2 بطرس 1 - ثريفيث 2020

لْمُقَدِّمَا

¹ نش ذ سِمْعَان بُطْرُس ذ يجّن ن ڒْعَبْذ ن عِيْسَى لْمَسِيح ذ اَرَّسُوْل نّس. تْسكِّيغ-د ثَبْرَات-أَ إِ يِنِّي يقبْڒن نّفْس لْإِيمَان اَم ونِّي إِي نقْبڒ نشِّين س صُّلْح نِّي ن أَربِّـي ذ عِيْسَى لْمَسِيح ونِّي إِي ذَانغ يسنْجَامن.

² أَذَايْوم يمَارْنِي اَرْضَا ذ ڒهْنَا س وَاطَّاس مِينْزِي ثسّْنم أَربِّـي ذ سِيذِيثْنغ عِيْسَى.

مَامّش يدْجَا لْإِيمَان ن ونِّي يذفَّارن أَربِّـي؟

³ أَقَا ثِزمَّار نّس يُوْعْڒَان ثُوْشَا-ٱنغ-د قَاع مِين نحْذَاج عْلَاحْسَاب ثُوْذَارْث ذ طَّاعَا نّغ إِ أَربِّـي. مَانَايَا مِينْزِي نسّن ونِّي ذَانغ د يڒَاغَان غَار لْعَظَمَا نّس ذ ثُوْصُبْحَانْت نّس.

⁴ عْلَاحْسَاب ثِمسْڒَايِين-أَ نتَّا يُوْشَا-ٱنغ-د لْوُعُوْد نّس يمْغَارن إِݣ يسوَّان اَطَّاس. حمَا س لْوُعُوْد-أَ اَذ تْشَرْشم ذِي طَّبِيعَا ن ونِّي يُوْعْڒَان وَامِي ثَروْڒم زِي مِين يفنَّان ذِي دُّنشْت-أَ عْلَاحْسَاب شّهَاوَاث ثِعفَّانِين.

⁵ فَا خ سَّبَاب-أَ وَانِيتَان، ݣّث لْمجْهُوْد نْوم مَارَّا بَاش اَذ تَرْنِيم مِين يدْجَان ذ اَصبْحَان غَار لْإِيمَان نْوم؛ سّنِّي اَرْنِيم ثُوْسْنَا اَك مَانَايَا يدْجَان ذ اَصبْحَان؛

⁶ أُو عَاوذ اَرْنِيم ڒحْكَام خ يِيخف نْوم اَك ثُوْسْنَا-يَا نْوم؛ أَو عَاوذ اَرْنِيم طَّاعَا إِ أَربِّـي اَك ڒحْكَام-أَ خ يِيخف نْوم؛

⁷ أُو عَاوذ اَرْنِيم ڒْخِير جَار وَاوْمَاثن اَك طَّاعَا-يَا نْوم إِ أَربِّـي؛ أُو عَاوذ اَرْنِيم ڒمْحِبّث اَك ڒْخِير-أَ نْوم جَار وَاوْمَاثن.

⁸ شُوْف، كنِّيو مڒَا ذَايْوم ثِمسْڒَايِين-أَ اَذَايْسنْت ثَرنِّيم، أَتَاف اَذَايْوم يِيڒِي نّْفَع اَذ تَارْوم عَاوذ ذِي ثُوْسْنَا ن سِيذِيثْنغ عِيْسَى لْمَسِيح.

⁹ قَا ونِّي ؤُمِي وَار ذِي دْجِينْت شَا ثِمسْڒَايِين-أَ، أَتَاف نتَّا وَار يتْوِيڒِي شَا مْلِيح غَار ڒݣّْوَاج قَا يتْوَاحْسَاب ذ اَذَرْغَاڒ اَتَاف عَاوذ يتتُّو بلِّي أَربِّـي يغْفَر-اَس ڒْمُعْصِيَاث نّس تُوْغَا يݣَّا زِي قْبڒ.

¹⁰ إِذن آي اَيثْمَا، ݣّث لْمجْهُوْد نْوم كْتَار عَاذ بَاش اَذ تْضمْنم اَڒَاغِي نّس غَارْوم بلِّي نتَّا يخْضَر-يكنِّيو. مڒَا ثݣِّيم ثِمسْڒَايِين-أَ، أَتَاف عمَّارْص اَذ د توْضَام.

