ڒخذايم 8 - ثريفيث 2020

شَاوُل يتْعدَّاب جْمَاعث ن ڒْمُوْمِنِين

¹ وَامِي نْغِين سْتِيفَان، ئِجّن قَّارن-اَس شَاوُل اَقَاث ذِنِّي يحْضَار يتَافق اَكِذْسن. نْهَار نِّي بْذَان تْعدَّابن جْمَاعث ن ڒْمُوْمِنِين ذِي ثنْدِينْت ن لْقُدْس. مسْفْرَاقن مَارَّا ڒْمُوْمِنِين رُوْحن غَار جْوَايه ن يَهُوْذِيَا ذ سَامَرْيَا كُڒ يجّن مَانِي يرُوْح، وَار يقِّيم حَدّ ذِي لْقُدْس إِلَّا اَرُّسُل.

² شَان ن يرْيَازن إِي تݣّْوْذن أَربِّـي نضْڒن سْتِيفَان حزْنن خَاس اَطَّاس.

³ شَاوُل نتَّا يرزُّو اَذ يقْضَا خ جْمَاعث ن ڒْمُوْمِنِين، يتَاذف زِي ثدَّارث غَار ثدَّارْث يسُوْفُوْغ-د يرْيَازن ذ ثمْغَارِين يتݣّ-يثن ذِي ڒحْبس.

تْبشَّارن س لْإِنْجِيل ذِي ثنْدِينْت ن سَمَارْيَا

⁴ ڒْمُوْمِنِين نِّي يمسْفْرَاقن تْرَاحن زݣ ومْشَان غَار ومْشَان تْبشَّارن س وَاوَاڒ ن أَربِّـي.

⁵ فِيلِيپَّـاس يرُوْح غَار ثنْدِينْت ن سَمَارْيَا، ئِتْحدَّاث إِ يمزْذَاغ نّس س لْمَسِيح.

⁶ سّنِّي مَارَّا ڒْغَاشِي نِّي وَامِي سْڒِين إِ وَاوَاڒ نّس وَامِي ࢲْرِين لْمُعْجِيزَاث نِّي يݣَّا، قِّيمن تْصنَّاطن-اَس مْلِيح غَار مِين يقَّار.

⁷ جْنُوْن يعفَّانن فّْغن زݣ وَاطَّاس ن يِوْذَان سْنكَّرن ثْغُوْيّث س جّْهذ. أَطَّاس ن يزحَّافن ذ يِنِّي ؤُمِي مُّوْثن يضَارن ݣنْفَان.

⁸ فَرّْحن اَطَّاس ذِي ثنْدِينْت نِّي.

⁹ ذِنِّي ذِي ثنْدِينْت نِّي يجّن ن وسحَّار قّارن-اَس سِمْعَان مشْحَاڒ زݣ وَامِي يسْخدَّام سّْحُوْر. ئِسذْهَاش مَارَّا يوْذَان ن أَيث-سَمَارْيَا، يَارَّا يخف نّس ذ اَمقّْرَان.

¹⁰ تسْڒَان-اَس مَارَّا يوْذَان س ومزْيَان ذ ومقّْرَان نَّان خَاس: "أَرْيَاز-أَ نتَّا ذ جّْهذ نِّي اَمقّْرَان ن أَربِّـي إِي يدْجَان عَظِيم!"

¹¹ تسْڒَان-اَس مِنْزِي يسذْهَاش-يثن اَطَّاس ن ڒْوقْث س سّْحُوْر نّس.

¹² وَلَكِن وَامِي ثن يبشَّر فِيلِيپَّـاس س ڒْمُلْك ن أَربِّـي ذ يِيسم ن عِيْسَى لْمَسِيح ڒخْدّنِّي ؤُمْنن تتْوَاطهَّارن س وَامَان س يرْيَازن ذ ثمْغَارِين.

¹³ سِمْعَان نتَّا س يِيخْف نّس يُوْمن يتْوَاطهَّار س وَامَان. ئِمُوْن اَك فِيلِيپَّـاس يتْعجّب سِمْعَان وَامِي يࢲْرَا لْمُعْجِزَاث ذ لْبُرْهَانَاث ذ ثِمقّْرَانِين إِݣ يتوْقِيعن.

¹⁴ وَامِي د اَرِّين ڒخْبَر اَرُّسُل ذِي لْقُدْس قَا اَيث-سَامَرْيَا قبْڒن اَوَاڒ ن أَربِّـي، كَّرن سّكّن غَارْسن بُطْرُس ذ يُوْحَنَّا.

