ڒخذايم 19 - ثريفيث 2020أَرَّسُوْل بُوْلُس يتْحدَّاث ذِي ثنْدِينْت ن ؤُفَسُوْس 1 أَپُـوْلُوْس وَامِي يدْجَا ذِي ثنْدِينْت ن كُوْرِينْث ذِي لْإِقْلِيم ن ؤُخَايَا، ئِكَّر اَرَّسُوْل بُوْلُس يكَّا خ وبْرِيذ ن يذُوْرَار يُوْوض غَار ثنْدِينْت ن ؤُفَسُوْس. يُوْفَا ذِنِّي شَان يمحْضَارن 2 ينَّا-ٱسن: "مَا يهْوَا-د خَاوم أَرُّوْح يقدّْسن وَامِي ثُوْمْنم؟" نَّان-اَس: "لَّا، نشِّين عمَّارْص وَار خَاس نسْڒِي شَا خ أَرُّوْح يقدّْسن." 3 ينَّا-ٱسن: "مَامّش ثݣِّيم وَامِي ثْتْوَاطهَّارم س وَامَان؟" نَّان-اَس: "نشِّين نتْوَاطهَّار س وَامَان عْلَاحْسَاب مَامّش يخدّم نَّبِي يَحْيَى." 4 ينَّا-ٱسن بُوْلُس: "قَا يَحْيَى يتْطهَّار س وَامَان إِ يِنِّي يتُوْبن، ئِقَّار-اَسن اَمْنث زݣ ونِّي إِي د غَا يَاسن منْبَعْد إِ نش، يعْنِي عِيْسَى." 5 سْڒِين إِ مَانَايَا رُوْحن تْوَاطهَّارن س وَامَان عْلَاحْسَاب يسم ن سِيذِيثْنغ عِيْسَى. 6 وَامِي خَاسن يسرْس بُوْلُس يفَاسّن نّس، ئِهْوَا-د خَاسن أَرُّوْح يقدّْسن. بْذَان سَّاوَاڒن س لُّغَاث وَار يدْجِين بُو نْسن، سَّاوَاڒن س مِينْزِي عڒْمن زِي أَربِّـي. 7 يرْيَازن نِّي نِثْنِي شَان ثنْعَاش إِذْسن. 8 سّنِّي بُوْلُس يُوْذف غَار ثمْزِيذَا ن أَيث-إِسْرَائِيل، ئِسَّاوَاڒ ذِنِّي س زْعَامث شَان ن ثڒْت-شْهُوْر. ئِتمْنَاقَاش اَكِذْسن بَاش اَثن يسقْنع خ ڒْمُلْك ن أَربِّـي. 9 ڒبْعَاض زَّايْسن طّْفن اَكِذس ثَغنَّانْت ؤُݣِين اَذ اَمْنن، تُوْكَّارن ذِي تَّعْلِيم ن سِيذِيثْنغ زَّاث إِ يِوْذَان. سّنِّي يفّغ-د بُوْلُس زِي ثمْزِيذَا نِّي يُوْوِي اَكِذس يمحْضَارن نّس، كُڒ نْهَار يسڒْمَاذ-يثن ذِي لْمَرْكز ن تِيرَانُّوْس. 10 ئِقِّيم بُوْلُس يتݣّ مَانَاينِّي عَامَاين. مَارَّا يمزْذَاغ ن لْإِقْلِيم ن آسْيَا سْڒِين إِ وَاوَاڒ ن سِيذِي أَربِّـي، أَيث-إِسْرَائِيل ذ ييُوْنَانِيْين س ثْنَاين إِذْسن. ثَارْوَا ن ڒفْقِي قَّارن-اَس سْكِيـبَا 11 أَربِّـي يتݣّ لْمُعْجِيزَاث ذ ثِيمقّْرَانِين خ وفُوْس ن بُوْلُس. 12 