أيث-كولوس 4 - ثريفيث 2020

¹ آي أَيثْبَاب ن يسمْغَان، ذبَّرم خَاسن خ يسمْغَان نْوم س مِين يدْجَان نِيشَان ذ ڒْحَقّ نْسن اَقَا كنِّيو ثسّْنم إِلَّا غَارْوم بَاب نْوم ذݣ وجنَّا.

ڒُوْصِيَاث ثِنݣُّوْرَا

² تݣّم لْمجْهُوْد س ثْࢲَادْجِيث نْوم، إِڒِيم عْلَابَال ذِي ثْࢲَادْجِيث نْوم شكَّرم أَربِّـي.

³ ذِي نّفْس ن ڒْوقْث تَّارم-اَس إِ أَربِّـي خَانغ بَاش اَذ يرْزم ثَوَّارْث إِ وَاوَاڒ نّغ أَ نْبشَّر س ڒْمَعْنَا ينُوْفَّرن ن لْمَسِيح إِي خف إِي دْجِيغ نش ذِي ڒحْبس.

⁴ تَّارم-اَس إِ أَربِّـي بَاش اَزَّايس سْفهْمغ مْلِيح إِ يِوْذَان عْلَاحْسَاب مِين لَابُد اَذ ينِيغ.

⁵ عِيشث س ڒفْهَامث اَك يِنِّي يدْجَان غَار بَارَّا نْوم وَار يُوْمِينن شَا، سْتَغلَّام ڒْوقْث نْوم مْلِيح.

⁶ أُو لَابُد اَوَاڒ نْوم اَذ يِيڒِي ڒبْدَا يشُّوْر س اَرْضَا يمدْجْحن س ڒمْڒح بَاش اَذ تسّْنم مَامش غَا ثَارّم خ كُڒ يجّن.

لْخِتَام ن ثبْرَات-أَ

⁷ ؤُمَاثْنغ تُوْشِيق اَكنِّيو يخبَّر خ مَارَّا مِين تݣّغ ذَانِيتَا. نتَّا يعِيزّ خَافِي، ئِتْسخَّار إِ أَربِّـي س يِجّن ن تِّقث. نتَّا ذ اَخدَّام يتمْعَشَارن اَكِذِي ذِي ڒْخذْمث ن سِيذِيثْنغ.

⁸ سّكّغ-ث-يذ غَارْوم خ شّْغڒ-أَ وَانِيتَا بَاش اَذ تسّْنم مَامش ندْجَا نشِّين اَذ يشجّع ؤُڒَاون نْوم.

⁹ أَكِذس ؤُمَاثْنغ وَنِيسَامُو نتَّا إِي خَانغ يعِيزّن ذَايس تِّقث، نتَّا زِي ثْمُوْرْث نْوم. يِيْنَا اَكنِّيو خبَّرن مَارَّا مِين يوقْعن ذݣ ومْشَان-أَ.

¹⁰ ئِسَاوَّاض-اَوم-د سْڒَام أَرِسْتَارْخُوْس ونِّي إِي كِذِي يدْجَان ذِي ڒحْبس-أَ. ئِسَاوَّاض-اَوم-د سْڒَام ؤُڒَا ذ مَرْقُس مِّيس ن عْزِيزس ن بَرْنَابَاس. تُوْغَا وصِّيغ-كنِّيو خ مَرْقُس-أَ مڒَا يُوْسَا-د غَارْوم رحّْبث زَّايس.

¹¹ ئِسَاوَّاض-اَوم-د سْڒَام عَاوذ عِيْسَى ونِّي ؤُمِي قَّارن يُوْسْتُوْس. ذ يِيْنَا وَاهَا إِݣ يدْجَان ذ يسْرَائِيلِيْين زݣ يِنِّي يتمْعَشَارن اَكِذِي ذِي ڒْخذْمث-أَ عْلَاحْسَاب ڒْمُلْك ن أَربِّـي، تْشجَّاعن-اَيِي اَطَّاس.

¹² ئِسَاوَّاض-اَوم-د سْڒَام پَـافْرَاس نتَّا إِݣ يدْجَان زِي ثْمُوْرْث نْوم، نتَّا ذ يجّن ن وخدَّام ن عِيْسَى لْمَسِيح. ڒبْدَا يتَاحڒ ذِي ثْࢲَادْجِيث عْلَاحْسَاب كنِّيو بَاش اَذ تْبدّم خ دْسَاس اَذ تِيڒِيم ثمْغَرم ذِي لْإِيمَان نْوم وَار غَارْوم يتِيڒِي بُو شّكّ ذِي مَارَّا مِين يخس أَربِّـي.

¹³ نش شهّْذغ خَاس يربّڒ خَاوم مْلِيح ذ يِنِّي عَاوذ يدْجَان ذِي ثنْدِينْت ن لَاوْدُكْيَا ذ يِنِّي يدْجَان ذِي ثنْدِينْت ن يِيرَاپُـلِيس.

¹⁴ ئِسَاوَّاض-اَوم-د سْڒَام اَمْعِيزّ نّغ لُوْقَا إِݣ يدْجَان ذ اَضْبِيب، أَكِذس دِيمَاس.

¹⁵ سِيوْضم-اَسن سْڒَام ينُو إِ أَيثْمَاثْنغ إِي يدْجَان ذِي ثنْدِينْت ن لَاوْدُكْيَا ذ وُوْتْشْمَاثْنغ نُوْمِيبْـيَا ذ جْمَاعْث ن ڒْمُوْمِنِين إِي يدْجَان ذِي ثدَّارْث نّس.

¹⁶ خْمِي غَا ثغرم ثَبْرَات-أَ كنِّيو جَارَاوم، عَاوذ خْزَرم جْمَاعث ن ڒْمُوْمِنِين اَت غَرن ذِي لَاوْدُكْيَا. خْزَرم عَاوذ كنِّيو ثَبْرَات نْسن زِي لَاوْدُكْيَا اَت تغَرم.

¹⁷ إِنِيم-اَس إِ أَرْكِيپُّـوْس أُو لَابُد اَذ تْكمّْڒذ لْوَاجِب ن ڒْخذْمث إِي ثْقبْڒذ زِي سِيذِيثْنغ.

¹⁸ قَا نش ذ بُوْلُس س ثِيرَا ن وفُوْس ينُو إِي زِي ذَاوم د سَاوَّاضغ سْڒَام ڒخُّو. فقْذم-اَيِي-د س سْنَاسڒ ينُو ن ڒحْبس-أَ. أَكِذْوم يِيڒِي اَرْضَا.