ڒخذايم 1 - ثريفيث 2020

لْمَسِيح يتْݣَعَّاذ غَار وجنَّا

^1-2 آ سِي تَاوْفِيلُوْس، لْكِتَاب اَمزْوَارُو إِي ؤُرِيغ نش ذَايس مَارَّا مِين يݣَّا عِيْسَى ذ مِين يسڒْمَاذ اَڒ نْهَار نِّي وَامِي يتْوَارْفع. نتَّا قْبڒ مَا ٱذ يتْوَارْفع، ئِوصَّا س أَرُّوْح يقدّْسن اَرُّسُل إِي تُوْغَا يخْضَر ينَّا-ٱسن مِين غَا ݣّن.

³ وَامِي يعْذُو ڒَعْذَاب ن ڒْموْث نّس، يتْمظْهَار-اَسن-د خ يِجّن ن اَرْبعِين يُوْم يسفْهَام-يثن مبْڒَا شّكّ نتَّا اَقَا يدَّر. ئِتَاس-د غَارْسن يسَّاوَاڒ اَكِذْسن خ ڒْمُلْك ن أَربِّـي.

⁴ وَامِي تُوْغَا اَكِذْسن يتتّ، ئِوصَّا-ثن ينَّا-ٱسن: "وَار تفّْغم شَا زِي ثنْدِينْت ن لْقُدْس. رَاجَام اَڒ د غَا يَاس مِين يوْعذ بَابَا إِي خف ذَاوم تُوْغَا سِّيوْڒغ.

⁵ يعْنِي يَحْيَى يطهَّار إِ يِوْذَان س وَامَان، كنِّيو وَار ذَاوم يقِّيم شَا اَذ تْوَاطهَّارم س أَرُّوْح يقدّْسن."

⁶ وَامِي مُوْنن اَرُّسُل اَك عِيْسَى نَّان-اَس: "آ سِيذِي، مَا ذݣ وُوْسَّان-أَ إي د غَا ثَارّذ ڒحْكَام غَار أَيث-إِسْرَائِيل؟"

⁷ ينَّا-ٱسن عِيْسَى: "وَار ذَاوم يتْوَاسْمح شَا اَذ تسّْنم لْأَوْقَات نِغ ذ تَّوَارِيخ تُوْغَا يݣَّا بَابَا س سُّلْطَا نّس.

⁸ وَلَكِن اَخْمِي خَاوم د غَا يهْوَا أَرُّوْح يقدّْسن، أَغَارْوم يِيڒِي جّْهذ. أَخَافِي ثْشهْذم ذِي ثنْدِينْت ن لْقُدْس ذ مَارَّا ثِمُوْرَا ن يَهُوْذِيَا ذ سَمَارْيَا اَڒ طَّارْف ونݣَّارُو ن دُّنشْت-أَ."

⁹ غِير يكمّڒ عِيْسَى اَوَاڒ نّس، ئِتْوَارْفع غَار وجنَّا. قِّيمن تْخزَّرن ذَايس أُوْشَا يودَّار-اَسن ذݣ وسيْنُو.

¹⁰ قِّيمن تْخزَّرن مْلِيح وَامِي يُوْڒِي غَار وجنَّا، عْلَاغَفْلَا ؤُفِين اَكِذْسن ثْنَاين ن يثَرَّاسن بدّن، غَارْسن اَرُّوْض ذ اَشمْڒَاڒ.

¹¹ نَّان-اَسن: "آي يرْيَازن ن ثْمُوْرْث ن لْجَلِيل، مَايمِّي عَاذ ثْبدّم ذَانِيتَا تْخزَّرم ذݣ وجنَّا؟ قَا عِيْسَى-يَا وَانِيتَا إِي ذَاوم يتْوَارْفْعن غَار وجنَّا، مَامّش ث ثࢲْرِيم يݣَعّذ غَار وجنَّا اَمنِّي إِي د غَا يذْوڒ."

تِيخْضَارن ونِّي غَا يِيڒِين ذݣ ومْشَان ن يهُوْذَا

¹² سّنِّي ذوْڒن-د اَرُّسُل زݣ وذْرَار ن زِّيتُوْن غَار ثنْدِينْت ن لْقُدْس إِي يݣّْوْجن س يِجّن ن كِيلُوْمِت.

¹³ وَامِي ؤُوْضن، ݣَعّْذن غَار ثْغُوْرْفَات مَانِي تِيڒِين: بُطْرُس ذ يُوْحَنَّا ذ يَعْقُوْب ذ أَنْدْرُوْس، ذ فِيلِيپَّـاس ذ تُوْمَا، ذ بَارْتُوْلُوْمَاي ذ مَتَّى، ذ يَعْقُوْب مِّيس ن حَلْفَى ذ سِمْعَان لْمُنَاضِل، ذ يَهُوْذَا مِّيس ن يَعْقُوْب.

