ڒخذايم 23 - ثريفيث 2020

¹ ئِخْزَر مْلِيح بُوْلُس غَار جْمَاعث ن لْحُكَّام ن أَيث-إِسْرَائِيل ينَّا-ٱسن: "آي اَيثْمَا، قَا نش ݣِّيغ لْوَاجِب نِيْشَان اَك أَربِّـي، زِي قْبڒ حتَّا نْهَارَا نش ضَّمِير ينُو مرْتَاح."

² ئِكَّر أَنَاس أَرَّايس ن ڒْفُقَهَا يُوْمَر يِنِّي يبدّن اَك بُوْلُس اَث ؤُوْثن غَار وقمُّوْم.

³ ڒخْدّنِّي ينَّا-ٱس بُوْلُس: "شك ثݣِّيذ اَم ڒْحِيض يرْشَان يجِّيَارن س جِّير، أَش يُوْوث أَربِّـي! ثقِّيمذ شك ذِنِّي اَخَافِي ثْحكْمذ عْلَاحْسَاب شَّرِيعَا، وَلَكِن ڒخُّو تْخَالَافذ شَّرِيعَا وَامِي ثن ثُوْمَرذ اَذَايِي ؤُوْثن."

⁴ نَّان-اَس إِ بُوْلُس يِنِّي ذِنِّي يحْضَارن: "مَا تُوْكَّارذ شك اَرَّايس ن ڒْفُقَهَا ن أَربِّـي؟!"

⁵ ينَّا-ٱسن بُوْلُس: "آي اَيثْمَا، قَا نش وَار ث سِّينغ شَا تُوْغَاث ذ اَرَّايس ن ڒْفُقَهَا مِنْزِي لْكِتَاب يقَّار: <أَرَّايس ن شَّعْب، وَار ذَايس قَّار بُو ڒْعِيب.>"

⁶ وَامِي يسّن بُوْلُس قَا شَا زَّايْسن زِي ڒْحِزْب ن يصَدُّوْقِيْين شَا نّغْنِي زِي ڒْحِزب ن يفَرِّسِيْين، ئِكَّر يڒَاغَا-د س جّْهذ ذِي جْمَاعث نِّي ن لْحُكَّام جَارَاسن ينَّا-ٱسن: "آي اَيثْمَا، قَا نش ذ اَفَرِّيسِي مِّيس ن يفَرِّيسِيْين! أَقَا تْحَاكَامم خَافِي وَامِي نش غَارِي لْأَمَال اَذ د كَّرن يِوْذَان زِي ڒْموْث ذِي لْقِيَامَا."

⁷ وَامِي ينَّا مَانَايَا يوْقع يجّن ن لْخِلَاف جَار يفَرِّسِيْين ذ يصَدُّوْقِيْين، جْمَاعث نِّي ن لْحُكَّام مسْفْرَاقن جَارَاسن.

⁸ (مِنْزِي يصَدُّوْقِيْين قَّارن قَا وَار ذِنِّي لَّا لْقِيَامَا، لَّا لْمَلَايْكَاث، لَّا جْنُوْن، وَلَكِن يفَرِّسِيْين قَّارن مَارَّا مَانَايَا يدْجَا.)

⁹ ئِوْقع يجّن ن سّْدَع يمْغَار، كَّرن ڒبْعَاض زݣ يمْسڒْمَاذن ن شَّرِيعَا نِثْنِي ذ يفَرِّيسِيْين تمْنَاقَارن س جّْهذ قَّارن: "نشِّين وَار ذَاس نْتِيف بُو شَان لْغَالط ذِي بْنَاذم-أَ، يمْكن يسِّيوڒ اَكِذس شَان ن جّنّ نِغ ذ شَان ن لْمَلَائِكَا."

¹⁰ وَامِي بْذَان تْمنْغَان س جّْهذ عْلَاحْسَاب لْخِلَاف نِّي، ئِݣّْوذ اَرَّايس ن ڒْعَسْكَار اَذ مزْقن بُوْلُس. يُوْمَر ڒْعَسْكَار نّس اَذ هْوَان اَذ د خضْفن بُوْلُس زِي ڒْوسْط نْسن، أَث سِيڒِين غَار لْقشْلَا.

