ڒخذايم 11 - ثريفيث 2020أَرَّسُوْل بُطْرُس يتْخبَّر جْمَاعث ن ڒْمُوْمِنِين ذِي لْقُدْس 1 منْبَعْد، اَرُّسُل ذ ؤُوْمَاثن يِنِّي يدْجَان ذِي يَهُوْذِيَا سْڒِين قَا ؤُڒَا ذ يِنِّي وَار يدْجِين شَا زِي أَيث-إِسْرَائِيل قبْڒن اَوَاڒ ن أَربِّـي. 2-3 وَامِي يݣَعّذ بُطْرُس غَارْسن غَار لْقُدْس ڒخْدّنِّي كَّرن ڒْمُوْمِنِين نِّي ن عِيْسَى ينِّي يتِيشّن لْهِمَّا اَطَّاس إِ طَّهَارث شِّين-ث س ڒْهمّْ نَّان-اَس: "مَايمِّي ثُوْذْفذ غَار ثدَّارْث ن يِنِّي وَار يطهَّارن شَا ثشِّيذ اَكِذْسن اَغْرُوْم؟" 4 ئِبْذَا بُطْرُس يتْفسَّار-اَسن ثَا س ثَا ينَّا-ٱسن: 5 "نش وَامِي تُوْغَا دْجِيغ ذِي ثنْدِينْت ن يَافَا تْࢲَادْجِيغ يُوْحَا-اَيي-د أَربِّـي، ذِي لْوَحِي نِّي سْهوَّان-د زݣ وجنَّا غَار ثْمُوْرْث يجّن ن ڒْحَاجث ثݣَّا اَم ثْشُوْقّت ذ ثَمقّْرَانْت تْوَاشدّ زِي ثْغمُّوْرَا نّس س اَربْعَا ثُوْسَا-د غَارِي. 6 خْزَرغ ذَايس مْلِيح ؤُفِيغ لْحَيَوَانَاث يݣُّوْرن خ اَرْبعَا ن يضَارن ذ ڒُوْحُوْش ذ مِين يتنْحُوْرُوْذن خ وعدِّيس ذ يجْضَاض ن وجنَّا. 7 ثُمَّا سْڒِيغ إِ يِجّن ن ثْمِيجَّا ثقَّار-اَيِي: كَّر آ بُطْرُس، غَرص، اشّ! 8 نِّيغ-اَس: لَّا وَالُو آ سِيذِي! نش عمَّارص وَار ݣِّيغ ذݣ وقمُّوْم ينُو مِين يدْجَان حْرَام نِغ مكْرُوْه. 9 ثنْدق-د ثْمِيجَّا نِّي زݣ وجنَّا وِيس مَرّْثَاين ثنَّا-ٱيِي: شك وَار تْحَرَّام شَا مِين يحدْجڒ أَربِّـي يَارِّي-ث حَلَال! 10 ئِوْقع-اَيِي مَانَاينِّي ثْڒَاثَا ن ثْوَاڒَاثِين، سّنِّي ينجْمع كُڒْشِي غَار وجنَّا. 11 ذِي ثْسَعَّات نِّي بدّن ثْڒَاثَا ن يرْيَازن غَار ثدَّارْث نِّي مَانِي دْجِيغ ذ اَنوْجِي، تْوَاسّكّن-د غَارِي زِي ثنْدِينْت ن قَيْصَارِيَا. 12 ثُمَّا يوصَّا-ٱيِي أَرُّوْح ن أَربِّـي ينَّا-ٱيِي رُوْح اَكِذْسن بْڒَا مَا ٱذَايْسن ثْشكّذ. ؤُوِيغ اَكِذِي ستَّا-يَا ن يَايثْمَا، نُوْذف غَار ثدَّارْث ن كُوْرْنِينْيُوْس. 13 ئِعَاوذ-اَنغ نتَّا مَامّش يࢲْرَا يجّن ن لْمَلَاك يبدّ-د ذِي ثدَّارْث نّس ينَّا-ٱس: سكّ يرْيَازن غَار ثنْدِينْت ن يَافَا اَذ د اَوِين سّنِّي سِمْعَان ؤُمي قَّارن بُطْرُس. 14 أَذَاش يِينِي اَوَاڒن إِي زِي غَا ثْنجْمذ شك ذ مَارَّا اَيثْبَاب ن ثدَّارْث نّش. 15 ثُمَّا وَامِي بْذِيغ سَّاوَاڒغ، يُوْسَا-د أَرُّوْح يقدّْسن يهْوَا-د خَاسن مَامّش خَانغ د يهْوَا ذݣ ومزْوَارُو. 16 فكَّرغ-د مِين ينَّا سِيذِيثْنغ وَامِي ينَّا قَا يَحْيَى يطهَّار إِ يِوْذَان س وَامَان، كنِّيو قَا اَذ تْوَاطهَّارم س أَرُّوْح يقدّْسن. 17 إِيوَا مڒَا يُوْشَا-ٱسن أَربِّـي إِ نِثْنِي اَمشْنَاو مِين ذَانغ يُوْشَا إِ نشِّين وَامِي نُوْمن زِي سِيذِيثْنغ عِيْسَى لْمَسِيح، مِين عْنِيغ نش بَاش اَذ عَارّْضغ إِ أَربِّـي؟" 