أيث-كولوس 2 - ثريفيث 20201 شُوْف، خْسغ اَذ تسّْنم مشْحَاڒ تَاحْڒغ ذِي ڒْخذْمث-أَ عْلَاحْسَاب كنِّيو ذ يِنِّي يدْجَان ذِي ثنْذِينْت ن لَاوْدُكْيَا ذ مَارَّا يِنِّي عمَّارْص مَا ࢲْرِين اَغمْبُوْب ينُو. 2 رزُّوْغ ؤُڒَاون نْوم اَذ تْوَاشجّْعن خْمِي غَا مُوْنن اَك وَايَاوْيَا س ڒمْحِبّث بَاش اَذ تَاوْضم غَار مَارَّا ڒْخِير نِّي إِݣ يدْجَان ذݣ يِجّن ن ڒفْهَامث ثكْمَاڒ ذ يِجّن ن ثُوْسْنَا خ ڒْمَعْنَا ينُوْفَّرن ن أَربِّـي يدْجَان ذِي لْمَسِيح. 3 ذَايس ذِي نتَّا إِي تْوَاسْنُوْفَّرن مَارَّا ڒْكُنُوْز ن ڒفْهَامث ذ مَارَّا ڒْكُنُوْز ن ثُوْسْنَا. 4 قَّارغ-اَوم مَانَايَا بَاش وَار د يتِيس حَدّ اَكنِّيو يشْمث س وَاوَاڒ نّس اَذَاوم يسْنعْمِيڒ ذ صَّح. 5 نش وَاخَّا وَار دْجِيغ شَا اَكِذْوم س دَّات ينُو اَقَايِي اَكِذْوم س أَرُّوْح ينُو، فَرّْحغ نش خْمِي تْوَاڒِيغ لْعِبَادَا نْوم نِيشَان تݣّم-ت ثَا س ثَا أُو مشْحَاڒ إِي تْبدَّام ذِي لْإِيمَان نْوم ذِي لْمَسِيح. لْحُرِّيَا إِي غَارْنغ ذِي ثُوْذَارْث نّغ اَك لْمَسِيح 6 إِذن، مَامّش ثْقبْڒم عِيْسَى لْمَسِيح اَمنِّي إِي غَا ثْعِيشم. 7 ئِتْخصَّا-كنِّيو اَذ تِيڒِيم ثبْنَام خ دْسَاس نّس مْلِيح، أَذ تِيڒِيم ثْجهْذم ذِي لْإِيمَان نْوم مَامّش إِي كنِّيو سڒْمَاذن، أَذ تِيڒِيم تنْفيَّاضم س شُّكر. 8 أَرّم-د ڒْبَاڒ نْوم ؤُڒَا ذ يجّن مَا يزمَّر اَكنِّيو يسْخَرْوض س لْفلْسَفَا نِغ س وغدَّاڒ نِّي يخْوَان عْلَاحْسَاب تَّقَالِيد ن بْنَاذم نِغ عْلَاحْسَاب لْقَوَانِين يقْذِيمن ن دُّنشْت-أَ قَا مَاشِي عْلَاحْسَاب لْمَسِيح. 9 لِأَنَّا لْمَسِيح مَارَّا مِين يدْجَان ن أَربِّـي يزْذغ ذِي دَّات نّس. 10 كنِّيو ثُوْذَارْث نْوم ثكْمَاڒ اَك لْمَسِيح يدْجَان نتَّا ذ اَزدْجِيف يتْرَايَّان خ مَارَّا يِنِّي يحكّْمن ذ يِنِّي يجهْذن. 11 ذَايس ذِي نتَّا عَاوذ إِي ذِي ثْطهَّارم وَلَكِن مَاشِي ذ يجّن ن طَّهَارث يݣِّين س يفَاسّن ن بْنَاذم؛ لَّا، ثْطهَّارم طَّبِيعَا نْوم ثَعفَّانْت قَاع س يِجّن ن طَّهَارث يݣِّي-ت لْمَسِيح. 12 يعْنِي ثنْضْڒم اَكِذس س طَّهَارث نْوم ذݣ وَامَان، أُو عَاوذ س طَّهَارث نْوم ذݣ وَامَان ثكَّارم-د اَكِذس زِي ڒْموْث س لْإِيمَان نْوم ذِي ثْزمَّار ن أَربِّـي ونِّي د يسكَّرن عِيْسَى زِي ڒْموْث. 13 فَا كنِّيو تُوْغَا ثمُّوْثم س وُوْڒَاون نْوم عْلَاحْسَاب