أيث-ݣلاطيا 2 - ثريفيث 2020أَرَّسُوْل بُوْلُس قبّْڒن-ث اَرُّسُل نّغْنِي 1 وَامِي ثعْذُو يجّن اَرْبعْطَاشَر سْنَا، ݣَعّْذغ عَاوذ غَار ثنْدِينْت ن لْقُدْس اَك بَرْنَابَا، ؤُوِيغ اَكِذِي ؤُڒَا ذ ؤُمَاثْنغ تِيتُوْس. 2 عْلَاحْسَاب مِين زِي ذَايِي يوصَّا أَربِّـي ذݣ يِجّن ن لْوَاحِي إِي ݣَعّْذغ ذِنِّي سخْبَارغ-ثن خ لْإِنْجِيل إِي زِي تْبشَّارغ جَار ڒݣْنُوْس. وَلَكِن ݣِّيغ مَانَاينِّي غِير إِ يِنِّي يدْجَان ذ يمقّْرَانن ن جْمَاعث حمَا اَذ سّْنغ مِين خذْمغ ذ مِين تُوْغَا خدّْمغ وَار يدْجِي شَا ذ ڒْبَاطڒ. 3 تِيتُوْس يدْجَان ذ اَمْعَاشَر ينُو، وَاخَّا نتَّا ذ اَيُوْنَانِي وَار خَاس زيَّارن شَا حمَا اَذ يݣّ طَّهَارث. 4 رزُّوْن خَاس خ مَانَاينِّي شَان ن وَاوْمَاثن زَعْمَا تْبُوْصَارن وَاهَا، ؤُذْفن-د جَارَانغ س ثْنُوْفْرَا حمَا اَذ جسّْسن خ لْحُرِّيَا إِي غَارْنغ ذِي لْمَسِيح بَاش اَذَانغ اَرّن اَم يسمْغَان إِ شَّرِيعَا نْسن. 5 وَلَكِن نشِّين نُوْݣِي اَذَاسن نݣّ اَرَّاي ؤُڒَا ذ يجّن ن دْقِيقث حمَا اَذ تقِّيم اَكِذْوم لْحَقِيقَا ن لْإِنْجِيل. 6 أَمَّا يِنِّي تْغِير-اَوم ذ يمقّْرَانن خَاوم، نِثْنِي وَار اَرْنِين ؤُڒَا ذ يجّن ن وَاوَاڒ زِي مِين بشَّرغ نش. قَّارغ مَانَايَا، مِين مَا عْنَان يِيْنَا غَارِي كِيف-كِيف، يعْنِي أَربِّـي وَار يتݣّ بُو س وُوْذمَاون جَارَانغ. 7 وَلَكِن مِين ؤُفِين؟ ؤُفِين يكلّف-اَيِي أَربِّـي بَاش اَذ بشَّرغ إِ ييُوْنَانِيْين مَامّش يكلّف بُطْرُس بَاش اَذ يبشَّر إِ أَيث-إِسْرَائِيل. 8 مِينْزِي أَربِّـي إِݣ يسْخدَّامن تّبْشِير ن بُطْرُس اَم اَرَّسُوْل إِ أَيث-إِسْرَائِيل، ذ نتَّا إِݣ يسْخدَّامن عَاوذ تّبْشِير ينُو اَم اَرَّسُوْل إِ يِنِّي يدْجَان ذ ييُوْنَانِيْين. 9 يَعْقُوْب ذ بُطْرُس ذ يُوْحَنَّا يتْوَاحْسَابن ذ يمقّْرَانن ذِي جْمَاعث نِّي، فهْمن اَرْضَا إِي ذَايِي يُوْشَا أَربِّـي سدْجْمن خَانغ نش ذ بَرْنَابَا س وفُوْس اَفُوْسِي نْسن اَمْعَاشَر. قبْڒن-اَنغ نشِّين أَ نْرَاح أَ نْبشَّر إِ يِنِّي يدْجَان ذ ييُوْنَانِيْين، نِثْنِي اَذ بشَّرن إِ يِنِّي يدْجَان زِي أَيث-إِسْرَائِيل. 10 غِير تَّارن زَّايْنغ أَ نْفكَّار ذݣ يپُـوْبْرِيثن نْسن. مَانَاينِّي رزُّوْغ-ث نِّيث س وُوْڒ ينُو اَث ݣّغ. أَرَّسُوْل بُوْلُس يتْوَاجَاه اَرَّسُوْل بُطْرُس 11 فَا وَامِي د يُوْسَا بُطْرُس غَار ثنْدِينْت ن وَانْطَاكْيَا وَاجْهغ-ث اَغمْبُوْب ذݣ وغمْبُوْب لِأَنَّا يݣَّا يجّن ن لْغَالط. 12 مِين يعْنَا لْغَالط نِّي؟ أَقَا قْبڒ مَا ٱذ د يَاس يجّن ن ڒْحِزب يعْنِي شَان يِوْذَان زِي يَعْقُوْب تُوْغَا بُطْرُس يتتّ اَك ڒْمُوْمِنِين يدْجَان ذ ييُوْنَانِيْين. وَلَكِن وَامِي د يُوْسَا ڒْحِزب نِّي، ئِبْذَا بُطْرُس يتْبعَّاذ خ ييُوْنَانِيْين نِّي ينعْزڒ خَاسن. مَايمِّي؟ لِأَنَّا يݣّْوذ زِي ڒْحِزب نِّي يعْنِي ن طَّهَارث. 13 ڒخْدّنِّي ذْفَارن-ث ذِي نِّفَاق نّس يسْرَائِيلِيْين نّغْنِي إِي يُوْمْنن. ؤُڒَا ذ بَرْنَابَا س يِيخف نّس سْبعّْذن-ث زݣ وبْرِيذ نِيشَان ذي نِّفَاق-أَ نْسن. 14 وَامِي ثن ࢲْرِيغ وَار ݣُّوْرن شا نِيشَان عْلَاحْسَاب لْحَقِيقَا إِي يدْجَان ذِي لإِنْجِيل، نِّيغ-اَس إِ بُطْرُس زَّاثْسن مَارَّا: شك ذ اَئِسْرَائِيلِي وَلَكِن تْعِيشذ اَمشْنَاو ييُوْنَانِيْين، يعْنِي مَاشِي اَمشْنَاو اَئِسْرَائِلِي. مَامّش غَا ثݣّذ اَذ تْزيَّارذ خ ييُوْنَانِيْين بَاش اَذ عِيشن اَمشْنَاو يسْرَائِيلِيْين؟ س لْإِيمَان أُو صَافِي إِي غَا نجْمن يِوْذَان مَاشِي س شَّرِيعَا 15 نشِّين ذ يسْرَائِيلِيْين زݣ وَامِي د نخْڒق، نشِّين وَار ندْجِي شَا زِي ڒݣْنُوْس يعصَّان زَعْمَا. 16 إِنَّمَا، نسّن بلِّي بْنَاذم وَار يتْوَاسمْصْڒَاح شَا اَك أَربِّـي يعْنِي مڒَا يطَاع إِ شَّرِيعَا ن مُوْسَى؛ لَّا، مَانَايَا إِلَّا س لْإِيمَان زِي عِيْسَى لْمَسِيح. خ مَانَايَا ؤُڒَا ذ نشِّين نُوْمن زِي عِيْسَى لْمَسِيح بَاش أَ نمْصْڒَاح اَك أَربِّـي س لْإِيمَان نِّي إِي زِي نُوْمن، مَاشِي س طَّاعَا ن شَّرِيعَا ن مُوْسَى. لِأَنَّا ؤُڒَا ذ يجّن ن بْنَاذم وَار يتْوَاسمْصْڒَاح شَا اَك أَربِّـي س طَّاعَا ن شَّرِيعَا نِّي. 17 فَا نشِّين نْرزُّو أَ نمْصْڒَاح اَك أَربِّـي س لْإِيمَان زِي لْمَسِيح. مڒَا س مَانَايَا منْبَعْد نُوْفَا يخف نّغ اَم ڒݣْنُوْس يعصَّان زَعْمَا، مَا اَتَاف لْمَسِيح يتْشجَّاع-اَنغ غَار ڒْمُعْصِيّث؟ لَّا، عمَّارْص! 18 لْعَكْس، نش اَذ يڒِيغ ذ لْعَاصِي مڒَا بْنِيغ عَاوذ نِّظَام نِّي اَقْذِيم ن شَّرِيعَا إِي هذْمغ. 19 عْلَاحْسَاب شَّرِيعَا ن مُوْسَى نتَّاث س يِيخف نّس، نش مُّوْثغ زَعْمَا إِ ڒحْكَام ن شَّرِيعَا-يَا خَافِي بَاش اَذ دَّرغ إِ أَربِّـي وَاهَا. 20 تْوَاصلّْبغ اَك لْمَسِيح. سَّا اَڒ ثْسَاونْت مَاشِي ذ نش إِ غَا يدَّرن؛ لَّا، ذ لْمَسِيح إِي غَا يدَّرن ذَايِي. ثُوْذَارْث-أَ إِي دَّرغ ڒخُّو ذِي دَّات ينُو، أَقَا دَّرغ-ت س لْإِيمَان ينُو زِي مِّيس ن أَربِّـي إِي ذَايِي يحِبّن يصدّق خَافِي يخف نّس. 21 نش ؤُݣِيغ اَذ سْبطّْڒغ اَرْضَا ن أَربِّـي. شُوْف، مَعْلِيك بْنَاذم يمصْڒَاح اَك أَربِّـي س شَّرِيعَا ن مُوْسَى، أَتَاف يمُّوْث لْمَسِيح خ ڒْبَاطڒ وَاهَا. |