ئِوْذَان كسِّين ڒزْيُوْف ذ ثِبَانْتِيوِين تْحَاذَان زَّايْسنْت بُوْلُس سْرُوْسَان-ثنْت خ يمهْڒَاش. ڒخْدّنِّي ڒهْرَاشَاث نِّي تْݣنْفَان، عَاوذ تفّْغن زَّايْسن جْنُوْن نِّي يعفَّانن إِي ذَايْسن. 13 ذِنِّي شَان يسْرَائِيلِيْين نِثْنِي ذ يسحَّارن تْرَاحن زݣ ومْشَان غَار ومْشَان. تْجَرَّابن اَذ سْخذْمن يسم ن سِيذِيثْنغ عِيْسَى بَاش اَذ سُوْفْغن جْنُوْن يعفَّانن زݣ يِوْذَان. نَّان-اَسن قَا تْأَمَرغ-كنِّيو عْلَاحْسَاب يسم ن عِيْسَى إِي زِي يتْحدَّاث بُوْلُس، فّْغث! 14 أَمنِّي إِي تݣّن يجّن ن سبْعَا ن ثَارْوَا ن يِجّن ن ؤُئِسْرَائِيلِي قَّارن-اَس سْكِيـبَا، نتَّا زِي اَرُّوْيَاس ن ڒْفُقَهَا. 15 ئِجّن ن نْهَار ينْدق-د جّنّ نِّي اَعفَّان ينَّا-ٱسن قَا نش سّْنغ عِيْسَى مِين يعْنَا، سّْنغ بُوْلُس مِين يعْنَا، كنِّيو مِين ثعْنَام؟ 16 ڒخْدّنِّي ينْظو خَاسن ورْيَاز نِّي إِي ذِي يدْجَا جّنّ اَعفَّان يغْڒب-يثن مَارَّا يجْهذ خَاسن. اَروْڒن زِي ثدَّارْث نِّي ذ يعَرْيَانن جَرّْحن. 17 أَرِّين-اَسن-د ڒخْبَار مَارَّا يمزْذَاغ ن ؤُفَسُوْس، يعْنِي أَيث-إِسْرَائِيل ذ ييُوْنَانِيْين س ثْنَاين إِذْسن. ثڒْقف-يثن ثِيݣّْوْذِي أُوْشَا يتْوَاسمْغَار يسم ن سِيذِيثْنغ عِيْسَى اَطَّاس. 18 ؤُسِين-د اَطَّاس زݣ يِنِّي إِي يُوْمْنن ڒخُّو، ڒخْذَايم نْسن إِي تُوْغَا ݣِّين ثِعفَّانِين عْتَارْفن زَّايْسنْت. 19 أَطَّاس ن يِوْذَان تُوْغَا ݣِّين سّْحُوْر ؤُوِين-د لْكُتُب نْسن سْحَرّْقن-ثن غَار بَرَّا زَّاث إِ كُڒْشِي. وَامِي حسْبن تَّمَن ن لْكُتُب نِّي، ؤُفِين خمْسِين اَڒَاف ن دِّينَار. 20 أَمنِّي اَوَاڒ ن سِيذِي أَربِّـي يتنْتَاشر يَرنِّي غَارس جّْهذ اَطَّاس. توْقِيع يجّن ن ڒْفَوْضَا ذِي ثنْدِينْت ن ؤُفَسُوْس 21 منْبَعْد إِ مَانَايَا، يعوّڒ بُوْلُس اَذ يسَفَر غَار لْقُدْس، أَذ يكّ خ لْإِقْلِيم ن مَاسِدُوْنْيَا ذ لْإِقْلِيم ن ؤُخَايَا. ينَّا: خْمِي غَا اَوْضغ ذِنِّي، ئِتْخصَّا-ٱيِي عَاوذ اَذ رَاحغ غَار ثنْدِينْت ن رُوْمَا! 22 ئِسّكّ غَار مَاسِدُوْنْيَا ثْنَاين زݣ يِنِّي إِي ث يتْعَاوَانن يجّن قَّارن-اَس تِيْمُوْتَاوُس يجّن قَّارن-اَس أَرِيسْطُوْس، نتَّا بُوْلُس يقِّيم يجّن ن ڒْوقْث ذِي لْإِقْلِيم ن آسْيَا. 23 ذِي ڒْوقْث نِّي ثوْقع يجّن ن ڒْفَوْضَا ثمْغَار خ سَّبَاب ن وبْرِيذ ن سِيذِيثْنغ. 24 ذِنِّي يجّن ن ورْيَاز قَّارن-اَس دِمِيتْرِيُوْس. نتَّا يضبَّاع نُّقَارْث، ئِتْصنَّاع مُوْنِيكُوْث س نُّقَارْث يتمْشَابَّاهن ذِي زَّاوْيِث ن لْأَصْنَام ؤُمِي قَّارن ثَارْطَمِيسْت. دِمِيتْرِيُوْس-أَ يسْربَّاح اَطَّاس يِيْنَا يتْصنَّاعن مُوْنِيكُوْث-أَ. 25 يڒَاغَا-د خ يِنِّي يخدّْمن ذِي مَانَاينِّي ذ يِنِّي يتْصنَّاعن ثِمسْڒَايِين نّغْنِي اَمنِّي. ينَّا-ٱسن: "آي يرْيَازن، ثسّْنم بلِّي نْربّح اَطَّاس ن تْمنْيَاث ذِي صّنْعَاث-أَ. 26 أَقَا تْوَاڒَام تسْڒَام بُوْلُس-أَ يسْقنّع اَطَّاس ن يِوْذَان ذِي ثنْدِينْت-أَ ن ؤُفَسُوْس عْڒَاين ؤُڒَا ذِي مَارَّا لْإِقْلِيم ن آسْيَا، ئِسُوْفُوْغ-يثن زݣ وبْرِيذ نّغ. ئِقَّار-اَنغ قَا لْأَصْنَام-أَ يتْوَاصنْعن س يفَاسّن قَا وَار دْجِين شَا ذ أَربِّـيثن. 27 خَطَر مَانَايَا خ صّنْعَاث نّغ اَتَاف وَار غَارس بُو لْقِيمَا. خَطَر عَاوذ ؤُڒَا خ زَّاوْيِث ثَمقّْرَانْت ن أَربِّـي نّغ ثَارْطَمِيسْت اَتَاف اَذ تْنقْضع. أَتَاف نتَّاث عَاوذ يمْكن وَار ذَايس تْغِيمِي لْعَظَمَا نّس قَاع، ثَانِيتَا إِي عبّْذن يمزْذَاغ ن لْإِقْلِيم-أَ ن آسْيَا مَارَّا ذ دُّنشْت اَمن-ثكْمَاڒ." 28 وَامِي سْڒِين إِ وَاوَاڒ-أَ، غضْبن اَطَّاس سْنكَّرن ثْغُوْيّث قَّارن ثَارْطَمِيسْت ن أَيث-ؤُفَسُوْس مشْحَاڒ ثمْغَار! 29 ثوْقع يجّن ن ڒْفَوْضَا ذ ثَمقّْرَانْت ذِي ثنْدِينْت نِّي اَمن-ثكْمَاڒ. مُوْنن يِوْذَان-أَ ؤُزّْڒن غَار فُوْرْبُو جَرّن اَكِذْسن ثْنَاين ن يمدُّوْكَاڒ ن بُوْلُس إِي كِذس يتْسَفَارن، ئِجّن قَّارن-اَس غَايُوْس يجّن قَّارن-اَس أَرِيسْتَارْخُوْس، نِثْنِي زِي أَيث-مَاسِدُوْنْيَا. 30 يرزُّو بُوْلُس اَذ يحْضَار زَّاث إِ ڒْغَاشِي نِّي، وَار