ڒخذايم 22 - ثريفيث 2020

¹ "آي اَيثْمَا آي يمْغَارن، صنّْطث-اَيِي مْلِيح ڒخُّو بَاش اَذ ذَافْعغ خ يِيخف ينُو!"

² وَامِي سْڒِين إِ بُوْلُس يسَّاوَاڒ س لُّغَا لْعِبْرِيَا أُوْشَا قضْعن ڒْحسّ. ينَّا-ٱسن:

³ "نش ذ اَئِسْرَائِيلِي خڒْقغ ذِي ثنْدِينْت ن طَرْسُوْس ذِي لْإِقْلِيم ن كِيلِيكْيَا، وَلَكِن نش يْمِيغ ذِي ثنْدِينْت-أَ ذَانِيتَا. غْرِيغ غَار يضَارن ن لْأُسْتَاد ݣَامْليِيل تْوَاربِّيغ س شَّرِيعَا ن ڒجْذُوْذ نّغ مَامّش ذَانغ ثْوصَّا ثَا س ثَا كُڒْشِي. رزُّوْغ اَذ ݣّغ لْوَاجِب اَك أَربِّـي س وُوْڒ ينُو مَامش ثْرزُّوْم اَذ تݣّم كنِّيو مَارَّا نْهَارَا.

⁴ نش تُوْغَا تْعدَّابغ يِنِّي يذْفَارن اَبْرِيذ-أَ حتَّا وَامِي مُّوْثن. طّْفغ يرْيَازن ذ ثمْغَارِين ݣِّيغ-ثن ذِي ڒحْبس.

⁵ أَرَّايس ن ڒْفُقَهَا ذ مَارَّا جْمَاعث ن يمقّْرَانن ن أَيث-إِسْرَائِيل نِثْنِي ذ ڒشْهُوْذ خ مَانَاينِّي. ؤُشِين-اَيِي اَرُّخْصَاث اَثنْت سِّيوْضغ غَار اَيثْمَاثْسن ذِي ثنْدِينْت ن دِمَشق. رُوْحغ ذِنِّي اَذ طّْفغ يوْذَان ن وبْرِيذ-أَ اَثن د اَوِيغ غَار لْقُدْس بَاش اَذ تْوَاعَاقْبن.

⁶ نش تُوْغَا ݣُّوْرغ ذݣ وبْرِيذ قَارّْبغ غَار دِمَشق، تُوْغَا عْڒَاين ذ اَزْين ن نْهَار. عْلَاغَفْلَا ينّض-اَيِي-د يجّن ن نُّوْر يتْشعْشِيع زݣ وجنَّا.

⁷ ؤُضِيغ غَار ثْمُوْرْث سْڒِيغ إِ يِجّن ن ثْمِيجَّا ثقَّار-اَيي-د: آ شَاوُل آ شَاوُل، مَايمِّي ذَايِي تْعدَّابذ؟

⁸ نِّيغ-اَس نش: مِين ثعْنِيذ شك آ سِيذِي؟ ينَّا-ٱيِي نش ذ عِيْسَى زي نَاصِرَا ذ ونِّي إِي تْعدَّابذ.

⁹ يِنِّي كِذِي يدْجَان ࢲْرِين نُّوْر نِّي وَلَكِن وَار فْهِيمن شَا إِ ثْمِيجَّا ن ونِّي إِي كِذِي د يسَّاوَاڒن.

¹⁰ نِّيغ-اَس نش: مِين غَا ݣّغ آ سِيذِي؟ ينَّا-ٱيِي سِيذِيثْنغ: كَّر اَذف غَار دِمَشق، أَذَاش يتْوَانَّا ذِنِّي مَارَّا مِين يُوْرِين اَذ تݣّذ.

¹¹ نُّوْر نِّي تُوْغَا يتْسقْسِيق يجْهذ خَافِي، ذوْڒغ وَار تْوِيڒِيغ وَالُو. طّْفن-اَيِي زݣ وفُوْس ينُو يِنِّي كِذِي يدْجَان، سِّيوْضن-اَيِي غَار دِمَشق.

^12-13 يُوْسَا-د غَارِي ذِنِّي يجّن قَّارن-اَس أَنَاس. نتَّا ذَايس دِّين، يتْطَاعَا إِ شَرِيعَا. سَّاوَاڒن خَاس مْلِيح مَارَّا يسْرَائِيلِيْين إِي زدّْغن ذِي دِمَشق. ئِبدّ-د زَّاثِي ينَّا-ٱيِي: آي ؤُمَا شَاوُل، ڒخُّو اَذ تْذوْڒذ اَذ تْوَاڒِيذ! ڒخْدّنِّي ݣنْفِيغ تْوَاڒِيغ نتَّا.

¹⁴ ينَّا-ٱيِي: أَربِّـي ن ڒجْذُوْذ نّغ يخْضَر-يشك نتَّا بَاش اَذ تسّْنذ مِين يخس، أَذ تْوَاڒِيذ س ثِيطَّاوِين نّش اَخدَّام نّس صَّالِح اَذ تْصنّْطذ إِ يِجّن ن وَاوَاڒ زݣ وقمُّوْم نّس.

¹⁵ شك اَخَاس ثِيڒِيذ ذ شَّاهذ غَار مَارَّا يوْذَان عْلَاحْسَاب مِين ثࢲْرِيذ ذ مِين ثسْڒِيذ.