ڒْمُعْصِيَاث ذ طَّبِيعَا نْوم وَار يطهَّارن شَا، وَلَكِن أَربِّـي يسدَّر-د كنِّيو اَك لْمَسِيح وَامِي ذَانغ يغْفَر قَاع ڒْمُعْصِيَاث نّغ. 14 ئِمْحَا اَمَارْوَاس نِّي إِݣ يزمّْمن خَانغ اَقَاث ضد نّغ س لْقَانُوْن. مَانَاينِّي ييْسِي-ث يصمَّر-يث خ صَّلِيب. 15 أَربِّـي يكّس ثِزمَّار نِّي ن يِنِّي يحكّْمن ذ يِنِّي يجهْذن يَارِّي-ثن اَخَاسن فُوْرّْجن يِوْذَان يفْضح-يثن يرْبح-يثن خ صَّلِيب. 16 إِذن وَار تجَّام حَدّ اَكنِّيو يعيّب خ مِين تتّم نِغ خ مِين ثْسسّم نِغ خ شَا ن ڒعْيُوْذَاث إِي تِيڒِين كُڒ عَام نِغ كُڒ شْهَار نِغ خ نْهَار ن سّبْث ن لْعِبَادَا. 17 مَارَّا ثِمسْڒَايِين-أَ نِثنْتِي اَم ثِيڒِي وَاهَا ن ثْمسْڒَايِين نِّي إِي د غَا يَاسن، ثِمسْڒَايِين نِّي ن صَّح ن لْمَسِيح. 18 وَار تجَّام ؤُڒَا ذ يجّن ن بْنَاذم اَكنِّيو يسْبطّڒ خ لْجَائِزَا. نتَّا بْنَاذم نِّي ذ ونِّي إِݣ يسمْغَارن مِين يقسْحن ذِي دِّين، ئِسمْغَار عَاوذ لْعِبَادَا نِّي إِي زِي عبّْذن لْمَلَائِكَاث. ئِسَّاوَاڒ اَطَّاس ثَا س ثَا خ مِين يࢲْرَا زَعْمَا ذِي شَا ن لْوَاحِي نّس. ڒْعَقڒ نّس يُوْفّ يمْغَر س تَّكبُّر. وَار ذِنِّي بُو أَرُّوْح يقدّْسن، ذِنِّي لْأَفْكَار نّس يخْوَان وَاهَا. 19 بْنَاذم نِّي يسخْصَار لْعَلَاقَا اَك ونِّي يتْرَايَّان ذ اَزدْجِيف. أَزدْجِيف نِّي نتَّا يتْدبَّار إِ دَّات نّس اَمن-ثكْمَاڒ وَامِي نتَّاث ثْمُوْن س يپُـوْرْصُوْثن ذ ڒمْفَاسڒ نّس بَاش دَّات اَذ تمْغَر عْلَاحْسَاب مِين يخس أَربِّـي اَذ تمْغَر. 20 كنِّيو مڒَا ثمُّوْثم اَك لْمَسِيح إِ لْقَوَانِين نِّي يقْذِيمن ن دُّنشْت-أَ، مَايمِّي ذَاس تݣّم اَرَّاي إِ لْقَانُوْن نِّي اَخْمِي عَاذ تْعِيشم زَّايس ذِي دُّنشْت-أَ؟ 21 يعْنِي: "وَار كسِّي شَا س وفُوْس، وَار تْقَاسَا شَا، وَار تْحَاذَا شَا." 22 لْقَاوَنِين-أَ يِيْنَا سَّاوَاڒن خ شَان ثْمسْڒَايِين إِي غَا يفْنَان خْمِي غَا تْوَاشّنْت، نِثْنِي ذ لْقَوَانِين ذ وسڒْمذ ن يِوْذَان وَاهَا. 23 ذ صَّح، تْغِيڒ-اَسن إِ يِوْذَان لْقَوَانِين نِّي اَم ذَايْسن ڒفْهَامث زَعْمَا خ سَّبَاب ن لْوَاجِب ن لْعِبَادَا نْسن ذ دِّين نْسن يقْسح أُو عَاوذ مشْحَاڒ تْزيَّارن خ دَّات ن بْنَاذم. وَلَكِن لْقَوَانِين-أَ وَار تْعِيوِينن ؤُڒَا ذ يجّن ن بْنَاذم بَاش وَار يتْسِيعِّيف شَا شّهَوَاث ن دَّات نّس. |