¹¹ دْجِيرث نِّي يبدّ-د سِيذِيثْنغ غَار بُوْلُس ينَّا-ٱس: "اݣّ زْعَامث! مَامّش إِي زَّايِي ثْشهْذذ ذِي ثنْدِينْت ن لْقُدْس، أُو لَابُد عَاوذ اَزَّايِي ثْشهْذذ ذِي ثنْدِينْت ن رُوْمَا."

أَيث-إِسْرَائِيل تْشِيطِّينن بَاش اَذ نْغن اَرَّسُوْل بُوْلُس

¹² وَامِي د يصْبح ڒْحَاڒ شِيطّْنن أَيث-إِسْرَائِيل، وعْذن أَربِّـي حَرّْمن يخف نْسن وَار تتّن وَار سسّن اَڒ غَا نْغن بُوْلُس.

¹³ كْتَار زِي اَرْبعِين إِذْسن إِݣ يشِيطّْنن ذِي مَانَايَا.

¹⁴ رُوْحن غَار اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل نَّان-اَسن: "نشِّين نوْعذ أَربِّـي نْحَرّم يخف نّغ وَار نْتتّ وَالُو اَڒ غَا نْنغ بُوْلُس نشِّين.

¹⁵ ڒخُّو جْمَاعث ن لْحُكَّام ذ كنِّيو تَّارم زِي اَرَّايس ن ڒْعَسْكَار ن اَرُّوْمَانُوْس بَاش اَغَارْوم د يسّكّ بُوْلُس. ݣّث يخف نْوم ثخْسم اَكِذس ثݣّم لْإِسْتِجْوَاب مْلِيح. نشِّين اَقَانغ مُوْجُوْد بَاش اَث نْنغ قْبڒ إِي د غَا يَاوض."

¹⁶ مِّيس ن وتْشْمَاس ن بُوْلُس يَارَّا-د ڒخْبَار خ مِين شِيطِّينن يِوْذَان نِّي، ئِرُوْح غَار لْقشْلَا يُوْذف ذِنِّي يعَاوذ-اَس مَانَاينِّي إِ بُوْلُس.

¹⁷ ئِڒَاغَا-د بُوْلُس خ يِجّن ن وعَسْكَارِي ذ اَمقّْرَان ن اَرُّوْمَانُوْس ينَّا-ٱس: "أَوِي اَحنْجِير-أَ غَار اَرَّايس نْوم اَقَا غَارس شَان وَاوَاڒ اَذَاس ث يِينِي."

¹⁸ يُوْوِي-ث غَار اَرَّايس ن ڒْعَسْكَار ينَّا-ٱس قَا يڒَاغَا-د خَافِي بُوْلُس اَمحْبُوْس نِّي يتَّار زَّايِي ينَّا-ٱيِي اَذَاش د اَوِيغ اَحنْجِير-أَ اَقَا غَارس شَان وَاوَاڒ اَذَاش ث يِينِي.

¹⁹ أَرَّايس نِّي ن ڒْعَسْكَار يطّف اَحنْجِير نِّي ذݣ وفُوْس، يُوْوِي-ث غَار شَان ثْغمَّارْث وَاحْذس ينَّا-ٱس: "مِين تخْسذ اَذَايِي ثِينِيذ؟"

²⁰ ينَّا-ٱس وحنْجِير نِّي: "ئِسْرَائِيلِيْين تَّافَاقن جَارَاسن بَاش اَزَّايك تَّارن اَذ د تسّكّذ ثِيوشَّا بُوْلُس غَار جْمَاعث ن لْحُكَّام نْسن. ݣِّين يخف نْسن اَخْمِي خْسن اَذَاس ݣّن لْإِسْتِجْوَاب مْلِيح.

²¹ وَار ثن تجَّا شَا اَش سْقنْعن قَا ذِنِّي كْتَار زِي اَرْبعِين ن يرْيَازن وجّْذن إِ بُوْلُس، وعْذن أَربِّـي حَرّْمن يخف نْسن وَار تتّن وَار سسّن اَڒ ث غَا نْغن. أَقَا نِثْنِي وجّْذن، غِير تْرَاجَان اَذ تْوَافْقذ خ طَّلب نْسن!"

