أيث-كولوس 1 - ثريفيث 2020لْمُقَدِّمَا 1 نش ذ بُوْلُس ذ اَرَّسُوْل ن عِيْسَى لْمَسِيح س ڒْخَاضَر ن أَربِّـي، أَكِذِي ؤُمَاثْنغ تِيْمُوْتَاوُس. 2 تَارِيغ ثَبْرَات-أَ إِ وَاوْمَاثن إِي ذِي يدْجَا لْإِيمَان يدْجَان ذ صَّالِحِين ذِي ثنْدِينْت ن كُوْلُوْس. أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ. شُّكر ذ ثْࢲَادْجِيث ن اَرَّسُوْل بُوْلُس خ ڒْمُوْمِنِين 3 نشِّين ڒبْدَا نتْشكَّار أَربِّـي بَابَاس ن سِيذِيثْنغ عِيْسَى لْمَسِيح خْمِي ذَاس نْتتَّار خَاوم. 4 لِأَنَّا نتسْڒَا خَاوم خ لْإِيمَان نْوم إِي ذَايْوم خ عِيْسَى لْمَسِيح ذ ڒمْحِبّث نْوم إِي تݣّم إِ صَّالِحِين مَارَّا. 5-6 لْإِيمَان-أَ ذ ڒمْحِبّث-أَ تَاسن-د زِي لْأَمَال نِّي يتْوَاخمّْڒن إِ كنِّيو ذݣ وجنَّا. تُوْغَا ثسْڒِيم خَاس ذݣ وَاوَاڒ ن ڒْحَقّ يعْنِي ذِي لْإِنْجِيل إِي غَارْوم د يُوْضن. ذِي مَارَّا دُّنشْت-أَ لْإِنْجِيل-أَ يتَارو يتمْغَار، مَامش عَاوذ يخدّم جَارَاوم زݣ وَامِي إِي ذَاس ثسْڒِيم ثْفهّْمم ذ صَّح اَرْضَا ن أَربِّـي. 7 أَمنِّي إِي ث ثْڒمْذم زݣ وُوْمَاثْنغ پَافْرَاس نتَّا ذ اَمْسخَّار يعِيزّن ذِي ڒْخذْمث. ئِخدّم نِيشَان إِ لْمَسِيح عْلَاحْسَاب نّغ. 8 ئِعَاوذ-ٱنغ خَاوم خ ڒمْحِبّث نْوم لْأَصل ن ڒمْحِبّث-أَ ذ أَرُوْح يقدّْسن. 9 خ مَانَايَا زِي نْهَار نِّي وَامِي تُوْغَا نسْڒَا نشِّين خَاوم، نتْغِيمَا نْتتَّار-اَس إِ أَربِّـي خَاوم بَاش اَذ تْعمَّرم س ثُوْسْنَا خ ڒْخَاضَر ن أَربِّـي س مَارَّا ڒْعَقڒ ذ ڒفْهَامث إِݣ يتِيشّن أَرُّوْح يقدّْسن. 10 حمَا اَذ تُوْيُوْرم خ يِجّن ن وبْرِيذ إِي ذَاس يتِيشّن إِ سِيذِيثْنغ لْقِيمَا إِي ذَاس يتعْجِيبن مَارَّا. خ وبْرِيذ-أَ اَذ تَارْوم مَارَّا ڒخْذَايم ثِصبْحَانِين اَذ تْمَارْنِيم ذِي ثُوْسْنَا نْوم خ أَربِّـي. 11 نْتتَّار إِ أَربِّـي اَذ تْجهْذم ذِي مَارَّا ثِزمَّار نْوم عْلَاحْسَاب لْقُوَّا نّس يدْجَان عَظِيمَا بَاش اَذ تْبدّم اَذ تصْبَارم مْلِيح س ڒفْرَاحث، 12 بَاش اَذ تْشكَّرم بَابَاثْنغ ونِّي إِي ذَاوم يُوْشِين ڒْحَقّ اَذ تْشَرْشم ذِي لْوَرث ن صَّالِحِين ذِي نُّوْر. 13 ئِسفْڒث-اَنغ زِي ڒحْكَام ن ثَادْجسْت يسِّيوض-اَنغ غَار ڒْمُلْك ن مِّيس يعِيزّن. 14 زَّايس نتَّا يسنْجم-اَنغ يعْنِي يغْفَر-اَنغ ڒْمُعْصِيَاث نّغ. 15 مِّيس نتَّا ذ صِّفث ن أَربِّـي ونِّي وَار نْزمَّر شَا نشِّين اَث نْࢲر. نتَّا ذ اَمنْزُو يحكّم خ قَاع مِين د يتْوَاخڒْقن. 16 زَّايس نتَّا إِي زِي د تْوَاخڒْقنْت قَاع ثِمسْڒَايِين إِݣ يدْجَان ذݣ وجنَّا نِغ ذِي ثْمُوْرْث. وَاخَّا تْبَاننْت-يد نِغ وَار د تْبِيننْت شَا. نِغ ذ لْعَرْشَاث نِغ ذ لْممْلَاكَاث نِغ ذ يِنِّي يحكّْمن نِغ ذ يِنِّي يجهْذن. قَاع