ڒخذايم 13 - ثريفيث 2020ڒْمُوْمِنِين سّكّن-د بَرْنَابَا ذ شَاوُل اَذ بشَّرن 1 ذِي جْمَاعث ن ڒْمُوْمِنِين ذِي ثنْدِينْت ن وَانْطَاكْيَا ذِنِّي لْأَنْبِيَا ذ يمْسڒْمَاذن. نِثْنِي ذ بَرْنَابَا، ذ سِمْعَان ونِّي ؤُمِي قَّارن أَبرْشَان، ذ لُوْقْيُوْس زِي لْقُرِينَا، ذ مَنَاهن ونِّي إِݣ يربَّان اَك وزدْجِيذ هِيرُدُوْس زِي ثمْزِي نّس، ذ شَاوُل. 2 وَامِي عبّْذن سِيذِي أَربِّـي تْࢲُوْمَّان، ينَّا-ٱسن أَرُّوْح يقدّْسن: حُوْزم-اَيِي-د بَرْنَابَا ذ شَاوُل إِ ڒْخذْمث نِّي ؤُمِي ثن يخْضَرغ. 3 وَامِي ࢲُوْمّن ࢲُّوْدْجن، ڒخْدّنِّي سرْسن خَاسن يفَاسّن نْسن سّكّن-ثن. 4 ئِسّكّ-يثن أَرُّوْح يقدّْسن رُوْحن غَار ثنْدِينْت ن سُلُوْكْيَا. سّنِّي سَفَرن ذݣ وغَرَّابُو غَار ثيْزِيرْث ن قُبْرُص. 5 وَامِي ؤُوْضن غَار ثنْدِينْت ن سَلَامِيس بْذَان تْبشَّارن س وَاوَاڒ ن أَربِّـي ذِي ثمْزِيذَاوِين ن أَيث-إِسْرَائِيل، ئِتْعَاوَان-يثن يُوْحَنَّا نِّي. 6 ؤُيُوْرن ذِي ثيْزِيرْث نِّي اَمن-ثكْمَاڒ اَڒ وَامِي ؤُوْضن غار ثنْدِينْت ن پَـافُوْس. ؤُفِين ذِنِّي يجّن ن وسحَّار نتَّا ذ اَئِسْرَائِيلِي يَارَّا يخْف نّس ذ نَّبي قَّارن-اَس بنْيَشُوْع. 7 ئِتِيڒِي اَك لْعَامِل ونِّي ؤُمِي قَّارن سَرْجْيُوْس بُوْلُس. لْعَامِل نِّي نتَّا ذ يجّن ن ورْيَاز ذ اَمِيغِيس، ئِڒَاغَا-د إِ بَرْنَابَا ذ شَاوُل يخس اَذَاس سْڒمْذن اَوَاڒ ن أَربِّـي. 8 وَلَكِن يعَارّض-اَسن ؤُسحَّار نِّي بنْيَشُوْع (ونِّي ؤُمِي قَّارن س ثْيُوْنَانِيث أُلِيمَاس). نتَّا يرزُّو اَذ يسْبعّذ لْعَامِل خ لْإِيمَان. 9 ئِكَّر شَاوُل يعْنِي بُوْلُس يشُّوْر س أَرُّوْح يقدّْسن يخْزَر ذݣ وسحَّار نِّي مْلِيح؛ 10 ينَّا-ٱس: "شك ذ مِّيس ن إِبْڒِيس. شك ذ ڒَعْذُو ن قَاع مِين يدْجَان نِيشَان، ثشُّوْرذ س لْحِيلَا ذ ثحْرَايْمشْت! مَا عَاذ ثْرزُّوْذ اَذ تْعوّْجذ يبْرِيذن إِي يدْجَان نِيشَان ن سِيذِي أَربِّـي؟ 11 سَّا ٱڒ ثْسَاونْت سِيذِي أَربِّـي اَقَاث ضذ نّش، أَذ تْضَرْغْڒذ اَتَاف وَار ثْࢲرّذ شَا ثْفَاوْث ن ثْفُوْشْت اَڒ يِجّن ن لْمُدَّا." ڒخْدّنِّي ثكَّا-ٱس-د ثَاشْبَابْث إِ ؤُسحَّار نِّي خ ثِيطَّاوِين يتْوَاڒَا ثَادْجسْت، ئِقِّيم يتنّض ذِنِّي يرزُّو ؤُو ث غَا يسْݣوّْذن س وفُوْس. 12 ئِࢲْرَا مَانَاينِّي لْعَامِل ڒخْدّنِّي يُوْمن، ئِقِّيم يذهّش س تَّعْلِيم ن سِيذِيثْنغ. بُوْلُس ذ بَرْنَابَا تْبشَّارن ذِي