¹⁵ وَامِي ؤُوْضن، تَّارن-اَس إِ أَربِّـي اَذَاسن يُوْش أَرُّوْح يقدّْسن.

¹⁶ عَاذ وَار د يهْوِي أَرُّوْح ؤُڒَا خ يِجّن زَّايْسن مِينْزِي تُوْغَا تْوَاطهَّارن س وَامَان عْلَاحْسَاب يسم ن سِيذِيثْنغ عِيْسَى أُو صَافِي.

¹⁷ ثُمَّا بُطْرُس ذ يُوْحَنَّا سرْسن خَافْسن يفَاسّن نْسن أُوْشَا يمُّوْش-اَسن أَرُّوْح يقدّْسن.

¹⁸ وَامِي سرْسن اَرُّسُل يفَاسّن نْسن خ يِوْذَان يتْوَاڒَا سِمْعَان بلِّي يمُّوْش-اَسن اَرُّوْح يقدّْسن، ئِكَّر سِيمْعَن يرزُّو اَذَاسن يُوْش تْمنْيَاث إِ اَرُّسُل.

¹⁹ ينَّا-ٱسن: "ؤُشم-اَيي ؤُڒَا ذ نش جّْهذ-أَ حمَا ونِّي إِي خف غَا سرْسغ يفَاسّن ينُو اَذَاس يمُّوْش أَرُّوْح يقدّْسن."

²⁰ ئِكَّر بُطْرُس ينَّا-ٱس: "لَّا، جْمع نُّقَارْث نّش قَا اَذ تِيڒِي ذ ثِمسِّي اَكِذش ذِي ڒفْنَا مِنْزِي ثنْوِيذ اَذ تسْغذ لْهَدِيَا ن أَربِّـي س تْمنْيَاث!

²¹ وَار غَارك يتِيڒِي بُو ومْشَان ؤُڒَا ذ ڒْحَقّ ذِي ڒْخذْمث-أَ ڒَاحقَّاش ؤُڒ نّش وَار يدْجِي شَا نِيشَان اَك أَربِّـي.

²² تُوْب زِي شَّرّْ نّش، تَّار إِ سِيذِي أَربِّـي يمْكن اَذَاش يغْفَر مِين ثنْوِيذ ذݣ وُوْڒ نّش.

²³ تْوَارِيغ شك ثشُّوْرذ س ثَارْزُوْݣِي ن ڒحْسذ، شك ذ اَمحْبُوْس ن شَّرّْ."

²⁴ ينَّا-ٱس سِمْعَان: "تَّارث اَكِذِي غَار سِيذِي أَربِّـي حمَا وَار ذَايِي توْقِيع ؤُڒَا ذ يجّن ن ڒْحَاجث زِي مِين ثنِّيم."

²⁵ وَامِي بُطْرُس ذ يُوْحَنَّا شهْذن خ عِيْسَى بشَّرن نِثْنِي س وَاوَاڒ ن سِيذِي أَربِّـي، كَّرن ذوْڒن غَار لْقُدْس بشَّرن س لْإِنْجِيل ذݣ وَاطَّاس ن ڒدْشُوْرَاث ذِي سَمَارْيَا.

فِيلِيپَّـاس اَك يِجّن ن لْوَزِير ن ثْمُوْرْث ن لْحَبَشَا

²⁶ ئِجّن لْمَلَائِكَا ن سِيذِي أَربِّـي ثسِّيوڒ-د غَار فِيلِيپَّـاس ثنَّا-ٱس: "كَّر، رُوْح غَار لْجَنُوْب اكّ خ وبْرِيذ نِّي ن ڒخْڒَا يتَاوِين زِي لْقُدْس غَار غَزَّا."

²⁷ ئِكَّر يرُوْح، ئِمْسڒْقَا ذِنِّي اَك يِجّن ن ورْيَاز نتَّا ذ اَحْبَاشِي ذ اَخَاصْيُوْنِي. نتَّا زݣ يمقّْرَانن ن لْمَلِكَا ن لْحَبَشَا قَّارن-اَس نتَّاث كَنْدَاكَا، نتَّا إِݣ يتْكلَّافن خ صّنْدُوْق ن تْمنْيَاث ن لْمَلِكَا نِّي. تُوْغَا يرُوْح غَار لْقُدْس اَذ يعْبذ أَربِّـي،

²⁸ ئِذْوڒ-د غَار لْحَبَشَا ينْيَا خ وكَارُّو نّس يقَّار ذِي لْكِتَاب ن نَّبي إِشَعْيَا.

