ڒخذايم 18 - ثريفيث 2020أَرَّسُوْل بُوْلُس ذِي ثنْدِينْت ن كُوْرِينْث 1 منْبَعْد يفّغ بُوْلُس زِي ثنْدِينْت ن ؤُتِينَا يرُوْح غَار ثنْدِينْت ن كُوْرِينْث. 2-3 يُوْفَا ذِنِّي يجّن ن وئِسْرَائِيلِي نتَّا ذ مِّيس ن لْإِقْلِيم ن پُـنْطُس قَّارن-اَس أَكِيلَاس. نتَّا تُوْغَا يُوْسَا-د ذݣ وُوْسَّان نِّي زِي ثْمُوْرْث ن إِطَاليَا نتَّا ذ ثمْغَارْث نّس ؤُمي قَّارن پْـرِسْكِيلَا. لِأَنَّا لْمَلِك كْلُوْدْيُوْس تُوْغَا يُوْمَر خ مَارَّا أَيث-إِسْرَائِيل اَثن سُوْفْغن زِي رُوْمَا. ئِرُوْح بُوْلُس غَار وَاكِيلَاس ذ پْـرِسْكِيلَا اَثن يࢲر. ئِقِّيم اَكِذْسن، ئِخدّم اَكِذْسن مِنْزِي نِثْنِي ڒْخذْمث نْسن ذ يشْتن تݣّن يقِيظَان. 4 مْكُڒ نْهَار ن سّبْث ن لْعِبَادَا بُوْلُس يتمْنَاقَاش اَك أَيث-إِسْرَائِيل ذ ييُوْنَانِيْين ذِي ثمْزِيذَا بَاش اَثن يسقْنع. 5 وَامِي د يخْضڒ سِيلَاس ذ تِيْمُوْتَاوُس زِي لْإِقْلِيم ن مَاسِدُوْنْيَا، ئِبْذَا بُوْلُس يخدّم غِير س تّبْشِير أُو صَافِي، ئِشهّذ إِ أَيث-إِسْرَائِيل بلِّي عِيْسَى نتَّا ذ لْمَسِيح. 6 وَامِي بْذَان تْعَارَّاضن-اَس تْبُوْصَارن خَاس، ئِمْسح اَرُّوْض نّس اَم يِجّن ن شْهَاذث خَاسن ينَّا-ٱسن: "ئِذَامّن نْوم خ يِيڒَاون نْوم، قَا نش تْبرِّيغ اَزدْجِيف ينُو زَّايْوم. سَّا ٱڒ ثْسَاونْت اَذ رَاحغ غَار يِنِّي وَار يدْجِين شَا زِي أَيث-إِسْرَائِيل." 7 ئِفّغ-د سّنِّي يرُوْح غَار ثدَّارْث ن يِجّن ورْيَاز يعبّْذن أَربِّـي قَّارن-اَس تِيتُوْس يُوْسْتُوْس، ثَدَّارْث نّس اَقَات طَّارْف إِ ثمْزِيذَا نِّي. 8 ڒفْقِي ن ثمْزِيذَا نِّي قَّارن-اَس كْرِيسْپُـوْس، يُوْمن س سِيذِيثْنغ نتَّا ذ مَارَّا ڒحْبَاب نّس. خَربِّي ن يِوْذَان زِي ثنْدِينْت ن كُوْرِينْث وَامِي سْڒِين إِ وَاوَاڒ ن بُوْلُس، ؤُمْنن تْوَاطهَّارن س وَامَان. 9 ئِجّن ن دْجِيڒث يُوْحَا-يَاس-د سِيذِي أَربِّـي إِ بُوْلُس ينَّا-ٱس: "وَار تݣّْوذ شَا، سِيوڒ وَار سْتُوْكَا شَا. 10 نش اَقَايِي اَكِذش، شك وَار ش يتْضَرِّي حَدّ زݣ يِنِّي خَاك د غَا يهجْمن مِينْزِي نش غَارِي اَطَّاس ن شَّعْب ينُو ذِي ثنْدِينْت-أَ." 11 ئِقِّيم ذِنِّي بُوْلُس عَام أُو ستّ-شْهُور يسڒْمَاذ نتَّا اَوَاڒ ن أَربِّـي إِ يِوْذَان. 12 وَلَكِن ذِي ڒْوقْث نِّي ن ݣَالْيُوْن لْعَامِل ن لْإِقْلِيم ن ؤُخَايَا، مُوْنن يسْرَائِيلِيْين هجْمن خ بُوْلُس ؤُوِين-ث غَار لْمَحْكَامَا. 13 نَّان اَرْيَاز-أَ يسْقنّع يوْذَان اَذ عبْذن أَربِّـي ضد إِ ڒْقَانُوْن. 14 وَامِي عْڒَاين اَذ يسِّيوڒ بُوْلُس يكَّر لْعَامِل ݣَالْيُون ينَّا-ٱسن إِ يسْرَائِيلِيْين نِّي: "مَعْلِيك ثْشثْشَام خ شَان ن شَّرّْ نِغ خ شَان ن لْجَرِيمَا ذ ثَعفَّانْت، أَتَاف غَارْوم ڒْحَقّ اَغَارْوم صنّْطغ. 15 وَلَكِن مَانَايَا ذ لْخِلَاف جَارَاوم كنِّيو ذݣ وَاوَاڒن ذ يِيسمَاون ذ شَّرِيعَا نْوم. حلّم مَانَايَا