18 يِنِّي يحْضَارن وَامِي سْڒِين إِ وَاوَاڒ-أَ، سْقَارن حمْذن أَربِّـي نَّان: "خْيَار، ؤُڒَا ذ يِنِّي وَار يدْجِين شَا زِي أَيث-إِسْرَائِيل يُوْشَا-ٱسن أَربِّـي تُّوْبَا اَغَارْسن ثِيڒِي ثُوْذَارْث!" جْمَاعث ن ڒْمُوْمِنِين يدْجَان ذِي ثنْدِينْت ن وَانْطَاكْيَا 19 عْلَاحْسَاب اَعدّب نِّي إِي يوقْعن وَامِي يتْوَانغ سْتِيفَان، ڒْمُوْمِنِين كُڒ يجّن مَانِي يرُوْح: ئِجّن يرُوْح ٱڒ فِينِيقْيَا، ئِجّن يرُوْح اَڒ قُبْرُص، ئِجّن يرُوْح اَڒ وَانْطَاكْيَا. وَار تْبشِّيرن ذِنِّي حَدّ س وَاوَاڒ ن أَربِّـي إِلَّا يسْرَائِيلِيْين. 20 وَلَكِن ڒبْعَاض ن يرْيَازن زِي قُبْرُص ذ لْقُرِينَا ؤُسِين-د غَار وَانْطَاكْيَا بْذَان سَّاوَاڒن اَك ييُوْنَانِيْين تْبشَّارن-ثن س سِيذِيثْنغ عِيْسَى. 21 سِيذِي أَربِّـي اَقَاث اَكِذْسن، اَطَّاس ن يِوْذَان ؤُمْنن ذوْڒن-د غَار سِيذِيثْنغ. 22 يُوْوض ڒخْبَار-أَ غَار جْمَاعث ن ڒْمُوْمِنِين ذِي لْقُدْس، كَّرن سّكّن بَرْنَابَا غَار وَانْطَاكْيَا. 23 وَامِي د يُوْوض، يُوْفَا مَامّش ثن يبَرك أَربِّـي. ئِفَرح يبْذَا يتْشجَّاع-يثن مَارَّا بَاش اَذ قِّيمن ذݣ وبْرِيذ ن سِيذِيثْنغ س مَارَّا وُوْڒَاون نْسن. 24 بَرْنَابَا نتَّا ذ يجّن ن ورْيَاز ذ اَصبْحَان يشُّوْر س أَرُّوْح يقدّْسن يتَامن اَطَّاس، خَربِّي ن يِوْذَان ؤُمْنن زِي سِيذِيثْنغ. 25 ئِرُوْح بَرْنَابا غَار ثنْدِينْت ن طَرْسُوْس يرزُّو خ شَاوُل. 26 وَامِي ث يُوْفَا يُوْوِي-ث-يذ اَكِذس غَار ثنْدِينْت-أَ ن وَانْطَاكْيَا. سعْذُوْن عَام يكْمَاڒ اَك جْمَاعث ن ڒْمُوْمِنِين، سڒْمَاذن اَطَّاس ن يِوْذَان. ذَانِيتَا ذِي وَانْطَاكْيَا-يَا إِي تْوَاسمَّان يمحْضَارن ثْوَاڒَا ثَمزْوَارُوْت س <ئِمَسِيْحِيْين.> 27 ذِي ڒِيَّام نِّي هْوَان-د شَان ن لْأَنْبِيَا زِي لْقُدْس غَار وَانْطَاكْيَا. 28 ئِكَّر يجّن زَّايْسن قَّارن-اَس غَابُوْس، ئِخْبَر إِ ڒْمُوْمِنِين ذِنِّي س مِين ذَاس ينَّا أَرُّوْح ن أَربِّـي. ينَّا-ٱسن قَا ٱذ يوْقع يجّن ن بُوْهيُّوْف ذ اَمقّْرَان خ ثْمُوْرْث مَارَّا (أُو ذ صَّح يوْقع مَانَاينِّي ذِي ڒْوقْث ن لْمَلِك قَيْصَار كْلُوْدْيُوْس). 29 كَّرن يمحْضَارن تَافْقن جَارَاسن كُڒ يجّن زَّايْسن اَذ سّكّن شْوَايْت ن لْمُعَاوَنَا عْلَاحْسَاب ثِزمَّار نْسن غَار اَيثْمَاثْسن إِݣ يزدّْغن ذِي يَهُوْذِيَا. 30 أَمنِّي إِي ݣِّين جَارَاسن، ؤُشِين لْمُعَاوَنَا نِّي إِ بَرْنَابَا ذ شَاوُل اَت سِّيوْضن إِ يمقّْرَانن ن جْمَاعث ن ڒْمُوْمِنِين إِي يدْجَان ذِنِّي. |