وَانْطَاكْيَا ذ پِــيْسِيْدْيَا 13 ئِنْيَا بُوْلُس ذ يمدُّوْكَاڒ نّس ذݣ وغَرَّابُو، رُوْحن زِي ثنْدِينْت نِّي ن پَـافُوْس غَار ثنْدِينْت ن بَارْجَا ذِي پَـامْفِيْلْيَا. ئِسْمح ذَايْسن ذِنِّي يُوْحَنَّا يذوْڒ-د غَار لْقُدْس. 14 نِثْنِي فّْغن زِي ثنْدِينْت ن بَارْجَا رُوْحن غَار ثنْدِينْت ن وَانْطَاكْيَا ذِي جْوَايه ن پِــيْسِيْدْيَا. ؤُذْفن قِّيمن ذِي ثمْزِيذَا ن أَيث-إِسْرَائِيل ذِي نْهَار ن سّبْث. 15 منْبَعْد إِ ثْغُوْرِي زِي لْكُتُب ن شَّرِيعَا ن مُوْسَى ذ لْأَنْبِيَا، سّكّن اَرُّوْيَاس ن ثمْزِيذَا اَوَاڒ نْسن إِ بَرْنَابَا ذ شَاوُل نَّان-اَسن: "آي اَيثْمَا، مڒَا غَارْوم شَان وَاوَاڒ إِي زِي غَا ثْشجّْعم شَّعْب-أَ، إِنِيم-اَسن-ث." 16 ئِكَّر يشيَّر-اَسن بُوْلُس س ؤُفُوْس ينَّا-ٱسن: "آي يرْيَازن ن اَيث-إِسْرَائِيل آي يِنِّي يتݣّْوْذن أَربِّـي، صنّْطث. 17 فَا أَربِّـي إِي يدْجَان خ شَّعْب ن أَيث-إِسْرَائِيل يخْضَر نتَّا ڒجْذُوْذ نّغ، يَرْنِي لْعَدَد نْسن وَامِي نِثْنِي تُوْغَا زدّْغن ذِي مِصْرَا. ئِسُوْفغ-يثن سّنِّي س جّْهذ نّس. 18 ثُمَّا يصْبَر اَكِذْسن ذݣ وعصَّاي نْسن شَان اَرْبعِين سْنَا ذِي صَّحْرَا. 19 ثُمَّا يقْضَا خ سبْعَا ن ڒݣْنُوْس ذِي ثْمُوْرْث ن كَنْعَان، ثَمُوْرْث نِّي يسْوَارْث-يت إِ ڒجْذُوْذ نّغ. 20 مَارَّا مَانَاينِّي يكَّا خَاسن يجّن اَرْبعْمِيَّا و خمْسِين سْنَا. ثُمَّا يݣَّا خَاسن ڒْقُوْضَاث اَڒ ڒْوقْث نِّي ن نَّبي صَامْوِيل. 21 ثُمَّا تَّارن-اَس إِ أَربِّـي اَغَارْسن يِيڒِي يجّن ن وزدْجِيذ نْسن، سّنِّي يُوْشَا-اَسن شَاوُل مِّيس ن قَيْس زِي أَيث-بنْيَامِين. يحْكم خَاسن نتَّا اَرْبعِين يسݣّْوُسَا. 22 ثُمَّا يكّس-يث أَربِّـي، يَارَّا دَاود ذ اَزدْجِيذ خَاسن. ئِشْهذ خَاس ينَّا قَا ؤُفِيغ دَاود مِّيس ن يَسَّى نتَّا ذ يجّن ن ورْيَاز يقْبڒ ڒْخَاضَر ينُو اَذ يݣّ مَارَّا مِين خْسغ. 23 ثُمَّا زِي دُوْرِّيث ن دَاود يسّكّ-د أَربِّـي عِيْسَى غَار أَيث-إِسْرَائِيل يعْنِي ونِّي إِي ثن غَا يسْنجْمن، مَامّش ثن يوْعذ زِي قْبڒ. 24 قْبڒ مَا ٱذ يرَاح غَارْسن عِيْسَى، تُوْغَا ذِنِّي يَحْيَى يتْبشَّار مَارَّا شَّعْب ن أَيث-إِسْرَائِيل حمَا اَذ تُوْبن اَذ تْوَاطهَّارن س وَامَان. 25 وَامِي يَحْيَى عْڒَاين اَذ يكمّڒ ڒْخذْمث نّس ينَّا-ٱسن: مِين ذَايِي تَارِّيم كنِّيو؟ قَا نش وَار دْجِيغ شَا ذ ونِّي إِي تْرَاجَام! منْبَعْد إِ نش اَذ د يَاس يجّن وَار سْذِهدْجغ اَذَاس فسْيغ ؤُڒَا ذ يفِيڒَان ن ثْسِيڒَا يقّن ذݣ يضَارن نّس." 26 ينَّا-ٱسن بُوْلُس: "آي اَيثْمَا، آ ثَارْوَا ن بْرَاهِيم، آي يِنِّي يتݣّْوْذن أَربِّـي! قَا ذ نشِّين ؤُمِي د يسّكّ أَربِّـي اَوَاڒ-أَ إِي زِي غَا ننْجم. 27 قَا يمزْذَاغ ن لْقُدْس ذ اَرُّوْيَاس نْسن وَار عْقِيڒن شَا عِيْسَى-يَا، وَار فْهِيمن شَا اَوَاڒن ن لْأَنْبِيَا ذِي لْكُتُب إِي قَّارن ذِي ثمْزِيذَاوِين زِي سّبْث غَار سّبْث. وَامِي حكْمن خ عِيْسَى س ڒْموْث فّْغن-د وَاوَاڒن نِّي إِي نَّان لْأَنْبِيَا. 28 وَاخَّا وَار ؤُفِين ؤُڒَا ذ يجّن ن سَّبَاب إِي زِي غَا خَاس حكْمن س ڒْموْث، وَلَكِن تَّارن إِ بِيلَاطُوْس اَث ينغ. 29 وَامِي ݣِّين مَارَّا مِين تُوْغَا خَاس ؤُرِين لْأَنْبِيَا، سهْوَان-ث-يذ زِي ثحْنَاشْت سرْسن-ث ذݣ ونْضڒ. 30 وَلَكِن أَربِّـي يسكَّر-يث-يذ زِي ڒْموْث. 31 ثُمَّا يمظهَّار-د عِيْسَى ذݣ وَاطَّاس ن نْهُوْرَاث إِ يِنِّي تُوْغَا يݣَعّْذن اَكِذس زِي ثْمُوْرْث ن لْجَلِيل غَار ثنْدِينْت ن لْقُدْس. ڒخُّو يِيْنَا يدْجَان ذ ڒشْهُوْذ نّس غَار شَّعْب. 32-33 فَا نشِّين نتْبشَّار-يكنِّيو س مَانَايَا. يعْنِي أَربِّـي وَامِي د يسكَّر عِيْسَى زِي ڒْموْث صَافِي يكمّڒ مِين زِي تُوْغَا يوْعذ ڒجْذُوْذ نّغ، ئِكمّڒ-يث اَكِذْنغ نشِّين يدْجَان ذ ثَارْوَا نْسن. أَقَا يُوْرَا ذِي لْكِتَاب ن زَّابُوْر ذݣ يِزْڒِي وِيس ثْنَاين: أَقَا شك ذ مِّي، نْهَارَا نش ذوْڒغ ذ بَابَاش. 34 فَا أربِّي يسكَّر-د عِيْسَى زِي ڒْموْث يعْنِي عمَّارص اَذ يكِيشّو. أَمنِّي يقَّار لْكِتَاب: <أَذَاوم ؤُشغ لْبَرَكَا ثَمْقدّسْت، لْبَرَكَا ذ صَّح إِي زِي وعْذغ نَّبِي دَاود.> 35 أَمنِّي يقَّار عَاوذ لْكِتَاب: <وَار تجِّيذ شَا لْعَظِيم نّش اَذ يكِيشّو.> 36 لِأَنَّا دَاود ذِي زْمَان نّس وَامِي يكمّڒ مِين يخس أَربِّـي صَافِي يمُّوْث، ئِتْوَانْضڒ طَّارف إِ ڒجْذُوْذ نّس صَافِي يكِيشّو. 37 وَلَكِن ونِّي د يسكَّر أَربِّـي زِي ڒْموْث نتَّا لَّا وَار يكِيشّو شَا. 38-39 إِذن آي اَيثْمَا، رزُّوْغ اَذ تسّْنم س وَاوَاڒ-أَ بلِّي س عِيْسَى-يَا إِي زِي غَا تْوَاغْفَرنْت ڒْمُعْصِيَاث. مَارَّا ونِّي زَّايس غَا يَامْنن اَس تْوَاغْفَرنْت مَارَّا ڒْمُعْصِيَاث نّس؛ لْغُفْرَان-أَ وَانِيتَا وَار يزمَّر شَا اَذ يِيڒِي س شَّرِيعَا ن مُوْسَى. 40 إِيوَا