²² ئِسّكّ اَرَّايس-أَ ن ڒْعَسْكَار اَحنْجِير نِّي ينَّا-ٱس: "وَار تْعَاوَاذ إِ حَدّ بلِّي شك ثنِّيذ-اَيِي إِ نش ڒخْبَار-أَ."

تَاوِين اَرَّسُوْل بُوْلُس غَار لْوَالِي فِيلِيكْس

²³ ڒخْدّنِّي يڒَاغَا-د اَرَّايس نِّي ن ڒْعَسْكَار إِ ثْنَاين ن يمقّْرَانن نّس ينَّا-ٱسن: "سْوجْذث مِيّتَاين ن ڒْعَسْكَار ذ سبْعِين ن يِنِّي إِي ينْيِين خ يِيْسَان ذ مِيّتَاين زݣ يِنِّي يكسِّين يكشُّوْضن غَارْسن ثِيشّط ن وُوْزّڒ، أَذ تْرَاحم غَار تسْعَا ن دْجِيڒث غَار ثنْدِينْت ن قَيْصَارِيَا.

²⁴ سْوجْذث إِ بُوْلُس مِينْخف غَا يني بَاش اَث تْسِيوْضم ذِي لْأَمَان أُو ضّْمَان غَار لْوَالِي فِيلِيكس."

²⁵ أُوْشَا يُوْرَا يجّن ن ثبْرَات إِ لْوَالِي فِيلِيكس ينَّا-ٱس ذَايس:

²⁶ "آ سِي لْوَالِي فِيلِيكس، نش كْلُوْدْيُوْس لِيسْيَاس تْسدْجَامغ خَاك.

²⁷ أَرْيَاز-أَ طّْفن-ث أَيث-إِسْرَائِيل تُوْغَا عْڒَاين اَث نْغن. وَامِي د اَرِّيغ ڒخْبَار قَا نتَّا غَارس لْجِينْسِيَا ن اَرُّوْمَانُوْس، رُوْحغ نش ذ ڒْعَسْكَار ينُو نْسنْجم-يث-يذ.

²⁸ رزُّوْغ اَذ سّْنغ نش تُّهْمَاث إِي خَاس ݣِّين، ؤُوِيغ-ث غَار جْمَاعث ن لْحُكَّام نْسن.

²⁹ ؤُفِيغ تُّهْمَاث نِّي نِثنْتِي ذ شَان ثْمسْڒَايِين خ شَّرِيعَا نْسن وَاهَا. وَار خَاس ؤُفِيغ بُو شَان تُّهْمَا يسْذَاهدْج خَاس ڒْموْث نِغ ذ ڒحْبس.

³⁰ وَامِي د اَرِّيغ ڒخْبَار شِيطّْنن خَاس، سّكّغ-ث-يذ غَارك ذغْيَا. ؤُمَرغ يِنِّي خَاس إِي ݣِّين تُّهْمَاث اَذَاش عَاوْذن مِين غَارْسن ضد نّس."

^31-33 سّنِّي نفْذن ڒْعَسْكَار عْلَاحْسَاب مِين زِي ثن يُوْمَر. ؤُوِين بُوْلُس س دْجِيڒث غَار ثنْدِينْت ن أَنتِيپَـاتْرِيس. ثِيوشَّا نّس ذوْڒن-د ڒبْعَاض ن ڒْعَسْكَار غَار لْقشْلَا نْسن، يِنِّي إِي ينْيِين خ يِيْسَان كمّْڒن خ وبْرِيذ نْسن اَك بُوْلُس ؤُوْضن غَار قَيْصَارِيَا. كلّْفن ذِنِّي لْوَالِي خ بُوْلُس سلّْمن-اَس ثَبْرَات نِّي.

^34-35 وَامِي ت يغْرَا لْوَالِي ينَّا-ٱس إِ بُوْلُس مَان لْإِقْلِيم إِي غَار تْوَاحْسَابذ شك؟ وَامِي ذَاس ينَّا بُوْلُس نش زِي لْإِقْلِيم ن كِيلِيكْيَا ينَّا-ٱس لْوَالِي: "نش اَذ يڒِيغ خ لْجلْسَا نّش خْمِي د غَا اَوْضن يِنِّي إِي خَاك غَا ينِين تُّهْمَا." سّنِّي يُوْمَر اَخَاس عسّْسن ذِي ڒقْصَاڒ ن هِيرُوْدُوْس.