ڒخذايم 6 - ثريفيث 2020

أَرُّسُل تِيخْضَارن سبْعَا ن صَّحَابَا ذِي ثنْدِينْت ن لْقُدْس

¹ ذݣ وُوْسَّان نِّي لْعَدَد ن يمحْضَارن يمَارْنِي. ڒْمُوْمِنِين إِي سَّاوَاڒن س لُّغَا ثَيُوْنَانِيث تْشثْشَان زݣ يِنِّي يسَّاوَاڒن لْعِبْرِيَا، قَّارن قَا نشِّين ثَاجَّاڒِين نّغ وَار ذَاسنْت تِيشّن بُو ڒْحَقّ نْسنْت خْمِي فرّْقن لْمُعْوَانَا مْكُڒ نْهَار.

² كَّرن ثنْعَاش نِّي ن اَرُّسُل سْمُوْنن مَارَّا يمحْضَارن نَّان-اَسن: "نشِّين اَرُّسُل مَاشِي مَعْقُوْل أَ نسْمح ذݣ وَاوَاڒ ن أَربِّـي بَاش أَ نفرق لْمُعْوَانَا.

³ آي اَيثْمَا، كَّرم اَوِيم-د سبْعَا ن يرْيَازن زَّايْوم اَذ تِيڒِي ثسّْنم-ثن اَقَاثن مْلِيح، أَذ يڒِين شُّوْرن س أَرُّوْح يقدّْسن ذ ڒفْهَامث. نشِّين اَثن نْكلّف س لْمُهِمَّا-يَا

⁴ بَاش نشِّين اَرُّسُل أَ نُوْش ڒْوقْث نّغ إِ ثْࢲَادْجِيث ذ وحدّث."

⁵ ئِعْجب-اَسن ڒْحَاڒ إِ مَارَّا جْمَاعث. كَّرن يخْضَرن يجّن ن ورْيَاز قَّارن-اَس سْتِيفَان، نتَّا يشُّوْر س لْإِيمَان ذ أَرُّوْح يقدّْسن. ئِخْضَرن فِيلِيپَّـاس ذ بْرُوْكُوْرُس ذ نِيكَانُوْر ذ تِيمُوْن ذ پَـرْمِينَاس ذ نِيكُوْلَاس زݣ وَانْطَاكْيَا، تُوْغَا يسْڒم نتَّا ذِي دِّين ن أَيث-إِسْرَائِيل.

⁶ سبْعَا-يَا ن صَّحَابَا قدّْمن-ثن غَار اَرُّسُل، ࢲُّوْدْجن خَاسن سرْسن خَاسن يفَاسّن نْسن بَرَكن-ثن.

⁷ ئِنْتَاشَار وَاوَاڒ ن أَربِّـي، مَارْنِين-د اَطَّاس ن يمحْضَارن ذِي لْقُدْس، ؤُمْنن اَطَّاس ن ڒْفُقَهَا ن أَيث-إِسْرَائِيل زِي لْإِنْجِيل.

طّْفن سْتِيفَان زِي سبْعَا نِّي ن صَّحَابَا يخْضَرن اَرُّسُل

⁸ سْتِيفَان نِّي نتَّا يشُّوْر س لْبَرَكَا ن أَربِّـي ذ جّْهذ، ئِخدّم جَار يِوْذَان لْبُرْهَانَاث ذ لْمُعْجِيزَات ذ ثِمقّْرَانِين.

⁹ كَّرن ڒبْعَاض زِي ثمْزِيذَا ؤُمي قَّارن <لْبَرْتِينُوْن.> نِثْنِي ذ يسْرَائِيلِيْين ن ثنْدِينْت ن لْقُرِينَا ذ ثنْدِينْت ن إِسْكَنْدَرِيَا ذ ينّغْنِي زِي لْإِقْلِيم ن كِيلِيكْيَا ذ لْإِقْلِيم ن آسْيَا. بْذَان تمْنَاقَارن اَك سْتِيفَان،

¹⁰ وَلَكِن وَار زمَّرن اَذ قَاوّْمن ڒفْهَامث ذ أَرُّوْح إِي زِي يسَّاوَاڒ.

¹¹ كَّرن ؤُشِين اَرّشْوث إِ شَان يرْيَازن بَاش اَذ ينِين قَا نشِّين نسْڒَا إِ سْتِيفَان نتَّا يقَّار اَوَاڒ وَار يحْڒِين خ مُوْسَى ذ أَربِّـي!

¹² وَامِي سْعصّْبن يوْذَان ؤُڒَا ذ يمقّْرَانن ن أَيث-إِسْرَائِيل ذ يمْسڒْمَاذن ن شَّرِيعا، طّْفن سْتِيفَان ؤُوِين-ث غَار جْمَاعث ن لْحُكَّام ن أَيث-إِسْرَائِيل.

¹³ ؤُوِين-د يوْذَان اَخَاس شهْذن ࢲُّوْر قَّارن "قَا بْنَاذم-أَ يقَّار اَوَاڒ وَار يحْڒِين خ ومْشَان-أَ اَمْقدّس ذ شَّرِيعَا ن مُوْسَى!

¹⁴ نسْڒَا-يَاس يقَّار بلِّي عِيْسَى زِي نَاصِرَا اَذ يهْذم اَمْشَان-أَ اَذ يبدّڒ لْعَادَاث نِّي إِي ذَانغ د يجَّا مُوْسَى."

¹⁵ خزَّرن ذَايس ذِي سْتِيفَان مَارَّا يِنِّي إِي ذِنِّي يدْجَان ذِي جْمَاعث ن لْحُكَّام ن أَيث-إِسْرَائِيل، ؤُفِين اَغمْبُوْب نّس اَم وغمْبُوْب ن لْمَلَائِكَا.