¹⁴ يِيْنَا كُڒ نْهَار تْمُوْنن مَارَّا س يِجّن ن لْفِكْرَا تْࢲَادْجَان، اَكِذْسن شَان ن ثمْغَارِين ذ مَرْيَم يمَّاس ن عِيْسَى ذ اَيثْمَاس.

¹⁵ ذݣ وُوْسَّان نِّي يكَّر بُطْرُس يبدّ ذِي ڒْوسْط ن ڒْمُوْمِنِين (ذِنِّي شَان مِيَّا أُو عِشْرِين إِذْسن) ينَّا-ٱسن:

¹⁶ "آي اَيثْمَا، تُوْغَا يتْخصَّا اَذ يكمّڒ وَاوَاڒ ن أَرُّوْح يقدّْسن إِي د يُوْسِين خ يِيڒس ن نَّبِي دَاود ذݣ يِجّن ن زْمَان وَامِي يسِّيوڒ خ يَهُوْذَا يعْنِي ونِّي يزنْزن عِيْسَى يسْبيّن-اَسن اَبْرِيذ يُوْوِي يِنِّي إِي ث يطّْفن.

¹⁷ يَهُوْذَا-يَا تُوْغَا يتْوَاحْسَاب زَّايْنغ، يُوْذف اَكِذْنغ ذِي ڒْخذْمث ن أَربِّـي.

¹⁸ س تْمنْيَاث نّس إِݣ يطّف ن لْحَرَام، ئِرُوْح يسْغَا زَّايْسنْت يجّن ن ثْمُوْرْث. ذِنِّي إِي يوْضَا س جّْهذ خ وُوْذم نّس، ئِدُّوْقّز-اَس وعدِّيس منْضَارن-اَس-د مَارَّا وَاذَان نّس.

¹⁹ أَرِّين-اَس-د ڒخْبَار مَارَّا اَيثْبَاب ن لْقُدْس. خ مَانَاينِّي سمَّان-اَس إِ ثْمُوْرْث نِّي س وَاوَاڒ نْسن <حَقل دَمَّا> يعْنِي <ئِيْير ن يذَامّن.>

²⁰ ئِقَّار لْكِتَاب ن زَّبُوْر: أَربِّـي اَذ يخْڒَا ثَدَّارْث ن ونِّي وَار ذَايس يزدّغ حَدّ. ئِقَّار عَاوذ: ڒْخذْمث نّس اَت يطّف يجّن نّغْنِي.

²¹ إِذن، ئِتْخصَّا أَ نخْضَر يجّن ن ورْيَاز زݣ يِنِّي تُوْغَا يدْجَان اَكِذْنغ مَارَّا ڒْوقْث نِّي وَامِي سِيذِيثْنغ عِيْسَى يتَاذف يتفّغ خَانغ.

²² يعْنِي زݣ وَامِي إِي ث يطهَّار يَحْيَى س وَامَان اَڒ وَامِي يتْوَارْفع خَانغ غَار وجنَّا. أَرْيَاز-أَ يتْخصَّا اَكِذْنغ يشْهذ قَا عِيْسَى يكَّر-د زِي ڒْموْث."

²³ كَّرن قدّْمن ثْنَاين ن يِوْذَان: يجّن قَّارن-اَس مَاتْيَاس يجّن قَّارن-اَس يُوْسف. يُوْسف نِّي عَاوذ قَّارن-اَس بَارْسَابَا نِغ يُوْسْتُوْس.

²⁴ تَّارن-اَس إِ أَربِّـي، نَّان-اَس: "آ سِيذِي أَربِّـي قَا شك ثسّْنذ مِين يدْجَان ذݣ وُوْڒَاون ن يِوْذَان مَارَّا. سظْهَار-اَنغ-د ونِّي إِي ثِيخْضَرذ زِي ثْنَاين-أَ.

²⁵ أَكِذْنغ يِيڒِي ذِي ڒْخذْمث-أَ، أَذ يذْوڒ ذ اَرَّسُوْل ذݣ ومْشَان ن يَهُوْذَا ونِّي إِݣ يسمْحن ذِي ڒْخذْمث-أَ يرُوْح غَار ومْشَان نّس اَعفَّان."

²⁶ أُوْشَا ݣِّين لْقُرْعَا، لْقُرْعَا نِّي ثُوْسَا-د ذِي مَاتْيَاس، اَرْنِين-ث-يذ غَار حِيطَاش نّي ن اَرُّسُل.