2 يوحنا 1 - ثريفيث 2020

لْمُقَدِّمَا

¹ نش ذ اَمْغَار، تَارِيغ ثَبْرَات-أَ إِ ثمْغَارْث يتْوَاخْضَرن ذ ثَارْوَا نّس إِي تخْسغ ذِي لْحَقِيقَا. مَاشِي ذ نش وَاهَا إِي ثن يتخْسن؛ لَّا، تخْسن-ثن قَاع يِنِّي يسّْنن لْحَقِيقَا.

² مَانَايَا عْلَاحْسَاب لْحَقِيقَا إِݣ يزدّْغن ذَايْنغ اَذ تِيڒِي اَكِذْنغ إِ ڒبْدَا.

³ عْلَاحْسَاب لْحَقِيقَا ذ ڒمْحِبّث اَكِذْنغ يِيڒِي اَرْضَا ذ اَرَّاحْمث ذ ڒهْنَا زِي أَربِّـي بَابَاثْنغ ذ عِيْسَى لْمَسِيح ونِّي يدْجَان ذ مِّيس ن بَابَاثْنغ.

لْحَقِيقَا ذ ڒمْحِبّث

⁴ نش فَرْحغ اَطَّاس وَامِي ؤُفِيغ زِي ثَارْوَا نّمْ يِنِّي يݣُّوْرن ذݣ ؤُبْرِيذ ن لْحَقِيقَا اَم مَامّش ذَانغ يوصَّا بَابَاثْنغ.

⁵ آ ثَمْغَارْث يتْوَاعِيزّن، ڒخُّو تتَّارغ زَّايم أَ نْتخْس اَيَاوْيَا. وَار ذَام د تَارِيغ بُو شَان ن ڒُوْصِيّث ذ جْذِيذ؛ لَّا، نتَّاث ذ ثنِّي تُوْغَا غَارْنغ زݣ ومزْوَارُو.

⁶ إِيوَا اَمُّو إِي ثدْجَا ڒمْحِبّث يعْنِي أَ نݣُّوْر عْلَاحْسَاب ڒُوْصِيَاث نّس. ڒُوْصِيّث-أَ نتَّاث ذ ثنِّي تُوْغَا ثسْڒِيم زݣ ومزْوَارُو. وَا اَمُّو يتْخصَّا اَذَايس ثݣُّوْرم.

⁷ أَقَا اَطَّاس ن يثَرَّاسن نِثْنِي ذ يغدَّارن فّْغن-د غَار دُّنشْت-أَ، نكَّرن بلِّي عِيْسَى لْمَسِيح يمظْهَار-د س دَّات ن بْنَاذم. أَثَرَّاس-أَ إِي يدْجَان اَمُّو نتَّا ذ اَغدَّار وَاهَا ذ دّجَّال إِي يدْجَا.

⁸ حْضَام يخف نْوم حمَا اَذ تْربْحم لْجَائِزَا نْوم ثكْمَاڒ مَاشِي اَذ تخْسَرم مِينْخف نْخدّم.

⁹ ونِّي يرُوْحن غَار ڒݣّْوَاج وَار يقِّيم شَا ذِي تَّعْلِيم ن لْمَسِيح اَتَاف وَار غَارس شَا أَربِّـي. ونِّي يقِّيمن ذِي تَّعْلِيم-أَ اَغَارس يِيڒِي بَابَاثْنغ اَك مِّيس.

¹⁰ ونِّي إِي غَارْوم د يتَاسن وَار د يتِيوِي اَكِذس تَّعْلِيم-أَ، ئِتْخصَّا-كنِّيو وَار ث ثْسِيذِيفم شَا غَار ثُوْذْرِين نْوم وَار ذَاس ثقَّارم شَا حتَّا ؤُڒَا ذ أَزُوْل.

¹¹ ڒَاحقَّاش ونِّي إِي ذَاس غَا ينِين ؤُڒَا ذ أَزُوْل اَتَاف يشَرّش اَكِذس ذِي ڒفْعَايڒ نّس ثِعفَّانِين.

لْخِتَام ن ثبْرَات-أَ

¹² عَاذ غَارِي اَطَّاس إِي خْسغ اَذَاوم ثِيذ اَرِيغ إِ كنِّيو وَلَكِن اَذ يِيڒِي حْسن مڒَا وَار سْتعْمِيڒغ شَا ذِي ثِوْڒِيقِين ذ سّْمخ. لَّا، تْمنِّييغ اَغَارْوم د اَسغ اَكِذْوم سِّيوْڒغ اَغمْبُوْب ذݣ وغمْبُوْب بَاش ڒفْرَاحث نّغ اَذ تجَّاون.

¹³ تْسَاوَّاضن-اَوم-د سْڒَام ثَارْوَا ن وُوْتْشْمَام يتْوَاخْضَرن.