لْوَالِدِين ن نَّبِي مُوْسَى سْنُوْفَّرن ممِّيثْسن وَامِي د يخْڒق مِينْزِي ࢲْرِين بلِّي نتَّا يصْبَح اَطَّاس، وَار ݣّْوِيذن شَا زِي مِين ذَاسن يوصَّا وزدْجِيذ. 24 س لْإِيمَان يكَّر نَّبِي مُوْسَى وَامِي يمْغَار يُوْݣِي اَذَاس ڒَاغَان ممِّيس ن يدْجِيس ن لْمَلِك فِرْعُوْن. 25 ئِخْضَر اَخَاس بُوْصَارن يمِصْرِيْين اَك شَّعْب ن أَربِّـي، وَار يقْبِيڒ شَا اَذ يفَرح ذݣ وفلّس نِّي وَار يتْدُوْمِين شَا. 26 ئِفْهم مڒَا سحْقَارن-ث عْلَاحْسَاب لْمَسِيح يعْنِي مَانَاينِّي غَارس لْقِيمَا كْتَار زِي مِين غَارْسن ذ لْكُنُوْز ذِي مِصْرَا. أَقَا نتَّا يخزَّر غَار زَّاث ذِي لْجَائِزَا نّس. 27 س لْإِيمَان يكَّر مُوْسَى يفّغ زِي مِصْرَا، وَار يݣّْوِيذ شَا زݣ وغْضَاب ن وزدْجِيذ نِّي. ئِطّف ذِي لْإِيمَان نّس اَم يِجّن يتْوَاڒَان أَربِّـي نتَّا وَار يزمَّر اَث يࢲر حَدّ. 28 س لْإِيمَان يكَّر نتَّا يݣَّا ڒْعِيذ اَمقّْرَان يرُوْشّ ثِوُّوْرَا س يذَامّن ن ڒْعِيذ حمَا عَزْڒَاين وَار ينقّ شَا يمنْزَا ن أَيثْ-إِسْرَائِيل. 29 س لْإِيمَان يكَّر شَّعْب يࢲْوَا غَار وجمَّاض-ين ن ڒبْحَر أَزݣّْوَاغ س يضَارن نْسن، ثِيْسِي نّس ثݣَّا اَمشْنَاو ثَمُوْرْث يُوْزْغن. وَلَكِن وَامِي جَرّْبن يمِصْرِيْين اَذ عْذُوْن سّنّي ينْفيّض-د خَاسن ڒبْحَر غرْقن. 30 س لْإِيمَان يكَّر شَّعْب ڒخْدّنِّي وْضَان ڒحْيُوْض ن ثنْدِينْت ن أَرِيحَا وَامِي ذَاس ينّض شَّعْب سبْعِيَّام. 31 س لْإِيمَان ثَحنْجِيرْث نِّي ؤُمِي قَّارن رِيحَاب إِي تُوْغَا يفّْغن اَبْرِيذ ثكَّر نتَّاث ثْرحّب س لْمُخَبَارَاث ن أَيثْ-إِسْرَائِيل. س مَانَاينِّي وَار ثمُّوْث شَا اَك يِنِّي وَار يتْطِيعِين شَا. 32 إِيوَا مِين غَا ينِيغ عَاذ؟ وَار غَارِي بُو ڒْوقْث اَذ سِّيوْڒغ خ جَعْذُوْن نِغ ذ بَارَاك نِغ ذ شَمْشُوْن نِغ ذ يَافْتَا نِغ ذ نَّبِي دَاود نِغ ذ نَّبِي صَمْوِيل نِغ ذ مَارَّا لْأَنْبِيَا. 33 س لْإِيمَان كَّرن نِثْنِي ربْحن لْممْلَاكَاث، حكْمن س ڒْحَقّ، حرْثن خ لْوُعُوْد، بلّْعن يقمُّوْمن ن سْبُوْعَاث، 34 سخْسِين اَحَذُوْق ن ثْمسِّي، فڒْثن زِي ڒقْضع ن سِّيف. ضُّوْعف نْسن يذْوڒ ذ جّْهذ، جهْذن ذِي ڒْحَرْب ؤُزّْڒن خ ڒْعَسْكَار ن ثْمُوْرَا نّغْنِي. 35 ڒبْعَاض ن ثمْغَارِين يْسِينْت-يد يمتِّينن نْسنْت إِي د كَّرن زِي ڒْموْث. ڒبْعَاض ن يِوْذَان مَارّْثن-ثن، وَلَكِن نِثْنِي ؤُݣِين اَذ تْوَاضڒْقن بَاش اَذ ربْحن يجّن ن لْقِيَامَا حْسن. 36 ڒبْعَاض ن يِوْذَان حݣَّرن-ثن، ؤُوْثِين-ثن س وسْغُوْن، شَرْفن-ثن س سْنَاسڒ، حبّْسن-ثن. 37 رجْمن-ثن س وزْرُو، قسّن-ثن خ ثْنَاين س ڒْمنْشَار، نْغِين-ثن س سِّيف. ݣُّوْرن س يِڒمَاون ن يحُوْڒِيْين ذ يغَايْذن. نِثْنِي ذ يمسْعَان، تْوَاعدَّابن، تنْعدَّان خَاسن. 38 نِثْنِي دُّنشْت-أَ وَار ثن ثسْذَاهدْج شَا. تْعزَّابن ذِي ڒخْڒَاوَاث ذ يذُوْرَار ذ يخُوْبَاش ذ يِيْفْرَان ن ثْمُوْرْث. 39 مَارَّا يِيْنَا تْوَاشكَّرن س لْإِيمَان نْسن. إِنَّمَا، ؤُڒَا ذ يجّن زَّايْسن تُوْغَا عَاذ وَار ذَاس د يُوْوِيض شَا مِين زِي ث يوْعذ أَربِّـي. 40 تُوْغَا أَربِّـي يذبَّر-اَنغ-د إِ نشِّين زِي قْبڒ يجّن ن ڒْحَاجث حْسن بَاش نِثْنِي وَار تِيوِيضن شَا غَار ونݣَّارُو يعْنِي اَذ يڒِين كمْڒن بْڒَا نشِّين. |