أيث-ؤفسوس 3 - ثريفيث 2020ئِمظْهَار-د ڒْمَعْنَا ينُوْفَّرن خ لْإِنْجِيل 1 خ مَانَايَا ترْكَاعغ خ يفَادّن ينُو، نش بُوْلُس إِي يدْجَان ذ اَمحْبُوْس عْلَاحْسَاب عِيْسَى لْمَسِيح أُو خَاوم كنِّيو إِي وَار يدْجِين شَا زِي أَيث-إِسْرَائِيل... 2 مَا ثسْڒَام نِغ لَّا خ لْمسْؤُوْلِيَا نِّي، يعْنِي يجّن ن لْبَرَكَا إِي ذَايِي يُوْشَا أَربِّـي خَاوم كنِّيو؟ 3 يعْنِي ڒْمَعْنَا ينُوْفَّرن خ لْإِنْجِيل يسْمظْهَار-اَيِي-يث-يذ يسهْوَا-ث-يذ خَافِي س لْوَاحِي مَامش ذَاوم ت ؤُرِيغ شْوَايْت زِي قْبڒ. 4 خْمِي غَا ثغرم مَانَايَا اَذ تسّْنم ڒفْهَامث ينُو إِي غَارِي ذِي ڒْمَعْنَا-يَا ينُوْفَّرن خ لْمَسِيح. 5 ڒْمَعْنَا-يَا وَار ثِيذ يسْمظْهَار شَا أَربِّـي إِ ثَارْوَا ن آدَم ذِي زْمَانَاث إِي يعْذُوْن اَم مَامّش ثِيذ يسْمظْهَار ڒخُّو س أَرُّوْح يقدّْسن إِ اَرُّسُل صَّالِحِين اَك لْأَنْبِيَا. 6 ڒْمَعْنَا-يَا ينُوْفَّرن ثَانِيتَا، مِين ثعْنَا؟ أَقَا ؤُڒَا ذ يِنِّي وَار يدْجِين شَا زِي أَيث-إِسْرَائِيل اَذ وَرْثن زِي أَربِّـي اَك أَيث-إِسْرَائِيل س لْإِنْجِيل. نِثْنِي ذ يجّن ن جْمَاعث، مَارَّا اَذ شَرْشن ذِي مِين يوْعذ أَربِّـي ذِي لْمَسِيح. 7 ذوْڒغ ذ اَخدَّام ن لْإِنْجِيل-أَ عْلَاحْسَاب لْبَرَكَا ن أَربِّـي وَامِي ذَايِي ت يهْذَا يسخْذم-يت س جّْهذ نّس. 8 لْبَرَكَا-يَا يُوْشَا-ٱيِي-ت أَربِّـي وَاخَّا ذ اَمزْيَان إِي دْجِيغ خ مَارَّا صَّالِحِين بَاش نش اَذ بشَّرغ يِنِّي وَار يدْجِين شَا زِي أَيث-إِسْرَائِيل اَذ سّْنن اَݣْڒَا نِّي ن لْمَسِيح إِي وَار يتْوَاشرِّيحن شَا. 9 عَاوذ بَاش اَذ سظْهَارغ مْلِيح إِ مَارَّا يوْذَان مِين يخطّط أَربِّـي ذِي ڒْمَعْنَا نِّي ينُوْفَّرن إِݣ يجَّا نتَّا ذݣ يِخف نّس ذِي زْمَانَاث يعْذُوْن أُو ذ نتَّا ذ لْخَالِق ن مَارَّا مِين يدْجَان ذ ثِمسْڒَايِين. 10 مِين يخطّط نتَّا؟ يِنِّي إِݣ يحكّْمن ذ يِنِّي إِݣ يجهْذن ذݣ يجنَّاثن ڒخُّو اَذ سّْنن خ وفُوْس ن جْمَاعث ن ڒْمُوْمِنِين مِين ثعْنَا ڒفْهَامث ن أَربِّـي خ مَارَّا ثِمسْڒَايِين. 11 مَانَايَا يدْجَا عْلَاحْسَاب لْغَرَض ن أَربِّـي زِي ڒبْدَا، أُو لْغَرَض-أَ يكمّڒ-يث س عِيْسَى لْمَسِيح سِيذِيثْنغ. 12 زَّايس نتَّا أَ نْقَارّب غَار أَربِّـي س زْعَامث ذ تِّقث بْڒَا مَا أَ نݣّْوذ خْمِي زَّايس نْتَامن. 13 فَلِيهَذَا نِّيغ-اَوم وَار تفْشِيڒث شَا عْلَاحْسَاب اَعدّب ينُو خَاوم ڒَاحقَّاش مَانَايَا اَكنِّيو ينْفع. أَرَّسُوْل بُوْلُس يتْࢲَادْجَا خ ڒْمُوْمِنِين ن أَيث-ؤُفَسُوْس 14 نِّيغ-اَوم خ مَانَايَا نش ترْكَاعغ خ يفَادّن ينُو زَّاث إِ بَابَاثْنغ. 15 زَّايس نتَّا إِي د تكّن يسمَاون ن لْأَصل ن مَارَّا ڒحْبَاب ن وجنَّا ذ ثْمُوْرْث. 16 تتَّارغ إِ أَربِّـي زݣ وَاݣْڒَا نّس اَعْظِيم اَكنِّيو يسجْهذ ذِي نّفْس نْوم س وفُوْس ن أَرُّوْح نّس 17 حمَا لْمَسِيح اَذ يزْذغ ذݣ وُوْڒَاون نْوم س لْإِيمَان. تتَّارغ إِ أَربِّـي عَاوذ اَذ تْوَاࢲُّوْم اَذ تُوْوْثم مْلِيح يࢲوْرَان ذݣ وشَاڒ ن ڒمْحِبّث 18 بَاش اَذ يِيڒِي غَارْوم جّهذ اَك مَارَّا صَّالِحِين اَذ تْزمَّرم اَذ تْفهْمم مشْحَاڒ ثِيڒِيو مشْحَاڒ ثَزيْرَاث مشْحَاڒ ثُوْعْڒَا مشْحَاڒ ثُوْدْجغ ڒمْحِبّث ن لْمَسِيح. 19 أَذ تسّْنم عَاوذ مْلِيح ڒمْحِبّث-أَ ثَانِيتَا ن لْمَسِيح مشْحَاڒ ثمْغر خ مَارَّا ثُوْسْنَا ذِي دُّنشْت-أَ بَاش اَذ تشَّارم س مِين يشُّوْر أَربِّـي. 20 إِيوَا سِيذِي أَربِّـي ذ نتَّا إِي يزمَّرن اَذ يݣّ اَطَّاس س وَاطَّاس زِي مِين ذَاس نْتتَّار نِغ ذ مِين نتْخيَّال عْلَاحْسَاب جّْهذ نّس إِي يخدْمن ذَايْنغ. 21 أَغَارس ثِيڒِي لْعَظَمَا ذِي جْمَاعث ن ڒْمُوْمِنِين أُو عَاوذ ذِي عِيْسَى لْمَسِيح زِي لْجِيل غَار لْجِيل إِ ڒبْدَا ن ڒبْدَاث. آمِين! |