¹⁶ ئِي ڒخُّو مِين تْرَاجِيذ؟ كَّر اَذ تْوَاطهَّارذ س وَامَان، سِيرذ زِي ڒْمُعْصِيَاث نّش خْمِي غَا ثْڒَاغِيذ خ يِيسم نّس.

¹⁷ وَامِي ذوْڒغ غَار ثنْدِينْت ن لْقُدْس تْࢲَادْجِيغ ذِي ثمْزِيذَا ثَمقّْرَانْت، ئِهْوَا-د خَافِي يجّن ن لْوَحِي.

¹⁸ ࢲْرِيغ سِيذِيثْنغ ينَّا-ٱيِي: كَّر فّغ ذغْيَا زِي لْقُدْس مِينْزِي شْهَاذث نّش خَافِي وَار ت قبّْڒن شَا.

¹⁹ نِّيغ-اَس: آ سِيذِي، نِثْنِي سّْنن بلِّي تُوْغَا تْرَاحغ زِي ثمْزِيذَا غَار ثمْزِيذَا تْحبَّاسغ شَّاثغ يِنِّي زَّايك يُوْمْنن.

²⁰ حْضَارغ نش وَامِي سِيزّْڒن يذَامّن ن سْتِيفَان ونِّي خَاك يشهّْذن. وَافْقغ خ ڒْموْث نّس، حْضِيغ-اَسن ؤُڒَا ذ اَرُّوْض ن يِنِّي إِي ث ينْغِين.

²¹ ينَّا-ٱيي سِيذِي: رُوْح، شك اَش سّكّغ غَار يمُوْشَان ݣّْوْجن اَطَّاس، غَار يِنِّي وَار يدْجِين شَا زِي أَيث-إِسْرَائِيل."

²² سْڒِين مْلِيح إِ بُوْلُس حتَّا اَڒ وَامِي ينَّا اَوَاڒ-أَ اَنݣَّارُو. ڒخْدّنِّي سْنكَّرن خَاس ثْغُوْيّث نَّان: مْحَاث اَرْيَاز-أَ زِي دُّنشْت-أَ، وَار يسْذِيهدْج شَا اَذ يقِّيم عَاذ يدَّر!

²³ سْنكَّرن ثْغُوْيّث، نظَّارن يزدْجُوْبَا نْسن، زُّوْزَّارن ثَعجَّاشْت غَار وجنَّا.

²⁴ ئِكَّر اَرَّايس ن ڒْعَسْكَار يُوْمَر اَذ سِيذْفن بُوْلُس غَار لْقشْلَا، أَث ؤُوْثن س وسْغُوْن اَذَاس ݣّن لْإِسْتِجْوَاب مَايمِّي خَاس سْنكَّرن ثْغُوْيّث قَاع اَمُّو.

²⁵ وَامِي ث شدّن بَاش اَث ؤُوْثن، ينَّا-ٱس بُوْلُس إِ ومقّْرَان ن ڒْعَسْكَار يبدّن ذِنِّي: "مَا قَانُوْنِي اَذ تُوْوْثم يجّن ن بْنَاذم س وسْغُوْن غَارس لْجِينْسِيَا ن اَرُّوْمَانُوْس مڒَا وَار خَاس ثْحكِّيمم شَا؟"

²⁶ وَامِي يسْڒَا ومقّْرَان نِّي ن ڒْعَسْكَار مَانَاينِّي، ئِرُوْح غَار اَرَّايس ن ڒْعَسْكَار ينَّا-ٱس: "مِين تݣّذ شك اَمُّو؟ قَا ٱرْيَاز نِّي غَارس لْجِينْسِيَا ن أَرُوْمَانُوْس!"

²⁷ يُوْسَاَ-د اَرَّايس نِّي ينَّا-ٱس: "إِن-اَيِي شك، مَا غَارك لْجِينْسِيَا ن أَرُوْمَانُوْس؟" يَارَّا خَاس بُوْلُس: "وَاه، نش اَقَات غَارِي."

²⁸ ينَّا-ٱس اَرَّايس نِّي: "قَا نش سْغِيغ لْجِينْسِيَا ينُو س وَاطَّاس ن تْمنْيَاث." ينَّا-ٱس بُوْلُس: "نش خڒْقغ-د زَّايس."

²⁹ ڒخْدّنِّي بعّْذن خَاس ذغْيَا يِنِّي يخْسن اَس ݣّن لْإِسْتِجْوَاب. ئِݣّْوذ وَاخَّا ذ اَرَّايس نِّي وَامِي يسّن بلِّي يشدّ يجّن غَارس لْجِينْسِيَا ن أَرُوْمَانُوْس.

أَرَّسُوْل بُوْلُس زَّاث إِ جْمَاعث ن لْحُكَّام ن أَيث-إِسْرَائِيل

³⁰ ثِيوشَّا نّس، يرزُّو اَرَّايس نِّي ن ڒْعَسْكَار اَذ يسّن مَايمِّي أَيث-إِسْرَائِيل تَاهَامن بُوْلُس، ئِرُوْح يُوْمَر اَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل اَذ مُوْنن. ڒخْدّنِّي يسُوْفغ-د بُوْلُس يُوْوِي-ث-يذ غَارْسن يسْبدّ-يث زَّاثْسن.