نِّيث جَارَاوم. بْڒَا مَا ٱذ يڒيِغ نش ذ ڒْقَاضِي خ ثْمسْڒَايِين-أَ جَارَاوم." 16 سّنِّي يُوزّڒ-د خَاسن زِي لْمَحْكَامَا. 17 كَّرن مَارَّا إِذْسن طّْفن سَاسْتِين رفْقِي ن ثمْزِيذَا ن أَيث-إِسْرَائِيل ؤُوْثِين-ث زَّاث إِ لْمَحْكَامَا. ݣَالْيُوْن نتَّا وَار ث يشْقِي شَا مَانَاينِّي قَاع. ئِتعْقَاب اَرَّسُوْل بُوْلُس غَار وَانْطَاكْيَا 18 ئِقِّيم عَاذ بُوْلُس اَطَّاس ن وُوْسَّان ذِي ثنْدِينْت ن كُوْرِينْث. سّنِّي يمْسَافَاض خ اَيثْمَاس ذِنِّي، ئِنْيَا ذݣ ؤُغَرَّابُو يرُوْح غَار سُوْرْيَا اَكِذس پْـرِسْكِيلَا ذ وَاكِيلَاس. تُوْغَا يحفّ بُوْلُس اَشوَّاف نّس ذِي ڒمْوِيِّـي ؤُمِي قَّارن كَنْغَرْيَا مِينْزِي تُوْغَا خَاس ڒْعَهذ إِي يݣَّا اَك سِيذِي أَربِّـي. 19 ؤُوْضن غَار ثنْدِينْت ن ؤُفَسُوْس، يجَّا بُوْلُس ذِنِّي پْـرِسْكِيلَا ذ وَاكِيلَاس، سّنِّي يُوْذف غَار ثمْزِيذَا بَاش اَذ يمْنَاقَاش اَك يسْرَائِيلِيْين. 20 تَّارن زَّايس يسْرَائِيلِيْين-أَ اَذ يقِّيم عَاذ كْتَار وَلَكِن نتَّا يُوْݣِي. 21 وَامِي خَاسن يمْسَافَاض ينَّا-ٱسن قَا مڒَا يخس أَربِّـي، عَاذ ٱذ د عقْبغ. سّنِّي ينْيَا ذݣ ؤُغَرَّابُو يفّغ زِي ثنْدِينْت نِّي ن ؤُفَسُوْس. 22 وَامِي يُوْوض غَار ثنْدِينْت ن قَيْصَارِيَا، ئِݣَعّذ غَار لْقُدْس يسدْجم خ جْمَاعث ن ڒْمُوْمِنِين، سّنِّي يُوْيُوْر غَار ثنْدِينْت ن وَانْطَاكْيَا. 23 وَامِي إِي ذَايس يكَّا شَان ڒْوقْث، ئِفّغ يعْذُو ذِي جْوَايه ن ݣَالَاطْيَا ذ جْوَايه ن فْرِيجْيَا يتݣّ ؤُڒ ذݣ يمحْضَارن نِّي إِي يدْجَان ذِنِّي مَارَّا. أَپُـوْلُوْس يتْبشَّار ذِي ثنْدِينْت ن ؤُفَسُوْس ذ لْإِقْلِيم ن ؤُخَايَا 24 ئِجّن ن ؤُئِسْرَائِيلِي قَّارن-اَس أَپُـوْلُوْس نتَّا يخْڒق ذِي ثنْدِينْت ن إِسْكَنْدَارِيَا، يُوْسَا-د غَار ثنْدِينْت ن ؤُفَسُوْس. نتَّا يفْسُوْس ذݣ وَاوَاڒ يغْرَا اَطَّاس ذِي لْكُتُب. 25 أَرْيَاز-أَ يڒْمذ خ وبْرِيذ ن سِيذِيثْنغ، ئِسَّاوَاڒ س جّْهذ ذ اَمقّْرَان، ئِسڒْمَاذ نِيشَان خ عِيْسَى. وَلَكِن يسّن غِير خ وطهَّار نِّي ن وَامَان إِݣ يسخْذم نَّبِي يَحْيَى. 26 ئِبْذَا يسَّاوَاڒ ذِي ثمْزِيذَا ن أَيث-إِسْرَائِيل س زْعَامث. سْڒِين-اَس پْـرِسْكِيلا ذ وَاكِيلَاس، ؤُوِين-ث اَكِذْسن غَار ثدَّارْث نْسن بْذَان سْفهَّامن-ث حْسن خ وبْرِيذ ن أَربِّـي. 27 وَامِي يخس أَپُـوْلُوْس اَذ يسَفَر غَار لْإِقْلِيم ن ؤُخَايَا، شجّْعن-ث اَيثْمَاس ؤُرِين-اَسن يجّن ن ثبْرَات إِ يمحْضَارن نِّي ن ذِنِّي بَاش اَزَّايس رحْبن. وَامِي يُوْوض غَار لْإِقْلِيم نِّي يعَاون اَطَّاس يِنِّي يُوْمْنن س اَرْضَا ن أَربِّـي. 28 لِأَنَّا نتَّا يتمْنَاقَاش س جّْهذ اَك يسْرَائِيلِيْين زَّاث إِ يِوْذَان، نِثْنِي وَار زمَّرن شَا اَث جَاوْبن نِيشَان مِينْزِي يسْبيّن-اَسن-د اَوَاڒن زِي لْكُتُب بلِّي نتَّا عِيْسَى ذ لْمَسِيح. |