22 أيث-كورينث 6 - ثريفيث 2020

¹ فَا نشِّين إِݣ يخدّْمن اَك أَربِّـي نْتتَّار إِ كنِّيو نقَّار-اَوم: مَاشِي اَذ تْقبّْڒم اَرْضَا ن أَربِّـي وَار زَّايس ثْخدّْمم شَا.

² أَقَا نتَّا يقَّار: <وَامِي إِي خَافِي ثَارْضَا ڒْوقْث سْڒِيغ-اَش، نْهَار نِّي ن وفكِّي عَاوْنغ-ش.> هَاقَاش، ڒخُّو ذ ڒْوقْث إِݣ يَارْضَان خ أَربِّـي. هَاقَاش، ڒخُّو ذ نْهَار إِݣ يسنْجَامن.

³ وَار نسْرُوْسِي وَالُو ذݣ وبْرِيذ إِ حَدّ بَاش اَث نغْضڒ حمَا وَار تِيفن بُو ڒْعِيب ذِي ڒْخذْمث نّغ.

⁴ إِنَّمَا، نشِّين نتْقدَّام-اَوم يخف نّغ س مَارَّا مِينْزِي نشِّين ذ يخدَّامن ن أَربِّـي: يعْنِي نْصبَّر اَطَّاس؛ تكّنْت خَانغ ڒمْحَاين ذ تَمَارَا ذ وزِيَّار؛

⁵ نشِّين تْمَرَّاثن-اَنغ، تْحبَّاسن-اَنغ، تݣّن-اَنغ ڒْفَوْضَا؛ نشِّين نشَّاث تَمَارَا، نقِّيم ذِي دْجِيَاڒِي بْڒَا يضص، ندْجُوْز.

⁶ نتْقدَّام-اَوم يخف نّغ س صّْفَا إِي غَارْنغ ذ ڒفْهَامث ذ تَّسِيع ن ڒْخَاضَر ذ ڒْخِير ذ أَرُّوْح يقدّْسن ذ يجّن ن ڒمْحِبّث بْڒَا نِّفَاق؛

⁷ س وَاوَاڒ ن لْحَقِيقَا ذ جّْهذ ن أَربِّـي ذ ڒسْنَاح ن ڒْحَقّ إِݣ يدْجَان ذݣ وفُوْسِي ذ وࢲرْمَاض.

⁸ نتْقدَّام-اَوم يخف نّغ لِأَنَّا يوْذَان تْوقَّرن-اَنغ سْبهْدَاڒن-اَنغ؛ قَّارن ذَايْنغ ڒْبَاطڒ سمْغَارن-اَنغ؛ تَارَّان-اَنغ ذ يغشَّاشن وَلَكِن نشِّين وَار ذَاينغ بُو يخَرِّيقن؛

⁹ نكَّرن-اَنغ وَلَكِن نشِّين نتْوَاسّن مْلِيح؛ نتْمتَّا وَلَكِن نشِّين نْتدَّر؛ تْعَاقَابن-اَنغ وَلَكِن نشِّين وَار ذَانغ نقّن شَا؛

¹⁰ نشِّين نتْوَازيَّار وَلَكِن ڒبْدَا نفَرّح؛ نشِّين ذ يپُـوْبْرِيثن نْسرْبَاح اَطَّاس ن يِوْذَان؛ وَار غَارْنغ وَالُو وَلَكِن غَارْنغ كُڒْشِي.

¹¹ آي أَيث-كُوْرِينْث، نسِّيوڒ اَكِذْوم س مَارَّا صَّرَاحَا، ؤُڒَاون نّغ نُّوْرْزْمن اَطَّاس إِ كنِّيو.

¹² ڒمْحِبّث نّغ وَار خَاوم ت نْتغْلِيق شَا نشِّين، ذ كنِّيو إِي خَانغ ت يتغْلَاقن.

¹³ سَّاوَاڒغ اَكِذْوم اَم ثَارْوَا ينُو. إِيوَا جّث وَاخَّا ذ ؤُڒَاون نْوم اَذ نُّوْرْزْمن اَطَّاس اَم نشِّين.

وَار شَرّْشم شَا اَك يِنِّي وَار يُوْمِينن شَا

¹⁴ وَار تݣّث خَاوم ثْزَايْڒُوْت اَك يِنِّي وَار يُوْمِينن شَا، وَار تِيڒِيث شَا ذ ثِيُوْيَا اَكِذْسن. مَا ذِنِّي شَا ن ڒْحَاجث إِݣ يشَرّش ڒْحَقّ اَك ڒْبَاطڒ؟ لَّا. مِين يشَرّش نُّوْر اَك ثَادْجسْت؟ وَالُو.

¹⁵ مَا ذِنِّي شَا ن ڒْحَاجث كِيف-كِيف جَار لْمَسِيح ذ إِبْڒِيس؟ لَّا. مَا ذِنِّي شَا ن ڒْحَاجث ثشَرّش جَار ڒْمُوْمن ذ ونِّي وَار يُوْمِينن شَا؟ وَالُو.

¹⁶ مِين ثْشَرّش ثمْزِيذَا ثَمقّْرَانْت ن أَربِّـي اَك لْأَصْنَام؟ وَالُو. شُوْف، نشِّين إِي يدْجَان ذ ثَمْزِيذَا ن أَربِّـي يدَّرن. أَمنِّي يقَّار أَربِّـي: <نش اَذ زذْغغ اَكِذْسن اَذ ؤُيُوْرغ جَارَاسن، أَذ يڒِيغ ذ أَربِّـي نْسن، نِثْنِي اَذ يڒِين ذ شَّعْب ينُو.

¹⁷ خ مَانَايَا يقَّار سِيذِي أَربِّـي: فّْغم-د زِي ڒْوسْط نْسن عزْڒث يخف نْوم، وَار تْحَاذَاث شَا مِين يدْجَان حَرَام. أُوْشَا نش اَكنِّيو قبْڒغ،

¹⁸ أَذ يڒِيغ ذ بَابَاثْوم، كنِّيو اَذ تِيڒِيم ذ ثَارْوَا ينُو ذ يِيسِّي ينُو. أَمنِّي يقَّار أَربِّـي يزمَّرن إِ كُڒْشِي.>