22 أيث-كورينث 9 - ثريفيث 2020

^1-2 أَمَّا صَّذَاقَا إِ صَّالِحِين بْڒَا مَا ذَاوم د اَرِيغ، قَا نش سّْنغ ثْرزُّوْم اَذ تْعَاوْنم ذغْيَا. تفْتَخَرغ نش س مَانَايَا غَار أَيث-مَاسِدُوْنْيَا، قَّارغ-اَسن قَا زݣ وَازذْغَاث كنِّيو ذِي لْإِقْلِيم ن وخَايَا ثْسوْجَاذم-د بَاش اَذ تْصدّْقم. ڒْخَاضَر-أَ نْوم يتْشجَّاع اَزين-اَمقّْرَان اَذ صدّْقن.

³ أُو سّكّغ-د غَارْوم أَيثْمَاثْنغ تِيتُوْس ذ ثْنَاين-أَ نّغْنِي بَاش لْإِفْتِخَر نّغ ذَايْوم وَار يتِيڒِي شَا ذ ڒْبَاطڒ وَاهَا، أَتَاف اَذ تِيڒِيم ثْسوْجَاذم مَامّش تُوْغَا ذَاسن نِّيغ نش.

⁴ منْبَعْد مڒَا ؤُسِين-د اَكِذِي ڒبْعَاض زِي أَيث-مَاسِدُوْنْيَا ؤُفِين-كنِّيو وَار ثسْوجْذم شَا اَتَاف نشِّين أَ نْسذْحَا خ تِّقث نّغ ذَايْوم (ؤُڒَا ذ كنِّيو اَذ تْسذْحَام).

⁵ س مَانَايَا ؤُفِيغ أُو لَابُد اَذ شجّْعغ أَيثْمَاثْنغ يِيْنَا إِي ذَايِي د يزْوَارن غَارْوم زِيش بَاش اَذ عذْڒن مَارَّا خ صَّذَاقَا-يَا ثَمقّْرَانْت إِي زِي ذَايِي ثْعَاهْذم زِي قْبڒ. أَمُّو اَذ تِيڒِي صَّذَاقَا-يَا مُوْجُوْدَا س وُوْڒَاون نْوم مَاشِي س بسِّيف.

صَّذَاقَا تَاس-د س ڒفْرَاحث

⁶ فكَّرث، ونِّي غَا يزرْعن ذْرُوْس اَذ يمْجَار ذْرُوْس. ونِّي غَا يزرْعن اَطَّاس اَذ يمْجَار اَطَّاس.

⁷ كُڒ يجّن يتْخصَّا-يَاس اَذ يصدّق س مِين ينْوَا ذݣ وُوْڒ نّس مَاشِي س وخيَّاق نِغ س بسِّيف، مِينْزِي أَربِّـي يتخْس ونِّي يتْصدَّاقن س ڒفْرَاحث.

⁸ أَربِّـي نتَّا يزمَّر اَكنِّيو يسْفيّض س لْبَرَاكَا بَاش اَتَاف ڒبْدَا اَغَارْوم يِيڒِي مِين تحْذَاجَام مَارَّا ثُمَّا اَذ تَرْنِيم اَطَّاس ذِي مَارَّا ڒْخذْمث ثَصبْحَانْت.

⁹ مَامّش يقَّار لْكِتَاب: <نتَّا يفرّق اَطَّاس أُوْشَا يُوْشَا-اَسن إِ يپُـوْبْرِيثن، ڒْحَقّ إِݣ يتݣّ نتَّا يتْدُوْمَا إِ ڒبْدَا.>

¹⁰ ونِّي إِݣ يفرّْقن زَّرِّيعث إِ وفدْجَاح نِّي إِݣ يزرّْعن ئِتِيشّ-اَس عَاوذ ؤُڒَا ذ اَغْرُوْم إِي غَا يشّ، أَتَاف نتَّا عَاوذ اَذَاوم يَرْنِي ذِي زَّرِّيعث نِّي إِي ثْزرّْعم اَذ يسمْغَار مِين ثْمجَّارم زِي صَّذَاقَا-يَا نْوم.

¹¹ أَغَارْوم يِيڒِي ڒْخِير اَطَّاس ذِي مَارَّا بَاش اَتَاف اَذ تِيڒِيم صَاخِيِين. أُو خْمِي غَا نسِّيوض صَّذَاقَا-يَا نْوم اَذ تذْوڒ ذ يجّن ن شُّكر إِ أَربِّـي.

¹² لِأَنَّا صَّذَاقَا-يَا إِي تݣّم مَاشِي غِير تْعمَّر زَّايس يفَاسّن يخْوَان ن ڒْمُوْمِنِين صَّالِحِين ذِي لْقُدْس؛ لَّا، نتَّاث عَاوذ ئِتنْفيَّاض زَّايس اَطَّاس ن شُّكر إِ أَربِّـي.

¹³ صَّذَاقَا-يَا ثُوْشَا دَّلِيل خَاوم، زَّايس إِي غَا حمْذن صَّالِحِين أَربِّـي. ثُوْمْنم س لْإِنْجِيل ن لْمَسِيح، ثْطَاعم-اَس خْمِي تْصدَّاقم اَطَّاس خَاسن أُو خ مَارَّا يوْذَان.

¹⁴ رزُّوْن خَاوم تْࢲَادْجَان خَاوم عْلَاحْسَاب اَرْضَا نِّي اَمقّْرَان إِي ذَاوم يُوْشَا أَربِّـي.

¹⁵ أَ نحْمذ أَربِّـي خ لْهَدِيَا نِّي نّس، وَار نْزمَّر اَت نوْصف.