ڒخذايم 24 - ثريفيث 2020

تْحَاكَامن خ اَرَّسُوْل بُوْلُس زَّاث إِ لْوَالِي فِيلِيكْس

¹ منْبَعْد إِ خمْسِييَّام يهْوَا-د غَار قَيْصَارِيَا اَرَّايس ن ڒْفُقَهَا أَنَاس اَكِذس ڒبْعَاض ن يمقّْرَانن ن أَيث-إِسْرَائِيل ذ يجّن ن لْمُحَامِي قَّارن-اَس تَارْتُوْلُوْس، تَاهَّامن بُوْلُس غَار لْوَالِي.

^2-3 ڒَاغَان-د خ بُوْلُس، ئِبْذَا تَارْتُوْلُوْس يتَاهَام-يث يقَّار: "آ سِي لْوَالِي فِيلِيكْس، نشِّين زِي سَّبَاب نّش نتْعِيش ذݣ يِجّن ن ڒهْنَا ذ اَمقّْرَان، أُو س وعْذڒ نّش ثْصڒْحذ مْلِيح ثُوْذَارْث نّغ ذِي ثْمُوْرْث-أَ. نشِّين نْقبّڒ مَانَايَا، نْشكَّر-يشك اَطَّاس ذي كُڒ ڒْوقْث ذ كُڒ اَمْشَان.

⁴ وَلَكِن وَار خْسغ شَا اَش سْعطَّرغ اَطَّاس، تتَّارغ زَّايك عْلَاحْسَاب ڒْخَاضَر نّش اَغَارْنغ ثسْڒذ شْوَايْت.

⁵ أَرْيَاز-أَ وَانِيتَا نُوْفِي-ث يتْخَارْوَاض وَاهَا يتݣّ لْفِيتْنَا جَار مَارَّا يسْرَائِيلِيْين إِي دْجَان ذِي مَارَّا دُّنشْت. نتَّا ذ يجّن ن اَرَّايس ن لْبِدْعَا ن نَّصَارَا.

⁶ عَاوذ يرزُّو اَذ يسخْنز حتَّا ثَمْزِيذَا ثَمقّْرَانْت. نشِّين نطّف-يث {نخْس اَخَاس نحْكم عْلَاحْسَاب شَّرِيعَا نّغ.

⁷ وَلَكِن يُوْسَا-د اَرَّايس ن ڒْعَسْكَار لِيسْيَاس يكّس-اَنغ-ث زݣ وفُوْس نّغ س لْقُوَّا.

⁸ يُوْمَر يِنِّي يتݣّن تُّهْمَاث بَاش اَغَارك د اَسن.} أَخْمِي ذَاس غَا ثݣّذ شك س يِيخف نّش لْإِسْتِجْوَاب اَذ تسّْنذ مِينْخف ث نْتَاهَام نشِّين."

⁹ تَافْقن يسْرَائِيلِيْين خ تُّهْمَاث نِّي، قَّارن قَا مَانَاينِّي يݣِّي-ث ذ صَّح.

أَرَّسُوْل بُوْلُس يتْذَافَاع خ يِيخف نّس

¹⁰ ئِشيَّر-اَس لْوَالِي إِ بُوْلُس بَاش اَذ يسِّيوڒ. ئِنْدق-د بُوْلُس ينَّا-ٱس: "نش سّْنغ مشْحَاڒ زݣ وَامِي شك ثْحكّْمذ خ ثْمُوْرْث-أَ. خ مَانَايَا فَرّْحغ بَاش اَذ ذَافْعغ خ يِيخف ينُو.

¹¹ ثْزمَّرذ اَذ تسّقْسِيذ نش يَالَّاه ثنْعَاشَر يُوْم زݣ وَامِي ݣَعّْذغ غَار لْقُدْس مَاشِي كْتَار، بَاش اَذ عبْذغ أَربِّـي.

¹² وَار ذَايِي ؤُفِين شَا تْمنْغِيغ اَك شَان حَدّ ذِي ثمْزِيذَا ثَمقّْرَانْت، نِغ تْسَامَرغ ڒْغَاشِي ڒَا ذِي ثمْزِيذَاوِين ؤُڒَا ذِي ثنْدِينْت.

¹³ وَار غَارْسن بُو دَّلِيل خ تُّهْمَاث-أَ إِي خَافِي تْقدَّامن ڒخُّو.

¹⁴ وَلَكِن قَّارغ-اَش نش تَعْتَرَافغ زَّاثش عبّْذغ أَربِّـي ن ڒجْذُوْذ نّغ عْلَاحْسَاب اَبْرِيذ-أَ إِي حسّْبن نِثْنِي زَعْمَا ذ لْبِدْعَا. تَامْنغ س مَارَّا مِين يتَافَاقن اَك شَّرِيعَا ذ مِين د يُوْرِين ذِي لْكُتُب ن لْأَنْبِيَا.

¹⁵ غَارِي لْأَمَال زِي أَربِّـي مَامش غَارْسن يدْجَا غَار يرْيَازن-أَ، يعْنِي اَذ د كَّرن زِي ڒْموْث صَّالِحِين ذ ضَّالِمِين.

¹⁶ فَلِهَاذَا تݣّغ مَارَّا جّْهذ ينُو بَاش اَذ عِيْشغ س يِجّن ن ضَّمِير مرْتَاح زَّاث إِ أَربِّـي ذ يِوْذَان.

¹⁷ منْبَعْد إِ وَاطَّاس ن يسݣّْوُوْسَا عقْبغ-د غَار ثنْدِينْت ن لْقُدْس ؤُوِيغ-د شَان ن صَّذَقَا إ لْأُمَّا ينُو، قدّْمغ شَا ن دْبِيحَاث.

¹⁸ وَامِي ذَايِـي ؤُفِين ذِي ثمْزِيذَا ثَمقّْرَانْت تݣّغ ڒُوْضُو. وَار ؤُفِين اَكِذِي بُو ڒْغَاشِي، وَار تݣّغ بُو سّْدَع. وَلَكِن ذِنِّي شَان ن يسْرَائِيلِيْين زِي لْإِقْلِيم ن آسْيَا،

¹⁹ ئِتْخصَّا نِثْنِي اَغَارك د اَسن س يِيخف نْسن ذَانِيتَا بَاش اَذ ينِين تُّهْمَاث إِي غَارْسن ضد ينُو.

²⁰ نِغ اَذَاش ينِين يِيْنَا إِي ذَا يبدّن مَان لْجَرِيمَا إي خَافِي ؤُفِين وَامِي بدّغ زَّاث إِ جْمَاعث ن لْحُكَّام نْسن.

²¹ وَاش يمْكن خ وَاوَاڒ نِّي إِي نِّيغ س وڒَاغِي جَارَاسن وَامِي بدّغ ذِنِّي؟ نِّيغ-اَسن اَقَا كنِّيو تْحَاكَامم خَافِي نْهَارَا مِينْزِي تَامْنغ بلِّي يوْذَان اَذ د كَّرن زِي ڒْموْث ذِي لْقِيَامَا."

ئِقِّيم اَرَّسُوْل بُوْلُس ذِي ڒحْبس ن قَيْصَارِيَا

²² فِيلِيكْس نتَّا يسّن مْلِيح خ وبْرِيذ-أَ ن عِيْسَى، وَلَكِن ئِأَجّل لْحُكم نّس ينَّا-ٱسن: "حتَّا اَذ د يَاس اَرَّايس ن ڒْعَسْكَار لِيسْيَاس عَاذ إِي غَا حكْمغ خ مَانَايَا."

²³ يُوْمَر يجّن ن ومقّْرَان ن ڒْعَسْكَار ينَّا-ٱس: "عسّ خ بُوْلُس ذِي ڒحْبس." ينَّا-ٱس: "وَلَكِن ؤُش-اَس شْوَايْت ن لْحُرِّيَا، اجّ يمدُّوْكَاڒ نّس اَغَارس د اَسن بَاش اَذَايس تْهِيلَّان."

²⁴ عْذُوْن شَان وُوْسَّان، يُوْسَا-د فِيلِيكْس اَكِذس ثَمْغَارْث نّس دْرُوْسِيلَا، نتَّاث ذ ثَئِسْرَائِيلِيث. ئِڒَاغَا-د خ بُوْلُس يصنّط-اَس وَامِي يسَّاوَاڒ خ لْإِيمَان زِي عِيْسَى لْمَسِيح.

²⁵ وَامِي يسِّيوڒ بُوْلُس خ مِين يدْجَان نِيشَان، ذ مَامّش غَا يحْكم بْنَاذم خ يِيْخف نّس، ذ يُوْم لْحِسَاب ذ لْعِقَاب إِي د غَا يَاسن أُوْشَا ئِنخْڒع فِيلِيكْس ينَّا-ٱس: "صَافِي ڒخُّو، عْقب. خْمِي غَارِي غَا ثِيڒِي لْفُرْصَا اَخَاك د ڒَاغِيغ."

²⁶ نتَّا عَاوذ فِيلِيكْس يرزُّو زِي بُوْلُس اَرّشْوث. س مَانَايَا يتْڒَاغَا-د خَاس اَطَّاس ن ثْوَاڒَاثِين يسَّاوَاڒ اَكِذس.

²⁷ عْذُوْن ثْنَاين ن يسݣّْوُوْسَا، ئِذْوڒ-د بُوْرْكْيُوْس فَسْتُوْس ذݣ ومْشَان ن لْوَالِي فِيلِيكْس. وَلَكِن فِيلِيكْس يݣَّا-ٱسن ڒْخَاضَر إِ يسْرَائِيلِيْين، يجَّا بُوْلُس ذِي ڒحْبس.