يعيبرانيين 10 - ثريفيث 2020سِيذِيثْنغ عِيْسَى إِݣ يسنْجَامن مَاشِي ذ شَّرِيعَا 1 شُوْف، شَّرِيعَا ن مُوْسَى نتَّاث غِير ذ يجّن ن ثِيڒِي ن ثْمسْڒَايِين ثِصبْحَانِين إِي د غَا يَاسن، وَار ثدْجِي شَا نتَّاث ذ ثِمسْڒَايِين نِّي ذ صَّح. خ مَانَايَا، دْبِيحَاث نِّي ن شَّرِيعَا إِي تݣّن زِي لْعَام غَار لْعَام وَار زمَّرنْت عمَّارْص اَذ سِّيصْفَانْت يِنِّي يتْقَارَّابن غَار أَربِّـي اَذ يڒِين بْڒَا ڒْعِيب. 2 دْبِيحَاث نِّي مَعْلِيك زمَّرنْت اَذ سِّيصْفَانْت، أَتَاف صَافِي سْبدّن-ثنْت نِغ لَّا؟ لِأَنَّا يِنِّي يعبّْذن اَتَاف اَذ قِّيمن ذ يمنْقَاوِيْين يجّن ن ثْوَاڒَا إِ ڒبْدَا، أَتَاف ضَّمِير نْسن وَار يتْعدِّيب شَا س ڒْمُعْصِيّث. 3 وَلَكِن دْبِيحَاث نِّي مِين عْنَانْت؟ نِثنْتِي تْفكَّارنْت-اَنغ كُڒ لْعَام س ڒْمُعْصِيّث. 4 لِأَنَّا يذَامّن ن ئِينْدُوْزن ذ يغَايْذن وَار زمَّرن شَا اَذ كّْسن ڒْمُعْصِيّث، وَار يتمْكِين شَا. 5 خ مَانَايَا، وَامِي د يُوْسَا لْمَسِيح غَار دُّنشْت-أَ ينَّا-ٱس إِ أَربِّـي: <ثسْوجْذذ-اَيِي يجّن ن دَّات، وَار ثرْزُوْذ شَا دْبِيحَاث ذ صّذْقث لَّا. 6 تُوْغَا وَار ذَاش يتعْجِيب بُو ڒْحَاڒ اَذَاش سْشمْضن لْحَيَوَانَاث، أَذَاش قدّْمن صّذْقث خ ڒْمُعْصِيّث. 7 أُوْشَا نِّيغ، آي أَربِّـي اَقَايِي ؤُسِيغ-د اَذ ݣّغ ڒْخَاضَر نّش، مَامش خَافِي يُوْرَا ذِي لْكِتَاب.> 8 ذ اَمزْوَارُو ينَّا-ٱس قَا دْبِيحَاث ذ صّذْقث وَار ثنْت ثرْزُوْذ شَا شك، وَار ذَاش يتعْجِيب بُو ڒْحَاڒ اَذَاش شمْضن لْحَيَوَانَاث اَذَاش قدّْمن صّذْقث خ ڒْمُعْصِيّث. (ثِيْنَا تْقدَّامن-ثنْت عْلَاحْسَاب شَّرِيعَا.) 9 ثُمَّا ينَّا-ٱس اَقَايِي ؤُسِيغ-د اَذ ݣّغ ڒْخَاضَر نّش. يعْنِي اَذ يكّس دْبِيحَاث نِّي ثِمزْوُوْرَا اَذ يݣّ ذݣ ومْشَان نْسنْت دْبِيحث وِيس ثْنَاين ن لْمَسِيح. 10 أُو س ڒْخَاضَر نِّي نشِّين نتْوَاسِّيصْفَا س دْبِيحث ن دَّات ن عِيْسَى لْمَسِيح، ئِجّن ن ثْوَاڒَا إِ ڒبْدَا. 11 ڒفْقِي كُڒ نْهَار يتْغِيمَا نتَّا يتݣّ شّْغڒ-أَ نّس، يعْنِي يتْقدَّام اَطَّاس ن ثْوَاڒَاثِين نّفْس ن دْبِيحَاث، وَلَكِن دْبِيحَاث نِّي وَار زمَّرنْت شَا اَذ كّْسنْت ڒْمُعْصِيّث. 12 لْمَسِيح لَّا، نتَّا يقدّم يجّن ن دْبِيحث وَاحْذس خ ڒْمُعْصِيّث يجّن ن ثْوَاڒَا إِ ڒبْدَا، أُوْشَا يقِّيم نتَّا خ وفُوْسِي ن أَربِّـي. 13 سّنِّي يقِّيم يتْرَاجَا ڒْعَذْيَان نّس اَذ يڒِين سْوَادَّاي يضَارن نّس. 14 لِأَنَّا يِنِّي يتْذوَّاڒن ذ صَّالِحِين يسِّيصْفَا-ثن ذݣ يِجّن ن ثْوَاڒَا إِ ڒبْدَا س يِجّن ن دْبِيحث أُو صَافِي بَاش اَذ يڒِين بْڒَا ڒْعِيب. 15 فَا يشهّذ-اَنغ أَرُّوْح يقدّْسن خ مَانَايَا. ذ اَمزْوَارُو يقَّار: 16 <ذ وَانِيتَا ذ ڒْعَهذ إِي غَا ݣّغ اَك أَيث-إِسْرَائِيل منْبَعْد إِ ڒْوقْث نِّي، ئِقَّار-يت سِيذِي أَربِّـي. أَذَاسن سِيذْفغ ڒُوْصِيَاث ينُو ذݣ وُوْڒَاون نْسن، أَغَارْسن يڒِينْت ذ ثِيْرَا خ ڒَعْقُوْڒَاث نْسن.> 17 سّنِّي يَرْنِي ينَّا: <ڒْمُعْصِيَاث نْسن ذ سَّايِأَث نْسن وَار ذَايْسنْت تْفكَّرغ شَا عَاذ.> 18 ثِيْنَا، مڒَا تْوَاغْفَرنْت مَاشِي عَاذ اَذ يقدّم شَان يِجّن دْبِيحث خ ڒْمُعْصِيّث. يَالَّاهث أَ نَاذْفث غَار أَربِّـي س لْإِيمَان 19-20 إِذن فَا آي أَيثْمَا، غَارْنغ يجّن ن زْعَامث بَاش أَ نَاذف غَار ؤُخَّام اَمْقدّس اَطَّاس س يذَامّن ن عِيْسَى يعْنِي س يِجّن ن وبْرِيذ ذ جْذِيذ يدَّرن، ئِنُّوْرْزم-اَنغ وَامِي يقَّارْص اَرّْوَاق نِّي يعْنِي دَّات نّس. 21-22 غَارْنغ يجّن ن ڒفْقِي اَمقّْرَان يمْغَار نتَّا يحكّم خ ثدَّارْث ن أَربِّـي. عْلَاحْسَاب ڒفْقِي-يَا إِي غَارْنغ، أَ نْقَارّبث غَار أَربِّـي س يِجّن ن وُوْڒ ذ اَشمْڒَاڒ ذ يِجّن ن تِّقث ثجْهذ. عَاوذ ؤُڒَاون نّغ اَذ يڒِين تْوَارُوْشّن بَاش ضَّمِير نّغ اَذ يتْوَاسِّيصْفَا وَار يتْعدِّيب شَا س ڒْمُعْصِيّث. أُو عَاوذ دَّات نّغ اَذ تِيڒِي تْوَاسِيڒذ س وَامَان يصْفَان. 23 أَ نطّف بْڒَا مَا أَ نضْڒق ذِي لْأَمَال نِّي إِي خف نْشهّذ لِأَنَّا أَربِّـي إِي ذَانغ يوعْذن ذَايس تِّقث. 24 نشِّين أَ نْخمّم مْلِيح مَامّش إِي غَا نݣّ أَ نْوصَّا اَيَاوْيَا خ ڒمْحِبّث ذ لْحَسَنَاث. 25 أَ نْمُوْن اَك وَايَاوْيَا مَاشِي أَ نسْمح ذِي لْوَاجِب-أَ اَم مَامّش نُّوْمن [نِّيْمن] ڒبْعَاض ن يِوْذَان. لَّا، أَ نْشجّع اَيَاوْيَا، أُو كْتَار