أيث-ݣلاطيا 6 - ثريفيث 2020

ڒُوْصِيَاث ثِنݣُّوْرَا

¹ آي أَيثْمَا، مڒَا ثُوْفِيم شَان يِجّن زَّايْوم ثْسحْصر-يث ڒْمُعْصِيّث، لَابُد مڒَا ثْجهْذم كنِّيو س أَرُّوْح يقدّْسن اَثِيذ تَارّم غَار وبْرِيذ س يِجّن ن وُوْڒ يسبَّارن. أُو حْضَا يخف نّش ؤُڒَا ذ شك بَاش وَار ثتْوَاغَرِّيذ شَا.

² أَرْبُوْث دْقڒ اَݣ وَايَاوْيَا، س مَانَايَا اَذ تݣّم ڒُوْصِيّث نِّي ن لْمَسِيح.

³ شُوْف، مڒَا شَان ن بْنَاذم يتْفكَّار اَذ يفْتَخَر س يِيخف نّس وَلَكِن نتَّا وَار ذَايس وَالُو، أَتَاف يخدّع يخف نّس.

⁴ لَّا، لَابُد مْكُڒ يجّن اَذ يرَاجع نِّيث ڒخْذَايم نّس، ثُمَّا اَتَاف اَذ يفْتَخَر نِيشَان أُو بْڒَا مَا ٱذ يشَابّه يخف نّس ذݣ ومْعَاشَر نّس.

⁵ ڒَاحقَّاش مْكُڒ يجّن اَذ يَارْبُو ڒحْمڒ نّس.

⁶ فَا ونِّي ؤُمِي سڒْمَاذن اَوَاڒ ن أَربِّـي، ئِتْخصَّا اَذ يشَرش نتَّا اَك ونِّي يسڒْمَاذن زِي مَارَّا مِين يدْجَان ذ اَصبْحَان.

⁷ وَار خدّْعث شَا يخف نْوم، أَربِّـي وَار ث يشمّث ؤُڒَا ذ يجّن. يعْنِي مِين مَا يزْرع بْنَاذم، ذ مَانَاينِّي إِي غَا يمْجَار.

⁸ ونِّي إِي غَا يزرْعن مِين ثخْس طَّبِيعَا ثَعفَّانْت نّس اَزَّايس يمْجَار مِين يفنَّان. ونِّي إِي غَا يزرْعن مِين يخس أَرُّوْح يقدّْسن اَزَّايس يمْجَار ثُوْذَارْث ن ڒبْدَا.

⁹ إِيوَا يتْخصَّا وَار نْتِيحڒ شَا ذِي ڒخْذَايم ن ڒْخِير. مَايمِّي؟ ڒَاحقَّاش اَڒ ڒْوقْث نِّي نِيشَان ن ومْجَار أَ نمْجَار يعْنِي مڒَا وَار نفْشِيڒ شَا.

¹⁰ إِذن مڒْمِي مَا نُوْفَا لْفُرْصَا، لَابُد أَ نݣّ ڒْخِير ذِي مَارَّا يوْذَان خَصَّاتَن اَك أَيثْمَاثْنغ ذِي لْإِيمَان.

لْخِتَام ن ثبْرَات-أَ

¹¹ أَقَا تْوَاڒَام ڒْحُرُوْف-أَ مشْحَاڒ ذ يمقّْرَانن نِثْنِي، أُو نش تَارِيغ-ثن نِّيث س وفُوْس ينُو!

¹² يِنِّي يرزُّوْن اَذ فْتَخَرن زِي دَّات، يعْنِي مِين وَار يدْجِين شَا زِي أَرُّوْح يقدّْسن، نِثْنِي تْبسَّاڒن خَاوم بَاش اَذ تݣّم طَّهَارث ن مُوْسَى. مَايمِّي؟ غِير رزُّوْن نِثْنِي وَار تْعدِّيبن شَا خ سَّبَاب ن صَّلِيب ن لْمَسِيح.

¹³ شُوْف، يِنِّي يتݣّن طَّهَارث نِثْنِي س يِيخف نْسن وَار تْطِيعِين شَا إِ شَّرِيعَا نْسن. رزُّوْن كنِّيو اَذ تݣّم طَّهَارث بَاش اَذ فْتَخَارن بلِّي ثݣِّيم لْعَادَا نْسن ذِي دَّات نْوم.

¹⁴ وَلَكِن نش عمَّارْص اَذ فْتَخَارغ إِلَّا زِي صَّلِيب ن سِيذِيثْنغ عِيْسَى لْمَسِيح. زِي صَّلِيب نّس إِي زِي ثتْوَاصلّب دُّنشْت إِ نش، أُو زَّايس عَاوذ نش إِي زِي تْوَاصلّْبغ إِ دُّنشْت.

¹⁵ لِأَنَّا بْنَاذم مڒَا يݣَّا طَّهَارث نِغ وَار ت يݣِّي شَا، مَانَايَا وَار ينفّع شَا؛ لَّا، ينفّع مڒَا بْنَاذم يخْڒق-د قَاع ذ جْذِيذ.

¹⁶ مَارَّا يِنِّي يݣُّوْرن خ مِين تْوصِّيغ نش ذِي ڒُوْصِيْيث-أَ اَتَاف اَغَارْسن يِيڒِي ڒهْنَا ذ اَرَّحْمث اَك شَّعْب ن أَربِّـي.

¹⁷ سَّا اَڒ ثْسَاونْت يتْخصَّا وَار ذَايِي يتݣّ حَدّ تَمَارَا ڒَاحقَّاش دَّات ينُو ذَايس لْأَثَار ن عِيْسَى.

¹⁸ آي أَيثْمَا، أَذ يِيڒِي اَك اَرُّوْح نْوم اَرْضَا ن سِيذِيثْنغ عِيْسَى لْمَسِيح. آمِين.