2 أيث-سلونيك 3 - ثريفيث 2020

¹ أَمَّا ثِمسْڒَايِين نّغْنِي آي أَيثْمَا، تَّارث خَانغ إِ أَربِّـي بَاش اَوَاڒ ن سِيذِيثْنغ اَذ يتنْتَاشَر اَذ يتْوَاسمْغَار مَامّش إِي يوقْعن جَارَاوم.

² تَّارث عَاوذ أَ نفْڒث زݣ يِوْذَان وَار يحْڒِين ذ يعفَّانن مِينْزِي لْإِيمَان وَار يدْجِي شَا ذِي مَارَّا يوْذَان.

³ وَلَكِن سِيذِيثْنغ ذَايس تِّقث، أَكنِّيو يسجْهذ اَكنِّيو يحْضَا زِي شَّرّْ.

⁴ نشِّين قَا متْأَكّدِين ذِي سِيذِي أَربِّـي اَقَا مِينْزِي كنِّيو نْوصَّا قَا تݣّم-ث، أَث تݣّم عَاذ.

⁵ أَذ يسِيْوض سِيذِيثْنغ ؤُڒَاون نْوم غَار ڒمْحِبّث ن أَربِّـي، عَاوذ غَار صّْبَر ن لْمَسِيح.

⁶ فَا آي أَيثْمَا، نتْوصَّا-كنِّيو عْلَاحْسَاب يسم ن سِيذِيثْنغ عِيْسَى لْمَسِيح اَذ تْبعّْذم زِي مْكُڒ ڒْمُوْمن يتْبَاعن فَرْق-شّْغڒ، نتَّا وَار يذفَّار شَا تَّعْلِيم إِي ثْقبْڒم زَّايْنغ.

⁷ كنِّيو س يِيخف نْوم ثسّْنم أُو لَابُد اَذ تبْعم اَبْرِيذ نِّي إِي نݣَّا جَارَاوم. نشِّين وَار نتْبِيع شَا فَرْق-شّْغڒ وَامِي تُوْغَانغ اَكِذْوم.

⁸ وَار نشِّي بُو وغْرُوْم اَك حَدّ بَاطڒ. لَّا، نْخدّم دْجِيڒث ذ نْهَار، نشَّاث تَمَارَا نْربّڒ بَاش وَار نتْبسِّيڒ خ حَدّ زَّايْوم.

⁹ نݣَّا مَانَاينِّي مَاشِي وَار غَارْنغ بُو ڒْحَقّ اَذَانغ ثْعَاوْنم؛ لَّا، نْسظْهَار-اَوم-د اَبْرِيذ إِي غَا ثذْفَارم.

¹⁰ وَاخَّا وَامِي تُوْغَانغ اَكِذْوم نُوْشَا-ٱوم ڒُوْصِيّث-أَ ثَانِيتَا: ونِّي يتَاݣِين اَذ يخْذم وَار يتتّ شَا.

¹¹ لِأَنَّا نتْسْڒَا بلِّي ذِنِّي ڒبْعَاض زَّايْوم تْبَاعن فَرْق-شّْغڒ. وَار خدّْمن شَا شّْغُوْڒَاث نْسن، نِثْنِي تَاذْفن ذِي شّْغُوْڒَاث ن مِيدّن وَاهَا.

¹² ئِوْذَان-أَ نتْوصَّا-ثن نقَّار-اَسن س يِيْسم ن سِيذِيثْنغ عِيْسَى لْمَسِيح اَذ خذْمن س لْمَعْقُوْل اَذ شّن اَغْرُوْم إِي يدْجَان نْسن.

¹³ أَمَّا كنِّيو آي أَيثْمَا، ݣّث ڒْخِير بْڒَا مَا ٱذ تَاحْڒم.

¹⁴ ونِّي وَار يتْطِيعِين شَا إِ وَاوَاڒ نّغ ذِي ثبْرَات-أَ ݣّم-ث ذِي ڒْبَاڒ نْوم، وَار كِذس ݣُوْرم شَا بَاش اَذ يسذْحَا.

¹⁵ وَلَكِن وَار ث تْوَاڒَام شَا اَم ڒَعْذُو نْوم؛ لَّا، نْهَام-ث اَم يِجّن زݣ وُوْمَاثْوم.

لْخِطَام ن ثبْرَات-أَ

¹⁶ سِيذِيثْنغ ن ڒهْنَا اَذَاوم يُوْش يجّن ن ڒهْنَا ذِي اَيَا ڒْوقْث أُو س مَارَّا ثِمسْڒَايِين. أَذ يِيڒِي سِيذِي أَربِّـي اَكِذْوم مَارَّا.

¹⁷ سْڒَام-أَ وَانِيتَا ؤُرِيغ-ث نش س وفُوْس ينُو بُوْلُس، ذ تَانِيتَا ذ لْعَلَامَا ينُو يدْجَان ذِي مَارَّا ثِبْرَاثِين ينُو. أَمُّو إِي تَارِيغ نش.

¹⁸ أَرْضَا ن سِيذِيثْنغ عِيْسَى لْمَسِيح اَكِذْوم يِيڒِي مَارَّا.