¹¹ أَتَاف اَذَاوم تْوَاسّوْجذ عَاوذ يجّن ن ثوَّارْث ذ ثَصبْحَانْت غَار ڒْمُلْك نّس وَار يفنِّين شَا ن سِيذِيثْنغ عِيْسَى لْمَسِيح ونِّي إِي ذَانغ يسنْجَامن.

أَرَّسُوْل بُطْرُس يشهّذ خ مِين يࢲْرَا س ثِيطَّاوِين نّس

¹² إِذن فَا، أَكنِّيو سْفكَّرغ ڒبْدَا خ ثْمسْڒَايِين-أَ وَاخَّا ثسّْنم-ثنْت كنِّيو مْلِيح قَا ثْبدّم خ دْسَاس ن لْحَقِيقَا-يَا إِي غَارْوم ڒخُّو.

¹³ نش مڒَا عَاذ قِّيمغ دَّرغ ذِي دَّات ينُو، تْحسَّابغ-ث ذ لْوَاجِب اَكنِّيو سْفكَّرغ خ مَانَايَا.

¹⁴ قَا سّْنغ بلِّي ذغْيَا نش اَذ سمْحغ ذِي دَّات ينُو مِينْزِي اَمُّو إِي تُوْغَا ذَايِي يسفْهم مْلِيح زِي قْبڒ سِيذِيثْنغ عِيْسَى لْمَسِيح.

¹⁵ أُو نش لَابُد اَذ ݣّغ مَارَّا لْمجْهُوْد ينُو بَاش اَذ تْزمَّرم اَذ تْعقْڒم منْبَعْد خ ثْمسْڒَايِين-أَ خْمِي غَا فّْغغ نش زِي دُّنشْت-أَ.

¹⁶ وَا شُوْف، نشِّين تُوْغَا وَار نْذفَّار شَا ثِحُوْجَا نِّي إِي تْوَاݣّنْت س ڒفْطَانث ن بْنَاذم وَامِي إِي كنِّيو نْسفْهَام خ جّْهذ نّس ذ نْهَار نِّي إِي ذِي د غَا يَاس سِيذِيثْنغ عِيْسَى لْمَسِيح؛ لَّا، نشِّين نࢲْرَا س ثِيطَّاوِين نّغ مشْحَاڒ ثمْغَر ثُوْعْڒَات نّس.

¹⁷ ڒَاحقَّاش أَربِّـي بَابَاثْنغ يسمْغَار-يث يُوْشَا-ٱس لْعَظَمَا وَامِي غَارس د تنْطق ثْمِيجَّا نِّي زِي لْعَظَمَا يُوْعْڒَان ثنَّا-ٱنغ: قَا ذ وَانِيتَا ذ مِّي يعِيزّن، نش فَرْحغ زَّايس.

¹⁸ ثْمِيْجَّا-يَا إِي غَارْنغ د ينطْقن زݣ وجنَّا نسْڒَا-يَاس نشِّين س يِيخف نّغ وَامِي تُوْغَا اَكِذس ذِنِّي ندْجَا ذݣ وذْرَار اَمْقدّس.

¹⁹ نشِّين ڒخُّو غَارْنغ اَوَاڒن ن لْأَنْبِيَا تْوَاضمّْنن كْتَار زِي مِين نفْهم قْبڒ. أَذ تݣّم مْلِيح مڒَا تݣّم ذَايْسن اَرَّاي نْوم اَم إِ يِجّن ن نُّوْر يتْشعْشِيعن ذݣ يِجّن ن ثَادْجسْت اَڒ د غَا يصْبح نْهَار نِّي اَذ د يݣَعّذ يِيْثْرِي ن ڒفْجَر ذݣ وُوْڒَاون نْوم.

²⁰ مِينْ يدْجَان مُهِم قَاع يتْخصَّا أُو لَابُد اَذ تْفهْمم بلِّي ؤُڒَا ذ يجّن ن وَاوَاڒ زِي لْأَنْبِيَا إِي يدْجَان ذِي لْكِتَاب، لْأَصل نّس وَار د يكِّي شَا زِي مِين يتْفسَّاڒ بْنَاذم.

²¹ لِأَنَّا اَوَاڒن ن لْأَنْبِيَا تُوْغَا عمَّارْص وَار تفِّيغن شَا زِي لْأَفْكَار نْسن؛ لَّا، نِثْنِي سَّاوَاڒن زِي مِين ذَاسن د يتَاسن زِي أَربِّـي مَامش إِي خَاسن د يهوَّا أَرُّوْح يقدّْسن.