ث جِّين شَا يمحْضَارن نّس. 31 حتَّا شَان ن يمْخَازْنِيْين ذ يمقّْرَانن زِي لْإِقْلِيم نِّي ن آسْيَا إِي دْجَان ذ يمدُّوْكَاڒ ن بُوْلُس سّكّن غَارس تَّارن زَّايس نَّان-اَس وَار تْرَاح شَا غَار فُوْرْبُو نِّي. 32 مْخَرْوَاضن مَارَّا يوْذَان إِي ذِنِّي يمُوْنن، سْنكَّرن ثْغُوْيّث كُڒ يجّن مِين يقَّار. أَزْين اَمقّْرَان وَار يسِّين مِيخف ذِين مُوْنن. 33 ذِنِّي جَار ڒْغَاشِي نِّي يجّن ن بْنَاذم قَّارن-اَس إِسْكَنْدر. عَانن-ث يسْرَائِيلِيْين غَار زَّاث، ڒَاغَان-اَس-د ڒبْعَاض زَّايْسن حمَا اَذ يسِّيوڒ. ئِتْشيَّار-اَسن إِ ڒْغَاشِي نِّي س يفَاسّن يرزُّو اَثن يسْبدّ بَاش اَذ يذَافع س يِجّن ن وَاوَاڒ. 34 وَامِي ࢲْرِين ڒْغَاشِي نِّي نتَّا ذ اَئِسْرَائِيلِي، مُوْنن مَارَّا إِذْسن شَان ثْنَاين ثْسَعَّاثِين سْنكَّرن ثْغُوْيّث نَّان ثَارْطَمِيسْت ن اَيث-ؤُفَسُوْس مشْحَاڒ ثمْغَار! 35 يُوْسَا-د نَائِب ن لْحَاكم ن ثنْدِينْت يهدّن ڒْغَاشِي نِّي ينَّا-ٱسن: "آي يرْيَازن ن ؤُفَسُوْس، مَا ذِنِّي شَا حَدّ إِي وَار يسِّينن شَا بلِّي ثَنْدِينْت-أَ ن ؤُفَسُوْس ذ نتَّاث إِي يحطَّان زَّاوْيِث ن ثَارْطَمِيسْت ثَمقّْرَانْت ذ وزْرُو نّس اَمْقدّس إِي د يوْضَان زݣ وجنَّا؟ 36 مَانَايَا وَار ذَايس بُو شّكّ. إِذن يتْخصَّا كنِّيو اَذ تْهدّْنم، وَار خدّْمث شَا بْڒَا ڒَعْقڒ. 37 ثُوِيم-د ذَانِيتَا يرْيَازن-أَ، وَار خوّْنن شَا زَّاوْيَاث وَار نِّين بُو ڒْعِيب ذِي أَربِّـي نّغ. 38 مڒَا يخس دِيمِيتْرِيُوْس ذ يِنِّي إِي كِذس يتْصنَّاعن نُّقَارْث اَذ شثْشَان خ شَان يِجّن، أَقَا لْمَحْكَامَا مُوْجُوْد أُو لْعَامِل مُوْجُوْد اَذ رَاحن اَذ شثْشَان س ڒْقَانُوْن. 39 مڒَا غَارْوم شَا وشثْشِي نّغْنِي، أَخَاس حكْمن ذِي لْمَجْلِس ن ثنْدِينْت. 40 ڒخُّو اَقَانغ ذِي لْخَطَر أَ نتْوَاحْكم مَارَّا إِذْنغ خ ڒْفَوْضَا يتوْقِيعن نْهَارَا، نشِّين وَار غَارْنغ بُو شَان ن سَّبَاب خ سّْدَع-أَ." 41 وَامِي ينَّا اَوَاڒ-أَ يسّكّ يِنِّي يمُوْنن اَذ روّْحن. |