عَاذ خْمِي نتْوَاڒَا نْهَار ن سِيذِيثْنغ يقَارّب-د. 26 شُوْف، نشِّين مڒَا نتْعِيش س ڒْمُعْصِيّث س ڒْخَاضَر نّغ أُو نسّن لْحَقِيقَا، أَتَاف وَار غَارْنغ بُو شَان دْبِيحث اَذ تكّس ڒْمُعْصِيّث نّغ. 27 لَّا، نشِّين غِير نتْرَاجَا يجّن ن لْحِسَاب ذ لْعِقَاب س ثِيݣّْوْذِي ذ يِجّن ن ثْمسِّي ثْحدّق اَذ تشّ ڒْعَذْيَان ن أَربِّـي. 28 ونِّي تُوْغَا يخڒْفن ذِي شَّرِيعَا ن مُوْسَى، مڒَا شهْذن خَاس ثْنَاين نِغ ثْڒَاثَا ن ڒشْهُوْذ اَتَاف اَذ يمّث بْڒَا مَا ث رحْمن. 29 ئِي كنِّيو، مِين تْفكَّرم؟ مشْحَاڒ إِي غَا يِيڒِي لْعِقَاب إِݣ يسْذَاهدْج ونِّي يسحْقَارن مِّيس ن أَربِّـي، ئِسخْنز يذَامّن ن ڒْعَهذ نِّي إِي زِي يتْوَاسِّيصْفَا، يزبّڒ أَرُّوْح ن اَرْضَا! 30 أَقَا نشِّين نسّن بلِّي ذ أَربِّـي إِݣ ينَّان قَا ذ نش إِݣ يتنْتَاقَامن اَثن خدْجْسغ. 31 مڒَا يجّن حكّْمن خَاس يفَاسّن ن أَربِّـي يدَّرن، أَتَاف مَانَايَا يسَاݣّْوَاذ. 32 فَا عقْڒث خ وُوْسَّان نِّي يعْذُوْن وَامِي خَاوم د يشعْشع نُّوْر. ثصْبَارم خ يِجّن ن ؤُمنْغِي يقْسح، ثْوَاجْهَام اَعدّب. 33 ڒبْعَاض ن ثْوَاڒَاثِين تْزبَّاڒن-كنِّيو تْعدَّابن-كنِّيو، ئِوْذَان تْفُوْرُّوْجن خَاوم. ڒبْعَاض ن ثْوَاڒَاثِين تْعَاوَانم يِنِّي يتْوَاعدَّابن تْبدَّام اَكِذْسن. 34 لِأَنَّا يمحْبَاس قِّيمن ذَايْوم ذݣ وُوْڒ. عَاوذ ثصْبَارم س ڒفْرَاحث وَامِي ذَاوم كّْسِين اَݣْڒَا نْوم، تُوْغَا تسّْنم عَاذ اَغَارْوم يِيڒِي يجّن ن وَاݣْڒَا حْسن زݣ ونّغْنِي، يتْدُوْمَان. 35 إِذن ٱجّث تِّقث نْوم، نتَّاث اَذَاوم د ثَاوِي يجّن ن لْأَجَر يمْغَر. 36 أَقَا يتْخصَّا اَذ تصْبَارم، مَايمِّي؟ بَاش خْمِي غَا ثݣّم ڒْخَاضَر ن أَربِّـي، أَتَاف اَغَارْوم يِيڒِي مِينْزِي إِي كنِّيو يوْعذ. 37 لِأَنَّا ثقِّيم ذْرُوْسْت ن ڒْوقْث اَذ د يَاوض ونِّي إِي د يتَاسن وَار يتْعطَّاڒ شَا. 38 وَلَكِن ونِّي يدْجَان نِيشَان اَذ يعِيش س لْإِيمَان. مڒَا يعْقب غَار ذفَّار اَتَاف وَار خَاس رطِّيغ شَا. 39 وَلَكِن نشِّين مَاشِي زݣ يِنِّي يتْعقَابن غَار ذفَّار بَاش أَ نفْنَا؛ لَّا، نشِّين زݣ يِنِّي يتَامْنن أَ نْسنْجم ڒَعْمَار نّغ. |