22 أيث-كورينث 7 - ثريفيث 2020

¹ إِذن آي يمْعِيزّن ينُو، وَامِي ذَانغ يعَاهذ أَربِّـي خ ثْمسْڒَايِين-أَ لَابُد أَ نسِّيصْفَا يخف نّغ زِي مَارَّا مِين ذَانغ يسخْنِيزن ذِي دَّات ذ اَرُّوْح حمَا أَ نِيڒِي ذ صَّالِحِين بْڒَا اَخطِّي س ثِيݣّْوْذِي ن أَربِّـي.

أَرَّسُوْل بُلُوس ثسْفَرّح-يث جْمَاعث ن ڒْمُوْمِنِين ن أَيث-كُوْرِينْث

² اَرزْمم-اَنغ كنِّيو يمُوْشَانْ ذݣ وُوْڒَاون نْوم. ؤُڒَا ذ يجّن وَار ث نضْڒِيم شَا، وَار ث نسْعوّج شَا، وَار ث نْغشّ شَا.

³ وَار قَّارغ شَا مَانَايَا بَاش اَكنِّيو عيّْبغ لَّا. ڒَاحقَّاش نِّيغ-اَوم قْبڒ قَا كنِّيو ذݣ وُوْڒَاون نّغ، أَ نمّث نِغ أَ ندَّر اَكِذْوم.

⁴ نش تݣّغ اَكِذْوم زْعَامث اَطَّاس، لْإِفْتِخَر إِي غَارِي ذَايْوم يمْغَر. تْوَاشجّْعغ اَطَّاس، ڒفْرَاحث ينُو تمْفيَّاض-د خ مَارَّا ڒمْحَاين نّغ.

⁵ شُوْف، نشِّين وَامِي د نُوْذف غَار لْإِقْلِيم ن مَاسِدُوْنْيَا دَّات نّغ وَار ثْرِيّح شَا، نتْوَازيَّار زِي مْكُڒ جِّهث اَمنْغِي غَار بَارَّا ذ ثِيݣّْوْذِي غَار ذَاخڒ.

⁶ وَلَكِن أَربِّـي، يعْنِى ونِّي يتْعَاوَانن يِنِّي يتْخيَّاقن يعَاون-اَنغ س ومَاثْنغ تِيتُوْس وَامِي د يُوْسَا.

⁷ أُو مَاشِي غِير وَامِي د يُوْسَا تِيتُوْس، يعَاون-اَنغ أَربِّـي عَاوذ وَامِي تُوْغَا ذَايس تْهِلَّام. ئِخْبَر-اَنغ تِيتُوْس قَا ثْوحّْشم-اَيِي، قَا ثْندْمم ثْرزُّوْم خَافِي اَطَّاس. أَمنِّي ڒفْرَاحث ينُو ثرْنِي كْتَار.

⁸ إِيوَا وَامِي كنِّيو سْخيّْقغ س ثبْرَات نِّي ينُو نّغْنِي، ذ اَمزْوَارُو تُوْغَا ندْمغ ڒخُّو وَار نْدِيمغ شَا. يعْنِى ندْمغ وَامِي ࢲْرِيغ ثَبْرَات نِّي ينُو ثسْخيّق-يكنِّيو ذݣ يِجّن ن ڒْوقْث وَلَكِن ثعْذُو ذغْيَا.

⁹ ڒخُّو نش فَرّْحغ. مَاشِي وَامِي ثْخيّْقم؛ لَّا، وَامِي ثْخيّْقم بَاش اَذ تْتُوْبم. ثْخيّْقم يعْنِي يجّن ن وخِيّق زِي أَربِّـي، أَمنِّي وَار كنِّيو ثڒْقِيف ؤُڒَا ذ يجّن ن ثْخسَّارْث زَّايْنغ.

¹⁰ شُوْف، أَخِيّق زِي أَربِّـي يتَارو-د تُّوْبَا، تُّوْبَا-يَا ثْندّه-يكنِّيو اَذ تْنجْمم وَار تجِّي بُو نْدَامث. أَخِيّق زِي دُّنشْت-أَ لَّا، يتَارو-د ڒْموْث.

¹¹ فكَّارث كنِّيو ذِي مِين ذَايْوم د يتَارو وخِيّق-أَ زِي أَربِّـي. يعْنِي مشْحَاڒ تْحَوَاڒم س وُوْڒ ثْرزُّوْم اَذ تْحلّم مَانَايَا ذغْيَا. يعْنِي مشْحَاڒ ثْندْمم مشْحَاڒ ثنْخڒْعم، ذَايْوم يجّن ن مزْڒِي ذ ثِيݣّْوْذِي. يعْنِي مشْحَاڒ ثسْوجْذم اَذ تْحكْمم نِيشَان. مِين مَا يدْجَان ذِي ثْمسْڒَايْث-أَ كنِّيو وَار ذَايْوم بُو ڒْعِيب.

¹² نش ؤُرِيغ-اَوم-د ثَبْرَات نِّي، مَايمِّي؟ مَا عْلَاحْسَاب ونِّي يضڒْمن نِغ ذ ونِّي يتْوَاضڒْمن؟ لَّا، ؤُرِيغ-اَوم-ت-يد بَاش اَكنِّيو سْفهْمغ زَّاث إِ أَربِّـي مشْحَاڒ إِي ذَانغ تݣّم اَرَّاي س وُوْڒ.

¹³ س مَارَّا مَانَايَا نتْوَاعَاون. مَاشِي نتْوَاعَاون نشِّين أُو صَافِي؛ لَّا، عَاوذ نْفَرح اَطَّاس وَامِي نࢲْرَا مشْحَاڒ يفَرح تِيتُوْس أَرُّوْح نّس ثسْريّْحم-ث كنِّيو مَارَّا.

¹⁴ وَامِي زَّايْوم فْتَخَرغ غَار تِيْتُوْس وَار يدْجِي مَايمِّي غَا سذْحِيغ ڒخُّو. ڒَاحقَّاش مَامّش نسِّيوڒ اَكِذْوم نِيشَان ذِي مَارَّا، ؤُڒَا ذ لْإِفْتِخَر نّغ خَاوم غَار تِيتُوْس قَا يفّغ-د نِيشَان.

¹⁵ نتَّا اَقَا ثقِّيمم-اَس ذݣ وُوْڒ أُو كْتَار عَاذ خْمِي يتْفكَّار ذِي اَرَّاي إِي ذَاس ثݣِّيم، يعْنِي ثْقبْڒم-ث س يِجّن ن ثِيݣّْوْذِي ترْجِيجِيم.

¹⁶ فَرّْحغ وَامِي زمَّرغ اَخَاوم تْعوَّاڒغ ذِي مِين ذِي مَا.