ثِمسْڒَايِين-أَ زَّايس إِي د تْوَاخڒْقنْت، تْوَاخڒْقنْت-اَس-د إِ نتَّا. 17 ذ نتَّا إِݣ يدْجَان قْبڒ خ ثْمسْڒَايِين قَاع أُو خ دْسَاس نّس إِي تْمُوْننْت قَاع ثِمسْڒَايِين. 18 ذ نتَّا إِي يدْجَان ذ اَزدْجِيف ن دَّات يعْنِي ن جْمَاعث ن ڒْمُوْمِنِين. ذ نتَّا إِݣ يدْجَان ذ اَمزْوَارُو، ذ نتَّا إِݣ يدْجَان ذ اَمنْزُو زݣ يمتِّينن بَاش ذ نتَّا إِي غَا يِيڒِين ذ اَمزْوَارُو ذِي ثِمسْڒَايِين قَاع. 19 لِأَنَّا يعْجب-اَس إِ أَربِّـي اَذَايس يسزْذغ ذِي مِّيس قَاع مِين غَارس. 20 ثُمَّا يسمْصْڒَاح أَربِّـي قَاع ثِمسْڒَايِين إِ يِيخف نّس إِݣ يدْجَان ذِي ثْمُوْرْث نِغ ذݣ وجنَّا يعْنِي يݣَّا ڒهْنَا س يذَامّن ن مِّيس إِي يُوْزّْڒن خ صَّلِيب. 21 كنِّيو تُوْغَا قْبڒ تِݣّْوْجم خ أَربِّـي تْمنْغَام اَكِذس س ڒَعْقُوْڒَاث نْوم تݣّم ثِمسْڒَايِين ذ ثِعفَّانِين. 22 وَلَكِن ڒخُّو لَّا، أَربِّـي يسمْصْڒَاح-يكنِّيو اَكِذس س دَّات ن لْمَسِيح يعْنِي س ڒْموْث نّس بَاش اَكنِّيو يقدّم زَّاثس ثصْفَام بْڒَا ڒْعِيب وَار ذِنِّي بُو وِي كنِّيو إِي غَا يتَاهَامن. 23 وَلَكِن لَابُد اَذ تقِّيمم ذِي لْإِيمَان نْوم نِيشَان اَذ تْبدّم خ دْسَاس، وَار ثْسمّْحم شَا ذِي لْأَمَال ن لْإِنْجِيل تُوْغَا إِي تسْڒِيم. لْإِنْجِيل-أَ تْوَابشَّرنْت زَّايس قَاع ثِمسْڒَايِين يتْوَاخڒْقن سْوَادَّاي وجنَّا، أُو نش بُوْلُس ذوْڒغ ذ اَخدَّام نّس. ڒْخذْمث ن اَرَّسُوْل بُوْلُس ذِي جْمَاعث ن ڒْمُوْمِنِين 24 ڒخُّو نش فَرّْحغ خ مِينْخف تْعدَّابغ عْلَاحْسَاب كنِّيو. لِأَنَّا ذِي دَّات-أَ ينُو كسِّيغ ڒْحَقّ ينُو زِي مِين عَاذ ينقّْصن زݣ وعدّب نِّي ن لْمَسِيح عْلَاحْسَاب دَّات نّس يعْنِي جْمَاعث ن ڒْمُوْمِنِين. 25 جْمَاعث-أَ ذوْڒغ غَارس نش ذ يجّن ن وخدَّام نّس عْلَاحْسَاب لْوَاجِب نِّي زِي أَربِّـي إِي ذَايِي د يمُّوْشن بَاش اَكنِّيو بشَّرغ س وَاوَاڒ يكْمَاڒ ن أَربِّـي. 26 أَوَاڒ-أَ نتَّا ذ ڒْمَعْنَا نِّي إِي تُوْغَا ينُوْفَّرن ذِي زْمَانَاث ذ لْجِلَاث يعْذُوْن، ڒخُّو اَرِّين-د خَاس ڒخْبَار صَّالِحِين. 27 نِثْنِي يخْضَر-يثن أَربِّـي بَاش اَذ خبَّارن إِ يِنِّي وَار يدْجِين شَا زِي أَيث-إِسْرَائِيل اَذَاسن ينِين مشْحَاڒ يمْغَر ڒْخِير-أَ لْعَظِيم ن ڒْمَعْنَا ينُوْفَّرن وَانِيتَا. مِين يعْنَى ڒْمَعْنَا-يَا؟ لْمَسِيح نتَّا يدْجَا ذَايْوم، ذ لْأَمَال ن لْعَظَمَا. 28 لْمَسِيح-أَ نتْبشَّار زَّايس إِ يِوْذَان، نْنهَّا-ثن مَارَّا إِذْسن، نْسڒْمَاذ-يثن س مَارَّا ڒفْهَامث بَاش أَ نْقدّم يوْذَان مَارَّا ذِي لْمَسِيح بْڒَا شَا ن ڒْعِيب إِ أَربِّـي. 29 خ مَانَايَا نش خدّْمغ، تَاحْڒغ ذِي ڒْخذْمث-أَ س مَارَّا جّْهذ نِّي ن لْمَسِيح نتَّا يسْخدَّام-اَيِي س ثْزمَّار نّس. |