²⁹ ينَّا-ٱس أَرُّوْح ن أَربِّـي إِ فِيلِيپَّـاس: "يَالَّاه، مُوْن اَك وكَارُّو-يِين."

³⁰ يُوْزّڒ فِيلِيپَّـاس غَار وحَبَاشِي نِّي يتسْڒَا-يَاس يقَّار ذِي لْكِتَاب ن نَّبِي إِشَعْيَا. ينَّا-ٱس: "مَا ثْفهْمذ مِين ثقَّارذ؟"

³¹ ينَّا-ٱس وحَبَاشِي نِّي: "نش، مَامّش غَا ݣّغ اَذ فهْمغ مڒَا وَار ذَايي يسفْهم شَان يِجّن؟ يَالَّاه نيْ-د اَكِذِي ذݣ وكَارُّو-يَا."

³² أَقَا لْأَيَاث نِّي إِي يقَّار وحَبَاشِي ذِي لْكِتَاب: <نتَّا اَمشْنَاو اَحُوْڒِي إِي تَاوِين اَذَاس غَرْصن، أَمشْنَاو يزْمَار إِي يذْوڒ ذ اَزيْزُوْن زَّاث إِ ينِّي يتْڒَاسّن ثَاضُوْفْث نّس، أَمّن وَار يرزّم شَا نتَّا اَقمُّوْم نّس.

³³ ضڒْمن-ث، كْسِين-اَس ڒحَقّ نّس. وَار غَارس ثدْجِي دُّوْرِّيث اَخَاس يِيڒِي وَاوَاڒ. ثُوْذَارْث نّس تْوَاكّس خ ثْمُوْرْث-أَ.>

³⁴ ئِسّقْسَا وحَبَاشِي نِّي فِيلِيپَّـاس ينَّا-ٱس: "تتَّارغ زَّايك اَذَايِي ثِينِيذ، مِيخف يسَّاوَاڒ نَّبِي-يَا؟ مَا خ يِيخف نّس نِغ خ شَان حَدّ نّغْنِي؟"

³⁵ ئِتْشَرَّاح-اَس فِيلِيپَّـاس، ئِبْذَا-يَاس زِي لْأَيَاث-أَ ذِي لْكِتَاب يتْبشَّار-يث س عِيْسَى.

³⁶ ݣُّوْرن ذݣ وبْرِيذ ؤُوْضن غَار شَان وَامَان. ينَّا-ٱس وحَبَاشِي نِّي: "أَقَاش اَمَان مُوْجُوْد، مِين ذَايِي يُوْغن نش وَار تْوَاطهَّارغ شَا س وَامَان-أَ؟"

³⁷ {ينَّا-ٱس فِيلِيپَّـاس: "شك مڒَا ثُوْمْنذ س مَارَّا ؤُڒ نّش قَا ثْزمَّرذ اَذ تْوَاطهَّارذ س وَامَان-أَ." يَارَّا خَاس ينَّا-ٱس: "وَاه، نش تَامْنغ بلِّي عِيْسَى لْمَسِيح نتَّا ذ مِّيس ن أَربِّـي."}

³⁸ يُوْمَر وحَبَاشِي اَذ سْبدّن اَكَارُّو نِّي. هْوَان س ثْنَاين إِذْسن غَار وَامَان، فِيلِيپَّـاس يطهَّار-اَس إِ وحَبَاشِي نِّي س وَامَان.

³⁹ وَامِي د ݣَعّْذن زݣ وَامَان نِّي، أَرُّوْح ن سِيذِيثْنغ يرْفع فِيلِيپَّـاس سّنِّي. وَار يقِّيم شَا وحَبَاشِي نِّي يتْوَاڒَا فِيلِيپَّـاس كْتَار عَاذ، يُوْيُوْر خ وبْرِيذ نّس س ڒفْرَاحث.

⁴⁰ فِيلِيپَّـاس يُوْفَا يخف نّس ذِي ثنْدِينْت ن وَاشْدُوْد، ئِتْرَاح زݣ ومْشَان غَار ومْشَان يتْبشَّار س لْإِنْجِيل ذِي مَارَّا يبِيلَاجن حتَّا ٱڒ وَامِي يُوْوض غَار ثتْدِينْت ن قَيْصَارِيَا.