حْضَاث يخف نْوم بَاش وَار ذَاوم يتوْقِيع شَا مِين ؤُرِين لْأَنْبِيَا: 41 خْزَارث آ يِنِّي يتْبُوْصَارن، تْعجّْبث فْنَاث. ذِي ڒِيَّام نْوم اَذ ݣّغ شَان ثْمسْڒَايِين وَاخَّا يخبَّر-يكنِّيو حَدّ زَّايْسنْت، وَار ث تِيمْنم شَا." 42 وَامِي كَّرن بُوْلُس ذ بَرْنَابَا اَذ د فّْغن زِي ثمْزِيذَا نِّي ن أَيث-إِسْرَائِيل، تَّارن زَّايْسن يِوْذَان نِّي اَذَاسن حدّْثن س مَانَاينِّي نْهَار ن سّبْت إِي د غَا يَاسن. 43 وَامِي د تفّْغن زِي ثمْزِيذَا، ذْفَارن-ثن اَطَّاس ن يسْرَائِيلِيْين ذ يِنِّي يسڒْمن ذِي دِّين ن أَيث-إِسْرَائِيل إِي تݣّْوْذن أَربِّـي. بُوْلُس ذ بَرْنَابَا سِّيوْڒن اَكِذْسن شجّْعن-ثن حمَا اَذ ارْنِين ذي اَرْضَا ن أَربِّـي. 44 وَامِي د ثُوْوض سّبْث نِّي، مُوْنن عْڒَاين مَارَّا اَيثْبَاب ن ثنْدِينْت حمَا اَذ صنّْطن إِ وَاوَاڒ ن سِيذِي أَربِّـي. 45 أَيث-إِسْرَائِيل وَامِي ؤُفِين ڒْغَاشِي اَطَّاس بْذَان حسّْذن اَطَّاس اَرُّسُل بْذَان تْعَارَّاضن إِ وَاوَاڒ ن بُوْلُس، تُوْكَّرن-ث. 46 بُوْلُس ذ بَرْنَابَا نَّان-اَسن س يِجّن ن زْعَامث: "نشِّين تُوْغَا يتْخصَّا اَذَاوم نسِّيوڒ إِ كنِّيو ذ يمزْوُوْرَا س وَاوَاڒ ن أَربِّـي. وَامِي ثُوْݣِيم، ثْحكْمم خ يِيخف نْوم بلِّي كنِّيو وَار ثسْذِيهدْجم شَا ثُوْذَارْث ن ڒبْدَا، ڒخُّو قَا نشِّين أَ نْرَاح غَار يِنِّي وَار يدْجِين شَا زِي أَيث-إِسْرَائِيل. 47 لِأَنَّا سِيذِي أَربِّـي يوصَّا-يَانغ ينَّا-ٱنغ: <أَرِّيغ-شك ذ ثْفَاوْث إِ مَارَّا ڒݣْنُوْس، حمَا يوْذَان اَذ نجْمن حتَّا اَڒ طَّارف ن دُّنشْت.>" 48 يِنِّي وَار يدْجِين شَا زِي أَيث-إِسْرَائِيل وَامِي سْڒِين مِين ينَّا بُوْلُس، فَرْحن حمّْذن إِ وَاوَاڒ ن سِيذِي أَربِّـي. ؤُمْنن مَارَّا يِنِّي يخْضَر أَربِّـي إِ ثُوْذَارْث ن ڒبْدَا. 49 ئِنْتَاشَر وَاوَاڒ ن سِيذِي أَربِّـي ذِي ثْمُوْرْث نِّي مَارَّا. 50 وَلَكِن يسْرَائِيلِيْين سَامَرن ثِمْغَارِين إِي ذَايْسنْت دِّين غَارْسنْت لْمَرْتَبَا، عَاوذ سَامَرن يمقّْرَانن ن ثنْدِينْت. تݣّن سَّبَاب إِ يِوْذَان حمَا اَذ عدّْبن بُوْلُس ذ بَرْنَابَا أُوْشَا ؤُزّْڒن خَاسن زِي جِّهث نِّي. 51 كَّرن بُوْلُس ذ بَرْنَابَا مسْحن ثَعجَّاشْت زݣ يضَارن نْسن اَم يِجّن ن شْهَاذث خَاسن، رُوْحن غَار ثنْدِينْت ن إِكُوْنْيَا. 52 ئِمحْضَارن يدْجَان ذِنِّي شُّوْرن س ڒفْرَاحث ذ أَرُّوْح يقدّْسن. |